ದುನಿಯಾ ವಿಜಯ್ ಅವರ ಭೀಮಾ ಸಿನಿಮಾದ ಕಥೆ, ಕಲಾವಿದರ ಅಭಿನಯ, ರೇಟಿಂಗ್ಸ್ ಸೇರಿದಂತೆ ಇತರ ಮಾಹಿತಿ ಇಲ್ಲಿದೆ.

ಭೀಮಾ ಸಿನಿಮಾದ ಕಥೆ ಜೆ.ಸಿ ರೋಡ್ ಪಕ್ಕದ ಗ್ಯಾರೇಜ್‌ವೊಂದರ ಸುತ್ತಾಮುತ್ತ ನಡೆಯುತ್ತದೆ. ಮೆಕಾನಿಕ್ ಜಾವಾ ರಾಮಣ್ಣನ ಗ್ಯಾರೇಜ್‌ನಲ್ಲಿ ಕೆಲಸ ಮಾಡಿಕೊಂಡಿದ್ದ ಡ್ರ್ಯಾಗನ್ ಮಂಜ ಗಾಂಜಾ ಸಪ್ಲೆಯರ್ ಆಗಿ ಇಡೀ ಏರಿಯಾ ಹುಡುಗರನ್ನು ನಶೆಯಲ್ಲಿ ತೇಲಿಸುತ್ತಿರುತ್ತಾನೆ. ಅದೇ ನಶೆಯಲ್ಲಿ ಮುಳುಗಿ ರಾಮಣ್ಣ ಮಗ ಸಾಯುತ್ತಾನೆ. ಆಗ ಗ್ಯಾರೇಜ್‌ಯಿಂದ ಮಂಜು ದೂರಾಗುತ್ತಾನೆ. ಅದೇ ಗ್ಯಾರೇಜ್‌ಗೆ ಅನಾಥ ಹುಡುಗ ಭೀಮಾಮನ ಎಂಟ್ರಿಯಾಗುತ್ತದೆ. ರಾಮಣ್ಣನ ಗ್ಯಾರೇಜ್ ಗಾಂಜಾ ದಂಧೆ ಕಾರಣಕ್ಕೆ ಕೆಟ್ಟ ಹೆಸರು ಪಡೆಯುತ್ತದೆ. ಆ ಕೆಟ್ಟ ಹೆಸರನ್ನು ಅಳಿಸಲು ಭೀಮಾ ಪಣ ತೊಡ್ತಾನೆ. ಈ ಹಾದಿಯಲ್ಲಿ ಏನೆಲ್ಲಾ ಆಗುತ್ತದೆ. ಭೀಮಾ ಯಾರನ್ನೆಲ್ಲಾ ಕಳೆದುಕೊಳ್ಳುತ್ತಾನೆ. ಅದಕ್ಕೆ ಹೇಗೆ ಪ್ರತೀಕಾರ ತೀರಿಸಿಕೊಳ್ಳುತ್ತಾನೆ? ಗಾಂಜಾ, ಡ್ರಗ್ಸ್ ದಂಧೆಯ ಕಿಂಗ್ ಪಿನ್ ಆಗಿ ಬೆಳೆಯುವ ಮಂಜನನ್ನು ಹೇಗೆ ಮಟ್ಟ ಹಾಕುತ್ತಾನೆ? ಅನ್ನೋದೇ ಸಿನಿಮಾ ಸ್ಟೋರಿ.

ಈ ಹಿಂದೆ 'ಸಲಗ' ಸಿನಿಮಾ ಮಾಡಿ ಗೆದ್ದಿದ್ದ ದುನಿಯಾ ವಿಜಯ್, ಭೀಮಾ ಮೂಲಕ ಈ ಬಾರಿ ಮತ್ತಷ್ಟು ಲೋಕಲ್ ಕಥೆ ಹೇಳುವ ಸಾಹಸ ಮಾಡಿದ್ದಾರೆ. ಜೆ. ಸಿ ರೋಡ್ ಹಾಗೂ ಕಲಾಸಿಪಾಳ್ಯದ ಸುತ್ತ ಬಹುತೇಕ ಸಿನಿಮಾ ಕಥೆ ಸಾಗುತ್ತದೆ. ಅಲ್ಲಿನ ಚಿಲ್ಟಾರಿಗಳೆಲ್ಲಾ ಗಾಂಜಾ ನಶೆಯಲ್ಲಿ ತೇಲುವುದು, ಅಮ್ಮ, ಅಕ್ಕ ಇನ್ನು ಏನೇನೋ ಕೆಟ್ಟ ಪದಗಳನ್ನೆಲ್ಲಾ ಉದುರಿಸುತ್ತಾ ಹೋಗುತ್ತಾರೆ. ಚಿತ್ರ ಯಾಕೆ ಕಡ್ಡಾಯವಾಗಿ ವಯಸ್ಕರಿಗೆ ಮಾತ್ರ ಎನ್ನುವುದಕ್ಕೆ ಬರೀ ವೈಲೆನ್ಸ್ ಮಾತ್ರವಲ್ಲ, ಇದು ಕೂಡ ಒಂದು ಕಾರಣ ಎನ್ನುವುದು ಗೊತ್ತಾಗುತ್ತದೆ. 'ಸಲಗ' ಚಿತ್ರಕ್ಕೆ ಹೋಲಿಸಿದರೆ ವಿಜಿ ಕಥೆ, ನಿರ್ದೇಶನ ಸಪ್ಪೆ ಎನಿಸುತ್ತದೆ.

ನಟನೆಯ ವಿಚಾರಕ್ಕೆ ಬಂದರೆ ದುನಿಯಾ ವಿಜಯ್ ಎಂದಿನ ತಮ್ಮ ಮಾಸ್ ಸ್ಕ್ರೀನ್‌ ಪ್ರೆಸೆನ್ಸ್‌ನಿಂದ ಗಮನ ಸೆಳೆಯುತ್ತಾರೆ. ನಿರ್ದೇಶನ ಹಾಗೂ ನಟನೆ ಎರಡನ್ನು ನಿಭಾಯಿಸುವಲ್ಲಿ ಅಲ್ಲಲ್ಲಿ ಕೊಂಚ ಡಲ್ಲಾಗಿರುವುದು ಗೊತ್ತಾಗುತ್ತದೆ. ಇನ್ನುಳಿದಂತೆ ತಮ್ಮ ಹುರಿಗಟ್ಟಿದ ದೇಹ ಪ್ರದರ್ಶನಕ್ಕೂ ಸನ್ನಿವೇಶವನ್ನು ಕಟ್ಟಿಕೊಟ್ಟಿದ್ದಾರೆ. ರಂಗಭೂಮಿ ಪ್ರತಿಭೆ ಅಶ್ವಿನಿ ನಾಯಕಿಯಾಗಿ ಕ್ಯಾಮಾರಾಗೆ ಇನ್ನು ಹೊಂದಿಕೊಳ್ಳಬೇಕಿತ್ತು. ಖಡಕ್‌ ಪೊಲೀಸ್‌ ಆಫೀಸರ್‌ ಪಾತ್ರಕ್ಕೆ ಪ್ರಿಯಾ ಶಠಮರ್ಷಣ ಹೆಚ್ಚು ಅಬ್ಬರಿಸಿದ್ದಾರೆ.

ಇನ್ನುಳಿದಂತೆ ಭೀಮನ್ನು ಸಾಕಿ ಬೆಳೆಸಿದ ತಂದೆ ಹಾಗೂ ತಾಯಿ ಪಾತ್ರಗಳಲ್ಲಿ ಅಚ್ಯುತ್‌ಕುಮಾರ್ ಹಾಗೂ ಕಲ್ಯಾಣಿ, ಸಹೋದರನಾಗಿ ಗೋಪಾಲ್‌ದೇಶ್‌ಪಾಂಡೆ ತಮ್ಮ ಪಾತ್ರಗಳಿಗೆ ನ್ಯಾಯ ಒದಗಿಸಿದ್ದಾರೆ. ಮುಕ್ಯವಾಗಿ ಟ್ರ್ಯಾಗನ್ ಮಂಜು ತಮ್ಮ ದೇಹಭಾಷೆಯಿಂದಲೇ ಹೆಚ್ಚು ಗಮನ ಸೆಳೆಯುತ್ತಾರೆ. ಆದರೆ, ಅವರ ನಟನೆ ಹಾಗೂ ಡೈಲಾಗ್‌ ಡೆಲಿವರಿಯಲ್ಲಿನಲ್ಲಿ ಪಕ್ವತೆ ಬೇಕಿತ್ತು. ಅದೇ ಕಾರಣಕ್ಕೂ ಏನೋ ಆ ಪಾತ್ರಕ್ಕಿಂತ ಪಕ್ಕದಲ್ಲಿರುವ ಪಾತ್ರಗಳು ಹೆಚ್ಚು ಮಾತನಾಡುತ್ತವೆ. ಇನ್ನು ಮಾದಕ ದ್ರವ್ಯ ವ್ಯಸನ ಮುಕ್ತ ಕೇಂದ್ರ ಮುಖ್ಯಸ್ಥರಾಗಿ ರಂಗಾಯಣ ರಘು ಗಂಭೀರ ಪಾತ್ರದಲ್ಲಿ ನಟಿಸಿದ್ದಾರೆ.

ಇವತ್ತಿನ ಅಂಡರ್‌ವರ್ಲ್‌, ಡ್ರಗ್ಸ್ ದಂಧೆ, ಅದರಿಂದ ಬಲಿಯಾಗುತ್ತಿರುವ ಯುವ ಜನತೆ. ಅದಕ್ಕೆಲ್ಲಾ ಕಡಿವಾಣ ಹಾಕಬೇಕು ಎನ್ನುವ ಆಶಯದೊಂದಿಗೆ 'ಭೀಮಾ' ಸಿನಿಮಾ ಕಥೆ ಸಾಗುತ್ತದೆ. ಹಿಂದೆ 'ಸಲಗ' ಸಿನಿಮಾ ಮಾಡಿ ಗೆದ್ದಿದ್ದ ದುನಿಯಾ ವಿಜಯ್ ಈ ಬಾರಿ ಮತ್ತಷ್ಟು ಲೋಕಲ್ ಕಥೆ ಹೇಳುವ ಸಾಹಸ ಮಾಡಿದ್ದಾರೆ. ಈ ಪ್ರಯತ್ನದಲ್ಲೇ ಅಂತೂ-ಇಂತೂ ಗೆದ್ದಿದ್ದಾರೆ.