ನಮ್ರತಾ ಪ್ಲ್ಯಾನ್‌ಗೆ ಟ್ವಿಸ್ಟ್ ಕೊಟ್ಟ ಬಿಗ್‌ಬಾಸ್‌: ಈ ವಾರದ ನಾಮಿನೇಷನ್ ಬೆಂಕಿಯಲ್ಲಿ 6 ಮಂದಿ

ಕಳೆದ ವಾರ ಎಲಿಮಿನೇಟ್ ಆಗಿದ್ದ ಸ್ನೇಹಿತ್ ಮನೆಯಿಂದ ಹೊರಹೋಗುವ ಸಂದರ್ಭ ನಮ್ರತಾಗೆ ವಿಶೇಷ ಅಧಿಕಾರ ನೀಡಿದ್ದರು. ಇದರ ಅನುಸಾರ ನಮ್ರತಾ 10ನೇ ವಾರದ ನಾಮಿನೇಷನ್ ಪ್ರಕ್ರಿಯೆ ನಡೆಸಿಕೊಡಬೇಕಿತ್ತು. ಅದರಂತೆ ಆಕ್ಟಿವಿಟಿ ಏರಿಯಾದೊಳಗೆ ಹೋದ ನಮ್ರತಾ, ಅವಿನಾಶ್, ಸಂಗೀತಾ, ತನಿಷಾ, ಕಾರ್ತಿಕ್, ಸಿರಿ, ವರ್ತೂರು ಸಂತೋಷ್ ಅವರನ್ನು ಡೇಂಜರ್‌ ಝೋನ್‌ಗೆ ತಳ್ಳಿದರು. ನಾಮಿನೇಷನ್ ಪ್ರಕ್ರಿಯೆಯಲ್ಲಿ ಪಾಲ್ಗೊಳ್ಳುವ ಅಧಿಕಾರ ವಿನಯ್, ಪವಿ, ತನಿಷಾ, ಅವಿನಾಶ್ ಹಾಗೂ ಮೈಕಲ್‌ಗೆ ಇರಲಿಲ್ಲ. 

ನಮ್ರತಾ 6 ಮಂದಿಯನ್ನು ನಾಮಿನೇಟ್ ಮಾಡಿದ ಬಳಿಕ ಪ್ರತಿಬಾರಿ ಬಝರ್ ಆದಾಗ ನಾಮಿನೇಷನ್ ಅಧಿಕಾರ ಹೊಂದಿರುವವರ ಪೈಕಿ ಒಬ್ಬರು ಒಳಗೆ ಬಂದು ಇಬ್ಬರ ಭಾವಚಿತ್ರವನ್ನು ನಾಮಿನೇಟ್ ಆಗದಿರುವ ಸ್ಪರ್ಧಿಗಳ ಜೊತೆ ಬದಲಿಸಿ, ಸೂಕ್ತ ಕಾರಣ ಕೊಡಬೇಕು. ಕೊನೆಯಲ್ಲಿ ಯಾವ 6 ಜನರ ಭಾವಚಿತ್ರ ಇರುತ್ತದೆಯೋ ಅವರು ನಾಮಿನೇಟ್ ಆದಂತೆ ಅಂತ ಬಿಗ್‌ಬಾಸ್ ಟ್ವಿಸ್ಟ್ ನೀಡಿದರು. ಅದರಂತೆ ನಾಮಿನೇಷನ್ ಅಧಿಕಾರ ಹೊಂದಿರುವ ಸ್ಪರ್ಧಿಗಳು, ಫೋಟೋ ಬದಲಿಸಿ ಕಾರಣ ನೀಡಿದರು. ಕೊನೆಯಲ್ಲಿ ನಮ್ರತಾ ಆಯ್ಕೆ ಮಾಡಿದ ಸಂಗೀತಾ-ಸಿರಿ ನಾಮಿನೇಟ್ ಆದರು. 

ನಾಮಿನೇಷನ್ ಪ್ರಕ್ರಿಯೆ ಮುಗಿದಮೇಲೆ ನನಗೆ ಆಪ್ಷನ್ ಇರಲಿಲ್ಲ. ಏನು ಮಾಡಬೇಕು ಅಂತಲೇ ಗೊತ್ತಾಗುತ್ತಿರಲಿಲ್ಲ. ನನ್ನ ಫೋಟೋ ತೆಗೆದು ಸಂಗೀತಾದು ಹಾಕಿದೆ. ನಿನ್ನದು ತೆಗೆದು ಡ್ರೋನ್ ಪ್ರತಾಪ್ ಹಾಕಿದೆ ಎಂದು ತುಕಾಲಿ ಸಂತು ನಮ್ರತಾಗೆ ಹೇಳಿದರು. ಆಗ, ನಮ್ರತಾ ನೀವು ಮತ್ತು ವರ್ತೂರು ಸಂತೋಷ್ ಲಾಸ್ಟ್‌ನಲ್ಲಿ ಹೋಗಬೇಕಿತ್ತು ಎಂದರು. ಅದಕ್ಕೆ ತುಕಾಲಿ ಸಂತು, ನಾನು ಎಷ್ಟು ಹೇಳಿದರೂ ಅವರು ಕೇಳಲಿಲ್ಲ ಎಂದರು. ಆಗ ನಮ್ರತಾ, ಇಲ್ಲಾಂದ್ರೆ ಫುಲ್ ಗೇಮ್ ನಮ್ಮ ಕಡೆ ಟರ್ನ್‌ ಆಗಿರೋದು ಅಂದರು. 

ವಿನಯ್‌ ತಂಡದವರ ಪೈಕಿ ಮೊದಲು ಬಿಗ್‌ಬಾಸ್ ಮನೆಯಿಂದ ಹೊರಹೋಗಿದ್ದು ರಕ್ಷಕ್ ಬುಲೆಟ್. ರಕ್ಷಕ್ ದೊಡ್ಮನೆಯಲ್ಲಿ ಸ್ಟ್ರಾಂಗ್ ಸ್ಪರ್ಧಿ ಎನಿಸಿಕೊಂಡರೂ ಕೂಡ ಒಂದೇ ತಿಂಗಳಿಗೆ ಎಲಿಮಿನೇಟ್ ಆದರು. ನಂತರ ಇಶಾನಿ ಎಲಿಮಿನೇಟ್ ಆದರು. ಆನಂತರದಲ್ಲಿ ತಂಡ ಬದಲಾಯಿಸಿದ ನೀತು, ಟಾಸ್ಕ್‌ಗಳಲ್ಲಿ ಉತ್ತಮವಾಗಿ ಆಡಿದ್ದರೂ ಕಡಿಮೆ ವೋಟ್ ಪಡೆದು ಮನೆಯಿಂದ ಹೊರಬಂದರು. ಇನ್ನು ತುಕಾಲಿ ಸಂತೋಷ್ ತಂಡ ಬದಲಿಸಿ ಬಚಾವ್ ಆದರು. 9ನೇ ವಾರ ಸ್ನೇಹಿತ್ ಗೌಡ ಕೂಡ ಎಲಿಮಿನೇಟ್ ಆಗಿದ್ದಾರೆ. ಬಿಗ್‌ಬಾಸ್‌ ಮನೆಗೆ ಬಂದಾಗಿನಿಂದಲೂ ನಮ್ರತಾ  ಹೇಳಿಕೊಳ್ಳುವಂತಹ ಪರ್ಫಾರ್ಮಮೆನ್ಸ್ ನೀಡಿರಲಿಲ್ಲ. ೮ನೇ ವಾರ ಮಾತ್ರ ಉತ್ತಮವಾಗಿ ಆಡಿ, ಕಿಚ್ಚನ ಚಪ್ಪಾಳೆ ಪಡೆದಿದ್ದರು. 9ನೇ ವಾರ ಮತ್ತೆ ಗ್ಯಾಂಗ್ ಕಟ್ಟಿಕೊಂಡು ಕಳಪೆ ಪ್ರದರ್ಶನ ನೀಡಿದ್ದರು. ಇದೀಗ ನಾಮಿನೇಷನ್‌ನಲ್ಲೂ ಗ್ರೂಪಿಸಂ ಮಾಡಿದ್ದಾರೆ. 

ಈ ವಾರ ಮನೆಯಿಂದ ಹೊರಹೋಗಲು ಪವಿ, ಸಿರಿ, ವಿನಯ್, ಮೈಕಲ್, ಸಂಗೀತಾ, ಪ್ರತಾಪ್ ನಾಮಿನೇಟ್ ಆಗಿದ್ದಾರೆ. ಈ ಪೈಕಿ ವೈಲ್ಡ್ ಕಾರ್ಡ್ ಎಂಟ್ರಿ ಪಡೆದಿರುವ ಪವಿ ಅಥವಾ ಸಿರಿ ಮನೆಯಿಂದ ಹೊರಹೋಗಬಹುದು ಎನ್ನಲಾಗುತ್ತಿದೆ. ನಿಮ್ಮ ಪ್ರಕಾರ, ಈ ಬಾರಿ ಎಲಿಮಿನೇಟ್ ಆಗುವವರು ಯಾರೆಂಬುದನ್ನು ಕಾಮೆಂಟ್ ಮೂಲಕ ತಿಳಿಸಿ.