ಮಳೆಯ ಅನುಭೂತಿಯನ್ನು ಇನ್ನಷ್ಟು ಹಿತವಾಗಿಸುವ ಈ ಕನ್ನಡ ಸಿನಿಮಾಗಳನ್ನು ಮಿಸ್ ಮಾಡ್ದೆ ನೋಡಿ!

ಮಳೆ ಅಂದಾಕ್ಷಣ ತಕ್ಷಣ ನೆನಪಗೋದೇ ಗೋಲ್ಡನ್ ಸ್ಟಾರ್ ಗಣೇಶ್ ಅವರ ಮುಂಗಾರು ಮಳೆ. 2006ರಲ್ಲಿ ಬಿಡುಗಡೆಯಾದ ಯೋಗರಾಜ್ ಭಟ್ ನಿರ್ದೇಶನದ ಈ ಸಿನಿಮಾ ಕನ್ನಡ ಚಿತ್ರರಂಗದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿತ್ತು. ಕೇವಲ 70 ಲಕ್ಷ ರೂ. ವೆಚ್ಚದಲ್ಲಿ ನಿರ್ಮಾಣವಾದ ಈ ಸಿನಿಮಾ ಗಲ್ಲಾಪೆಟ್ಟಿಗೆಯಲ್ಲಿ 75 ಕೋಟಿ ಬಾಚಿಕೊಂಡಿತ್ತು. ಚಿತ್ರದಲ್ಲಿನ ಗಣೇಶ್ ಅವರ ಡೈಲಾಗ್‌ಗಳು ಹಾಗೂ ಹಾಡುಗಳಂತೂ ಒಂದಕ್ಕಿಂತ ಒಂದು ಸೂಪರ್ ಹಿಟ್. ಚಿತ್ರದಲ್ಲಿ ಪೂಜಾ ಗಾಂಧಿ ಮತ್ತು ಗಣೇಶ್‌ ಕೆಮಿಸ್ಟ್ರಿ ತುಂಬ ಚೆನ್ನಾಗಿ ಮೂಡಿಬಂದಿತ್ತು. ಮುಂಗಾರು ಮಳೆ ಎಂದಿಗೂ ಟ್ರೆಂಡಿಂಗ್‌ನಲ್ಲಿರುತ್ತದೆ.  

ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಅಭಿನಯದ 'ಪರಮಾತ್ಮ' ಸಿನಿಮಾ  ಬಿಡುಗಡೆಯಾದ ಸಮಯದಲ್ಲಿ ಪ್ರೇಕ್ಷಕರಿಗೆ ಹಿಡಿಸಿರಲಿಲ್ಲ. ಚಿತ್ರದಲ್ಲಿ ಕೆಲವೊಂದು ಬೇಕಿರದ ಕ್ಯಾರೆಕ್ಟರ್‌ಗಳು ಹಾಗೂ ಸೀನ್‌ಗಳಿದ್ದರಿಂದ ಅನೇಕರಿಗೆ ಕನೆಕ್ಟ್ ಆಗಿರಲಿಲ್ಲ. ಆದ್ರೀಗ, ಪರಮಾತ್ಮ ಅಂದರೆ ಏನು ಅಂತ ಒಳ್ಳೆಯ ಅರ್ಥ ಹೇಳುವ ಈ ಸಿನಿಮಾ ಹಲವರ ಫೆವರಿಟ್.  ಚಿತ್ರದಲ್ಲಿ ಯಾವಾಗ್ಲೂ ಪಾಸಿಟಿವ್ ಆಗಿರೋ ಅನಂತ್‌ ನಾಗ್, ತನ್ನ ಹೃದಯ ಹೇಳಿದ್ದನ್ನೇ ಮಾಡೋ ಪರಮ್, ಜಾಸ್ತಿ ನಗುವ ಹಾಗೂ ಅಲ್ಲಲ್ಲಿ ಸೈಕೋ ಎನಿಸುವ ದೀಪಾ ಸನ್ನಿಧಿ ಕ್ಯಾರೆಕ್ಟರ್‌ಗಳು ಗಮನ ಸೆಳೆದಿದ್ದವು. ಪರಮಾತ್ಮ ಸಿನಿಮಾದ ಪ್ರತಿಯೊಂದು ಹಾಡುಗಳು ಕೂಡ ಸಖತ್ ಹಿಟ್ ಆಗಿದ್ದವು.   

ಯೋಗರಾಜ್ ಭಟ್ ನಿರ್ದೇಶನದ 'ಗಾಳಿಪಟ' ಸಿನಿಮಾವನ್ನು ಬಹುಶಃ ಇಷ್ಟಪಡದವರೇ ಇಲ್ಲ. ಗಣೇಶ್, ದಿಗಂತ್ ಹಾಗೂ ರಾಜೇಶ್ ಕೃಷ್ಣನ್ ಮೂವರ ಸಂಗಮದಲ್ಲಿ ಬಂದಿದ್ದ 'ಗಾಳಿಪಟ' ಚಿತ್ರವು ಆ ಕಾಲದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿತ್ತು. ಹಾಡುಗಳು ಕೂಡ ಸೂಪರ್ ಹಿಟ್ ಎನಿಸಿದ್ದವು. ಮೂರು ಸ್ನೇಹಿತರ ಪಟ್ಟಣದ ತಮ್ಮ ಜೀವನಶೈಲಿಯಿಂದ ಬೇಸರವಾಗಿ ಒಂದು ಮಲೆನಾಡಿನ ಹಳ್ಳಿಗೆ ಬಂದಾಗ, ಅಲ್ಲಿ ಇವರ ಪ್ರೇಮದ ಅಧ್ಯಾಯ ಆರಂಭವಾಗುತ್ತದೆ. ಈ ಸಿನಿಮಾದ ಆರಂಭದಿಂದ ಕೊನೆಯವರೆಗೂ ಎಲ್ಲಿಯೂ ಬೋರ್ ಅನಿಸುವುದೇ ಇಲ್ಲ. ಚಿತ್ರದಲ್ಲಿ ಗಣೇಶ್ ಡೈಲಾಗ್‌, ಲೋಕೇಷನ್ ಅಂತೂ ಸಿಕ್ಕಾಪಟ್ಟೆ ಇಷ್ಟವಾಗುತ್ತದೆ.  

ಹೊಸದೊಂದು ಕವಿತೆ ಬರೆಯುವೆ, ಮಾಡಿ ಹಳೇ ಪದಗಳ ರಿಪೇರಿ. ಎಲ್ಲಿಯೂ ಹೇಳದ ಕಥೆಯ ಹೇಳುವೆ, ಅದ್ಭುತವೆನಲ್ಲ ಸಿಂಪಲ್ಲಾಗ್ ಒಂದ್ ಲವ್ ಸ್ಟೋರಿ. ನಿರ್ದೇಶಕ ಸಿಂಪಲ್ ಸುನಿಯವರು ಇಡೀ ಚಿತ್ರದ ಕಥೆಯನ್ನು ಈ ಎರಡು ಲೈನ್‌ನಲ್ಲಿಯೇ ಹೇಳಿಬಿಟ್ಟಿದ್ದರು. ಸರಳ ಪ್ರೇಮಕಥೆಗೆ ವಿನೂತನ ನಿರೂಪಣೆ ಹೊಂದಿದ್ದ ಈ ಚಿತ್ರದಲ್ಲಿ ಕುಶಾಲ್ ಆಗಿ ರಕ್ಷಿತ್ ಹಾಗೂ ಖುಷಿಯಾಗಿ ಶ್ವೇತಾ ಶ್ರೀವಾತ್ಸವ್ ನಡುವಿನ ಕೆಲ ಸಂಭಾಷಣೆಗಳು ಸಖತ್ ಡಿಫರೆಂಟ್ ಆಗಿದ್ದವು. ರಕ್ಷಿತ್ ವಿಭಿನ್ನ ಶೇಡ್‌ಗಳಲ್ಲಿ ನಟಸಿದ್ದ ಈ ಸಿನಿಮಾವನ್ನು ಮಿಸ್ ಮಾಡದೇ ನೋಡಿ. 

2009ರ ಡಿಸೆಂಬರ್ 11ರಂದು ಬಿಡುಗಡೆಯಾಗಿದ್ದ ಪ್ರೀತಂ ಗುಬ್ಬಿ ನಿರ್ದೇಶನದ 'ಮಳೆಯಲಿ ಜೊತೆಯಲಿ' ಸಿನಿಮಾವನ್ನು ನೀವು ಮಿಸ್ ಮಾಡ್ದೇ ನೋಡಲೇಬೇಕು. ಚಿತ್ರದಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್ ಜೊತೆ ಯುವಿಕಾ ಚೌಧರಿ ಮತ್ತು ಅಂಜನಾ ಸುಖಾನಿ ಇಬ್ಬರು ನಾಯಕಿಯರು ನಟಿಸಿದ್ದರು. ಸ್ವತಃ ಗಣೇಶ್ ಸ್ವಂತ ಬ್ಯಾನರ್‌ನಲ್ಲಿ ಶಿಲ್ಪಾ ಗಣೇಶ್ ನಿರ್ಮಾಣ ಮಾಡಿದ್ದರು. ಮಳೆಯಲಿ ಜೊತೆಯಲಿ ಲವ್ ಸ್ಟೋರಿ ಜೊತೆಗೆ ಮ್ಯೂಸಿಕಲ್ ಹಿಟ್ ಆಗಿತ್ತು. ಸಿನಿಮಾದಲ್ಲಿ ಗಣೇಶ್ ಅವರ ಉದ್ದುದ್ದ ಡೈಲಾಗ್ಸ್, ಮಳೆ, ಎಮೋಷನಲ್ ಕ್ಲೈಮ್ಯಾಕ್ಸ್ ಎಲ್ಲವೂ ಗಮನ ಸೆಳೆದಿತ್ತು. 57ನೇ ಫಿಲ್ಮ ಫೇರ್ ಅವಾರ್ಡ್ ಕಾರ್ಯಕ್ರಮದಲ್ಲಿ ಈ ಸಿನಿಮಾಗೆ ಅತ್ಯುತ್ತಮ ಸಿನಿಮಾ ಹಾಗೂ ಗಣೇಶ್‌ಗೆ ಅತ್ಯುತ್ತಮ ನಟ ಪ್ರಶಸ್ತಿ ಲಭಿಸಿತ್ತು.  

ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ನಿರ್ದೇಶಿಸಿ, ನಟಿಸಿರುವ 'ಜಸ್ಟ್ ಮಾತ್ ಮಾತಲ್ಲಿ' ಸಿನಿಮಾ ಹಲವರಿಗೆ ಇಷ್ಟವಾಗಿರಲಿಲ್ಲ. ಆದರೆ, ಈ ಚಿತ್ರದಲ್ಲಿ ಕೆಲ ಒಳ್ಳೆಯ ಅಂಶಗಳು ಇದ್ದವು. ಸಿನಿಮಾದಲ್ಲಿ ರಘು ದೀಕ್ಷಿತ್ ಅವರ ಧ್ವನಿಯಲ್ಲಿ ಮೂಡಿಬಂದ ಸಾಂಗ್‌ಗಳು ಮಾತ್ರ ಸೂಪರ್ ಹಿಟ್ ಆಗಿದ್ದವು. ಪ್ರೇಮ ಕಥೆಯುಳ್ಳ ಈ ಚಿತ್ರದಲ್ಲಿ ರಮ್ಯಾ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು. ಈ ಸಿನಿಮಾ ಹಲವರಿಗೆ ಇಷ್ಟವಾಗದಿದ್ದರೂ ಹಾಡುಗಳಂತೂ ಎಲ್ಲರಿಗೂ ಇಷ್ಟ.