ಎಷ್ಟು ಬಾರಿ ನೋಡಿದ್ರೂ ಬೋರೇ ಆಗದ ಪವರ್ ಸ್ಟಾರ್ ನಟನೆಯ 5 ಸಿನಿಮಾಗಳಿವು!

ಪವರ್‌ಸ್ಟಾರ್ ಪುನೀತ್ ರಾಜ್‌ಕುಮಾರ್ ನಾಯಕನಾಗಿ ಎಂಟ್ರಿ ಕೊಟ್ಟ ಮೊದಲ ಅಪ್ಪು. ಈ ಸಿನಿಮಾವನ್ನು ಪುರಿ ಜಗನ್ನಾಥ್ ನಿರ್ದೇಶಿಸಿದ್ದು, 2002ರ ಏಪ್ರಿಲ್ 26ರಂದು ರಿಲೀಸ್ ಆಗಿತ್ತು. ಈ  ಸಿನಿಮಾದಲ್ಲಿ ಅಪ್ಪು ಆಕ್ಷನ್, ಡ್ಯಾನ್ಸ್ ನೋಡಿ ಅಭಿಮಾನಿಗಳು ಕುಣಿದು ಕುಪ್ಪಳಿಸಿದ್ದರು. ಲವ್‌ಸ್ಟೋರಿ, ಆಕ್ಷನ್, ಕಾಮಿಡಿ ಎಲ್ಲಾ ಎಲಿಮೆಂಟ್ಸ್‌ ಈ ಸಿನಿಮಾದಲ್ಲಿತ್ತು. ಅಪ್ಪು ನಾಯಕನಾದ ಮೊದಲ ಸಿನಿಮಾ ಥಿಯೇಟರ್‌ಗಳಲ್ಲಿ 100 ದಿನ ಅಲ್ಲ, 200 ದಿನ ಓಡಿತ್ತು. ಇದೀಗ 'ಅಪ್ಪು' ಸಿನಿಮಾ ರೀ-ರಿಲೀಸ್ ಆಗುತ್ತಿದ್ದು, ಅಭಿಮಾನಿಗಳು ಸಿನಿಮಾ ನೋಡಲು ಕಾತರದಿಂದ ಕಾಯುತ್ತಿದ್ದಾರೆ.

ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್, ಪಾರ್ವತಿ ಮೆನನ್, ಪೂಜಾ ಗಾಂಧಿ ಲೀಡ್‌ ರೋಲ್‌ನಲ್ಲಿ ನಟಿಸಿದ್ದ 'ಮಿಲನಾ' ಸಿನಿಮಾವನ್ನು ಎಷ್ಟೇ ನೋಡಿದ್ರೂ ಮತ್ತೆ-ಮತ್ತೆ ನೋಡಬೇಕಿನಿಸುತ್ತದೆ. ಸೂಪರ್ ಹಿಟ್ ಸಾಂಗ್‌ಗಳ ಜೊತೆಗೆ ಈ ಚಿತ್ರದ ಯಾವುದೇ ಸೀನ್ ಕೂಡ ಪ್ರೇಕ್ಷಕರಿಗೆ ಬೋರ್ ಅನಿಸುವುದಿಲ್ಲ. ಪ್ರಕಾಶ್ ನಿರ್ದೇಶನದಲ್ಲಿ ಮೂಡಿಬಂದ ಈ ಸಿನಿಮಾ 50 ಚಿತ್ರಮಂದಿರಗಳಲ್ಲಿ ಶತದಿನೋತ್ಸವ, 15 ಚಿತ್ರಮಂದಿರಗಳಲ್ಲಿ 200 ದಿನ ಪ್ರದರ್ಶನ ಕಂಡಿತ್ತು. ಜೊತೆಗೆ ಮಲ್ಟಿಪ್ಲೆಕ್ಸ್‌ನಲ್ಲಿ 600 ದಿನ ಪ್ರದರ್ಶನ ಕಂಡ ಏಕೈಕ ಚಿತ್ರವಾಗಿ ಇದು ದಾಖಲಾಗಿದೆ. ಎಷ್ಟೇ ಬಾರಿ ಈ ಸಿನಿಮಾ ಟಿವಿಯಲ್ಲಿ ಬಂದರೂ ಮಿಸ್ ಮಾಡದೇ ನೋಡುವ ಅಭಿಮಾನಿಗಳಿದ್ದಾರೆ.  

ಅಪ್ಪು ಅಭಿನಯದ 'ಪರಮಾತ್ಮ' ಇಂದಿಗೂ ಅನೇಕರ ಫೇವರಿಟ್ ಅಂದರೆ ತಪ್ಪಾಗಲ್ಲ. ಪರಮಾತ್ಮ ಇದು ಕೇವಲ ಒಂದು ಚಿತ್ರವಲ್ಲ ಎಮೋಷನ್ ಎಂದು ಹೇಳುವವರೇ ಹೆಚ್ಚಿದ್ದಾರೆ. ಯೋಗರಾಜ್ ಭಟ್ ನಿರ್ದೇಶನದ ಈ ಸಿನಿಮಾದ ಒಂದೊಂದು ಹಾಡುಗಳು ಕೂಡ ಅದ್ಭುತವಾಗಿದ್ದು, ಜನರ ಮನಸಲ್ಲಿ ಅಚ್ಚಳಿಯದೇ ಉಳಿದಿವೆ. ಚಿತ್ರದ ಡೈಲಾಗ್‌ಗಳು, ಸಂಭಾಷಣೆ, ಅನಿರೀಕ್ಷಿತ ಕ್ಲೈಮ್ಯಾಕ್ಸ್ ಎಲ್ಲವೂ ಸಖತ್ ಆಗಿದ್ದವು. ಆದರೆ, ಪರಮಾತ್ಮ ಥಿಯೇಟರ್‌ಗಳಲ್ಲಿ ಓಡಲಿಲ್ಲ. ಚಿತ್ರ ಬಿಡುಗಡೆಯಾದಾಗ ಅದಕ್ಕೆ ಸಿಗಬೇಕಿದ್ದ ಪ್ರಶಂಸೆ ಮತ್ತು ಯಶಸ್ಸು ಸಿಗದೇ ನಂತರದ ದಿನಗಳಲ್ಲಿ ಆ ಚಿತ್ರದ ಬೆಲೆ ಜನರಿಗೆ ಅರ್ಥವಾಗಿ ಇದೊಂದು 'ಮೋಸ್ಟ್ ಅಂಡರ್‌ರೇಟೆಡ್ ಸಿನಿಮಾ ಗುರು ಜನ ನೋಡಲಿಲ್ಲ ಅಷ್ಟೇ' ಎನಿಸಿಕೊಳ್ಳುವ ಚಿತ್ರಗಳಿವೆ. ಅದೇ ಸಾಲಿಗೆ ಪರಮಾತ್ಮ ಸಿನಿಮಾ ಕೂಡ ಸೇರುತ್ತೆ.

ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಅವರ ಬ್ಲಾಕ್ ಬಸ್ಟರ್ ಸಿನಿಮಾಗಳ ಪೈಕಿ ಅರಸು ಕೂಡ ಒಂದು. ಅಪ್ಪು ಎನ್‌ಆರ್‌ಐ ಉದ್ಯಮಿಯಾಗಿ ಕಾಣಿಸಿಕೊಂಡಿದ್ದ ಈ ಸಿನಿಮಾದಲ್ಲಿ ಮೀರಾ ಜಾಸ್ಮಿನ್ ಹಾಗೂ ರಮ್ಯಾ ನಾಯಕಿರಾಗಿ ನಟಿಸಿದ್ದರು. ವಿಭಿನ್ನ ಕಥಾಹಂದರ ಹೊಂದಿದ್ದ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಈ ಸಿನಿಮಾದ ನಟನೆಗಾಗಿ ಪುನೀತ್ ಫಿಲ್ಮ್ ಫೇರ್ ಪ್ರಶಸ್ತಿಯನ್ನು ಪಡೆದುಕೊಂಡಿದ್ದರು. ಇನ್ನೊಂದು ವಿಶೇಷ ಎಂದರೆ ಈ ಚಿತ್ರಕ್ಕೆ ಶಿವಣ್ಣ 'ಅರಸು' ಎಂದು ಹೆಸರಿಟ್ಟಿದ್ದರು. ಇದು ಶಿವಣ್ಣ ಅವರ ಅಚ್ಚುಮೆಚ್ಚಿನ ಸಿನಿಮಾ ಕೂಡ ಆಗಿದೆ.   

2011ರಲ್ಲಿ ರಿಲೀಸ್ ಆದ ಹುಡುಗರು ಚಿತ್ರದಲ್ಲಿ ಪುನೀತ್ ರಾಜ್‌ಕುಮಾರ್, ಯೋಗೇಶ್ , ಶ್ರೀನಗರ ಕಿಟ್ಟಿ ನಾಯಕರಾಗಿ ಮತ್ತು ರಾಧಿಕಾ ಪಂಡಿತ್, ಅಭಿನಯ, ವನಿತಾ ವಸು ನಾಯಕಿಯರಾಗಿ ಕಾಣಿಸಿಕೊಂಡಿದ್ದರು. ಒಂದೇ ಮನಸ್ಥಿತಿಯುಳ್ಳ ಮೂವರು ಹುಡುಗರ ಕಥೆ ಹೊಂದಿದ್ದ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಅಷ್ಟೇ ಅಲ್ಲದೇ ಚಿತ್ರಮಂದಿರಗಳಲ್ಲಿ 15 ವಾರಗಳ ಕಾಲ ಓಡಿತ್ತು. ಹುಡುಗರು ಅನೇಕ ಅಪ್ಪು ಅಭಿಮಾನಿಗಳ ಫೇವರಿಟ್ ಆಗಿದೆ.