ಆನೆ ಬಂತೊಂದಾನೆ ಅಂತ ಕ್ಯಾಪ್ಟನ್ ಆದ ವಿನಯ್ ಗೌಡ: ಈ ವಾರ ಮನೆಯಿಂದ ಹೊರ ಹೋಗೋದ್ಯಾರು?

ಸಂಗೀತಾ ಶೃಂಗೇರಿ ಆಂಡ್ ಟೀಮ್‌ ಮೇಲೆ ವಿನಯ್ ಗೌಡ ಅವರಿಗೆ ಸಿಕ್ಕಾಪಟ್ಟೆ ಅಸಹನೆಯಿದೆ. ಬಿಗ್‌ಬಾಸ್ ಆರಂಭವಾದಗಿನಿಂದಲೂ ಇಬ್ಬರ ಜಟಾಪಟಿ ನಡೆಯುತ್ತಲೇ ಇದೆ. ಹಳ್ಳಿ ಜೀವನದ ಟಾಸ್ಕ್‌ನಲ್ಲಂತೂ ಇದು ಅತಿರೇಕಕ್ಕೆ ಹೋಗಿತ್ತು. ಇದೀಗ ವಿನಯ್ ಕ್ಯಾಪ್ಟನ್ ಪಟ್ಟ ಅಲಂಕರಿಸಿದ್ದಾರೆ. ಹೀಗಾಗಿ, ಬಿಗ್‌ಬಾಸ್ ಮನೆಯ ಗಾರ್ಡನ್ ಏರಿಯಾದಲ್ಲಿ ಒಂದಷ್ಟು ಮಂದಿ ಸಂಭ್ರಮಿಸುತ್ತಿದ್ದರೆ, ಸಂಗೀತಾ ಡ್ರೆಸ್ಸಿಂಗ್ ರೂಮ್‌ನ ಕನ್ನಡಿ ಮುಂದೆ ನಿಂತು 'ನಾವು ಆನೆ ವಿರೋಧಿಗಳಲ್ಲ'. ನಾವು ಆನೆಗೆ ಹೆದರೋದು ಇಲ್ಲ ಎಂಬ ಡೈಲಾಗ್ ಹೊಡೆದಿದ್ದಾರೆ. ಇದರಿಂದಾಗಿ ಮುಂದಿನವಾರ ಮತ್ತಷ್ಟು ಜಟಾಪಟಿ ನಡೆಯುವ ಸೂಚನೆ ಸಿಕ್ಕಿದೆ. 

ಹಳ್ಳಿ ಜೀವನದ ಟಾಸ್ಕ್‌ನಲ್ಲಿ ನಡೆದ ಕುಸ್ತಿ ಪಂದ್ಯಾವಳಿಯಲ್ಲಿ ವಿನಯ್ ಗೌಡ ಅವರ ತಂಡ ಗೆದ್ದು ಬೀಗಿತ್ತು. ಸಂಗೀತಾ ತಂಡ ಸೋತು ಸುಮ್ಮನಾಗಿತ್ತು. ಸೀಕ್ರೇಟ್ ಆಗಿ ವಿನಯ್ ಅವರ ಮನೆತನಕ್ಕೆ ಸಪೋರ್ಟ್ ಮಾಡಿದ್ದ ತುಕಾಲಿ ಸಂತು ಕೂಡ ಕ್ಯಾಪ್ಟನ್ಸಿ ಟಾಸ್ಕ್‌ಗೆ ಅರ್ಹರಾಗಿದ್ದರು. 

ಬಿಗ್‌ಬಾಸ್ ಕ್ಯಾಪ್ಟನ್ಸಿಗಾಗಿ ಟೈಯರ್ ಓಡಿಸುವ ಟಾಸ್ಕ್ ನೀಡಿದ್ದರು. ಇದರಲ್ಲಿ ವಿನಯ್ ಮನೆತನದ ಎಂಟು ಮಂದಿ ಇದ್ದರು. ಟೈಯರ್ ಓಡಿಸಿ ಯಾರು ಮೊದಲು ಗುರಿ ಮುಟ್ಟುತ್ತಾರೋ ಅವರು ಪ್ರತಿ ಬಾರಿ ಒಬ್ಬರನ್ನು ಕ್ಯಾಪ್ಟನ್ಸಿ ಟಾಸ್ಕ್‌ನಿಂದ ಹೊರಗಿಡಬಹುದಾಗಿತ್ತು. ಕೊನೆಯಲ್ಲಿ ವಿನಯ್ ಗೌಡ ಹಾಗೂ ತುಕಾಲಿ ಸಂತು ಉಳಿದಿದ್ದರು. ಕೊನೆಯಲ್ಲಿ ನಡೆದ ಕ್ಯಾಪ್ಟನ್ಸಿ ಟಾಸ್ಕ್‌ನಲ್ಲಿ ತುಕಾಲಿ ಸಂತು ಸೋತಿದ್ದು, ವಿನಯ್ ಕ್ಯಾಪ್ಟನ್ ಆಗಿ ಆಯ್ಕೆಯಾಗಿದ್ದಾರೆ. ಇದರ ಪ್ರೋಮೋ ಬಿಡುಗಡೆಯಾಗಿದ್ದು, ಇಂದಿನ ಸಂಚಿಕೆಯಲ್ಲಿ ಪ್ರಸಾರವಾಗಲಿದೆ. 

ನಾಲ್ಕನೇ ವಾರ ಬಿಗ್‌ಬಾಸ್ ಮನೆಯಿಂದ ಹೊರ ಹೋಗಲು ವಿನಯ್ ಗೌಡ, ಮೈಕಲ್ ಅಜಯ್, ಸಿರಿ, ತುಕಾಲಿ ಸಂತು, ರಕ್ಷಕ್, ತನಿಷಾ ಹಾಗೂ ಕಾರ್ತಿಕ್ ಮಹೇಶ್ ನಾಮಿನೇಟ್ ಆಗಿದ್ದಾರೆ. ಇವರಲ್ಲಿ ಈ ವಾರ ಯಾರು ದೊಡ್ಮನೆಯಿಂದ ಹೊರ ಹೋಗುತ್ತಾರೆ? ಒಬ್ಬರು ಹೋಗುತ್ತಾರಾ ಅಥವಾ ಇಬ್ಬರು ಹೋಗುತ್ತಾರಾ ಎಂಬುದು ಕುತೂಹಲ ಮೂಡಿಸಿದೆ. 

ಆರಂಭವಾದ ನಾಲ್ಕೇ ವಾರಗಳಲ್ಲಿ ಬಿಗ್‌ಬಾಸ್ ಮನೆ ಇಬ್ಭಾಗವಾಗಿದೆ. ಇತ್ತ ವಿನಯ್ ತಮ್ಮದೇಯಾದ ತಂಡ ಕಟ್ಟಿಕೊಂಡಿದ್ದಾರೆ. ನಾಮಿನೇಷನ್, ಕಳಪೆ, ಕ್ಯಾಪ್ಟೆನ್ಸಿ ವಿಚಾರದಲ್ಲಿ ಕೆಲ ಸ್ಪರ್ಧಿಗಳನ್ನು ವಿನಯ್ ಇನ್‌ಫ್ಲುಯೆನ್ಸ್ ಮಾಡಿದ್ದಾರೆ. ಇದೀಗ ಫಿನಾಲೆಯಲ್ಲಿ ನಮ್ಮಲ್ಲೇ ಯಾರಾದರೂ ಇರಬೇಕು. ಬೇರೆಯವರನ್ನೆಲ್ಲಾ ಎಲಿಮಿನೇಟ್ ಮಾಡ್ತಾ, ಮಾಡ್ತಾ ಫಿನಾಲೆಯಲ್ಲಿ ನಾವೇ ಇರಬೇಕು ಅಂತ ನಮ್ರತಾ ಗೌಡ ತಮ್ಮ ಗುಂಪಿನವರಿಗೆ ಫೀಡ್ ಮಾಡಿದ್ದಾರೆ. ಈ ಗ್ರುಪಿಸಂ ಮತ್ತು ಫಿಕ್ಸಿಂಗ್ ಬಗ್ಗೆ ಕಿಚ್ಚನ ಪಂಚಾಯಿತಿಯಲ್ಲಿ ಚರ್ಚೆ ನಡೆಯಲಿದೆಯಾ ಎಂಬುದನ್ನು ಕಾದು ನೋಡಬೇಕಿದೆ.