ಅದು ನಿಮ್ಮ ಬಾಯಿಂದ ಮಾತ್ರ ಯಾಕೆ ಬರುತ್ತೆ?-ಗಂಡು-ಹೆಣ್ಣು ತಾರತಮ್ಯದ ಬಗ್ಗೆ ಸಂಗೀತಾಗೆ ವಿನಯ್ ಪ್ರಶ್ನೆ

ಮೂರನೇ ಟಾಸ್ಕ್‌ಗೆ ಸ್ಪರ್ಧಿಗಳ ಆಯ್ಕೆ ವಿಚಾರ ಮಾಡುವಾಗ ವಿನಯ್ ತಮ್ಮನ್ನೂ ಸೇರಿದಂತೆ ಕಾರ್ತಿಕ್, ಮೈಕಲ್ ಹಾಗೂ ತುಕಾಲಿ ಸಂತು ಅವರನ್ನು ಆಯ್ಕೆ ಮಾಡಿದರು. ಇದೇ ವೇಳೆ ಸಂಗೀತಾ ಕೂಡ ಸ್ವಿಮ್ ಮಾಡ್ತಾಳೆ. ಆದರೆ, ಟಾರ್ಗೆಟ್ ಮಾಡೋದು ಗೊತ್ತಿಲ್ಲ ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದರು.  ಕಾರ್ತಿಕ್ & ಮೈಕಲ್ ಆಯ್ಕೆ ಕೂಡ ಇದೇ ಆಗಿತ್ತು. ಆಗ ಸಂಗೀತಾ ಮುಂದೆ ಬಂದು ನಾನು ಬ್ರೆಥ್ ಕಂಟ್ರೋಲ್ ಹಾಗೂ ಟಾರ್ಗೆಟ್ ಚೆನ್ನಾಗಿ ಮಾಡ್ತೀನಿ ಎಂದರು. ಕೊನೆಯದಾಗಿ ಅಂತಿಮ ನಿರ್ಧಾರ ತೆಗೆದುಕೊಳ್ಳುವ ಸವಾಲು ಕ್ಯಾಪ್ಟನ್ ತನಿಷಾ ಅವರದ್ದಾಗಿತ್ತು. ಬಹುಮತದ ಅನುಸಾರ ತನಿಷಾ, ಕಾರ್ತಿಕ್, ವಿನಯ್, ಮೈಕಲ್ ಹಾಗೂ ತುಕಾಲಿ ಸಂತು ಅವರನ್ನೇ ಆಯ್ಕೆ ಮಾಡಿದರು. ಜೊತೆಗೆ ಮುಳುಗಿ ನೋಡಿ ಹುಡುಕಿ ತರುವಂತಹದ್ದು ಏನಾದರೂ ಇದ್ದರೆ ಸಂಗೀತಾಗೆ ಕಷ್ಟವಾಗಬಹುದು. ಬೇರೆ ಸಂದರ್ಭದಲ್ಲಿ ಟ್ರೈ ಮಾಡಬಹುದು, ಈಗ ಬೇಡ ಎಂದರು. ಇದರಿಂದ ಬೇಸರಗೊಂಡ ಸಂಗೀತಾ, ವಾಶ್‌ರೂಮ್‌ಗೆ ತೆರಳಿ ಕಣ್ಣೀರು ಸುರಿಸಿದರು. 

ಒಬ್ಬರು (ನಮ್ರತಾ) ನನ್ನ ಜೊತೆ ನಿಂತರು. ಇನ್ನೊಬ್ಬರು (ತನಿಷಾ) ಈಗೋಗೋಸ್ಕರ ಹೇಳುತ್ತಿದ್ದಾರೆ. ಇವರುಗಳು ಅವಕಾಶ ಕೊಟ್ಟಿಲ್ಲ ಅಂದರೆ ನನಗೆ ಟ್ಯಾಲೆಂಟ್ ತೋರಿಸೋಕೆ ಬರಲ್ವಾ? ಬಿಗ್‌ಬಾಸ್‌ ಗೆಲ್ಲೋಕೆ ಆಗಲ್ವಾ? ನಾನು ಯಾವತ್ತೂ ಮೆಜಾರಿಟಿಯಲ್ಲಿ ಇರಲಿಲ್ಲ ಅಂತ ತಮ್ಮಷ್ಟಕ್ಕೆ ತಾವೇ ಹೇಳಿಕೊಂಡರು. 

ನಂತರ ಕಿಚನ್‌ಗೆ ಬಂದ ಸಂಗೀತಾ, ಏನೂ ಮಾಡೋಕೆ ಆಗಲ್ಲ. ಇಲ್ಲಿ ಯಾವತ್ತಿದ್ದರೂ ಮೆಜಾರಿಟಿ.. ನನಗೆ ಅವಕಾಶ ಸಿಕ್ಕಿಲ್ಲ ಅಂದರೆ ಬೇಜಾರು ಆಗೇ ಆಗುತ್ತೆ. ಬೇಜಾರಾಯ್ತು ಅತ್ತೆ ಅಷ್ಟೇ. 'ದಿಸ್‌ ಈಸ್‌ ಔ ವುಮನ್ ಡಸ್ ನಾಟ್ ವಿನ್ ಹಿಯರ್' ಎಂದರು. ಇದನ್ನು ಕೇಳಿಸಿಕೊಂಡ ವಿನಯ್ ಪ್ರಶ್ನೆ ಮಾಡಿದರು.
ವಿನಯ್: ಅಯ್ಯೋ...ಯಪ್ಪಾ ಇದು ನಾನ್‌ಸೆನ್ಸ್ ಸ್ಟೆಟ್‌ಮೆಂಟ್. ಇದು ಹೇಗೆ ರಿಲೇಟ್ ಆಗಿದೆ? ಅಂದರು.
ಸಂಗೀತಾ: ಯಾಕೆಂದರೆ ನನಗೆ ಅವಕಾಶ ಸಿಕ್ಕಿಲ್ಲ ಅಂದರೆ ಟ್ಯಾಲೆಂಟ್ ಹೇಗೆ ತೋರಿಸೋಕೆ ಆಗುತ್ತೆ ಎಂದರು. 
ವಿನಯ್: ಚಾನ್ಸ್ ಸಿಕ್ಕಿಲ್ಲ ಅಂದರೆ ಅದು ನಿನ್ನ ಪ್ರಾಬ್ಲಂ.
ಸಂಗೀತಾ: ನನ್ನ ಪ್ರಾಬ್ಲಂ ಹೇಗೆ ಆಗುತ್ತೆ? ಸ್ವಿಮ್ಮಿಂಗ್ ಬರುತ್ತೆ ಅಂತ ಹೇಳಿದ್ದೇನೆ.
ವಿನಯ್: ಕಣ್ಣು ಪ್ರಾಬ್ಲಂ ಇದೆಯಂತ ನೀನೇ ಹೇಳಿಕೊಂಡಿರೋದು.
ಸಂಗೀತಾ: ನನ್ನ ಕಣ್ಣು. ನನಗೆ ಟಾಸ್ಕ್ ಮಾಡಲು ಆಗುತ್ತದೆ ಅಂತ ನಾನೇ ಹೇಳುತ್ತಿದ್ದೇನೆ. ನಾನು ಕಾರಣಗಳನ್ನು ಕೊಟ್ಟಿಲ್ಲ ಎಂದರು.

ಇದಾದ ಬಳಿಕ ವಿನಯ್, ಆ ತರಹದ ಹೇಳಿಕೆಯನ್ನು ಕೊಡಬಾರದು ಎಂದರು. ಅದಕ್ಕೆ ಸಂಗೀತಾ, ನಾನು ಅದನ್ನು ನಮ್ರತಾಗೆ ಹೇಳಿದ್ದು. ನೀವ್ಯಾಕೆ ರಿಯಾಕ್ಟ್ ಮಾಡುತ್ತಿದ್ದೀರಾ? ತನಿಷಾ ಮೇಲೆ ಆಯ್ಕೆ ಇತ್ತು ಎಂದರು. ಆಗ ತನಿಷಾ, ಮಹಿಳೆಯರಿಗೆ ಆದ್ಯತೆ ಕೊಡಬೇಕು ಅಂತಿದ್ದರೆ ನಾನು ನನಗೆ ನಾನೇ ಕೊಟ್ಟುಕೊಳ್ಳುತ್ತಿದ್ದೆ ಎಂದರು.
ಸಂಗೀತಾ: ನಿಮಗೆ ನೀರಿನ ಭಯ ಇದೆ. ನನಗೆ ಸ್ವಿಮ್ಮಿಂಗ್ ಬರುತ್ತೆ.
ವಿನಯ್: ಗಂಡು-ಹೆಣ್ಣು ಅಂತ ಯಾಕೆ ತಾರತಮ್ಯ ತರ್ತಿಯಾ? ಅದು ನಿಮ್ಮ ಬಾಯಿಂದ ಮಾತ್ರ ಯಾಕೆ ಬರುತ್ತೆ ಎಂದರು.
ಸಂಗೀತಾ: ತನಿಷಾ ಬಳಿ ಅವಕಾಶವಿತ್ತು. ಅವರು ನನ್ನನ್ನು ಆಯ್ಕೆ ಮಾಡಬಹುದಿತ್ತು.
ವಿನಯ್: ಈಕ್ವಾಲಿಟಿ ಅಂತ ಮಾತಾಡ್ತೀಯಾ. ಆಮೇಲೆ ತಾರತಮ್ಯ ಬಗ್ಗೆ ಯಾಕೆ ಮಾತಾಡ್ತೀಯಾ ಅಂತ ಪ್ರಶ್ನಿಸಿದರು.
ಸಂಗೀತಾ: ನಾನು ಗಂಡು ಅಂತ ಹೇಳೇ ಇಲ್ಲ.
ನಮ್ರತಾ: ಅವಕಾಶ ಕಡಿಮೆಯಾದಾಗ ಮಹಿಳೆಯರು ಕಾಣಿಸಿಕೊಳ್ಳುವುದಿಲ್ಲ. ಹೀಗಿದ್ದಾಗ ಜನರಿಗೆ ನಾವು ಹೇಗೆ ಹತ್ತಿರ ಆಗ್ತೀವಿ ಅನ್ನೋದು ಅವರ ಮಾತಿನ ಅರ್ಥವಾಗಿತ್ತು ಎಂದರು.
ವಿನಯ್: ಇಡೀ ಜರ್ನಿಯಲ್ಲಿ ಮಹಿಳೆಯರ ಅವಕಾಶಗಳನ್ನು ಪುರುಷರು ಕಿತ್ತುಕೊಳ್ಳುತ್ತಿದ್ದಾರೆ ಅನಿಸುತ್ತಿದೆಯಾ? ಎಂದರು.

ವಾದ ವಿವಾದಗಳಲ್ಲಿ ಮಧ್ಯೆ ಪ್ರವೇಶಿಸಿದ ಮೈಕಲ್, ನಾನು ಹೇಗೆ ಮುಂದಕ್ಕೆ ಹೋಗೋದು ಅಂತ ನೀನು ಹೇಳಿದ್ದರೆ, ಈ ಜಗಳ ಆಗುತ್ತಿರಲಿಲ್ಲ. ಮಹಿಳೆಯರು ಹೇಗೆ ಗೆಲ್ಲಬೇಕು ಅಂತ ಹೇಳುತ್ತಿರುವುದಕ್ಕೆ ಜಗಳವಾಗುತ್ತಿರುವುದು ಎಂದರು. ಆಗ ತನಿಷಾ, ನನ್ನ ಆಯ್ಕೆ ತಪ್ಪು ಅಂತ ಹೇಳೋದಕ್ಕೂ, ಮಹಿಳೆಯರು ಗೆಲ್ಲೋದಕ್ಕೆ ಆಗಲ್ಲ ಅಂತ ಹೇಳೋದಕ್ಕೂ ತುಂಬಾ ವ್ಯತ್ಯಾಸವಿದೆ. ಟಾಸ್ಕ್ ಅಷ್ಟೇ ಕಾರಣವಲ್ಲ ಮಹಿಳೆ ಗೆಲ್ಲೋದಕ್ಕೆ ಎಂದರು. 

ಈ ವಾದದ ನಡುವೆ ವರ್ತೂರು ಸಂತೋಷ್, ಸಂಗೀತಾ ಬುದ್ಧಿ ಸರಿಯಿಲ್ಲ. ಅವರೇ ಹೋಗಿ ಕಣ್ಣಿಗೆ ಖಾರದಪುಡಿ ಹಾಕಿಕೊಂಡರೆ ತಪ್ಪಿಲ್ಲ. ಬೇರೆಯವರು ನೀರು ಹಾಕಿದರೆ ತಪ್ಪು. ಹೋದರೆ ನನ್ನ ಕಣ್ಣು ತಾನೇ ಹೋಗೋ ಅಂತಿದ್ದಾಳೆ ಎಂದು ತುಕಾಲಿ ಸಂತಿ ಬಳಿ ಹೇಳಿದರು.