Vadhu Serial:ವಧು ಸೀರಿಯಲ್ ನಾಯಕ ಸಾರ್ಥಕ್ ಕುರಿತ ಇಂಟರೆಸ್ಟಿಂಗ್ ವಿಷಯಗಳಿವು!

ವಧು ಧಾರಾವಾಹಿಯಲ್ಲಿ ಹೀರೋ ಸಾರ್ಥಕ್ ಪಾತ್ರ ನಿರ್ವಹಿಸುತ್ತಿರುವ ನಟನ ಹೆಸರು ಅಭಿಷೇಕ್ ಶ್ರೀಕಾಂತ್. ಬೆಂಗಳೂರಿನಲ್ಲಿಯೇ ಹುಟ್ಟಿ ಬೆಳೆದ ಇವರು, ಪ್ರತಿಷ್ಠಿತ ಬಿಷಪ್ ಕಾಟನ್ ಬಾಯ್ಸ್ ಸ್ಕೂಲ್‌ನಲ್ಲಿ ವಿದ್ಯಾಭ್ಯಾಸ ಮಾಡಿದ್ದಾರೆ. ನಂತರ ಪಿಇಎಸ್ ಯೂನಿವರ್ಸಿಟಿಯಲ್ಲಿ ಇಂಜಿನಿಯರಿಂಗ್ ಮಾಡಿದ್ದಾರೆ.

ಅಭಿಷೇಕ್ ಶ್ರೀಕಾಂತ್ ಬಣ್ಣದ ಲೋಕಕ್ಕೆ ಕಾಲಿಡಬೇಕು ಎಂದುಕೊಂಡಾಗ, ಮೊದಲು ತರಬೇತಿ ಪಡೆಯುವ ನಿರ್ಧಾರ ಮಾಡಿದರು. ಅದರಂತೆ ಕನ್ನಡದ ನಟಿ ಉಷಾ ಭಂಡಾರಿ ಅವರ ಬಳಿ ನಟನಾ ಕೋರ್ಸನ್ನು ಪೂರ್ಣಗೊಳಿಸಿದ ಅಭಿಷೇಕ್, ಅದರ ಆಗು-ಹೋಗುಗಳನ್ನು ಹಂತ ಹಂತವಾಗಿ ತಿಳಿದುಕೊಂಡರು.

ಅಭಿಷೇಕ್ ಕುಟುಂಬದಲ್ಲಿ ಯಾರು ಕಲಾವಿದರಿಲ್ಲ. ಆದರೆ, ಇವರಿಗೆ ನಟನೆ ಮೇಲೆ ಸಿಕ್ಕಾಪಟ್ಟೆ ಆಸಕ್ತಿಯಿತ್ತು. ಹೀಗಾಗಿಯೇ ೭೦ ರಿಂದ ೮೦ ಆಡಿಷನ್ ಕೊಟ್ಟಿದ್ದರಂತೆ.  ಇವರು ಮೊದಲ ಬಾರಿ ತೆರೆಮೇಲೆ ಕಾಣಿಸಿಕೊಂಡಿದ್ದು ಕಲರ್ಸ್ ಕನ್ನಡ ವಾಹಿನಿಯ ಶಾಂತಂ ಪಾಪಂ ಧಾರಾವಾಹಿಯಲ್ಲಿ. ಬಳಿಕ ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾದ ಯಜಮಾನಿ ಸೀರಿಯಲ್‌ನಲ್ಲಿ ನಟಿಸಿದರು.

ವಸಿಷ್ಠ ಸಿಂಹ ನಟನೆಯ ತಲ್ವಾರ್ ಪೇಟೆ ಸಿನಿಮಾ ಮೂಲಕ ಕನ್ನಡ ಚಿತ್ರರಂಗಕ್ಕೂ ಕಾಲಿಟ್ಟ ಅಭಿಷೇಕ್, ಮುಂದೆ ಕೆಟಿಎಂ ಹಾಗೂ ಡಾಲಿಯವರ ಕೋಟೆ ಸಿನಿಮಾಗಳಲ್ಲಿ ನಟಿಸಿದರು. ಫಿಟ್ನೆಸ್‌ಗೆ ಹೆಚ್ಚು ಮಹತ್ವ ನೀಡುವ ಇರಿಗೆ ಬೈಕ್‌ಗಳೆಂದರೆ ಪಂಚಪ್ರಾಣ. ಆಗಾಗ ಸೋಲೋ ಟ್ರಿಪ್ ಮಾಡುತ್ತಿರುತ್ತಾರೆ. ಅಭಿಷೇಕ್ ಶ್ರೀಕಾಂತ್‌ಗೆ ಡ್ಯಾನ್ಸ್ ಅಂದರೆ ಸಿಕ್ಕಾಪಟ್ಟೆ ಪ್ರೀತಿ. ಸಮಯ ಸಿಕ್ಕಾಗೆಲ್ಲಾ ಡ್ಯಾನ್ಸ್ ಕ್ಲಾಸ್ ಅಟೆಂಡ್ ಮಾಡುವ ಇವರು, ಸೂಪರ್ ಡ್ಯಾನ್ಸರ್ ಕೂಡ ಹೌದು.

ಈ ಹಿಂದೆ ಕಲರ್ಸ್ ವಾಹಿನಿಯಲ್ಲಿ ಪ್ರಸಾರವಾಗಿದ್ದ ಲಕ್ಷಣ ಸೀರಿಯಲ್‌ನಲ್ಲಿ ಅಭಿಷೇಕ್ 'ಮೌರ್ಯ' ಎಂಬ ಪಾತ್ರ ಮಾಡಿದ್ದರು. ಈ ರೋಲ್ ಆರಂಭದಲ್ಲಿ ನೆಗೆಟಿವ್ ಆಗಿದ್ದರೂ, ಸಮಯ ಕಳೆದಂತೆ ಪಾಸಿಟಿವ್ ಆಗಿ ಬದಲಾಗಿತ್ತು. ಈ ಮೂಲಕ ಒಂದೇ ಸೀರಿಯಲ್‌ನಲ್ಲಿ ಎರಡು ರೀತಿಯ ಪಾತ್ರದ ಮೂಲಕ ಗಮನ ಸೆಳೆದಿದ್ದರು. ಇದೀಗ ಸಾರ್ಥಕ್ ಆಗಿ ಮೋಡಿ ಮಾಡುತ್ತಿದ್ದಾರೆ.