ಕನ್ನಡಿಗರ ಮನಗೆದ್ದ ಶ್ರೀಗೌರಿ ಧಾರಾವಾಹಿ: ಈ ಸೀರಿಯಲ್‌ನ ಪ್ರಮುಖ ಪಾತ್ರಧಾರಿಗಳ ಪರಿಚಯ ಇಲ್ಲಿದೆ.

ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗಿದ್ದ 'ಕಮಲಿ' ಸೀರಿಯಲ್ ಮೂಲಕ ಕನ್ನಡಿಗರಿಗೆ ಹತ್ತಿರವಾಗಿದ್ದ ಅಮೂಲ್ಯ ಗೌಡ ಈ ಧಾರಾವಾಹಿಯಲ್ಲಿ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಕಮಲಿ ಬಳಿಕ ಬಿಗ್‌ಬಾಸ್‌ ಒಟಿಟಿಯಲ್ಲಿ ಕಾಣಿಸಿಕೊಂಡಿದ್ದ ಅಮೂಲ್ಯ, ನಂತರ ತೆಲುಗು ಧಾರಾವಾಹಿಗಳಲ್ಲಿ ಬ್ಯುಸಿಯಾಗಿದ್ದರು. ಇದೀಗ ಶ್ರೀಗೌರಿಯಾಗಿ ಕಂಬ್ಯಾಕ್ ಮಾಡಿದ್ದಾರೆ. ಮೂಲತಃ ಮೈಸೂರಿನರಾದ ಅಮೂಲ್ಯ ಗೌಡಗೆ ಈಗ 31 ವರ್ಷ ವಯಸ್ಸು. 

ಶ್ರೀಗೌರಿ ಧಾರಾವಾಹಿ ನಾಯಕನಾಗಿ ಕಾರ್ತಿಕ್ ಅತ್ತಾವರ್ ಅಭಿನಯಿಸುತ್ತಿದ್ದಾರೆ.  ಸಾಫ್ಟ್‌ವೇರ್ ಕಂಪೆನಿಯೊಂದರಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಇವರ ಬಣ್ಣದ ಲೋಕದ ಪಯಣ ಶುರುವಾಗಿದ್ದು ಕೋಸ್ಟಲ್‌ವುಡ್ ಮೂಲಕ. ತುಳುವಿನ 'ರಿಕ್ಷಾ ಡ್ರೈವರ್' ಸಿನಿಮಾದ ಮೂಲಕ ನಟನೆಗೆ ಪಾದಾರ್ಪಣೆ ಮಾಡಿದರು. ಆ ಸಿನಿಮಾ ಪ್ರತಿಷ್ಠಿತ ಕರ್ನಾಟಕ ರಾಜ್ಯ ಸಿನಿಮಾ ಪ್ರಶಸ್ತಿಗೂ ಪಾತ್ರವಾಗಿತ್ತು. ನಂತರ ಕಲರ್ಸ್ ಕನ್ನಡದ ಯಶೋಧೆ ಎಂಬ ಧಾರಾವಾಹಿಯಲ್ಲಿ ಅಭಿನಯಿಸಿದರು. ಆ ಬಳಿಕ ಡ್ಯಾನ್ಸಿಂಗ್ ಸ್ಟಾರ್ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಕ್ರೇಜಿ ಸ್ಟಾರ್ ರವಿಚಂದ್ರನ್‌ ಅವರಿಂದ ಪ್ರಶಂಸೆ ಪಡೆದರು. ಮುಂದೆ ಕನ್ನಡ ಸಿನಿಮಾ 'ಅನುಕ್ತ'ದಲ್ಲಿ ನಾಯಕನಾಗಿ ನಟಿಸುವ ಮೂಲಕ ಸ್ಯಾಂಡಲ್‌ವುಡ್‌ಗೆ ಕಾರ್ತಿಕ್ ಕಾಲಿಟ್ಟರು. ಕಾರ್ತಿಕ್ `ಅನಮೋಲ್' ಎಂಬ ಒಂದು ಹಿಂದಿ ಕಿರುಚಿತ್ರವನ್ನು ನಿರ್ದೇಶಿಸಿದ್ದಾರೆ. ಇದೀಗ ಬರೋಬ್ಬರಿ 9 ವರ್ಷಗಳ ಬಳಿಕ ಕಿರುತೆರೆಗೆ ಮರಳಿದ್ದಾರೆ.

50ಕ್ಕೂ ಧಾರಾವಾಹಿಗಳನ್ನು ನಿರ್ದೇಶನ ಮಾಡಿರುವ ಸುನೀಲ್ ಪುರಾಣಿಕ್ ಈ ಧಾರಾವಾಹಿಯಲ್ಲಿ ಪ್ರಮುಖ ಪಾತ್ರ ನಿರ್ವಹಿಸುತ್ತಿದ್ದಾರೆ. ಅವರು ಊರಿನ ಧಣಿ ರಘುರಾಮ್ ಹೆಗಡೆ ಹಾಗೂ ಶ್ರೀಗೌರಿಯ ತಂದೆಯಾಗಿ ಅಭಿನಯಿಸಿದ್ದಾರೆ. ಅಪ್ಪು ತಾಯಿ ಮಂಗಳಮ್ಮನಾಗಿ ನಂದಿನಿ ಗೌಡ, ಶ್ರೀಗೌರಿಯ ಅಜ್ಜಿಯಾಗಿ ಗಾಯಿತ್ರಿ ಪ್ರಭಾಕರ್, ಅಜ್ಜನಾಗಿ ಸಂಜಯ್ ಸೂರಿ ನಟಿಸಿದ್ದಾರೆ. 

ಎರಡು ವಿಭಿನ್ನ ಜಗತ್ತುಗಳಿಂದ ಬಂದ ಇಬ್ಬರ ಬದುಕುಗಳು ಕರಾವಳಿ ತೀರದ ಊರೊಂದರಲ್ಲಿ ಸಂಧಿಸಿದ ಮೇಲೆ ಏನೆಲ್ಲಾ ನಡೆಯುತ್ತದೆ ಎಂಬುದು ಈ ಧಾರಾವಾಹಿಯ ಪ್ರಮುಖ ಕಥಾಹಂದರ.  ಸೀರಿಯಲ್‌ನಲ್ಲಿ ಶ್ರೀಗೌರಿ ವಿಚಿತ್ರ ಕಾಯಿಲೆಯಿಂದ ಬಳಲುತ್ತಿರುತ್ತಾಳೆ. ಅವಳ ತಂದೆಗೆ ಅದನ್ನು ಮುಚ್ಚಿಟ್ಟು ಮಗಳಿಗೊಂದು ಮದುವೆ ಮಾಡಿಸುವ ಆಸೆ. ಇತ್ತ ಊರಿಗೆ ಊರಿಗೆ ಉಪಕಾರಿ, ಮನೆಗೆ ಮಾರಿಯಂತಿರವ ನಾಯಕ ಅಪ್ಪುಗೆ ತಾಯಿಯೇ ಎಲ್ಲಾ. ನಾಟಿ ವೈದ್ಯ ಕಲಿತಿರುವ ಅಪ್ಪು ತಾಯಿ ಮಂಗಳಮ್ಮಗೆ ಅವನ ಮದುವೆಯದ್ದೇ ಚಿಂತೆ. ಅಮ್ಮ ಪದೇ ಪದೇ ಮದುವೆಯಾಗು ಎಂದಾಗೆಲ್ಲಾ ಅಪ್ಪು ಸಾಯುವ ಮಾತನಾಡಿ ದಿನ ದೂಡುತ್ತಿದ್ದಾನೆ. ಹೀಗಿರುವಾಗ ಅಪ್ಪು-ಶ್ರೀಗೌರಿ ಭೇಟಿಯಾದ ಮೇಲೆ ಏನೆಲ್ಲಾ ನಡೆಯುತ್ತದೆ ಎಂಬುದೇ ಶ್ರೀಗೌರಿ. 

ಶ್ರೀಗೌರಿ ಧಾರಾವಾಹಿಯನ್ನು ಜಗನ್ ನಿರ್ಮಾಣ ಮಾಡುತ್ತಿದ್ದಾರೆ. ಜಗನ್ ಈಗಾಗಲೇ ಲಕ್ಷಣ, ರಕ್ಷಾಬಂಧನ ಹಾಗೂ ಗೃಹಪ್ರವೇಶ ಧಾರಾವಾಹಿಗಳನ್ನು ನಿರ್ಮಿಸಿದ್ದರು. ಇದೀಗ ಶ್ರೀಗೌರಿ ನಿರ್ಮಿಸುತ್ತಿದ್ದಾರೆ.  ಜಗನ್ ಜೋಶ್ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಕಾಲಿಟ್ಟಿದ್ದರು. ಬೆಳ್ಳಿತೆರೆಗಿಂತ ಕಿರುತೆರೆಯಲ್ಲಿ ಖ್ಯಾತಿಗಳಿಸಿದ್ದ ಜಗನ್,ಪುನರ್ ವಿವಾಹ, ಗಾಂಧಾರಿ, ಸೀತಾ ವಲ್ಲಭ, ಲಕ್ಷಣ ಸೇರಿದಂತೆ  ಸಾಕಷ್ಟು ಧಾರಾವಾಹಿಗಳಲ್ಲಿ ಅಭಿನಯಿಸಿದ್ದಾರೆ. ಜೊತೆಗೆ ಬಿಗ್‌ಬಾಸ್ ಸೀನಸ್ 5ರ ಸ್ಪರ್ಧಿಯಾಗಿದ್ದರು.