CCL 2025 LIVE: ಮುಂಬೈ ಹೀರೋಗಳಿಗೆ ಭೋಜಪುರಿ ಸ್ಟಾರ್‌ಗಳ ಸವಾಲು, ಗೆಲ್ಲೋದು ಯಾರು ?

5 ಓವರ್‌ಗಳ ಮುಕ್ತಾಯಕ್ಕೆ ಒಂದು ವಿಕೆಟ್ ಕಳೆದುಕೊಂಡು 71 ರನ್ ಕಲೆ ಹಾಕಿದ್ದ ಮುಂಬೈ ಹೀರೋಸ್ ತಂಡ ಎರಡನೇ ಇನಿಂಗ್ಸ್‌ನಲ್ಲಿ 4 ವಿಕೆಟ್ ಕಳೆದುಕೊಂಡ 128 ರನ್ ಗಳಿಸಿದೆ. ಶಬ್ಬೀರ್ ಅಹ್ಲುವಾಲಿಯಾ 32 ಬಾಲ್‌ಗಳಲ್ಲಿ 82 ರನ್ ಗಳಿಸಿ ರನೌಟ್ ಆದರೆ ನಿಶಾಂಥ್ ದಹಿಯಾ 33 ರನ್ ಗಳಿಸಿ ಔಟ್ ಆಗಿದ್ದಾರೆ. ಇನ್ನು ಭೋಜ್‌ಪುರಿ ತಂಡದ ನಾಯಕ ಮನೋಜ್ ತಿವಾರಿ ಎರಡು ಓವರ್ ಬೌಲಿಂಗ್ ಮಾಡಿದ್ದು 21 ರನ್‌ಗಳನ್ನು ನೀಡಿದ್ದಾರೆ

ದೆಹಲಿಯ ಅರುಣ್ ಜೇಟ್ಲಿ ಕ್ರೀಡಾಂಗಣದಲ್ಲಿ ರನ್‌ಗಳ ಸುರಿಮಳೆಯಾಗುತ್ತಿದೆ. ಮುಂಬೈ ಮತ್ತು ಭೋಜ್‌ಪುರಿ ತಂಡದ ದಾಂಡಿಗರು ಬೌಲರ್‌ಗಳ ಮೇಲೆ ದಯೆ ತೋರದೇ ಬ್ಯಾಟ್ ಬೀಸುತ್ತಿದ್ದಾರೆ. ಮೊದಲ ಇನಿಂಗ್ಸ್‌ನಲ್ಲಿ 125 ರನ್ ಗಳಿಸಿದ್ದ ಮುಂಬೈ ಈಗ ಎರಡನೇ ಇನಿಂಗ್ಸ್‌ನಲ್ಲಿ 5 ಓವರ್‌ಗಳ ಮುಕ್ತಾಯಕ್ಕೆ ಒಂದು ವಿಕೆಟ್ ಕಳೆದುಕೊಂಡು 71 ರನ್ ಕಲೆ ಹಾಕಿದೆ. ಶಬ್ಬೀರ್ ಅಹ್ಲುವಾಲಿಯಾ 18 ಎಸೆತಗಳಲ್ಲಿ 48 ರನ್ ಗಳಿಸಿದ್ದರೆ ನಿಶಾಂತ್ ದಹಿಯಾ 11 ಎಸೆತಗಳಲ್ಲಿ 23ರನ್ ಗಳಿಸಿದ್ದಾರೆ.

ಮುಂಬೈ ತಂಡದ ವಿರುದ್ಧ ಭೋಜ್‌ಫುರಿ ಸ್ಟಾರ್ಸ್ ಅಬ್ಬರಿಸಿ ಬೊಬ್ಬಿರಿದಿದ್ದಾರೆ. ಅದರಲ್ಲಿಯೂ ಅಸ್ಗರ್ ಖಾನ್ ಐತಿಹಾಸಿಕ ದಾಖಲೆಯನ್ನು ನಿರ್ಮಾಣ ಮಾಡಿದ್ದು ಕೇವಲ 36 ಎಸೆತಗಳಲ್ಲಿ 96ರನ್ ಗಳಿಸಿದ್ದಾರೆ. ಅಸ್ಗರ್ ಅವರ ಈ ಸ್ಫೋಟಕ ಆಟದಲ್ಲಿ 11 ಸಿಕ್ಸರ್ ಮತ್ತು 4 ಫೋರ್‌ಗಳು ಸೇರಿಕೊಂಡಿವೆ. ಕೊನೆಯವರೆಗೆ ಮುಂಬೈ ಅಸ್ಗರ್ ಖಾನ್ ಬೆಂಡೆತ್ತಿದ ಪರಿಣಾಮ ಭೋಜ್‌ಪುರಿ ತಂಡ ಹತ್ತು ಓವರ್‌ಗಳಲ್ಲಿ 150ರನ್‌ಗಳ ಬೃಹತ್ ಮೊತ್ತ ಕಲೆ ಹಾಕಿದೆ. ಮುಂಬೈ ತಂಡದ ಮೇಲೆ 25ರನ್ ಗಳ ಲೀಡ್ ಪಡೆದಿದೆ.

125 ರನ್‌ಗಳ ಬೃಹತ್ ಮೊತ್ತ ಬೆನ್ನತ್ತಿದ ಭೋಜ್‌ಪುರಿ ದಬಾಂಗ್ಸ್ ತಂಡ ಮೊದಲ ಬಾಲಿನಿಂದಲೇ ಆಕ್ರಮಣಕಾರಿ ಶೈಲಿಯನ್ನು ಅನುಸರಿಸಿತು. ಆದರೆ ಇದಕ್ಕೆ ಬೆಲೆಯನ್ನು ತೆರಬೇಕಾಯಿತು. 4 ಓವರ್‌ನಲ್ಲಿ 59 ರನ್‌ಗಳನ್ನು ಗಳಿಸಿದ ಭೋಜ್‌ಪುರಿ ತಂಡ ಎರಡು ವಿಕೆಟ್ ಕಳೆದುಕೊಂಡಿತು. ಪರವೇಶ್ ಲಾಲ್ ಯಾದವ್ ಶೂನ್ಯ ಸುತ್ತಿದರೆ ಅನ್ಷುಮನ್ ರಜಪೂತ್ 12 ರನ್‌ ಗಳಿಸಿ ವಿಕೆಟ್ ಚೆಲ್ಲಿದರು. ಇನ್ನು ಆದಿತ್ಯ ಓಜಾ 15 ಎಸೆತಗಳಲ್ಲಿ 32 ರನ್ ಗಳಿಸಿ ಇನ್ನೂ ಆಡುತ್ತಿದ್ದಾರೆ. ಇನ್ನೂ ಮತ್ತೊಂದು ಬದಿಯಲ್ಲಿರುವ ಅಸ್ಗರ್ ಖಾನ್ ಸ್ಫೋಟಕ ಬ್ಯಾಟಿಂಗ್ ಆಡಿದ್ದು ಕೇವಲ 8 ಎಸೆತಗಳಲ್ಲಿ 31 ರನ್ ಗಳಿಸಿದ್ದಾರೆ. ಅದರಲ್ಲಿ ನಾಲ್ಕು ಸಿಕ್ಸ್‌ಗಳು ಸೇರಿವೆ. ಸದ್ಯ 5 ಓವರ್ ಅಂತ್ಯಕ್ಕೆ ಭೋಜ್‌ಪುರಿ ದಬಾಂಗ್ಸ್ ತಂಡ 78 ರನ ಗಳಿಸಿದೆ.

ಆರಂಭದ ಐದು ಓವರ್‌ಗಳಲ್ಲಿ ಅರವತ್ತು ರನ್ ಗಳಿಸಿದ್ದ ಮುಂಬೈ ಬಹುದೊಡ್ಡ ಟಾರ್ಗೆಟ್‌ನ ಭೋಜಪುರಿ ತಂಡಕ್ಕೆ ನೀಡುತ್ತೆ ಎಂದು ಎಲ್ಲ ಅಂದುಕೊಂಡಿದ್ದರು. ಆದರೆ ಆ ನಂತರ ಭೋಜಪುರಿ ಬೌಲರ್‌ಗಳು ಪಂದ್ಯದ ದಿಕ್ಕನ್ನು ಬದಲಿಸಿದರು. ಆರು ರನ್‌ಗೆ ನಾಲ್ಕು ವಿಕೆಟ್ ಪಡೆಯುವ ಮೂಲಕ ಮುಂಬೈಗೆ ಶಾಕ್ ನೀಡಿದರು. ಆದರೆ ಈ ಸಮಯದಲ್ಲಿ ಗಾಯಗೊಂಡು ಪೆವಲಿಯನ್ ಸೇರಿದ್ದ ಸಿದ್ಧಾಂಥ್ ಮತ್ತೆ ಮೈದಾನಕ್ಕೆ ಮರಳಿದರು. ಮತ್ತೆ ಪಂದ್ಯವನ್ನು ಭೋಜ್‌ಪುರಿಯಿಂದ ಕಿತ್ತುಕೊಂಡರು. 3 ಫೋರ್ 3 ಸಿಕ್ಸರ್ ಚಚ್ಚಿದ ಸಿದ್ಧಾಂಥ್ ಕೇವಲ 13 ಎಸೆತಗಳಲ್ಲಿ 37 ರನ್ ಗಳಿಸಿದರು. ಇವರಿಗೆ ಶಬ್ಬೀರ್ ಸಾಥ್ ನೀಡಿದರು. 09 ಎಸೆತಗಳಲ್ಲಿ 19 ರನ್ ಬಾರಿಸಿದರು. ಅಂತಿಮವಾಗಿ ಮುಂಬೈ ಹೀರೋಸ್ 10 ಓವರ್‌ಗಳಲ್ಲಿ 125 ರನ್‌ಗಳ ಬೃಹತ್ ಮೊತ್ತ ಕಲೆ ಹಾಕಿತು

ಮೊದಲ ಐದು ಓವರ್‌ನಲ್ಲಿ ಮುಂಬೈ ಹೀರೋಸ್ ನ ಆರಂಭಿಕ ಆಟಗಾರರು ತಂಡಕ್ಕೆ ಬೇಕಿದ್ದ ಓಪನಿಂಗ್ ಒದಗಿಸಿದರು. ಐದು ಓವರ್‌ಗಳಲ್ಲಿ 60 ರನ್ ಗಳಿಸಿದರು. ಕೇವಲ ಒಂದು ವಿಕೆಟ್ ಮಾತ್ರ ಕಳೆದುಕೊಂಡಿದ್ದರು. ಆದರೆ ಆ ನಂತರ ಭೋಜಪುರಿ ದಬಾಂಗ್ಸ್‌ನ ಬೌಲರ್‌ಗಳು ಸಂಪೂರ್ಣ ಪಂದ್ಯದ ದಿಕ್ಕನ್ನೇ ಬದಲಿಸಿದರು. ರಾಜೀವ್ ಔಟ್ ಆದ ನಂತರ ಆಡಲು ಬಂದಿದ್ದ ಶರದ್ ಖೇಲ್ಕೇರ್ 5 ರನ್‌ಗೆ ವಿಕೆಟ್ ಚೆಲ್ಲಿದರು. ಆ ನಂತರ ಬಂದ ಸಿದ್ಧಾರ್ಥ್ ಮೊದಲನೇ ಬಾಲ್‌ನಲ್ಲಿ ಪೆಟ್ಟು ಮಾಡಿಕೊಂಡು ಮೈದಾನದಿಂದ ಹೊರ ನಡೆದರು. ಮುಂಬೈ ತಂಡದ ದುರಾದೃಷ್ಟಕ್ಕೆ 34 ರನ್ ಗಳಿಸಿದ್ದ ನಾಯಕ ಸಾಖೀಬ್ ಎಲ್ ಬಿ ಡಬ್ಲೂ ಬಲೆಗೆ ಬಿದ್ದರು. ಕ್ಯಾಪ್ಟನ್ ಔಟ್ ಆದ ನಂತರ ಬಂದ ನವದೀಪ್ ಕೂಡ ಬಂದಷ್ಟೇ ವೇಗವಾಗಿ ಪೆವಲಿಯನ್ ಸೇರಿದರು.

ಟಾಸ್ ಸೋತು ಬ್ಯಾಟಿಂಗ್ ಗೆ ಇಳಿದ ಮುಂಬೈ ಹೀರೋಸ್ ತಂಡ ಮೊದಲ ಐದು ಓವರ್‌ನಲ್ಲಿ ಅರವತ್ತು ರನ್ ಗಳಿಸಿದೆ. ತಂಡದ ಆರಂಭಿಕನಾಗಿ ಕಣಕ್ಕಿಳಿದ ನಾಯಕ ಸಾಖೀಬ್ 17 ಎಸೆತದಲ್ಲಿ 35 ರನ್ ಗಳಿಸಿದ್ದಾರೆ. ಭೋಜಪುರಿ ಬೌಲರ್‌ಗಳ ಬೆವರಿಳಿಸುತ್ತಿದ್ದಾರೆ. ಇನ್ನು ಪಂದ್ಯದ ಆರಂಭಕ್ಕೂ ಮುನ್ನವೇ ಮುಂಬೈ ನಾಯಕ ಆತ್ಮ ವಿಶ್ವಾಸದ ಮಾತುಗಳನ್ನಾಡಿದ್ದರು. ಈ ಬಾರಿ ಪಕ್ಕಾ ತಯಾರಿಯೊಂದಿಗೆ ಬಂದಿರುವ ಸುಳಿವನ್ನು ನೀಡಿದ್ದರು. ಇವರ ಸದ್ಯದ ಆಟವನ್ನು ನೋಡುತ್ತಿದ್ದರೆ ಮುಂಬೈ ಈ ಬಾರಿ ಸಿಸಿಎಲ್‌ನ ಗಂಭೀರವಾಗಿ ಪರಿಗಣಿಸಿದಂತೆ ಕಾಣುತ್ತಿದೆ

ಮುಂಬೈ ಹೀರೋಸ್ ಮತ್ತು ಭೋಜ್‌ಪುರಿ ದಬಾಂಗ್ಸ್ ನಡುವೆ ಪಂದ್ಯ ಶುರುವಾಗಿದೆ. ಟಾಸ್ ಗೆದ್ದ ಭೋಜಪುರಿ ದಬಾಂಗ್ಸ್ ಬೌಲಿಂಗ್ ಆಯ್ಕೆ ಮಾಡಿಕೊಂಡಿದೆ. ಮುಂಬೈ ತಂಡವನ್ನು ಸಾಖೀಬ್ ಸಲೀಂ ಮುನ್ನಡೆಸುತ್ತಿದ್ದರೆ ಭೋಜಪುರಿ ತಂಡವನ್ನು ಮನೋಜ್ ತಿವಾರಿ ಮುನ್ನಡೆಸಲಿದ್ದಾರೆ. ಮುಂಬೈ ತಂಡದಲ್ಲಿ ಶರದ್ ಖೇಲ್ಕರ್, ಅಪೂರ್ವ ಲಾಖಿಯಾ, ಅವರಂತಹ ಚಿರಪರಿಚಿತ ಮುಖಗಳಿವೆ.

ಜಿಶ್ಶು ಸೇನ್ ಗುಪ್ತಾ ನಾಯಕತ್ವದ ಬೆಂಗಾಲ್ ಟೈಗರ್ಸ್ ತಂಡ ಪಂಜಾಬ್ ತಂಡವನ್ನು ಸುಲಭವಾಗಿ ಮಣಿಸಿದೆ. ಕೇವಲ 2 ವಿಕೆಟ್ ಕಳೆದುಕೊಂಡು 84 ರನ್‌ಗಳ ಗುರಿಯನ್ನು ತಲುಪಿದೆ. ಈ ಮೂಲಕ ಸಿಸಿಎಲ್‌ನಲ್ಲಿನ ಮೊದಲೆರಡು ಪಂದ್ಯಗಳನ್ನು ಗೆದ್ದಿದೆ. ಮೊದಲ ಇನಿಂಗ್ಸ್‌ನಲ್ಲಿ 65 ರನ್‌ಗಳನ್ನು ಗಳಿಸಿದ್ದ ಎರಡನೇ ಇನಿಂಗ್ಸ್‌ನಲ್ಲಿ 24 ರನ್ ಗಳಿಸಿ ಅಜೇಯರಾಗಿ ಉಳಿದರೆ, ಇವರ ಜೊತೆ ಕ್ರೀಸ್‌ನಲ್ಲಿದ್ದ ಯುಸೂಫ್ 21 ರನ್ ಗಳಿಸಿದರು. ಈ ಬಾರಿ ಇನಿಂಗ್ಸ್ ಆರಂಭಿಸಿದ ರಾಹುಲ್ ಮಿಂಚಿನ ವೇಗದಲ್ಲಿ 22 ರನ್ ಗಳಿಸುವ ಮೂಲಕ ಬೆಂಗಾಲ್ ಟೈಗರ್ಸ್ ಗೆಲುವಿನ ಹಾದಿಯನ್ನು ಸುಗಮವಾಗಿಸಿದರು.

ಬೆಂಗಾಲ್ ಟೈಗರ್ಸ್ ತಂಡಕ್ಕೆ ಪಂಜಾಬ್ ದಿ ಶೇರ್ ತಂಡ 83 ರನ್‌ಗಳ ಗುರಿಯನ್ನು ನೀಡಿದೆ. ಮೊದಲ ಇನಿಂಗ್ಸ್‌ನಲ್ಲಿ 111 ರನ್ ಗಳಿಸಿದ್ದ ಪಂಜಾಬ್ ಎರಡನೇ ಇನಿಂಗ್ಸ್‌ನಲ್ಲಿ 82ರನ್‌ಗಳನ್ನು ಮಾತ್ರ ಗಳಿಸಿದೆ. ಹಾರ್ಡಿ ಸಂಧು ತಂಡದ ನಾಯಕನಾಗಿ ಜವಾಬ್ಧಾರಿಯುತ ಆಟವನ್ನು ಆಡಿದ್ದು 21 ಬಾಲ್‌ಗೆ 42ರನ್‌ಗಳನ್ನು ಗಳಿಸಿದರು. ಇವರನ್ನು ಹೊರತು ಪಡಿಸಿದರೆ ಪಂಜಾಬ್‌ನ ಬೇರೆ ಯಾರು ಕೂಡ ಬೆಂಗಾಲ್ ತಂಡದ ಬೌಲರ್‌ಗಳನ್ನು ಸಮರ್ಥವಾಗಿ ಎದುರಿಸಲಿಲ್ಲ. ಕೊನೆ ಕೊನೆಯಲ್ಲಿ ಬಂದ ಪಂಜಾಬ್ ತಂಡದ ಬೌಲರ್ ದಾಖೇಶ್ 12 ರನ್ ಪೇರಿಸಿದರು. ಬೆಂಗಾಲ್ ಟೈಗರ್ಸ್ ಪರ ಸತ್ಯದೀಪ್, ರತನ್ ದೀಪ್, ಮತ್ತು ರಾಹುಲ್ ತಲಾ 2 ವಿಕೆಟ್ ಕಬಳಿಸಿದರು. ಉದಯ್ 1 ವಿಕೆಟ್ ಪಡೆದರು.

ಮೊದಲ ಇನಿಂಗ್ಸ್‌ನಲ್ಲಿ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ಮಾಡಿದ್ದ ಪಂಜಾಬ್ ತಂಡ ಎರಡನೇ ಇನಿಂಗ್ಸ್‌ನಲ್ಲಿ ಮುಗ್ಗರಿಸಿದೆ. 5 ಓವರ್‌ಗಳಲ್ಲಿ 38ರನ್ ಮಾತ್ರ ಗಳಿಸಿ ತನ್ನ 5 ಪ್ರಮುಖ ವಿಕೆಟ್ ಕಳೆದುಕೊಂಡಿದೆ. ಸದ್ಯ 39 ರನ್‌ಗಳ ಲೀಡ್‌ ಪಡೆದುಕೊಂಡಿರುವ ಪಂಜಾಬ್‌ಗೆ ಮೊದಲ ಇನಿಂಗ್ಸ್‌ನ ಸ್ಟಾರ್ ಪ್ಲೇಯರ್ ಹಾರ್ಡಿ ಸಂಧು ಆಸರೆಯಾಗಿ ನಿಂತಿದ್ದಾರೆ. 11 ಎಸೆತಗಳಲ್ಲಿ 21ರನ್‌ಗಳನ್ನು ಹಾರ್ಡಿ ಹೊಡೆದಿದ್ದಾರೆ.

ಪಂಜಾಬ್ ಮತ್ತು ಬೆಗಾಲ್ ನಡುವೆ ನಡೆಯುತ್ತಿರುವ ಪಂದ್ಯ ರೋಚಕ ಹಂತದತ್ತ ಸಾಗುತ್ತಿದೆ. ಪಂಜಾಬ್ ನೀಡಿದ್ದ 111 ಗುರಿಯನ್ನು ಬೆನ್ನತ್ತಿದ ಬೆಂಗಾಲ್ ಸರಿಯಾದ ಪ್ರತ್ಯುತ್ತರ ನೀಡಿದೆ. ಕೇವಲ ಎರಡು ವಿಕೆಟ್ ಕಳೆದುಕೊಂಡು 110 ರನ್ ಗಳಿಸಿದೆ. ಕೊನೆಯ ಎರಡು ಎಸೆತದಲ್ಲಿ ರಾಹುಲ್ ಎರಡು ಸಿಕ್ಸರ್‌ಗಳನ್ನು ಸಿಡಿಸುವ ಮೂಲಕ ಸ್ಕೋರ್ ಲೆವಲ್ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ. ಇನ್ನು ಬೆಂಗಾಲ್ ಪರ ಮೊದಲ ಇನಿಂಗ್ಸ್‌ನಲ್ಲಿ ಆಕ್ರಮಣಕಾರಿ ಆಟವನ್ನು ಆಡಿದ ಜಾಮಿ 38 ಎಸೆತಗಳಲ್ಲಿ 65 ರನ್ ಗಳಿಸಿದರೆ ಬೆಂಗಾಲ್ ತಂಡದ ನಾಯಕ ಜಿಶ್ಶು ಸೇನ್‌ಗುಪ್ತಾ 22 ರನ್‌ಗಳನ್ನು ಹೊಡೆದು ಅಜೇಯರಾಗಿ ಉಳಿದಿದ್ದಾರೆ.

ಬೆಂಗಾಲ್ ಟೈಗರ್ಸ್ ತಂಡದ ಬ್ಯಾಟಿಂಗ್‌ನ ಬೆನ್ನೆಲುಬು ಆದ ಜಾಮಿ, ಮೊದಲ ಐದು ಓವರ್‌ ತಂಡದ ಜವಾಬ್ದಾರಿಯನ್ನು ವಹಿಸಿಕೊಂಡು ಯಶಸ್ವಿಯಾಗಿ ನಿರ್ವಹಿಸಿದ್ದಾರೆ. 20 ಬಾಲ್‌ನಲ್ಲಿ 28ರನ್ ಗಳಿಸಿ ಇನ್ನು ಕ್ರೀಸ್‌ನಲ್ಲಿದ್ದಾರೆ. ಬೆಂಗಾಲ್ ತಂಡದ ಕ್ಯಾಪ್ಟನ್ ಜಿಶ್ಶು ಸೇನ್ ಗುಪ್ತಾ ಐದು ಎಸೆತಗಳಲ್ಲಿ ಆರು ರನ್ ಗಳಿಸಿದ್ದು ಬೆಂಗಾಲ್ ಟೈಗರ್ಸ್ 05 ಓವರ್‌ಗಳಲ್ಲಿ45 ರನ್‌ ಗಳಿಸಿದೆ. ಒಂದು ವಿಕೆಟ್ ಕಳೆದುಕೊಂಡಿದೆ.

ಪಂಜಾಬ್ ನೀಡಿದ 111 ರನ್‌ಗಳ ಗುರಿಯನ್ನು ಬೆನ್ನತ್ತಿದ್ದ ಬೆಂಗಾಲ್ ಉತ್ತಮ ಆರಂಭವನ್ನು ಮಾಡಿತು. ಎರಡು ಓವರ್‌ಗಳಲ್ಲಿ 21 ರನ್ ಗಳಿಸಿತು. ಈ 21ರನ್‌ಗಳಲ್ಲಿ ಜಾಮಿ ಅವರ ಬ್ಯಾಟಿಂದ 16 ರನ್ ಹರಿದು ಬಂದಿದ್ದವು. ಇನ್ನು ಮೂರನೇ ಓವರ್‌ನಲ್ಲಿ ಬೆಂಗಾಲ್‌ನ ಹಾರ್ಡಿ ಸಂಧು ಆರಂಭದ ಐದು ಎಸೆತಗಳಲ್ಲಿ ಕಟ್ಟಿ ಹಾಕಿದರು. ಕೇವಲ ಮೂರು ರನ್ ನೀಡಿದರು. ಆದರೆ ಕೊನೆಯ ಎಸೆತದಲ್ಲಿ ಉದಯ್ ಬೌಂಡರಿಯನ್ನು ಬಾರಿಸಿದರು. ಇನ್ನು ಇದೇ ಓವರನ್‌ ಮೂರನೇ ಎಸೆತದಲ್ಲಿ ಉದಯ್ ರನ್‌ಔಟ್‌ನಿಂದ ಕೂದಲೆಳೆ ಅಂತರದಿಂದ ಪಾರಾದರು.

ಬೆಂಗಾಲ್ ಟೈಗರ್ಸ್ ವಿರುದ್ದ ಟಾಸ್ ಗೆದ್ದ ಪಂಜಾಬ್ ಬ್ಯಾಟಿಂಗ್ ಆಯ್ದುಕೊಂಡಿತು. ಆರಂಭದಿಂದಲೂ ಬೆಂಗಾಲ್ ಬೌಲರ್ಸ್‌ಗಳ ಬೆವರಿಳಿಸಿದ ಪಂಜಾಬ್ ಬ್ಯಾಟ್ಸಮನ್‌ಗಳು ಹತ್ತು ಓವರ್‌ನಲ್ಲಿ ಹನ್ನೊಂದು ಫೋರ್‌ ಮತ್ತು ಏಳು ಸಿಕ್ಸರ್‌ಗಳನ್ನು ಬಾರಿಸಿದರು. 05 ವಿಕೆಟ್ ಕಳೆದುಕೊಂಡು 111 ಸ್ಕೋರ್ ಗಳಿಸಿದರು. ರಾಹುಲ್ 26 ರನ್ ಗಳಿಸಿದರೆ ಹಾರ್ಡಿ ಸಿಂಧು 40 ರನ್‌ ಗಳಿಸಿದರು

ಸೋನು ಸೂದ್ { ಕ್ಯಾಪ್ಟನ್ } ಮಿಕಾ ಸಿಂಗ್, ಜಿಮ್ಮಿ ಶೆರ್ಗಿಲ್, ಆಯುಷ್ಮಾನ್ ಖುರಾನಾ, ಬಿನ್ನು ಧಿಲ್ಲೋನ್, ಮನ್ವಿರ್ ಸ್ರಾನ್, ರಾಹುಲ್ ದೇವ್, ನವರಾಜ್ ಹನ್ಸ್, ಜಾಝಿ ಬಿ, ಹರ್ಮೀತ್ ಸಿಂಗ್, ಪಿಯೂಷ್ ಮಲ್ಹೋತ್ರಾ, ಗುಲ್ಜಾರ್ ಚಹಾಲ್, ರೋಷನ್ ಪ್ರಿನ್ಸ್, ಅಮರಿಂದರ್ ಗಿಲ್, ಅಂಗದ್ ಬೇಡಿ, ಯುವರಾಜ್ ಶರ್ಮಾ ಹನ್ಸ್, ರಾಜು ಶರ್ಮಾ ಹನ್ಸ್,

ಜಿಶ್ಶು ಸೇನ್‌ಗುಪ್ತಾ { ಕ್ಯಾಪ್ಟನ್ } ಬೋನಿ ಸೇನ್‌ಗುಪ್ತಾ, ಜಮ್ಮಿ ಬ್ಯಾನರ್ಜಿ, ಜಾಯ್ ಮುಖರ್ಜಿ, ಯೂಸುಫ್ ಚಿಶ್ತಿ, ಸೌರವ್ ದಾಸ್, ಜೋಯ್ ಡೆಬ್ರಾಯ್, ಸತದೀಪ್ ಸಹಾ, ರತ್ನದೀಪ್ ಘೋಷ್, ಆದಿತ್ಯ ರಾಯ್, ಉದಯ್ ಪ್ರತಾಪ್, ರಾಹುಲ್ ಮಜುಂದಾರ್, ಮುಕುಲ್ ಜಾನಾ, ಸೌಗತಾ ನಂದಿ.

ಚೆನ್ನೈ ವಿರುದ್ಧ ಮೊದಲ ಪಂದ್ಯದಲ್ಲಿ ರೋಚಕ ಗೆಲುವನ್ನು ಕಂಡ ಕಳೆದ ಬಾರಿಯ ಚಾಂಪಿಯನ್ ಬೆಂಗಾಲ್ ಟೈಗರ್ಸ್ ತಮ್ಮ ನಾಯಕ ಜಿಶ್ಶು ಸೇನ್‌ಗುಪ್ತಾ, ಬೋನಿ ಸೇನ್‌ಗುಪ್ತಾ, ಜಮ್ಮಿ ಬ್ಯಾನರ್ಜಿ ಮತ್ತು ಸೌರವ್ ದಾಸ್ ಅವರನ್ನು ಅವಲಂಬಿಸಿದೆ. ಇವರ ಜೊತೆ ತಮ್ಮ ಚಾಪು ಮೂಡಿಸಲು ಉತ್ಸಾಹಿ ಯುವ ಪಡೆ ತಂಡದಲ್ಲಿದೆ. ಇನ್ನು ಪಂಜಾಬ್ ದಿ ಶೇರ್ ತಂಡವು ಬಿನ್ನು ದಿಲ್ಲೋನ್ ಅವರ ಮೇಲೆ ಹೆಚ್ಚು ಅವಲಂಬಿತವಾಗಿದೆ. ಜಾಸ್ಸಿ ಗಿಲ್, ನಿಂಜಾ ಮತ್ತು ದೇವ್ ಖರೌದ್ ಅವರಂತಹ ಪ್ರಮುಖ ಪ್ಲೇಯರ್‌ಗಳು ಕೂಡ ತಂಡದಲ್ಲಿದ್ದು ಇಂದು ಬೆಂಗಾಲ್ ಟೈಗರ್ಸ್‌ಗೆ ಪಂಜಾಬ್ ತೀವೃವಾದ ಸ್ಪರ್ಧೆಯನ್ನು ನೀಡುವ ಸಾಧ್ಯತೆ ಇದೆ.

ತೆಲುಗು ವಾರಿಯರ್ಸ್ ವಿರುದ್ಧ ಕರ್ನಾಟಕ ಬುಲ್ಡೋಜರ್ಸ್ ತಂಡ ಗೆದ್ದಿದೆ. ರೋಚಕ ಪಂದ್ಯದಲ್ಲಿ ಗೆಲುವು ಅತ್ತ ಇತ್ತ ವಾಲಿ ಕೊನೆಗೆ ಸುದೀಪ್ ನೇತೃತ್ವದ ತಂಡ ಗೆಲುವಿನ ನಗೆ ಬೀರಿದೆ. ತಲಾ 10 ಓವರ್‌ಗಳ 4 ಇನ್ನಿಂಗ್ಸ್ ಪಂದ್ಯದಲ್ಲಿ ತೆಲುಗು ವಾರಿಯರ್ಸ್ ತಂಡ ಪ್ರಬಲ ಪೈಪೋಟಿ ಕೊಟ್ಟಿತ್ತು. ಕೊನೆಗೆ 46 ರನ್‌ಗಳಿಂದ ಕರ್ನಾಟಕ ಬುಲ್ಡೋಜರ್ಸ್ ಗೆದ್ದಿದೆ.

ಎರಡನೇ ಇನ್ನಿಂಗ್ಸ್‌ನಲ್ಲಿ ತೆಲುಗು ವಾರಿಯರ್ಸ್ ತಂಡ ದಿಢೀರನೆ ಕುಸಿತ ಕಂಡು ಸಂಕಷ್ಟಕ್ಕೆ ಸಿಲುಕಿದೆ. ಎಸ್. ತಮನ್ ಅಬ್ಬರದ ಆಟದ ನಡುವೆಯೂ ತಂಡ ಭಾರೀ ಮೊತ್ತ ಗಳಿಸಬೇಕಾದ ಅನಿವಾರ್ಯತೆಗೆ ಸಿಲುಕಿದೆ. 5 ಓವರ್‌ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 58 ರನ್ ಗಳಿಸಿದೆ. ಇನ್ನು 30 ಎಸೆತಕ್ಕೆ 80 ರನ್ ಗಳಿಸಬೇಕಿದೆ.

ಕರ್ನಾಟಕ ಬುಲ್ಡೋಜರ್ಸ್ ಮೇಲೆ ಎಸ್. ತಮನ್ ಸವಾರಿ ಮಾಡಿದ್ದಾರೆ. ಕೇವಲ 16 ಎಸೆತಗಳಲ್ಲಿ 37 ರನ್ ಸಿಡಿಸಿ ಅಬ್ಬರಿಸಿದ್ದಾರೆ. ಬೌಂಡರಿ ಸಿಕ್ಸರ್‌ಗಳ ಮೂಲಕ ಕರ್ನಾಟಕ ಬುಲ್ಡೋಜರ್ಸ್ ತಂಡದ ಬೌಲರ್‌ಗಳ ಬೆಂಡೆತ್ತಿದ್ದಾರೆ.

ಕರ್ನಾಟಕ ಇನ್ನಿಂಗ್ಸ್ 2ನೇ ಇನ್ನಿಂಗ್ ಮುಕ್ತಾಯವಾಗಿದೆ. 10 ಓವರ್‌ಗಳಲ್ಲಿ 3 ವಿಕೆಟ್ ಕಳೆದುಕೊಂಡು 123 ರನ್ ಗಳಿಸಿತು. ಆ ಮೂಲಕ ಕರ್ನಾಟಕ ಬುಲ್ಡೋಜರ್ಸ್ ಒಟ್ಟಾರೆ ಭಾರೀ ಮೊತ್ತದ ಟಾರ್ಗೆಟ್ ಅನ್ನು ತೆಲುಗು ವಾರಿಯರ್ಸ್ ತಂಡದ ಮುಂದಿಟ್ಟಿದೆ. 10 ಓವರ್‌ಗಳಲ್ಲಿ 138 ರನ್‌ ಗಳಿಸಿದರೆ ತೆಲುಗು ವಾರಿಯರ್ಸ್ ತಂಡ ಪಂದ್ಯ ಗೆಲ್ಲಲಿದೆ.

ಎರಡನೇ ಇನ್ನಿಂಗ್ಸ್‌ನಲ್ಲಿ 7 ಓವರ್‌ಗಳಲ್ಲಿ ಕರ್ನಾಟಕ ಬುಲ್ಡೋಜರ್ಸ್ ತಂಡ 3 ವಿಕೆಟ್ ಕಳೆದುಕೊಂಡು 76 ರನ್ ಪೇರಿಸಿದೆ. 90 ರನ್‌ಗಳ ಮುನ್ನಡೆ ಕಾಯ್ದುಕೊಂಡಿದ್ದು ಭಾರೀ ಟಾರ್ಗೆಟ್ ಅನ್ನು ತೆಲುಗು ವಾರಿಯರ್ಸ್ ತಂಡಕ್ಕೆ ನೀಡುವ ಸುಳಿವು ಸಿಗುತ್ತಿದೆ.

ಕರ್ನಾಟಕ ಬುಲ್ಡೋಜರ್ಸ್ ಎರಡನೇ ಇನ್ನಿಂಗ್ಸ್ ಆರಂಭದಲ್ಲೇ ಆಘಾತ ಎದುರಾಗಿದೆ. ಮೊದಲ 2 ಓವರ್‌ಗಳಲ್ಲಿ 2 ವಿಕೆಟ್ ಕಳೆದುಕೊಂಡು ತಂಡ 26 ರನ್ ಗಳಿಸಿದೆ. 5 ಎಸೆತಗಳಲ್ಲಿ 12 ರನ್ ಗಳಿಸಿ ಮಂಜುನಾಥ್ ಗೌಡ ಔಟ್ ಆಗಿದ್ದಾರೆ.

ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಕರ್ನಾಟಕ ಬುಲ್ಡೋಜರ್ ಹಾಗೂ ತೆಲುಗು ವಾರಿಯರ್ಸ್ ನಡುವಿನ ಪಂದ್ಯದಲ್ಲಿ ತೆಲುಗು ವಾರಿಯರ್ಸ್ ಮೊದಲ ಇನ್ನಿಂಗ್ಸ್ ಮುಕ್ತಾಯ ಆಗಿದೆ. 10 ಓವರ್‌ಗಳಲ್ಲಿ 99 ರನ್ ಗಳಿಸಿದ್ದು, 5 ವಿಕೆಟ್‌ಗಳನ್ನು ಕಳೆದುಕೊಂಡಿದೆ. ಅಖಿಲ್ ಅಕ್ಕಿನೇನಿ 51 ರನ್ ಗಳಿಸಿದ್ದರೆ, ಆದರ್ಶ್ 25 ರನ್ ಗಳಿಸಿದ್ದಾರೆ. ಕರ್ನಾಟಕ ಬುಲ್ಡೋಜರ್ ತಂಡದ ಪರ ಚಂದನ್, ಮಂಜುನಾಥ್, 2 ಎರಡು ವಿಕೆಟ್ ಪಡೆದಿದ್ದು, ಒಂದು ರನ್ ಔಟ್ ಆಗಿದೆ.

ತೆಲುಗು ವಾರಿಯರ್ಸ್ ತಂಡದ ನಾಯಕ ಅಖಿಲ್ ಅಕ್ಕಿನೇನಿ ಔಟ್. ಕರ್ನಾಟಕ ಬುಲ್ಡೋಜರ್ ತಂಡದ ಬೌಲರ್ ಮಂಜುನಾಥ್ ಗೌಡಗೆ ಅಖಿಲ್ ಔಟ್ ಆಗಿದ್ದಾರೆ. 31 ಬೌಲ್‌ಗೆ 51ರನ್‌ಗಳನ್ನು ಗಳಿಸಿದ್ದಾರೆ. 9 ಓವರ್‌ಗಳಿಗೆ 91 ರನ್ ಗಳಿಸಿದೆ.

ತೆಲುಗು ವಾರಿಯರ್ಸ್ ತಂಡದ ಎರಡನೇ ವಿಕೆಟ್ ಪತನ ಆಗಿದೆ. ಭರ್ಜರಿ ಬ್ಯಾಟಿಂಗ್ ಮಾಡುತ್ತಿದ್ದ ಆದರ್ಶ್ ಕರ್ನಾಟಕ ಬುಲ್ಡೋಜರ್ ತಂಡದ ಬೌಲರ್ ಚಂದನ್‌ಗೆ ಔಟ್ ಆಗಿದ್ದಾರೆ. ಕಿಚ್ಚ ಸುದೀಪ್ ಅದ್ಭುತ ಸ್ಟಂಪ್ ಮಾಡಿದ್ದಾರೆ.

ಕರ್ನಾಟಕ ಬುಲ್ಡೋಜರ್ ಪರ ಆರನೇ ಓವರ್ ಅನ್ನು ಗೋಲ್ಡನ್ ಸ್ಟಾರ್ ಗಣೇಶ್ ಮಾಡಿದ್ದಾರೆ. ಮೊದಲ ಓವರ್‌ನಲ್ಲಿ ಗಣೇಶ್ 13 ರನ್‌ಗಳನ್ನು ನೀಡಿದ್ದಾರೆ.ತೆಲುಗು ವಾರಿಯರ್ಸ್ 6 ಓವರ್ ಮುಕ್ತಾಯಕ್ಕೆ 60/1 ಗಳಿಸಿದೆ.

ತೆಲುಗು ವಾರಿಯರ್ಸ್ ತಂಡ ಅದ್ಭುತ ಬ್ಯಾಟಿಂಗ್ ಮಾಡಿದೆ. ಐದು ಓವರ್‌ಗಳಲ್ಲಿ 47 ರನ್‌ಗಳನ್ನು ಕಲೆ ಹಾಕಿದ್ದು ಕೇವಲ ಒಂದು ವಿಕೆಟ್‌ಗಳನ್ನು ಕಳೆದುಕೊಂಡಿದೆ. ಅಖಿಲ್ ಅಕ್ಕಿನೇನಿ ಹಾಗೂ ಆದರ್ಶ್ ಇಬ್ಬರೂ ಉತ್ತಮ ಬ್ಯಾಟಿಂಗ್ ಮಾಡುತ್ತಿದ್ದಾರೆ.

ತೆಲುಗು ವಾರಿಯರ್ಸ್‌ ತಂಡ ಮೊದಲ ವಿಕೆಟ್ ಕಳೆದುಕೊಂಡಿದೆ. ಆರಂಭಿಕ ಆಟಗಾರ ಅಶ್ವಿನ್ ಬಾಬು ಕರ್ನಾಟಕ ಬುಲ್ಡೋಜರ್ ತಂಡದ ಬೌಲರ್ ಮಂಜುನಾಥ್ ಗೌಡಗೆ ವಿಕೆಟ್ ಒಪ್ಪಿಸಿದ್ದಾರೆ. 3.3 ಓವರ್‌ಗಳಲ್ಲಿ 33 ರನ್‌ಗೆ ಒಂದು ವಿಕೆಟ್ ಕಳೆದುಕೊಂಡಿದೆ.

ತೆಲುಗು ವಾರಿಯರ್ಸ್‌ ತಂಡ ಪವರ್‌ ಪ್ಲೇಯನ್ನು ಯಶಸ್ಸಿಯಾಗಿ ಬಳಸಿಕೊಂಡಿದೆ. ಮೂರು ಓವರ್‌ಗಳಲ್ಲಿ 27 ರನ್ ಗಳಿಸಿ, ಯಾವುದೇ ವಿಕೆಟ್‌ಗಳನ್ನು ಕಳೆದುಕೊಂಡಿಲ್ಲ. ನಾಯಕ ಅಖಿಲ್ ಅಕ್ಕಿನೇನಿ 19 ರನ್‌ಗಳನ್ನು ಕಲೆ ಹಾಕಿದ್ದಾರೆ.

ತೆಲುಗು ವಾರಿಯರ್ಸ್ ತಂಡ ಮೊದಲ ಓವರ್‌ಗೆ ಆರು ರನ್ ಗಳಿಸಿದೆ. ತಂಡದ ನಾಯಕ ಅಖಿಲ್ ಅಕ್ಕಿನೇನಿ ಒಂದು ಫೋರ್ ಬಾರಿಗೆ ಐದು ರನ್ ಗಳಿಸಿದ್ದಾರೆ. ಅಶ್ವಿನ್ ಒಂದು ರನ್ ಗಳಿಸಿದ್ದಾರೆ. ಎರಡನೇ ಓವರ್ ಅನ್ನು ಸುನೀಲ್ ರಾವ್ ಮಾಡುತ್ತಿದ್ದಾರೆ.

ತೆಲುಗು ವಾರಿಯರ್ಸ್ ತಂಡದ ನಾಯಕ ಅಖಿಲ್ ಅಕ್ಕಿನೇನಿ ಹಾಗೂ ಅಶ್ವಿನ್ ಬ್ಯಾಟಿಂಗ್ ಮಾಡುವುದಕ್ಕೆ ಕಣಕ್ಕೆ ಇಳಿದಿದ್ದಾರೆ. ಕರ್ನಾಟಕ ಬಿಲ್ಡೋಜರ್ ಪರ ಜಯರಾಂ ಕಾರ್ತಿಕ್ ಬೌಲಿಂಗ್ ಮಾಡುತ್ತಿದ್ದಾರೆ.

ಕರ್ನಾಟಕ ಬುಲ್ಡೋಜರ್ಸ್ ಮೊದಲ ಇನ್ನಿಂಗ್ಸ್ ಮುಕ್ತಾಯ ಆಗಿದೆ. ಡಾರ್ಲಿಂಗ್ ಕೃಷ್ಣ ಅವರ ಅದ್ಭುತ ಬ್ಯಾಟಿಂಗ್ ನಿಂದ ಬೃಹತ್ ಮೊತ್ತವನ್ನು ಕಲೆ ಹಾಕಿದೆ. 10 ಓವರ್‌ಗಳಲ್ಲಿ ಕರ್ನಾಟಕ ಬುಲ್ಡೋಜರ್ ತಂಡ 113 ರನ್‌ಗಳನ್ನು ಕಲೆ ಹಾಕಿದ್ದು, 3 ವಿಕೆಟ್‌ಗಳನ್ನು ಕಳೆದುಕೊಂಡಿದೆ.

ಕರ್ನಾಟಕ ಬುಲ್ಡೋಜರ್ vs ತೆಲುಗು ವಾರಿಯರ್ಸ್‌ ನಡುವಿನ ಪಂದ್ಯದಲ್ಲಿ 100 ರನ್‌ಗಳನ್ನು ಕಲೆ ಹಾಕಿದೆ. ಡಾರ್ಲಿಂಗ್ ಕೃಷ್ಣ ಅದ್ಬುತ ಬ್ಯಾಟಿಂಗ್ ಮಾಡಿದ್ದಾರೆ. 9 ಓವರ್‌ಗಳಲ್ಲಿ 100 ರನ್‌ಗಳನ್ನು ಕಲೆ ಹಾಕಿದ್ದಾರೆ. ಡಾರ್ಲಿಂಗ್ ಕೃಷ್ಣ 69 ರನ್ ಗಳಿಸಿದ್ದಾರೆ. 100 ಕ್ಕೆ 3 ವಿಕೆಟ್‌ಗಳನ್ನು ಕಳೆದುಕೊಂಡಿದೆ.

ಕರ್ನಾಟಕ ಬುಲ್ಡೋಜರ್ ತಂಡದ ಪರ ಡಾರ್ಲಿಂಗ್ ಕೃಷ್ಣ ಅದ್ಬುತ ಬ್ಯಾಟಿಂಗ್ ಮಾಡಿದ್ದಾರೆ. ಸುಮಾರು 8 ಓವರ್‌ಗಳಿಗೆ 86 ರನ್‌ಗಳನ್ನು ಕಲೆ ಹಾಕಿದ್ದಾರೆ.

ಕರ್ನಾಟಕ ಬುಲ್ಡೋಜರ್ ತಂಡದ ಮೂರನೇ ವಿಕೆಟ್ ಪಥನ. ಎರಡು ರನ್ ಗಳಿಸಿ ಮಂಜುನಾಥ್ ಗೌಡ ಪೆವಿಲಿಯನ್‌ಗೆ ಮರಳಿದ್ದಾರೆ. ತೆಲುಗು ವಾರಿಯರ್ಸ್ ತಂಡದ ಖಾಯ್ಯಂಗೆ ವಿಕೆಟ್ ಅನ್ನು ಅರ್ಪಿಸಿದ್ದಾರೆ. ಮುಂದಿನ ಆಟಗಾರ ಕರಣ್ ಆರ್ಯನ್.

ಕರ್ನಾಟಕ ಬುಲ್ಡೋಜರ್‌ನ ಮತ್ತೊಂದು ವಿಕೆಟ್ ಪತನ. ಜಯರಾಂ ಕಾರ್ತಿಕ್ ರನ್‌ಔಟ್ ಆಗಿದ್ದಾರೆ. ಮೂರು ಓವರ್‌ಗಳಲ್ಲಿ 18 ರನ್‌ಗೆ 2 ವಿಕೆಟ್‌ಗಳನ್ನು ಕಳೆದುಕೊಂಡಿದೆ. ಮಂಜುನಾಥ್ ಗೌಡ ಬ್ಯಾಟಿಂಗ್‌ಗೆ ಆಗಮಿಸಿದ್ದಾರೆ.

ರಾಜೀವ್ ಆಟ ನೋಡುವುದಕ್ಕೆ ಬಂದಿದ್ದ ಪ್ರೇಕ್ಷಕರಿಗೆ ನಿರಾಸೆ. ಮೊದಲ ಓವರ್‌ನ ಕೊನೆಯ ಬಾಲ್‌ನಲ್ಲಿ ರಾಜೀವ್ ತೆಲುಗು ವಾರಿಯರ್ಸ್ ತಂಡದ ಆರಂಭಿಕ ಬೌಲರ್ ಆದಿಗೆ ವಿಕೆಟ್ ಒಪ್ಪಿಸಿದ್ದಾರೆ. ಮೊದಲ ಓವರ್‌ಗಳ ಮುಕ್ತಾಯಕ್ಕೆ 6ಕ್ಕೆ ಒಂದು ವಿಕೆಟ್ ಕಳೆದುಕೊಂಡಿದೆ.

ಕರ್ನಾಟಕ ಬುಲ್ಡೋಜರ್ ಹಾಗೂ ತೆಲುಗು ವಾರಿಯರ್ಸ್ ತಂಡದ ನಡುವಿನ ಹೈ ವೋಲ್ಟೇಜ್ ಪಂದ್ಯ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯುತ್ತಿದೆ. ಈ ಪಂದ್ಯವನ್ನು ನೋಡುವುದಕ್ಕೆ ಸುಮಾರು 30 ಸಾವಿರ ಮಂದಿ ಸ್ಟೇಡಿಯಂಗೆ ಆಗಮಿಸಿದ್ದಾರೆ. ಎರಡನೇ ಪಂದ್ಯಕ್ಕೆ ಪ್ರೇಕ್ಷಕರಿಂದ ಅದ್ಭುತ ರೆಸ್ಪಾನ್ಸ್ ಸಿಕ್ಕಿದೆ.

ಕರ್ನಾಟಕ ಬುಲ್ಡೋಜರ್ಸ್ vs ತೆಲುಗು ವಾರಿಯರ್ಸ್ ಪಂದ್ಯದ ಟಾಸ್ ಮುಕ್ತಾಯವಾಗಿದೆ. ಟಾಸ್ ಗೆದ್ದು ತೆಲುಗು ವಾರಿಯರ್ಸ್ ತಂಡ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿದೆ. ಇದಕ್ಕು ಮುನ್ನ ಕರ್ನಾಟಕ ಡಿಸಿಎಂ ಡಿ. ಕೆ ಶಿವಕುಮಾರ್ ಮೈದಾನಕ್ಕೆ ಬಂದು ಎರಡೂ ತಂಡಗಳಿಗೆ ಶುಭ ಹಾರೈಸಿದರು.

ಕರ್ನಾಟಕ ಬುಲ್ಡೋಜರ್ ಹಾಗೂ ತೆಲುಗು ವಾರಿಯರ್ಸ್ ತಂಡದ ನಡುವಿನ ಪಂದ್ಯದಲ್ಲಿ ಟಾಸ್ ಗೆದ್ದ ಅಖಿಲ್ ಅಕ್ಕಿನೇನಿ ಬೌಲಿಂಗ್ ಆಯ್ಕೆ ಮಾಡಿಕೊಂಡಿದ್ದಾರೆ. ಹೀಗಾಗಿ ಕರ್ನಾಟಕ ಬುಲ್ಡೋಜರ್ ತಂಡ ಬ್ಯಾಟಿಂಗ್ ಮಾಡಬೇಕಿದೆ. ಇದೇ ವೇಳೆ ಕಿಚ್ಚ ಸುದೀಪ್ ಪ್ರೇಕ್ಷಕರಿಗೆ ಧನ್ಯವಾದಗಳನ್ನು ಅರ್ಪಿಸಿದ್ದಾರೆ.

ಸಿಸಿಎಲ್ 2025 ಎರಡನೇ ಪಂದ್ಯ ಆರಂಭ ಆಗುತ್ತಿದೆ. ಕರ್ನಾಟಕ ಬುಲ್ಡೋಜರ್ ಹಾಗೂ ತೆಲುಗು ವಾರಿಯರ್ಸ್ ತಂಡದ ನಡುವೆ ಪಂದ್ಯ ಆರಂಭ ಆಗುತ್ತಿದೆ. ಅದಕ್ಕೂ ಮುನ್ನ ಕರ್ನಾಟಕದ ಉಪಮುಖ್ಯ ಮಂತ್ರಿ ಡಿಕೆ ಶಿವಕುಮಾರ್ ಆಗಮಿಸಿದ್ದಾರೆ. ಎರಡು ತಂಡದ ಆಟಗಾರರ ಪರಿಚಯ ಮಾಡಲಾಗಿದೆ. ಕರ್ನಾಟಕ ಬುಲ್ಡೋಜರ್‌ ಪರ ಕಿಚ್ಚ ಸುದೀಪ್ ಹಾಗೂ ತೆಲುಗು ವಾರಿಯರ್ಸ್ ಪರ ಅಖಿಲ್ ಅಕ್ಕಿನೇನಿ ಪರಿಚಯ ಮಾಡಿಕೊಟ್ಟಿದ್ದಾರೆ.

ಕೊನೆ 18 ಎಸೆತಗಳಲ್ಲಿ ಚೆನ್ನೈ ರೈನೋಸ್ ತಂಡಕ್ಕೆ ಗೆಲ್ಲಲು 46 ರನ್‌ಗಳ ಅಗತ್ಯವಿದೆ. ಸದ್ಯ 3 ವಿಕೆಟ್ ಕಳೆದುಕೊಂಡು 55 ರನ್ ಗಳಿಸಿದೆ. ಪಂದ್ಯ ರೋಚಕ ಘಟ್ಟಕ್ಕೆ ತಲುಪಿತ್ತು. ಅಂತಿಮವಾಗಿ ತಂಡ 5 ವಿಕೆಟ್ ನಷ್ಟಕ್ಕೆ 88 ರನ್ ಗಳಿಸಿ ಸೋಲು ಒಪ್ಪಿಕೊಂಡಿದೆ.

ಚೆನ್ನೈ ರೈನೋಸ್ ಸೆಕೆಂಡ್ ಇನ್ನಿಂಗ್‌ನಲ್ಲಿ ಸ್ಟಂಪ್ ಔಟ್‌ವೊಂದು ಬಹಳ ಚರ್ಚೆ ಹುಟ್ಟುಹಾಕಿತು. 3ನೇ ಓವರ್ ಎರಡನೇ ಬಾಲ್ ಅನ್ನು ವಿಕ್ರಾಂತ್ ಎದುರಿಸಿದರು. ಆ ಬಳಿಕ ಬಾಲ್ ಆಕ್ಷನ್ ಮುಗಿಯಿತು ಎಂದು ಕ್ರೀಸ್‌ನಿಂದ ಹೊರಕ್ಕೆ ಬಂದರು. ಈ ವೇಳೆ ಕೀಪರ್ ಸ್ಟಂಪ್ ಮಾಡಿ ಔಟ್ ಎಂದು ಅಪೀಲ್ ಮಾಡಿದರು. ಥರ್ಡ್ ಅಂಪೇರ್ ಔಟ್ ಎಂದರು. ಇದಕ್ಕೆ ಚೆನ್ನೈ ರೈನೋಸ್ ತಂಡ ಬೇಸರ ವ್ಯಕ್ತಪಡಿಸಿದರು.

ಎರಡನೇ ಇನ್ನಿಂಗ್ಸ್‌ನಲ್ಲಿ ಬೆಂಗಾಲ್ ಟೈಗರ್ಸ್ ತಂಡ 10 ಓವರ್‌ಗಳಲ್ಲಿ ರನ್ ಗಳಿಸಿದೆ. ಆ ಮೂಲಕ ಚೆನ್ನೈ ರೈನೋಸ್ ತಂಡಕ್ಕೆ 101 ರನ್‌ಗಳ ಗುರಿ ನೀಡಿದೆ.

ಮೊದಲ ಇನಿಂಗ್ಸ್‌ನಲ್ಲಿ ಬ್ಯಾಟಿಂಗ್‌ನಲ್ಲಿ ರನ್ ಗಳಿಸಲು ಪರದಾಡಿದ ಬೆಂಗಾಲ್ ಟೈಗರ್ಸ್ ಎರಡನೇ ಇನಿಂಗ್ಸ್‌ನಲ್ಲಿ 07 ಓವರ್‌ಗಳಲ್ಲಿ ಕೇವಲ ಒಂದು ವಿಕೆಟ್ ನಷ್ಟಕ್ಕೆ 81ರನ ಕಲೆ ಹಾಕಿದೆ. ಜಾಯ್ ಬಿರುಸಿನ 30 ರನ್ ಗಳಿಸಿದ ಔಟಾದರೆ ರಾಹುಲ್ 36ರನ್ ಗಳಿಸಿ ಇನ್ನು ಕ್ರೀಸ್‌ನಲ್ಲಿದ್ದಾರೆ. ಇನ್ನು ಮೂರು ಓವರ್ ಬಾಕಿ ಇದ್ದು ಚೆನ್ನೈಗೆ 100 ರನ್‌ಗಳ ಮೇಲಿನ ಟಾರ್ಗೆಟ್‌ ನ ಬೆಂಗಾಲ್ ನೀಡುವ ಸಾಧ್ಯತೆ ಇದೆ.

ಮೊದಲ ಇನ್ನಿಂಗ್‌ನಲ್ಲಿ ಚೆನ್ನೈ ರೈನೋಸ್ ತಂಡ 90 ಗಳಿಸಿ 11 ರನ್‌ಗಳ ಮುನ್ನಡೆ ಪಡೆದಿದೆ. ಎರಡನೇ ಇನ್ನಿಂಗ್ಸ್‌ನಲ್ಲಿ ಬೆಂಗಾಲ್ ಟೈಗರ್ಸ್ ತಂಡ ಉತ್ತಮ ಪ್ರದರ್ಶನ ನೀಡುತ್ತಿದೆ. 7 ಓವರ್‌ಗಳಲ್ಲಿ 80 ರನ್ ಗಳಿಸಿದೆ. ದೊಡ್ಡ ಮೊತ್ತವನ್ನು ಚೆನ್ನೈಗೆ ಟಾರ್ಗೆಟ್ ಆಗಿ ನೀಡುವ ಸಾಧ್ಯತೆಯಿದೆ.

79 ರನ್ ಗಳ ಗುರಿಯನ್ನು ಬೆನ್ನತ್ತಿದ ಚೆನ್ನೈ ರೈನೋಸ್ ತಂಡ ಮೊದಲ ಇನಿಂಗ್ಸ್‌ನಲ್ಲಿ ಕೇವಲ ಹನ್ನೊಂದು ರನ್‌ಗಳ ಲೀಡ್ ಪಡೆದಿದೆ. ಹತ್ತು ಓವರ್‌ಗಳಲ್ಲಿ ನಾಲ್ಕು ವಿಕೆಟ್ ಕಳೆದುಕೊಂಡು 90 ರನ್ ಗಳಿಸಿದೆ. ಅಜಯ್ 20 ಮತ್ತು ಪೃಥ್ವಿ 14 ರನ್ ಗಳಿಸಿ ಅಜಯರಾಗಿ ಉಳಿದಿದ್ದಾರೆ. ಹಾಗೇ ನೋಡಿದರೆ ನೂರು ರನ್‌ಗಳ ಗಡಿಯನ್ನು ದಾಟುವ ಸುವರ್ಣ ಅವಕಾಶ ಚೆನ್ನೈ ಬಳಿ ಇತ್ತು. ಆದರೆ 08ನೇ ಓವರ್‌ನಲ್ಲಿ ಬೆಂಗಾಲ್ ಟೈಗರ್ಸ್‌ ಚೆನ್ನೈ ತಂಡಕ್ಕೆ ಕೇವಲ ಮೂರು ರನ್ ಮಾತ್ರ ಗಳಿಸಲು ಅವಕಾಶ ನೀಡಿತು.

ಚೆನ್ನೈ ರೈನೋಸ್ ತಂಡ ಮೊದಲ ಇನ್ನಿಂಗ್ಸ್‌ನಲ್ಲಿ ಭರ್ಜರಿ ಬ್ಯಾಟಿಂಗ್ ಮಾಡಿದೆ. ಬೆಂಗಾಲ್ ಟೈಗರ್ ಅನ್ನು ಸಾಧಾರಾಣ ಮೊತ್ತಕ್ಕೆ ಕಟ್ಟಿ ಹಾಕುವಲ್ಲಿ ಯಶಸ್ಸಿಯಾಗಿದ್ದ ಚೆನ್ನೈ ರೈನೋಸ್ ಮೊದಲ ಇನ್ನಿಂಗ್ಸ್ ಬ್ಯಾಟಿಂಗ್ ಆರಂಭಿಸಿತ್ತು. ಮೊದಲ ಐದು ಓವರ್‌ಗಳಲ್ಲಿ ಕಂಟ್ರೋಲ್ ಬ್ಯಾಟಿಂಗ್ ನಾಡಿದೆ. ರಮಣ ಹಾಗೂ ಶರಣ್ ಇಬ್ಬರೂ ಅದ್ಭುತ ಬ್ಯಾಟಿಂಗ್ ಮಾಡಿದ್ದು, ರಮಣ 28 ರನ್ ಹಾಗೂ ಶರಣ್ 20 ಕಲೆ ಹಾಕಿ ತಂಡದ ಮೊತ್ತವನ್ನು ಐದು ಓವರ್‌ಗಳಲ್ಲಿ 50 ರನ್‌ಗಳನ್ನು ಕೂಡಿ ಹಾಕಿದ್ದಾರೆ. ಶರಣ್ ಓವರ್‌ನ ಕೊನೆಯ ಓವರ್‌ನಲ್ಲಿ ವಿಕೆಟ್ ಒಪ್ಪಿಸಿದ್ದರು.

ತಲಾ 10 ಓವರ್‌ಗಳ 4 ಇನ್ನಿಂಗ್ಸ್‌ಗಳಲ್ಲಿ ಸಿಸಿಎಲ್ ಪಂದ್ಯಗಳು ನಡೆಯುತ್ತವೆ. ಬೆಂಗಾಲ್ ಟೈಗರ್ಸ್ ಮೊದಲ ಇನ್ನಿಂಗ್ಸ್ ಬಳಿಕ ಚೆನ್ನೈ ರೈನೋಸ್ ಇನ್ನಿಂಗ್ಸ್ ಆರಂಭಿಸಿದೆ. 79 ರನ್‌ಗಳನ್ನು ಬೆನ್ನತ್ತಿದೆ. ಉತ್ತಮವಾಗಿ ಶುಭಾರಂಭ ಮಾಡಿದ್ದು ಮೊದಲ 2 ಓವರ್‌ಗಳಲ್ಲಿ ವಿಕೆಟ್ ಕಳೆದುಕೊಳ್ಳದೇ 20 ರನ್ ಗಳಿಸಿದೆ.

ಮೊದಲ 10 ಓವರ್‌ಗಳಲ್ಲಿ ಬೆಂಗಾಲ್ ಟೈಗರ್ಸ್ ತಂಡ 79 ಗಳಿಸಿದೆ. 5 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದೆ. ಜಾಮಿ 22, ಜೋಯ್ 19 ಗಳಿಸಿ ಔಟ್ ಆಗಿದ್ದಾರೆ. ಸದ್ಯ ಯೂಸುಫ್ ಹಾಗೂ ರತ್ನದೀಪ್ ಕ್ರೀಸ್‌ನಲ್ಲಿದ್ದಾರೆ. 2 ಓವರ್‌ಗಳಲ್ಲಿ 16 ರನ್ ನೀಡಿ ಕಾಳೈ 2 ವಿಕೆಟ್ ಒಡೆದಿದ್ದಾರೆ. ಚೆನ್ನೈ ರೈನೋಸ್ ತಂಡದ ಶರಣ್ ಹಾಗೂ ಭರತ್ ತಲಾ ಒಂದು ವಿಕೆಟ್ ಕಬಳಿಸಿದ್ದಾರೆ.

7 ಓವರ್‌ಗಳಲ್ಲಿ ಬೆಂಗಾಲ್ ಟೈಗರ್ಸ್ ತಂಡ 4 ವಿಕೆಟ್ ಕಳೆದುಕೊಂಡು 41 ರನ್ ಗಳಿಸಿದೆ. ಆರಂಭದಲ್ಲೇ ತಂಡದ ಬ್ಯಾಟಿಂಗ್ ಕುಸಿತ ಕಂಡಿದೆ. ಚೆನ್ನೈ ರೈನೋಸ್ ತಂಡ ಉತ್ತಮವಾಗಿ ಆಟ ಆರಂಭಿಸಿದೆ.

ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಬೆಂಗಾಲ್ ಟೈಗರ್ಸ್ ತಂಡ ಚೆನ್ನೈ ತಂಡದ ಬೌಲಿಂಗ್‌ಗೆ ಹೈರಾಣಾಯ್ತು. ಇನ್ನು ಕರಾರುವಕ್ಕಾಗಿ ಬೌಲಿಂಗ್ ಮಾಡುವುದಲ್ಲದೇ ಚೆನ್ನೈ ತಂಡ ಅಷ್ಟೇ ಅದ್ಭುತವಾಗಿ ಫೀಲ್ಡಿಂಗ್‌ನ್ನು ಕೂಡ ಮಾಡಿತು. ಹೀಗಾಗಿ ರನ್ ಗಳಿಸಲು ಪರದಾಡಿದ ಬೆಂಗಾಲ್ ತಂಡದ ಆಟಗಾರರು ಆಕ್ರಮಣಕಾರಿ ಹೊಡೆತಕ್ಕೆ ಕೈ ಹಾಕಿದರು. ವಿಕೆಟ್ ಕೈ ಚೆಲ್ಲಿದರು. 07 ಓವರ್ ಆದರೂ ಕೂಡ 40 ರನ್ ಗಳಿಸಿದ ಬೆಂಗಾಲ್ ಗೆ ಮೂರು ಬೌಂಡರಿಗಳನ್ನು ಹೊಡೆಯಲು ಮಾತ್ರ ಸಾಧ್ಯ ಆಯ್ತು. ಇನ್ನು ಜ್ಯಾಮಿ ಅವರನ್ನು ಹೊರತು ಪಡಿಸಿದರೆ ಬೇರೆ ಮೂರು ಪರಿಣಾಮಕಾರಿ ಆಟವನ್ನು ಆಡಲಿಲ್ಲ.

2011ರಲ್ಲಿ ಸಿಸಿಎಲ್ ಆರಂಭವಾಯ್ತು. ಅಲ್ಲಿಂದ ಇಲ್ಲಿಯವರೆಗೆ ಸಿಸಿಎಲ್ ನಡೆದುಕೊಂಡು ಬಂದಿದೆ. ಈ 13 ವರ್ಷಗಳಲ್ಲಿ ಹಲವು ತಂಡಗಳು ಚಾಂಪಿಯನ್ ಆಗಿವೆ. ಆ ಪೈಕಿ ಮೊದಲ ಎರಡು ಸೀಸನ್‌ನಲ್ಲಿ ಚೆನ್ನೈ ಟ್ರೋಫಿ ಮುಡಿಗೇರಿಸಿಕೊಂಡರೆ ಬೆಂಗಾಲ್ ಟೈಗರ್ಸ್ ಕಳೆದ ವರ್ಷ ಚಾಂಪಿಯನ್ ಆಗಿ ಹೊರ ಹೊಮ್ಮಿದೆ. ದೊಡ್ಡ ದೊಡ್ಡ ತಂಡಗಳನ್ನು ಹಿಂದಿಕ್ಕಿ ಇತಿಹಾಸ ನಿರ್ಮಾಣ ಮಾಡಿದೆ.ಇಂಥಾ ಚೆನ್ನೈ ಮತ್ತು ಬೆಂಗಾಲ್ ತಂಡ ಇಂದು ಸಿಸಿಎಲ್‌ನ ಮೊದಲ ಪಂದ್ಯದಲ್ಲಿ ಮುಖಾಮುಖಿಯಾಗಿವೆ. ಈ ಎರಡು ತಂಡಗಳಲ್ಲಿ ಇಂದು ಯಾರು ಗೆಲ್ಲುತ್ತಾರೆ ಎಂದು ಹೇಳುವುದು ಕಷ್ಟವಾದರೂ ಎರಡು ತಂಡಗಳ ಬಲಾಬಲ ಮೇಲ್ನೋಟಕ್ಕೆ ಚೆನ್ನಾಗಿಯೇ ಕಾಣುತ್ತಿದೆ.

ಬೆಂಗಾಲ್ ಟೈಗರ್ಸ್ ಹಾಗೂ ಚೆನ್ನೈ ರೈನೋಸ್ ಮೊದಲ ಪಂದ್ಯ ಕೆಲವೇ ಕ್ಷಣಗಳಲ್ಲಿ ಆರಂಭವಾಗಲಿದೆ. ಈಗಾಗಲೇ ಟಾಸ್ ಮುಗಿದಿದ್ದು ಟಾಸ್ ಗೆದ್ದ ಬೆಂಗಾಲ್ ಟೈಗರ್ಸ್ ತಂಡದ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿದೆ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಪಂದ್ಯ ನಡೆಯುತ್ತಿದೆ. ಈ ಪಂದ್ಯದ ಬಳಿಕ ಕರ್ನಾಟಕ ಬುಲ್ಡೋಜರ್ಸ್ vs ತೆಲುಗು ವಾರಿಯರ್ಸ್ ಪಂದ್ಯ ಶುರುವಾಗಲಿದೆ.

ಮೊದಲ ಪಂದ್ಯಕ್ಕೆ ಇನ್ನೇನು ಕೆಲವೇ ಕ್ಷಣಗಳು ಬಾಕಿ ಇವೆ. ಚಿನ್ನ ಸ್ವಾಮಿ ಕ್ರೀಡಾಂಗಣದತ್ತ ಅನೇಕ ಕ್ರಿಕೆಟ್ ಮತ್ತು ಸಿನಿಮಾ ಅಭಿಮಾನಿಗಳು ಮುಖ ಮಾಡಿದ್ದಾರೆ. ಇದರ ನಡುವೆ ಬೆಂಗಾಲ್ ಟೈಗರ್ಸ್ ತಂಡದ ನಾಯಕ ಜಿಸ್ಶು ಸೇನ್‌ಗುಪ್ತಾ ತಮ್ಮ ಖುಷಿಯನ್ನು ಹಂಚಿಕೊಂಡಿದ್ದಾರೆ. ಮೊದಲಿಗೆ ಬೆಂಗಾಲ್‌ನಲ್ಲಿರುವ ಎಲ್ಲ ತಮ್ಮ ಅಭಿಮಾನಿಗಳಿಗೆ ಹಿತೈಶಿಗಳಿಗೆ ಮನವಿಯನ್ನು ಮಾಡಿಕೊಂಡಿರುವ ಬೆಂಗಾಲ್ ನಾಯಕ ಜಿಸ್ಶು ಸೇನ್‌ಗುಪ್ತಾ ಕಳೆದ ವರ್ಷದಂತೆ ನಾವು ಚಾಂಪಿಯನ್ ಆಗಬೇಕು ಅಂದರೆ ಅದಕ್ಕೆ ನಿಮ್ಮ ಬೆಂಬಲ ಮತ್ತು ಪ್ರೀತಿ ಬೇಕು ಎಂದಿದ್ದಾರೆ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಆಡುವುದು ಒಂದು ರೀತಿ ನಮ್ಮೆಲ್ಲರಿಗೆ ಕನಸು, ಈ ಹತ್ತು ವರ್ಷಗಳಲ್ಲಿ ಇಲ್ಲಿ ಎಷ್ಟು ಬಾರಿ ಬಂದಿದ್ದೇವೆ, ಇಲ್ಲಿ ಆಡುವ ಅನುಭವವೇ ಬೇರೆ ಎಂದು ಹೇಳಿದ್ದಾರೆ. ನಿಮ್ಮ ಬೆಂಬಲವೂ ನಮಗೆ ಇರಲಿ ಎಂದಿದ್ದಾರೆ.

ತೆಲುಗು ವಾರಿಯರ್ಸ್ ತಂಡ ಚಿನ್ನಸ್ವಾಮಿ ಸ್ಟೇಡಿಯಂಗೆ ಬಂದಿಳಿದಿದೆ. ಅಖಿಲ್ ನೇತೃತ್ವದ ತಂಡದ ಆಟಗಾರರ ಮೈದಾನಕ್ಕಿಳಿದ ತಾಲೀಮು ನಡೆಸಿದ್ದಾರೆ. ಆದರ್ಶನ್, ಸಚಿನ್ ಜೋಶಿ, ಎಸ್ ತಮನ್ ಸೇರಿದಂತೆ ಇಡೀ ತಂಡ ಆಟಗಾರರು ತಾಲೀಮಿನ ವೇಳೆ ಕಾಣಿಸಿಕೊಂಡಿದ್ದಾರೆ. ಸಂಜೆ ಕರ್ನಾಟಕ ಬುಲ್ಡೋಜರ್ಸ್ ಎದುರು ತೆಲುಗು ವಾರಿಯರ್ಸ್ ತಂಡ ಸೆಣೆಸಲಿದೆ.

ಸಿಸಿಎಲ್ 2025 ಪಂದ್ಯ ಇಂದಿನಿಂದ ಆರಂಭ ಆಗುತ್ತಿದೆ. ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಮಧ್ಯಾಹ್ನ 2 ಗಂಟೆಯಿಂದ ಬೆಂಗಾಲ್ ಟೈಗರ್ ತಂಡದೊಂದಿಗೆ ಚೆನ್ನೈ ರೈನೋಸ್ ತಂಡ ಸೆಣೆಸಾಡಲಿದೆ. ಪಂದ್ಯ ಆರಂಭಕ್ಕೆ ಇನ್ನೇನು ಕೆಲವೇ ಕ್ಷಣಗಳು ಬಾಕಿ ಉಳಿದಿವೆ. ಮೊದಲ ಪಂದ್ಯ ಆಗುವುದಕ್ಕೆ ಚೆನ್ನೈ ರೈನೋಸ್ ತಂಡ ಬೆಂಗಳೂರಿಗೆ ಬಂದಿಳಿದಿದೆ. ತಮಿಳು ನಟ ಆರ್ಯ ಚೆನ್ನೈ ರೈನೋಸ್ ತಂಡವನ್ನು ಮುನ್ನೆಡೆಸಲಿದ್ದಾರೆ.

ಈ ಬಾರಿ ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಒಂದೇ ಒಂದು ದಿನ ಸಿಸಿಎಲ್ ಪಂದ್ಯಗಳು ನಡೆಯಲಿವೆ. ಈ ಎರಡು ಪಂದ್ಯಗಳು ಬಿಟ್ಟರೆ ಮತ್ತೆ ಚಿನ್ನಸ್ವಾಮಿಯಲ್ಲಿ ಮ್ಯಾಚ್‌ಗಳು ಇಲ್ಲ. ಅದರಲ್ಲೂ ಕರ್ನಾಟಕ ಬುಲ್ಡೋಜರ್ಸ್ ತಂಡ ತೆಲುಗು ವಾರಿಯರ್ಸ್ ತಂಡದ ಜೊತೆ ಮೈದಾನದಲ್ಲಿ ಸೆಣೆಸಾಡುವುದನ್ನು ಕಣ್ತುಂಬಿಕೊಳ್ಳುವುದಕ್ಕೆ ಜನರು ಎದುರು ನೋಡುತ್ತಿದ್ದಾರೆ. ಈ ಪಂದ್ಯವನ್ನು ವೀಕ್ಷಿಸಲು ವೀಕ್ಷಕರು ಉತ್ಸಾಹ ತೋರಿದ್ದಾರೆ. ಹೀಗಾಗಿ ಪಂದ್ಯ ಎಲ್ಲಾ ಟಿಕೆಟ್‌ಗಳು ಸೋಲ್ಡ್ ಆಗಿವೆ. ಇನ್ನೂ ಟಿಕೆಟ್‌ಗಳಿಗೆ ಬೇಡಿಕೆ ಇದ್ದು, ಪಂದ್ಯ ಆರಂಭ ಆಗುವುದಕ್ಕೂ ಎರಡು ದಿನ ಮುನ್ನವೇ ಎಲ್ಲಾ ಟಿಕೆಟ್‌ಗಳು ಸೋಲ್ಡ್ ಔಟ್ ಆಗಿವೆ.

ಬೆಂಗಳೂರಿನ ಎಂ ಚಿನ್ನಸ್ವಾಮಿ ಕ್ರೀಡಾಂಗಣದ ಪಿಚ್ ಬ್ಯಾಟ್ಸ್‌ಮನ್‌ಗಳ ಸ್ವರ್ಗ ಎಂದು ಪರಿಗಣಿಸಲಾಗಿದೆ. ಮೈದಾನದ ಔಟ್ ಫೀಲ್ಡ್ ಹಸಿರಾಗಿದ್ದು ಚೆಂಡು ಬ್ಯಾಟ್‌ಗೆ ಚೆನ್ನಾಗಿ ಬರುತ್ತದೆ. ಮಧ್ಯಮ ಓವರ್‌ಗಳಲ್ಲಿ ಸ್ಪಿನ್ನರ್‌ಗಳಿಗೆ ಪಿಚ್‌ನಿಂದ ಸಹಾಯ ಸಿಗುವ ನಿರೀಕ್ಷೆ ಇದ್ದು, ಮೈದಾನ ಚಿಕ್ಕದಾಗಿರುವುದರಿಂದ ಬೌಂಡರಿ, ಸಿಕ್ಸರ್​ಗಳ ಮಳೆ ಸುರಿಯುವುದನ್ನು ಈ ಹಿಂದಿನ ಪಂದ್ಯದಲ್ಲಿ ನಾವು ನೋಡಿದ್ದೇವೆ. ಹೀಗಾಗಿ ಇಂದಿನ ಪಂದ್ಯಗಳಲ್ಲಿ ಕೂಡ ಫೋರ್ ಮತ್ತು ಸಿಕ್ಸರ್‌ಗಳ ಸುರಿಮಳೆಯನ್ನು ಎದುರು ನೋಡಬಹುದು.

ಆರ್ಯ { ಕ್ಯಾಪ್ಟನ್ } ಭರತ್, ಶಾಮ್, ಬೋಸ್ ವೆಂಕಟ್, ಹೇಮಚಂದ್ರನ್, ಕಲೈಯರಸನ್, ಮಹೇಂದ್ರನ್, ನಂದಾ, ಪೃಥ್ವಿ, ರಮಣ, ಸಂಜಯ್ ಭಾರತಿ, ಶಂತನು, ಶರಣ್, ಉದಯ್ ಕುಮಾರ್, ವಿಕ್ರಾಂತ್, ವಿಷ್ಣು

ಜಿಸ್ಶು ಸೇನ್‌ಗುಪ್ತಾ { ಕ್ಯಾಪ್ಟನ್ } ಇಂದ್ರಶಿಶ್, ಮೋಹನ್, ಸುಮನ್, ಜಾಯ್, ಜೋ, ಯೂಸುಫ್, ಜೀತು ಕಮಲ್, ಜಮ್ಮಿ, ರತ್ನದೀಪ್ ಘೋಷ್, ಆನಂದ್ ಚೌಧರಿ, ಸ್ಯಾಂಡಿ, ಆದಿತ್ಯ ರಾಯ್ ಬ್ಯಾನರ್ಜಿ, ಅರ್ಮಾನ್ ಅಹಮದ್, ಮಾಂಟಿ, ರಾಹುಲ್ ಮಜುಂದಾರ್, ಗೌರವ್ ಚಕ್ರವರ್ತಿ, ಬೋನಿ, ಸೌರವ್ ದಾಸ್

ಇಂದು ಬೆಂಗಾಲ್ ಮತ್ತು ಚೆನ್ನೈ ನಡುವೆ ಮೊದಲ ಮ್ಯಾಚ್ ಶುರುವಾಗಲಿದೆ. ಈ ಮೂಲಕ ಸಿಸಿಎಲ್ ಗೆ ಚಾಲನೆ ಸಿಗಲಿದೆ. ಇನ್ನು ಬೆಂಗಾಲ್ ತಂಡಕ್ಕೆ ಚೊಚ್ಚಲ ಸಿಸಿಎಲ್ ಪ್ರಶಸ್ತಿಯನ್ನು ತಂದು ಕೊಟ್ಟಿದ್ದ ಜಿಸ್ಶು ಸೇನ್‌ಗುಪ್ತಾ ಈ ಬಾರಿ ಕೂಡ ತಂಡವನ್ನು ಮುನ್ನಡೆಸಲಿದ್ದು ಚೆನ್ನೈ ತಂಡವನ್ನು ಆರ್ಯ ಮುನ್ನಡೆಸಲಿದ್ದಾರೆ. ಕಳೆದ ಬಾರಿ ಬೆಂಗಾಲ್ ಟೈಗರ್ಸ್, ಕರ್ನಾಟಕ ಬುಲ್ಡೋಜರ್ಸ್ ತಂಡವನ್ನು ಫೈನಲ್‌ನಲ್ಲಿ ಮಣಿಸಿತ್ತು. ಹೀಗಾಗಿ ಸಹಜವಾಗಿ ಬೆಂಗಾಲ್‌ ಆಟಗಾರರ ಆತ್ಮ ವಿಶ್ವಾಸ ಹೆಚ್ಚಿದೆ. ಈ ಬಾರಿ ಕೂಡ ಕಳೆದ ವರ್ಷದ ಮ್ಯಾಜಿಕ್ ರಿಕ್ರಿಯೇಟ್ ಮಾಡುವ ಕಿಚ್ಚಿದೆ. ಚೆನ್ನೈ ತಂಡ ಬೆಂಗಾಲ್‌ನ ಈ ಆತ್ಮವಿಶ್ವಾಸಕ್ಕೆ ಪೆಟ್ಟು ನೀಡುತ್ತಾ ಎನ್ನುವುದಕ್ಕೆ ಉತ್ತರ ಕೆಲವೇ ಗಂಟೆಗಳಲ್ಲಿ ಸಿಗಲಿದೆ.

ಕರ್ನಾಟಕ ಬುಲ್ಡೋಜರ್ಸ್ ತಂಡದಲ್ಲಿ ಕಿಚ್ಚ ಸುದೀಪ್, ಗಣೇಶ್, ಡಾರ್ಲಿಂಗ್ ಕೃಷ್ಣ, ರಾಜೀವ್ ಸ್ಟಾರ್ ಪ್ಲೇಯರ್ಸ್ ಎನಿಸಿಕೊಂಡಿದ್ದಾರೆ. ತೆಲುಗು ವಾರಿಯರ್ಸ್ ತಂಡದಲ್ಲಿ ಅಖಿಲ್, ಆದರ್ಶ್, ಸಚಿನ್ ಜೋಶಿ ಆಲ್‌ರೌಂಡರ್‌ಗಳಾಗಿ ತಂಡದ ಆಧಾರ ಸ್ತಂಭ ಎನಿಸಿಕೊಂಡಿದ್ದಾರೆ.

ಸಿಸಿಎಲ್‌ನ ರಣರೋಚಕ ಪಂದ್ಯಗಳನ್ನು ನೀವು ಮನೆಯಲ್ಲಿಯೇ ಕುಳಿತು ನೋಡಬಹುದು. ಟೂರ್ನಾಮೆಂಟ್‌ ಡಿಸ್ನಿ + ಹಾಟ್ ಸ್ಟಾರ್ ಮತ್ತು ಸೋನಿ ಸ್ಫೋರ್ಟ್ಸ್ 3ಯಲ್ಲಿ ಪ್ರಸಾರವಾಗಲಿದ್ದು ಕಿರುತೆರೆಯಲ್ಲಿ ಕರ್ನಾಟಕ ಬುಲ್ದೋಜರ್ಸ್‌ ತಂಡದ ಪಂದ್ಯಗಳನ್ನು ನೀವು ಸ್ಟಾರ್ ಸುವರ್ಣದಲ್ಲಿ ನೋಡಬಹುದು. ಕನ್ನಡದಲ್ಲಿಯೇ ಕಾಮೆಂಟರಿ ಕೇಳುತ್ತಾ ಮ್ಯಾಚ್‌ ಎಂಜಾಯ್ ಮಾಡಬಹುದು. ಇನ್ನು ಸ್ಟಾರ್ ವಿಜಯ್ ಸೂಪರ್ ತಮಿಳಿನಲ್ಲಿ ಚೆನ್ನೈ ರೈನ್ಹೋಸ್ ಪಂದ್ಯಗಳನ್ನು ಪ್ರಸಾರ ಮಾಡಲಿದೆ.

2025ರ ಬಹು ನಿರೀಕ್ಷಿತ ಸೆಲೆಬ್ರಿಟಿ ಕ್ರಿಕೆಟ್ ಲೀಗ್ ಇಂದು ಶುರುವಾಗಲಿದೆ. ಈ ಹಿನ್ನೆಲೆಯಲ್ಲಿ ಸುದೀಪ್ ತಮ್ಮ ತಂಡದ ಸದಸ್ಯರ ಜೊತೆ ಮನಸಾರೆ ಮಾತನಾಡಿದ್ದಾರೆ. ಧೈರ್ಯ ತುಂಬಿದ್ದಾರೆ. ತಂಡದ ನಾಯಕನಾಗಿ ಎಲ್ಲರಲ್ಲಿಯೂ ಆತ್ಮವಿಶ್ವಾಸವನ್ನು ತುಂಬಿದ್ದಾರೆ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಪ್ರ್ಯಾಕ್ಟೀಸ್ ಮಾಡುತ್ತಿದ್ದ ಸಮಯದಲ್ಲಿ ತಂಡವನ್ನು ಉದ್ದೇಶಿಸಿ ಸುದೀಪ್ ಮಾತನಾಡಿದ್ದಾರೆ. ತಮ್ಮ ತನು ಮನ ಅರ್ಪಿಸಿ ಆಡುವಂತೆ ಕರೆ ನೀಡಿದ್ದಾರೆ.