ಬಿಗ್‌ಬಾಸ್ ಸೀಸನ್ 1ರಿಂದ 10ರವರೆಗೆ ಬಿಗ್‌ಬಾಸ್‌ ಮನೆಯಲ್ಲಿ ಸದ್ದು ಮಾಡಿದ ಜೋಡಿಗಳಿವರು: ಈ ಬಾರಿ ಯಾರು?

ಬಿಗ್‌ಬಾಸ್ ಕನ್ನಡ ಸೀಸನ್ ಒಂದರ ಜೋಡಿ ಹಕ್ಕಿಗಳು ತಿಲಕ್ ಹಾಗೂ ಶ್ವೇತಾ ಪಂಡಿತ್. ಇವರಿಬ್ಬರು ತುಂಬ ಕ್ಲೋಸ್ ಆಗಿದ್ದರು. ಆಗಷ್ಟೇ, ಬಿಗ್ ಬಾಸ್ ಕಾರ್ಯಕ್ರಮ ಕನ್ನಡಕ್ಕೆ ಬಂದಿತ್ತು. ಹಲವರಿಗೆ ಈ ಕಾರ್ಯಕ್ರಮ ಅರ್ಥವೇ ಆಗಿರಲಿಲ್ಲ. ಬಿಗ್ ಬಾಸ್ ಕನ್ನಡ ಸೀಸನ್ ಒಂದರಲ್ಲಿ ತಿಲಕ್ ಮತ್ತು ಶ್ವೇತಾ ಪಂಡಿತ್ ತುಂಬಾ ಹತ್ತಿರವಾಗಿದ್ದರು. ಇದಾದ ಬಳಿಕ ನಟಿ ಸಂಜನಾ ಗಲ್ರಾನಿ ಹಾಗೂ ತಿಲಕ್ ಜೋಡಿ ಸುದ್ದಿಯಾಗಿತ್ತು.

 ಮೊದಲ ಸೀಸನ್​ನಲ್ಲಿ ನಡೆದ ಪ್ರೇಮ ಪ್ರಸಂಗಗಳು ಎರಡನೇ ಸೀಸನ್​ನಲ್ಲಿಯೂ ಮುಂದುವರೆದಿತ್ತು. ಎರಡನೇ ಸೀಸನ್​ನಲ್ಲಿ ನಟಿ ನೀತು ಹಾಗೂ ನಟ ಆದಿ ಲೋಕೇಶ್ ಪ್ರೇಮ ಪಕ್ಷಿಗಳಾಗಿ ಕಾಣಿಸಿಕೊಂಡಿದ್ದರು. ಈ ಜೋಡಿ ಒಟ್ಟಿಗೆ ಓಡಾಡುವುದು, ಒಟ್ಟಿಗೆ ಇರುವುದು, ಸೀಕ್ರೆಟ್ ಮಾತನಾಡುವುದು ಹೆಚ್ಚಾಗಿತ್ತು. ಟ್ರೋಫಿ ಗೆಲ್ಲದಿದ್ದರೂ ಹೆಚ್ಚು ಅವಧಿ ಟಿವಿಯಲ್ಲಿ ಹೆಚ್ಚು ಸಮಯ ಕಾಣಿಸಿಕೊಂಡಿದ್ದರು.  

ಸಿನಿಮಾಗಳಲ್ಲಿ ಅವಕಾಶಗಳು ಕಡಿಮೆಯಾಗುತ್ತಿದ್ದಂತೆ ನಟಿ ಪೂಜಾ ಗಾಂಧಿ ಬಿಗ್ ಬಾಸ್ ಸೀಸನ್ 3ಕ್ಕೆ ಬಂದರು. ಈ ವೇಳೆ ಪೂಜಾ ಗಾಂಧಿ ಹಾಗೂ ಕ್ರಿಕೆಟ್ ಆಟಗಾರ ಅಯ್ಯಪ್ಪ ಪ್ರೇಮಿಗಳ ಹಾಗೆ ಕಾಣಿಸಿಕೊಂಡಿದ್ದರು. ಮೊದಲು ದೂರವೇ ಇದ್ದ ಈ ಜೋಡಿ ನಂತರದ ದಿನಗಳಲ್ಲಿ ಹತ್ತಿರವಾದರು. ಬಿಗ್‌ಬಾಸ್ ಟಾಸ್ಕ್‌ಗಳ ಮೂಲಕ ಇನ್ನಷ್ಟು ಕ್ಲೋಸ್ ಆಗಿದ್ದರು.

ಬಿಗ್‌ಬಾಸ್ಸ್ ಸೀಸನ್ ನಾಲ್ಕರಲ್ಲಿ ಭುವನ್ ಪೊನ್ನಣ್ಣ ಹಾಗೂ ಸಂಜನಾ ಪ್ರೇಮ ಪಕ್ಷಿಗಳಾಗಿ ಕಾಣಿಸಿಕೊಂಡರು. ಆದರೆ, ಇವರಿಬ್ಬರ ನಡುವೆ ಪ್ರಥಮ್ ಬಂದ ಮೇಲೆ ಟ್ವಿಸ್ಟ್ ಬಂತು. ಭುವನ್ ಹಾಗೂ ಸಂಜನಾ ಅಣ್ಣ-ತಂಗಿ ಎಂದು ಹೇಳಿ ಪ್ರಥಮ್ ಇವರಿಬ್ಬರಿಗೆ ಬಹಳ ಕಾಟ ಕೊಟ್ಟರು.

ಬಿಗ್‌ಬಾಸ್ ಸೀಸನ್ ಐದರಲ್ಲಿ ಎರಡೆರಡು ಜೋಡಿಗಳಿದ್ದರು.  ಒಂದೆಡೆ ಚಂದನ್ ಶೆಟ್ಟಿ ಮತ್ತು ನಿವೇದಿತಾ ಗೌಡ, ಇನ್ನೊಂದೆಡೆ ಜೆಕೆ ಮಾತ್ತು ಶ್ರುತಿ ಪ್ರಕಾಶ್. ಯಾರ ಮೇಲೆ ಯಾರು ಆಕರ್ಷಣೆ ಹೊಂದಿದ್ದಾರೆ ಎನ್ನುವುದೇ ಗೊದಲವಾಗಿತ್ತು. ಬಿಗ್‌ಬಾಸ್‌ನಿಂದ ಹೊರಬಂದ ಬಳಿಕ ಚಂದನ್ ಮತ್ತು ನಿವೇದಿತಾ ಮದುವೆಯಾಗಿದ್ದರು. ಆದ್ರೀಗ ಈ ಜೋಡಿ ಬೇರೆಯಾಗಿದೆ.

ಬಿಗ್‌ಬಾಸ್ ಸೀಸನ್ 6ರಲ್ಲಿ ಹೆಚ್ಚು ಗಮನ ಸೆಳೆದ ಜೋಡಿಗಳು ಮಾಡ್ರನ್ ರೈತ ಶಶಿಕುಮಾರ್ ಹಾಗೂ ಕವಿತಾ ಗೌಡ. ಇವರಿಬ್ಬರು ದೊಡ್ಮನೆಯಲ್ಲಿ ಜೋಡಿಯಾಗಿ ಕಾಣಿಸಿಕೊಂಡಿದ್ದರು. ಇದರ ಜೊತೆಗೆ ಸೋನು ಪಾಟೀಲ್ ಹಾಗೂ ಗಾಯಕ ನವೀನ್ ಸಜ್ಜು ಜೋಡಿ ಕೂಡ ಕೆಲ ದಿನಗಳು ಸುದ್ದಿ ಮಾಡಿತ್ತು.

ಬಿಗ್‌ಬಾಸ್ ಸೀಸನ್  7ರಲ್ಲಿ ದೀಪಿಕಾ ದಾಸ್ ಮತ್ತು ಶೈನ್ ಶೆಟ್ಟಿ ಜೋಡಿ ಹೆಚ್ಚು ಸದ್ದು ಮಾಡಿತ್ತು. ಈ ಸೀಸನ್​ನಲ್ಲಿ ಶೈನ್ ಶೆಟ್ಟಿ ವಿಜೇತರಾಗಿದ್ದರು. ಬಿಗ್ ಬಾಸ್ ಮುಗಿದ ಮೇಲೂ ಈ ಜೋಡಿ ಸ್ನೇಹಿತರಾಗಿದ್ದರು. ಇವರಿಬ್ಬರ ಮದುವೆ ಬಗ್ಗೆ ಹಲವು ಸುದ್ದಿಗಳು ಹರಿದಾಡಿದ್ದವು. ದೀಪಿಕಾ ಮತ್ತೆ ಬಿಗ್ ಬಾಸ್ ಸೀಸನ್ 9ರಲ್ಲೂ ಭಾಗವಹಿಸಿದ್ದರು. 

ಬಿಗ್‌ಬಾಸ್ ಸೀಸನ್ 8ರಲ್ಲಿ ದಿವ್ಯ ಉರುಡುಗ ಹಾಗೂ ಅರವಿಂದ್ ಕೆ.ಪಿ ಜೋಡಿಯಾಗಿ ಕಾಣಿಸಿಕೊಂಡಿದ್ದರು. ಈಗಲೂ ಕೂಡ ಈ ಜೋಡಿ ಪ್ರೀತಿಯಲ್ಲಿದೆ. ದಿವ್ಯ ಉರುಡುಗ ಮತ್ತೆ ಬಿಗ್ ಬಾಸ್ ಸೀಸನ್ 9ರಲ್ಲಿ ಪ್ರವೀಣರಾಗಿ ಭಾಗಹಿಸಿದ್ದಾರೆ. ಇನ್ನು ಬಿಗ್ ಬಾಸ್ ಸೀಸನ್ 8ರಲ್ಲಿ ದಿವ್ಯಾ ಸುರೇಶ್-ಮಂಜು ಪಾವಗಡ ಕೂಡ ಜೋಡಿ ಹಕ್ಕಿಗಳಾಗಿ ಕಾಣಿಸಿಕೊಂಡಿದ್ದರು.  ಈ ಪೈಕಿ ದಿವ್ಯ ಉರುಡುಗ ಹಾಗೂ ಅರವಿಂದ್ ಕೆ.ಪಿ ಸದ್ಯದಲ್ಲೇ ಮದುವೆಯಾಗುವ ಸೂಚನೆಯಿದೆ.  

ಬಿಗ್‌ಬಾಸ್ ಸೀಸನ್ 9ರಲ್ಲಿ ಪುಟ್ಟಗೌರಿ ಧಾರಾವಾಹಿ ಖ್ಯಾತಿಯ ಸಾನ್ಯ ಅಯ್ಯರ್ ಹಾಗೂ ತುಳು ನಟ ರೂಪೇಶ್ ಶೆಟ್ಟಿ ಜೋಡಿಯಾಗಿ ಸುದ್ದಿಯಾಗಿದ್ದರು. ದೊಡ್ಮನೆಯಲ್ಲಿ ಇವರಿಬ್ಬರ ಜೋಡಿ ಸಾಕಷ್ಟು ಸುದ್ದಿ ಮಾಡಿತ್ತು. ರೂಪೇಶ್ ಶೆಟ್ಟಿ ಬಿಗ್‌ಬಾಸ್ ಟ್ರೋಫಿ ಗೆದ್ದಿದ್ದರು.

ಬಿಗ್‌ಬಾಸ್‌ ಕನ್ನಡ ಸೀಸನ್ 10ರಲ್ಲಿ ನಾಲ್ಕು ಜೋಡಿಗಳು ಗಮನ ಸೆಳೆದಿದ್ದವು. ಮೊದಲು ಕಾರ್ತಿಕ್ ಮಹೇಶ್ ಹಾಗೂ ಚಾರ್ಲಿ ಬೆಡಗಿ ಸಂಗೀತಾ ಶೃಂಗೇರಿ ಸಿಕ್ಕಾಪಟ್ಟೆ ಕ್ಲೋಸ್ ಆಗಿದ್ದರು. ನಂತರ ಇಶಾನಿ ಹಾಗೂ ಮೈಕಲ್ ತಾವಿಬ್ಬರು ಪ್ರೀತಿಸುತ್ತಿರುವುದಾಗಿ ಬಹಿರಂಗವಾಗಿಯೇ ಹೇಳಿಕೊಂಡರು. ನಂತರ ಇಬ್ಬರು ಬ್ರೇಕಪ್ ಮಾಡಿಕೊಂಡರು. ದೊಡ್ಮನೆಗೆ ಎಂಟ್ರಿ ಕೊಟ್ಟಾಗಿನಿಂದಲೂ ಸ್ನೇಹಿತ್ ತಮಗೆ ನಮ್ರತಾ ಮೇಲೆ ಫೀಲಿಂಗ್ಸ್ ಇದೆ ಅಂತ ಹೇಳಿಕೊಂಡಿದ್ದರು. ಆದರೆ, ನಮ್ರತಾ ಅದಕ್ಕೆ ಒಪ್ಪಿಗೆ ಸೂಚಿಸಿರಲಿಲ್ಲ, ಸ್ನೇಹಿತ್ ಅವರದ್ದು ಒನ್ ಸೈಡೆಡ್ ಲವ್ ಆಗಿತ್ತು. ಇನ್ನು ವರ್ತೂರು ಸಂತೋಷ್ ಹಾಗೂ ತನಿಷಾ ಜೋಡಿ ಕೂಡ ದೊಡ್ಮನೆಯಲ್ಲಿ ಸಿಕ್ಕಾಪಟ್ಟೆ ಸುದ್ದಿಯಾಗಿತ್ತು.