Happy Birthday: ಸ್ಯಾಂಡಲ್‌ವುಡ್‌ನ ಪ್ರತಿಭಾನ್ವಿತ ನಟ ರಂಗಾಯಣ ರಘು ಕುರಿತ ಇಂಟರೆಸ್ಟಿಂಗ್ ವಿಷಯಗಳು ಇಲ್ಲಿವೆ.

ರಂಗಾಯಣ ರಘು ಎಂದೇ ಖ್ಯಾತಿ ಪಡೆದಿರುವ ಕೊಟ್ಟೂರು ಚಿಕ್ಕರಂಗಪ್ಪ ರಘುನಾಥ್ ಅವರು  ತುಮಕೂರು ಜಿಲ್ಲೆಯ ಪಾವಗಡ ತಾಲೂಕಿನ ಕೊಟ್ಟೂರಿನಲ್ಲಿ 1965ರಲ್ಲಿ ಜನಸಿದರು.  ತಂದೆ ಚಿಕ್ಕರಂಗಪ್ಪ ಹಾಗೂ ತಾಯಿ ವೀರಮ್ಮ. ಇವರು ಒಂದುವರೆ ವರ್ಷದವರಿದ್ದಾಗಲೇ  ತಾಯಿ ತೀರಿಕೊಂಡರು. 

ನಾಲ್ಕನೇ ತರಗತಿವರೆಗೆ ಊರಲ್ಲೇ ಓದಿದ ರಂಗಾಯಣ ರಘು, ನಂತರ ಬೆಂಗಳೂರಿಗೆ ಬಂದರು. 8ನೇ ಕ್ಲಾಸ್‌ನಿಂದಲೇ ನಾಟಕದ ಬಗ್ಗೆ ಅಪಾರ ಆಸಕ್ತಿ ಹೊಂದಿದ್ದ ಇವರು, 10ನೇ ತರಗತಿ ಪಾಸ್ ಆಗದೇ ಮತ್ತೆ ಊರಿಗೆ ಹೋದರು. 

ಎಸ್‌ಎಸ್ಎಲ್ಎಸಿಯಲ್ಲಿ ಫೇಲ್ ಆಗಿ ಪಾವಗಡ ತಾಲೂಕಿನ ಕೊಟ್ಟೂರಿಗೆ ಮರಳಿದ ಇವರು, ಕೆಲಕಾಲ ಊರಿನಲ್ಲಿ ಕುರಿ ಮೇಯಿಸಿಕೊಂಡು ಇದ್ದರು. ನಂತರ ಮತ್ತೆ ಬೆಂಗಳೂರಿಗೆ ಬಂದು ನ್ಯಾಷನಲ್ ಕಾಲೇಜು ಸೇರಿದರು.

1988ರಲ್ಲಿ ಮೈಸೂರಿನ ರಂಗಸಂಸ್ಥೆ `ರಂಗಾಯಣ' ಸೇರಿದರು. ಇಲ್ಲಿ ಇವರಿಗೆ ಪ್ರತಿ ತಿಂಗಳು 800 ರೂಪಾಯಿ ಸಂಬಳ ದೊರೆಯುತ್ತಿತ್ತು. 1995ರಲ್ಲಿ ಹಂಸಲೇಖ ನಿರ್ದೇಶನದ `ಸುಗ್ಗಿ' ಚಿತ್ರದಲ್ಲೊಂದು ಪಾತ್ರ ಮಾಡಿದರು. ಆದರೆ ಈ ಚಿತ್ರ ತೆರೆಕಾಣಲಿಲ್ಲ. ನಂತರ 2002 ರಲ್ಲಿ ಎಂ.ಎಸ್.ರಮೇಶ್ ನಿರ್ದೇಶನದ ಕಿಚ್ಚ ಸುದೀಪ್ ಅಭಿನಯದ `ಧಮ್' ಚಿತ್ರದಲ್ಲಿ ನಟಿಸಿದರು. ಈ ಚಿತ್ರದ ನಂತರ ಹಲವಾರು ಚಿತ್ರಗಳಲ್ಲಿ ಸಣ್ಣ-ಪುಟ್ಟ ಪಾತ್ರಗಳನ್ನು ಮತ್ತು ಕೆಲವು ಚಿತ್ರಗಳಲ್ಲಿ ಖಳನಾಯಕರಾಗಿ ನಟಿಸಿದರು.

2007ರಲ್ಲಿ ತೆರೆಕಂಡ ಸೂರಿ ನಿರ್ದೇಶನದ `ದುನಿಯಾ' ಸಿನಿಮಾ ರಂಗಾಯಣ ರಘು ಅವರ ಸಿನಿಬದುಕಿಗೆ ದೊಡ್ಡ ಬ್ರೇಕ್ ನೀಡಿತು. ಈ ಚಿತ್ರದಲ್ಲಿ ತಮ್ಮ ಗಂಭೀರ ಪಾತ್ರಗಳಿಂದ ಹೊರಬಂದು ಸಂಪೂರ್ಣ ಹಾಸ್ಯ ಪಾತ್ರ ಮಾಡಿದರು. ಬಳಿಕ ಹಲವಾರು ಸಿನಿಮಾಗಳಲ್ಲಿ ಭಿನ್ನ- ಭಿನ್ನ ಪಾತ್ರಗಳ ಮೂಲಕ ಪ್ರೇಕ್ಷಕರನ್ನು ರಂಜಿಸಿದರು.  

ರಂಗಾಯಣ ರಘು ಅವರಿಗೆ ದುನಿಯಾ ಮತ್ತು ಮಣಿ ಸಿನಿಮಾಗಳ ನಟನೆಗಾಗಿ ಕರ್ನಾಟಕ ರಾಜ್ಯ ಫಿಲ್ಮ್ ಪ್ರಶಸ್ತಿ, ರಾಮ್, ಒಲವೇ ಮಂದಾರ ಮತ್ತು ಜಯಮ್ಮನ ಮಗ ಚಿತ್ರದ ನಟನೆಗಾಗಿ ಸೌತ್ ಫಿಲ್ಮ್ ಫೇರ್ ಪ್ರಶಸ್ತಿ, ಸಂಜು ವೆಡ್ಸ್ ಗೀತಾ ಸಿನಿಮಾದಲ್ಲಿ ನೆಗೆಟಿವ್ ಪಾತ್ರಕ್ಕಾಗಿ ದಕ್ಷಿಣ ಭಾರತ ಅಂತರಾಷ್ಟ್ರೀಯ ಫಿಲ್ಮ್ ಪ್ರಶಸ್ತಿ,  ರೋಮಿಯೊಗೆ ದಕ್ಷಿಣ ಭಾರತ ಅಂತರಾಷ್ಟ್ರೀಯ ಫಿಲ್ಮ್ ಪ್ರಶಸ್ತಿ, ಶಿವ ಚಿತ್ರದ ನಟನೆಗಾಗಿ ಅತ್ಯುತ್ತಮ ಹಾಸ್ಯ 'ದಕ್ಷಿಣ ಭಾರತ ಅಂತರಾಷ್ಟ್ರೀಯ ಫಿಲ್ಮ್ ಪ್ರಶಸ್ತಿ',  ಉದಯ ಫಿಲ್ಮ್ ಪ್ರಶಸ್ತಿ, ಸುವರ್ಣ ಫಿಲ್ಮ್ ಪ್ರಶಸ್ತಿ ಸೇರಿದಂತೆ ಹಲವಾರು ಪ್ರಶಸ್ತಿಗಳು ಲಭಿಸಿವೆ.