ಟಾಪ್ 2 ಆಯ್ಕೆಯಲ್ಲಿ ಪರಸ್ಪರ ಬಿಟ್ಟು ಕೊಡದ ಕಾರ್ತಿಕ್-ವಿನಯ್: ಫ್ರೆಂಡ್‌ಶಿಪ್ ಅಂದ್ರೆ ಇದು ಎಂದ ವೀಕ್ಷಕರು

ಈ ವಾರದ ನಾಮಿನೇಷನ್ ಪ್ರಕ್ರಿಯೆ ಕೊಂಚ ವಿಭಿನ್ನವಾಗಿ ನಡೆಯಿತು. ಕ್ಯಾಪ್ಟನ್ ಸಂಗೀತಾ ಅವರನ್ನು ಬಿಟ್ಟು ಉಳಿದ ಸ್ಪರ್ಧಿಗಳು ಕುತ್ತಿಗೆಗೆ ಹಾಕಲಾಗಿದ್ದ ಹೃದಯಾಕಾರಕ್ಕೆ ಇರಿದು ಇಬ್ಬರನ್ನು ನಾಮಿನೇಟ್ ಮಾಡಬೇಕಿತ್ತು. ಅದರಂತೆ ಈ ವಾರ ಮನೆಯಿಂದ ಹೊರಹೋಗಲು ಕಾರ್ತಿಕ್, ವಿನಯ್, ವರ್ತೂರು ಸಂತೋಷ್, ತನಿಷಾ, ತುಕಾಲಿ ಸಂತೋಷ್ ಹಾಗೂ ನಮ್ರತಾ ನಾಮಿನೇಟ್ ಆಗಿದ್ದಾರೆ. 

ನಾಮಿನೇಷನ್ ಪ್ರಕ್ರಿಯೇ ಆರಂಭಿಸುವುದಕ್ಕೂ ಮುನ್ನ ಬಿಗ್‌ಬಾಸ್‌ ಒಬ್ಬೊಬ್ಬರನ್ನೇ ಕನ್ಫೆಷನ್ ರೂಮ್‌ಗೆ ಕರೆದು ನೀವು ಫಿನಾಲೆ ತಲುಪಿ, ಟಾಪ್ 2 ಸ್ಪರ್ಧಿಗಳ ಪೈಕಿ ಒಬ್ಬರಾದರೆ ನಿಮ್ಮ ಜೊತೆಗಿರುವ ಇನ್ನೊಬ್ಬ ಸ್ಪರ್ಧಿ ಯಾರಾಗಬೇಕು ಅಂತ ಬಯಸುತ್ತೀರಿ? ಅಂತ ಪ್ರಶ್ನಿಸಿದರು. ಈ ಸಂದರ್ಭ ಕಾರ್ತಿಕ್ ಆರಂಭದಲ್ಲಿ ಕೊಟ್ಟ ಮಾತಿನಂತೆ ವಿನಯ್ ಅವರ ಹೆಸರು ಸೂಚಿಸಿದರು. ವಿನಯ್ ಕೂಡ ಕಾರ್ತಿಕ್ ಹೆಸರನ್ನೇ ಸೂಚಿಸಿದರು. ಬಿಗ್‌ಬಾಸ್‌ ಮನೆಗೆ ಎಂಟ್ರಿ ಕೊಟ್ಟಾಗಿನಿಂದಲೂ ಕಾರ್ತಿಕ್ ಮತ್ತು ವಿನಯ್ ನಡುವೆ ಸಾಕಷ್ಟು ವಿಷಯಗಳಿಗೆ ಜಿದ್ದಾಜಿದ್ದಿ ನಡೆದಿದೆ. ಕೆಲವೊಮ್ಮೆ ಕೈ-ಕೈ ಮಿಲಾಯಿಸುವ ಹಂತಕ್ಕೂ ತಲುಪಿತ್ತು. ಇದನ್ನೆಲ್ಲಾ ಮನಸ್ಸಿನಲ್ಲಿಟ್ಟುಕೊಳ್ಳದೇ ಆಯ್ಕೆ ಮಾಡಿರುವುದು ವೀಕ್ಷಕರ ಮೆಚ್ಚುಗೆಗೆ ಕಾರಣವಾಗಿದೆ.

ಇನ್ನು ಟಾಪ್ 2 ಸ್ಪರ್ಧಿಗಳ ಆಯ್ಕೆ ಪ್ರಕ್ರಿಯೆ ಸಂದರ್ಭ ವರ್ತೂರು ಸಂತೋಷ್ ಅವರು ಡ್ರೋನ್ ಪ್ರತಾಪ್ ಹೆಸರು ಸೂಚಿಸಿದರು. ತುಕಾಲಿ ಸಂತು ಅವರು ಸಂಗೀತಾ ಶೃಂಗೇರಿಯವರನ್ನು ಆಯ್ಕೆ ಮಾಡಿದರು. ಡ್ರೋನ್ ಪ್ರತಾಪ್ ಅವರು ನಮ್ರತಾ ಅವರ ಹೆಸರನ್ನು ಬರೆದರು. ತನಿಷಾ ಅವರು ಕಾರ್ತಿಕ್, ನಮ್ರತಾ ಅವರು ವಿನಯ್, ಸಂಗೀತಾ ಅವರು ಡ್ರೋನ್ ಪ್ರತಾಪ್ ಹೆಸರನ್ನು ಹೇಳಿದರು. ಈ ಪ್ರಕ್ರಿಯೆಯಲ್ಲಿ ಕಾರ್ತಿಕ್, ವಿನಯ್ ಹಾಗೂ ಡ್ರೋನ್ ಪ್ರತಾಪ್‌ಗೆ ತಲಾ 2 ಮತಗಳು ಲಭಿಸಿವೆ. 

ಫಿನಾಲೆಗೆ 20 ದಿನಗಳು ಉಳಿದಿವೆ. ಫಿನಾಲೆ ತಲುಪಿ, ವಿಜಯದ ಕಿರೀಟ ಮುಡಿಗೇರಿಸಿಕೊಳ್ಳುವುದು ನಿಮ್ಮೆಲ್ಲರ ಆಸೆ. ನಿಮ್ಮೆಲ್ಲರ ಪೈಕಿ ಒಬ್ಬರ ಆಸೆ ಮಾತ್ರ ನಿಜವಾಗಲು ಸಾಧ್ಯ. ಫಿನಾಲೆ ವೇದಿಕೆ ತಲುಪಲು ಅರ್ಹತೆಯಿಲ್ಲದ ಇಬ್ಬರನ್ನು ನಾಮಿನೇಟ್ ಮಾಡಿ ಅಂತ ಬಿಗ್‌ಬಾಸ್‌ ಸೂಚಿಸಿದರು. ಈ ವೇಳೆ ಯಾರು ಯಾರ ಹೆಸರು ಸೂಚಿಸಿದರು ಎಂಬ ಪಟ್ಟಿ ಕೆಳಗಿದೆ.
ಕಾರ್ತಿಕ್ ಆಯ್ಕೆ- ತನಿಷಾ, ವರ್ತೂರು ಸಂತೋಷ್
ನಮ್ರತಾ ಆಯ್ಕೆ-ವರ್ತೂರು ಸಂತೋಷ್, ತುಕಾಲಿ ಸಂತು
ವಿನಯ್ ಆಯ್ಕೆ-ಡ್ರೋನ್ ಪ್ರತಾಪ್, ವರ್ತೂರು ಸಂತೋಷ್
ತುಕಾಲಿ ಸಂತೋಷ್ ಆಯ್ಕೆ-ನಮ್ರತಾ, ತುಕಾಲಿ ಸಂತೋಷ್ 
ಡ್ರೋನ್ ಪ್ರತಾಪ್ ಆಯ್ಕೆ- ತುಕಾಲಿ ಸಂತೋಷ್, ವಿನಯ್
ತನಿಷಾ ಆಯ್ಕೆ-ವರ್ತೂರು ಸಂತೋಷ್, ನಮ್ರತಾ
ವರ್ತೂರು ಸಂತೋಷ್ ಆಯ್ಕೆ- ನಮ್ರತಾ, ಕಾರ್ತಿಕ್

ಕ್ಯಾಪ್ಟನ್ ಸಂಗೀತಾ ಅವರಿಗೆ ನಾಮಿನೇಟ್ ಆದವರ ಪೈಕಿ ಒಬ್ಬರನ್ನು ಸೇವ್ ಮಾಡುವ ಅಧಿಕಾರವನ್ನು ಬಿಗ್‌ಬಾಸ್‌ ನೀಡಿದರು. ಟಾಪ್ 2 ಆಯ್ಕೆಯಲ್ಲಿ ತಲಾ 2 ವೋಟ್ಸ್ ಪಡೆದ ವಿನಯ್, ಕಾರ್ತಿಕ್ ಹಾಗೂ ಪ್ರತಾಪ್ ಮೂವರಲ್ಲಿ ಒಬ್ಬರನ್ನು ಸೇಫ್ ಮಾಡುವಂತೆ ಸೂಚಿಸಿದರು. ಈ ವೇಳೆ ಸಂಗೀತಾ ಅವರು ಪ್ರತಾಪ್ ಅವರನ್ನು ಸೇಫ್ ಮಾಡಿದರು. ತಮ್ಮನ್ನು ಸೇಫ್ ಮಾಡಿದ್ದಕ್ಕೆ ಖುಷಿಪಟ್ಟ ಪ್ರತಾಪ್, ದೀದಿಗೆ ಧನ್ಯವಾದ ಹೇಳಿದರು. ಇತ್ತ ನಮ್ರತಾ ನಾಮಿನೇಟ್ ಆಗಿದ್ದಕ್ಕೆ ಕಣ್ಣೀರು ಸುರಿಸಿದರು.