ಎಲ್ಲಿ ಜನರಿಗೆ ಹೇಗೆ ಮಂಕು ಬೂದಿ ಎರಚಬೇಕು ಅನ್ನೋದು ನಿನಗೆ ಚೆನ್ನಾಗಿ ಗೊತ್ತು: ಪ್ರತಾಪ್‌ಗೆ ಚುಚ್ಚಿದ ವಿನಯ್ ಗೌಡ

ವಾರಾಂತ್ಯ ಸಂಚಿಕೆಯಲ್ಲಿ ಯಾರು ಯಾವ ಪುಸ್ತಕ ಬರೆದರೆ ಸೂಕ್ತ ಎಂಬ ಚಟುವಟಿಯನ್ನು ಕಿಚ್ಚ ಸುದೀಪ್ ಮನೆಯ ಸದಸ್ಯರಿಗೆ ನೀಡಿದ್ದರು. ಈ ವೇಳೆ ಡ್ರೋನ್ ಪ್ರತಾಪ್ 'ಬೇರೆಯವರನ್ನು ತುಳಿದು ಬೆಳೆಯೋದು ಹೇಗೆ? ಎಂಬ ಪುಸ್ತಕವನ್ನು ವಿನಯ್‌ಗೆ ನೀಡಿದರು. ಇಲ್ಲಿವರೆಗೂ ಯಾರ್ಯಾರು ವಿನಯ್ ಜೊತೆಯಲ್ಲಿದ್ದರೋ... ಎಲ್ಲಾ ಫ್ರೆಂಡ್ಸ್, ಹಾಗೆ ಹೀಗೆ ಅಂದುಕೊಂಡು ಅವರೆಲ್ಲಾ ತಪ್ಪು ಮಾಡ್ತಿದ್ದಾರೆ ಎಂಬ ಅಭಿಪ್ರಾಯವನ್ನೇ ವಿನಯ್ ಕೊಟ್ಟಿಲ್ಲ. ಇಂತಹ ಕಡೆ ತಪ್ಪು ಮಾಡ್ತಿದ್ದಾರೆ ಅಂತ ಹೇಳೇ ಇಲ್ಲ. ಸರಿ ಎಂದುಕೊಂಡೇ ಜೊತೆಯಲ್ಲಿ ಇದ್ದವರೆಲ್ಲಾ ಮನೆಗೆ ಹೋದರು. ಮನೆಗೆ ಹೋದವರೆಲ್ಲರ ಬೆಡ್‌ಶೀಟ್‌ ಇವರ ಬೆಡ್ ಸೇರಿಕೊಳ್ತು ಎಂದಿದ್ದರು. ಸುದೀಪ್ ಮುಂದೆ ಪ್ರತಾಪ್ ಈ ಮಾತು ಹೇಳುತ್ತಿದ್ದಂತೆ ವಿನಯ್ ಕೋಪ ನೆತ್ತಿಗೇರಿತ್ತು. ಇದೇ ವಿಚಾರವಾಗಿ ಭಾನುವಾರದ ಸಂಚಿಕೆಯಲ್ಲಿ ಚರ್ಚಿಸಿದ್ದು, ಸೋಮವಾರ ಈ ವಿಷಯ ತಾರಕಕ್ಕೇರಿದೆ. 

ದೊಡ್ಮನೆಯಲ್ಲಿ ಮುಂದುವರೆಯಲು ಕೆಲವರು ಪ್ಲೇ ಕಾರ್ಡ್ ಬಳಸುತ್ತಿದ್ದಾರೆ ಅಂತ ಕೆಲ ಸ್ಪರ್ಧಿಗಳು ಆರೋಪಿಸುತ್ತಾ ಬಂದಿದ್ದಾರೆ. ಹೀಗಾಗಿ, ಸೋಮವಾರದ ಸಂಚಿಕೆಯಲ್ಲಿ ಯಾರ್ಯಾರು ಯಾವ್ಯಾವ ಕಾರ್ಡ್ ಬಳಸುತ್ತಿದ್ದಾರೆ ಎಂದು ಸ್ಪಷ್ಟವಾಗಿ ತಿಳಿದುಕೊಳ್ಳುವ ಉದ್ದೇಶದಿಂದ ಬಿಗ್‌ಬಾಸ್‌ ವಿಶೇಷ ಚಟುವಟಿಕೆ ನೀಡಿದ್ದರು. ನಿಯಮದ ಪ್ರಕಾರ ಸ್ಪರ್ಧಿಗಳು ಚರ್ಚಿಸಿ ಯಾರು ಯಾವ ಕಾರ್ಡ್ ಪ್ಲೇ ಮಾಡ್ತಿದ್ದಾರೆಂದು ಒಮ್ಮತದ ನಿರ್ಧಾರ ತೆಗೆದುಕೊಳ್ಳಬೇಕಿತ್ತು. ಈ ವೇಳೆ ವಿನಯ್ ಮತ್ತು ಪ್ರತಾಪ್ ನಡುವೆ ವಾರ್ ನಡೆದಿದೆ. ಚಟುವಟಿಕೆ ಸಂದರ್ಭ ವಿನಯ್ ಅವರು ಪ್ರತಾಪ್‌ಗೆ 'ತಿ* ಮುಚ್ಕೊಂಡು ಇರು....ಏನು ಅಲ್ಲಾಡ್ಸಕ್ಕೆ ಆಗಲ್ಲ. ನನಗೆ ಏನು ಮಾತನಾಡಬೇಕು ಅಂತ ಗೊತ್ತು. ನೀನು ಹೆದರಿಲ್ಲ ಅಂದ್ರೆ ** ಹೋಯ್ತು ಎಂದೆಲ್ಲಾ ಮಾತನಾಡಿದ್ದಾರೆ. ಇದನ್ನು ಖಂಡಿಸಿದ ಇತರ ಸದಸ್ಯರು, ಕೆಟ್ಟ ಶಬ್ದ ಬಳಸಬೇಡಿ ಅಂತ ಹೇಳಿದ್ದಾರೆ. ಇದು ಎಪಿಸೋಡ್‌ನಲ್ಲಿ ಪ್ರಸಾರವಾಗಿಲ್ಲ. ಆದರೆ, ಲೈವ್‌ನಲ್ಲಿ ವೀಕ್ಷಕರು ನೋಡಿದ್ದಾರೆ. 

ತನ್ನ ಸ್ವಾರ್ಥಕ್ಕೋಸ್ಕರ ಬೇರೆಯವರ ಭಾವನೆಯೊಂದಿಗೆ ಆಟವಾಡುವ ಸ್ಪರ್ಧಿಗೆ ಎಮೋಷನ್ ಕಾರ್ಡ್ ಕೊಡಬೇಕಿತ್ತು. ಅದನ್ನು ವಿನಯ್‌ಗೆ ಪ್ರತಾಪ್ ನೀಡಿದರು. ಎಷ್ಟೋ ಬಾರಿ ಪರ್ಸನಲ್ ಆಟ್ಯಾಕ್ ಮಾಡ್ತಾರೆ. ಹೊರಗಡೆ ವಿಷಯ ಮಾತನಾಡ್ತಾರೆ. ನಾನು ಆಟಕ್ಕಾಗಿ ಕೊಟ್ಟಿರುವ ಕಾರಣವನ್ನು ಬೇರೆ ರೀತಿ ಮಾತನಾಡಿ, ಬೇರೆಯದ್ದೇ ಅರ್ಥ ನೀಡ್ತಾರೆ. ಚೀಪ್ ಕಾಂಟ್ರವರ್ಸಿ ಅಂದರು. ಹೊರಗಡೆ ವಿಷ್ಯವನ್ನೇ ಇಟ್ಟುಕೊಂಡು ಆಡಿದ ಮಾತದು ಎಂದರು. 

ಅದಕ್ಕೆ ವಿನಯ್, ಚೀಪ್ ಕಾಂಟ್ರವರ್ಸಿ ಮಾಡಿಕೊಂಡು ಹೆಸರು ಮಾಡಿಲ್ಲ ನಾನು, ನನ್ನ ಸ್ವಂತ ಹೆಸರು ಬಳಸಿಕೊಂಡು ಈ ಲೆವೆಲ್‌ಗೆ ಬೆಳೆದಿದ್ದೇನೆ ಅಂತ ನಾನು ಹೇಳದ್ದು. ಚೀಪ್ ಕಾಂಟ್ರವರ್ಸಿ ಮಾಡಿಕೊಂಡು ಈ ಮನೆಯೊಳಗೆ ಬಂದಿದ್ಯಾ ಅಂತ ನಿನ್ನ ಮುಖ ನೋಡಿಕೊಂಡು ಹೇಳುವ ಧೈರ್ಯ ನನಗಿದೆ. ನೀನು ಸಿಕ್ಕಾಪಟ್ಟೆ ಕಾಂಟ್ರವರ್ಸಿಗಳನ್ನು ಮಾಡಿಕೊಂಡಿದ್ಯಾ. ನಾನು ಚೀಪ್ ಆಗಿದ್ದರೆ ಹೇಳುತ್ತಿದ್ದೆ. ಈಡಿಯೆಟ್, ನಾನ್‌ಸೆನ್ಸ್ ತರ ಮಾತನಾಡಿದ್ರೆ ಸ್ಪಷ್ಟನೆ ಕೊಡಬೇಕಾಗುತ್ತೆ ಅಂತ ವಿನಯ್ ಕೆರಳಿದರು. ಆಗ ಪ್ರತಾಪ್, ಈಡಿಯೆಟ್ ಅಂತೆಲ್ಲಾ ಹೇಳಬೇಡಿ. ಇಲ್ಯಾರೂ ಮೂರ್ಖರಾಗಿ ಬಂದಿಲ್ಲ ಎಂದರು. ವಿನಯ್, ಮೂರ್ಖನೇ ನೀನು ಎಂದರು. 
ಪ್ರತಾಪ್: ನೀನು, ತಾನು ಅಂತೆಲ್ಲಾ ಬಳಸಬೇಡಿ. ಪ್ರತಾಪ್ ಅಂತ ಬಳಸಿ ಎಂದರು.
ವಿನಯ್: ನನಗಿಂತ ಚಿಕ್ಕವರಿಗೆ ನಾನು ಮಾತನಾಡೋದೆ ನೀನು, ತಾನು ಅಂತ ಎಂದರು.  

ಆರೋಪ ಕಾರ್ಡ್‌ ಅನ್ನು ಪ್ರತಾಪ್‌ಗೆ ವಿನಯ್ ನೀಡಿದರು. ಇಲ್ಲದ ಜಾಗದಲ್ಲಿ ಮೂಗು ತೂರಿಸಿಕೊಂಡು, ತಿರುಚಿ ಹೇಳೋದು ಪ್ರತಾಪ್. ಫ್ರೆಂಡ್ಸ್ ತಪ್ಪುಗಳನ್ನ ನಾನು ತಿದ್ದರೇ ಅವರನ್ನು ಹೊರಗೆ ಕಳುಹಿಸಿ, ಅವರುಗಳು ಬ್ಲಾಂಕೆಟ್‌ಗಳನ್ನು ನಾನು ಹಾಕಿಕೊಂಡಿದ್ದೇನೆ ಅಂತ ನನ್ನ ಮೇಲೆ ಪ್ರತಾಪ್ ಆರೋಪ ಮಾಡಿದ್ದರು. ಆ ಆರೋಪ ಮಾಡೋದನ್ನ ಯಾವತ್ತೂ ನಿಲ್ಲಿಸುತ್ತೀಯೋ, ಅವತ್ತು ಲೈಫ್‌ನಲ್ಲಿ ಬೆಳಿತೀಯಾ ಅಂತ ಹೇಳುತ್ತಿದ್ದೀನಿ ಎಂದರು. 

ಪ್ರತಾಪ್‌ಗೆ ವಿನಯ್ ಅಮಾಯಕ ಕಾರ್ಡ್ ನೀಡಿದರು. ಅಮಾಯಕ ಕಾರ್ಡ್‌ನ ಪ್ರತಾಪ್ ಎಷ್ಟು ಚೆನ್ನಾಗಿ ಪ್ಲೇ ಮಾಡ್ತಾನೆ ಅನ್ನೋದು ಎಲ್ಲರಿಗೂ ಗೊತ್ತು. ಯಾರು ಜೊತೆಗೂ ಬೆರೆಯುತ್ತಿರಲಿಲ್ಲ. ಎಲ್ಲರೂ ಮೂಲೆಗೆ ಹಾಕಿದ್ದಾನೆ. ತಾನೇನೂ ತಪ್ಪು ಮಾಡಿಲ್ಲ. ತನ್ನ ಮೇಲೆ ದೌರ್ಜನ್ಯ ನಡೆಯುತ್ತಿದೆ ಎಂಬ ರೀತಿಯಲ್ಲಿ ಇವತ್ತಿನವರೆಗೂ ನಡೆದುಕೊಂಡಿದ್ದಾರೆ. ಅಮಾಯಕನ ತರಹ ನಾಟಕ ಮಾಡಿಕೊಂಡಿರೋದು ಪ್ರತಾಪ್. ಪ್ರತಿ ಬಾರಿ ಮುಗ್ಧ ಮುಖ ಮಾಡಿಕೊಂಡು, ತಪ್ಪುಗಳನ್ನು ಕವರ್ ಅಪ್ ಮಾಡಿಕೊಂಡು, ಎಲ್ಲರಿಗೂ ಬೂದಿ ಎರಚಿಕೊಂಡು, ಕಾಗೆ ಕೂರಿಸಿಕೊಂಡು ಪ್ರತಿಯೊಬ್ಬರಿಗೂ ಪಾಪ ಎನಿಸುವ ಹಾಗೆ ಅಮಾಯಕ ಕಾರ್ಡ್ ಪ್ಲೇ ಮಾಡ್ತಾರೆ. ಎಲ್ಲಿ ಜನರಿಗೆ ಹೇಗೆ ಮಂಕು ಬೂದಿ ಎರಚಬೇಕು ಅನ್ನೋದು ನಿನಗೆ ಚೆನ್ನಾಗಿ ಗೊತ್ತು ಎಂದರು. ಅದಕ್ಕೆ ಪ್ರತಾಪ್, ಯಾವುದೇ ಕಾರಣಕ್ಕೂ ನಾನು ಇದನ್ನು ಒಪ್ಪಲ್ಲ. ಯಾವ ಟೈಮ್‌ನಲ್ಲಿ ಹೇಗೆ ನಡೆದುಕೊಳ್ಳಬೇಕು ಅನಿಸತ್ತೋ ಹಾಗೆ ನಡೆದುಕೊಂಡಿದ್ದೇನೆ ಎಂದರು. 

ಪ್ರಚೋದಿಸುವ ಕಾರ್ಡ್ ಅನ್ನು ವಿನಯ್‌ಗೆ ಪ್ರತಾಪ್ ನೀಇದರು. ಈ ಮನೆಯಲ್ಲಿ ಪ್ರಚೋದನಕಾರಿ ಹೇಳಿಕೆ, ಯಾರ ಬಗ್ಗೆಯಾಗಲಿ ಶುರು ಮಾಡೋದೇ ವಿನಯ್. ನಿನ್ನೆಯ ವಿಚಾರ ಅಲ್ಲಿಗೆ ಮುಗಿದಿತ್ತು. ಆದರೂ ಅದನ್ನು ಪದೇ ಪದೇ ಮಾತನಾಡುತ್ತಿದ್ದಾರೆ ಎಂದರು. 

ಡಬಲ್ ಸ್ಟಾಂಡರ್ಡ್ ಕಾರ್ಡ್ ಅನ್ನು ವಿನಯ್‌ಗೆ ಪ್ರತಾಪ್ ನೀಡಿದರು. ಹೊರಗಡೆ ವಿಷಯವನ್ನು ಇಲ್ಲಿ ತಂದು ಮಾತನಾಡೋದು ಸರಿಯಲ್ಲ. ಪರಿಣಾಮ ಕೂಡ ನೆಟ್ಟಗೆ ಇರೋದಿಲ್ಲ ಎಂದರು. ಅಷ್ಟರಲ್ಲಿ ಇಬ್ಬರ ನಡುವೆ ಮಾತಿನ ಚಕಮಕಿ ನಡೆಯಿತು. 
ವಿನಯ್: ಪರಿಣಾಮ ನೆಟ್ಟಗೆ ಇರಲ್ಲ ಅಂದ್ರೆ ಏನೋ ಮಾಡ್ತೀಯಾ?
ಪ್ರತಾಪ್‌: ಇನ್ನೊಮ್ಮೆ ಚೀಪ್ ಕಾಂಟ್ರವರ್ಸಿ ಅಂದ್ರೆ ನನಗೆ ಕೇಳಿಸಿಕೊಳ್ಳೋಕೆ ಆಗಲ್ಲ. ನಾಲಿಗೆ ಮೇಲೆ ಹಿಡಿತವಿರಬೇಕು. 
ವಿನಯ್: ಆಗಲ್ಲ. 
ಪ್ರತಾಪ್: ಇಲ್ಲಿ ಯಾರೂ ಚೀಪ್ ಆಗಿ ಬಂದಿಲ್ಲ. ನಾಲಿಗೆ ಮೇಲೆ ಹಿಡಿತ ಇರಲಿ.
ವಿನಯ್: ಪರಿಣಾಮ ಸರಿಗಿರಲ್ಲ ಅಂದ್ರೆ ಏನೋ ಮಾಡ್ತೀಯಾ?
ಪ್ರತಾಪ್: ನಾವು ಮಾತುಗಳ ಮುಖಾಂತರ ಉತ್ತರ ಕೊಡಬೇಕಾಗುತ್ತದೆ.
ವಿನಯ್: ವಾರ್ನಿಂಗ್ ಎಲ್ಲಾ ನನ್ನ ಹತ್ತಿರ ಇಟ್ಟುಕೊಳ್ಳಬೇಡ. ಒಬ್ಬರನ್ನು ತುಳಿದು ಬಂದೆ ಅಂತ ಕಿತ್ತೋಗಿರೋ ರೀಸನ್ ಕೊಟ್ಟೆ. ಏನಪ್ಪಾ ಗೊತ್ತು ನಿನಗೆ ನನ್ನ ಬಗ್ಗೆ? ಗೊತ್ತಿಲ್ಲ ಅಂದ್ರೆ ಮುಚ್ಕೂಂಡು ಕುಳಿತುಕೊಳ್ಳಬೇಕು ಎಂದರು.