ನಾನು ಸಿಎಂ ಆಗೇ ಆಗ್ತೀನಿ, ನೀನೇ ನನ್ನ ಪಿಎ: ಧನರಾಜ್‌ಗೆ ಆಫರ್ ಕೊಟ್ಟ ಜಗದೀಶ್

ಕಳೆದ ಸಂಚಿಕೆಯಲ್ಲಿ ಬಿಗ್‌ಬಾಸ್ ಹುಷಾರ್ ಹುಷಾರ್ ಹುಷಾರ್ ಸಾರ್ ಟಾಸ್ಕ್ ನೀಡಿದ್ದರು. ಈ ಟಾಸ್ಕ್‌ನ ಅನುಸಾರ, ಪ್ಲಾಸ್ಟಿಕ್ ಬಾಲ್‌ ಅನ್ನು ಝಿಗ್ ಝ್ಯಾಗ್‌ನಲ್ಲಿ ಬ್ಯಾಲೆನ್ಸ್ ಮಾಡುತ್ತಾ ತಂದು ಬಾಕ್ಸ್‌ನಲ್ಲಿ ಹಾಕಬೇಕಿತ್ತು. ಸ್ವರ್ಗ ಹಾಗೂ ನರಕ ತಂಡಗಳಿಂದ ತಲಾ ಮೂರು ಮಂದಿ ಬಂದು ಟಾಸ್ಕ್ ಆಡಬೇಕಿತ್ತು. ಅಂತಿಮವಾಗಿ 21 ನಿಮಿಷ 40 ಸೆಕೆಂಡ್‌ನಲ್ಲಿ ಟಾಸ್ಕ್ ಮುಗಿಸಿ, ನರಕ ನಿವಾಸಿಗಳು ಗೆಲುವು ಸಾಧಿಸಿದರು.

ಟಾಸ್ಕ್‌ನಲ್ಲಿ ಸೋತ ಸ್ವರ್ಗವಾಸಿಗಳು ನರಕ ವಾಸಿಗಳಿಗೆ ಮೂರು ಹೊತ್ತು ಅವರು ಕೇಳಿದ ಅಡುಗೆ ಮಾಡಿಕೊಡುವಂತೆ ಬಿಗ್‌ಬಾಸ್ ಸೂಚಿಸಿದರು. ಕಳೆದೊಂದು ವಾರದಿಂದ ಗಂಜಿ ಊಟ ಮಾಡ್ತಿದ್ದ ನರಕವಾಸಿಗಳು ಚಪಾತಿ ಮತ್ತು ಅನ್ನ ಮಾಡಿಸಿಕೊಂಡು ಭರ್ಜರಿ ಊಟ ಸವಿದರು. ಇದಕ್ಕೂ ಮುನ್ನ ಕ್ಯಾಪ್ಟನ್ ಹಂಸ ನರಕವಾಸಿಗಳಿಗೆ ಒಳ್ಳೆಯ ಊಟ ಕಳುಹಿಸುವಂತೆ ಬಿಗ್‌ಬಾಸ್‌ಗೆ ಮನವಿ ಮಾಡಿ, ಕಣ್ಣೀರು ಹಾಕಿದ್ದರು.

ಲಾಯರ್ ಜಗದೀಸ್ ಬಾತ್ರೂಮ್ ಸ್ವಚ್ಛಗೊಳಿಸುತ್ತಿದ್ದಾಗ ಅಲ್ಲಿಗೆ ಬಂದ ಧನರಾಜ್ ಅವರ ಬಳಿ ಮಾತನಾಡುತ್ತಿದ್ದರು. ಈ ಸಂದರ್ಭ ನೀವು ನಿಜವಾಗಿಯೂ ಸಿಎಂ ಆಗ್ತೀರಾ? ಅಂತ ಪ್ರಶ್ನಿಸಿದರು. ಅದಕ್ಕೆ ಹೌದು ಎಂದು ಉತ್ತರಿಸಿದ ಜಗದೀಶ್, ನಾನು ಸಿಎಂ ಆಗೇ ಆಗ್ತೀನಿ. ಆಗ ನೀನೇ ನನ್ನ ಪಿಎ. ಕಾರು ಹಾಗೂ 1.5 ಲಕ್ಷ ವೇತನ ಅಂತ ಹೇಳಿದ್ರು.

ಎರಡನೇ ವಾರದ ನಾಮಿನೇಷನ್‌ಗೆ ಬಿಗ್‌ಬಾಸ್ ಹೊಸ ಟಾಸ್ಕ್ ನೀಡಿದ್ದರು. ಇದರ ಪ್ರಕಾರ, ದೊಡ್ಮನೆಯ ಸದಸ್ಯರು ವೇದಿಕೆ ಮೇಲೆ ಬಂದು ಬೇರೆ ಸ್ಫರ್ಧಿಗಿಂತ ನಾವ್ಯಾಕೆ ಶ್ರೇಷ್ಠ ಅಂತ ವಾದಿಸಬೇಕಿತ್ತು. ಈ ಚರ್ಚೆಯನ್ನು ಗಮನಿಸಿ, ಕ್ಯಾಪ್ಟನ್ ಹಂಸ ಯಾರು ನಾಮಿನೇಟ್ ಮಾಡಿ ಮಸಿ ಬಳಿಯಬೇಕಿತ್ತು. ಅದರಂತೆ ತ್ರಿವಿಕ್ರಮ್, ಅನುಷಾ, ಧನರಾಜ್ ಸೋತು ಮಸಿ ಬಳಸಿಕೊಂಡು ನಾಮಿನೇಟ್ ಆಗಿದ್ದಾರೆ. ಗೋಲ್ಡ್ ಸುರೇಶ್ ನೇರವಾಗಿ ನಾಮಿನೇಟ್ ಆಗಿದ್ದಾರೆ.