ಬೆಳ್ಳಿತೆರೆಯಲ್ಲಿ ಖಾಕಿ ಖದರ್ ತೋರಿಸಿದ ಸ್ಯಾಂಡಲ್‌ವುಡ್ ನಟಿಯರಿವರು!

ಸ್ಯಾಂಡಲ್‌ವುಡ್‌ನಲ್ಲಿ ಆಕ್ಷನ್ ಹೀರೋಯಿನ್ ಎಂದೇ ಗುರುತಿಸಿಕೊಂಡಿರುವ ಕನಸಿನ ರಾಣಿ ಮಾಲಾಶ್ರೀ ಅವರನ್ನು ಮೀರಿಸುವ ಆಕ್ಷನ್ ನಟಿ ಕನ್ನಡದಲ್ಲಿ ಮತ್ತೊಬ್ಬರಿಲ್ಲ. ಪೊಲೀಸ್ ಪಾತ್ರದಲ್ಲಿ ಕಾಣಿಸಿಕೊಳ್ಳುವುದಕ್ಕಿಂತ ಮೊದಲು ಅವರು ದರ್ಪ ತೋರುವ ಮಹಿಳೆಯ ಪಾತ್ರವನ್ನು ನಿರ್ವಹಿಸುತ್ತಿದ್ದರು. ನಂತರ ದುಷ್ಟ ಅಧಿಕಾರಿಗಳನ್ನು ಸದೆ ಬಡಿಯುವ ದಕ್ಷ ಪೊಲೀಸ್ ಅಧಿಕಾರಿ ಪಾತ್ರದಲ್ಲಿ ಕಾಣಿಸಿಕೊಂಡು ಆ ಪಾತ್ರಕ್ಕೆ ಜೀವ ತುಂಬಿದರು. ಲೇಡಿ ಕಮಿಷನ್, ಚಾಮುಂಡಿ, ಭವಾನಿ ಐಪಿಎಸ್, ದುರ್ಗಿ, ಕನ್ನಡದ ಕಿರಣ್ ಬೇಡಿ, ಲೇಡಿ ಪೊಲೀಸ್ ಮತ್ತು ಶಕ್ತಿ ಮಾಲಾಶ್ರೀ ಪೊಲೀಸ್ ಪಾತ್ರದಲ್ಲಿ ಕಾಣಿಸಿಕೊಂಡ ಸಿನಿಮಾಗಳು.

2009ರಲ್ಲಿ 'ವೀರ ಮದಕರಿ' ಸಿನಿಮಾ ಮೂಲಕ ಸಿನಿಪಯಣ ಆರಂಭಿಸಿದ ನಟಿ ರಾಗಿಣಿ ದ್ವಿವೇದಿ, ಈವರೆಗೂ 25ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಜೊತೆಗೆ ಕೆಲ ಹಿಂದಿ, ಮಲಯಾಳಂ, ತೆಲಗು ಮತ್ತು ತಮಿಳು ಚಿತ್ರಗಳಲ್ಲೂ ಬಣ್ಣಹಚ್ಚಿದ್ದಾರೆ. ಬಹುತೇಕ ಗ್ಲಾಮರ್ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದ ರಾಗಿಣಿ, ರಾಗಿಣಿ ಐಪಿಎಸ್ ಸಿನಿಮಾದಲ್ಲಿ ಪೊಲೀಸ್ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದರು.

ನಟಿ ಪ್ರೇಮ ಒಂದು ಕಾಲದಲ್ಲಿ ಕನ್ನಡ ಚಿತ್ರರಂಗದ ಯಶಸ್ವಿ ನಟಿಯಾಗಿ ಗುರುತಿಸಿಕೊಂಡಿದ್ದರು. ಅಂದು ಪ್ರೇಮಾ ನಟಿಸಿದ ಸಿನಿಮಾಗಳು ಇಂದಿಗೂ ಜನರ ಮಾನಸದಲ್ಲಿ ಉಳಿದಿವೆ. ಇವರು 2005ರಲ್ಲಿ ಪ್ರೇಮಾ 'ಇನ್ಸ್‌ಪೆಕ್ಟರ್ ಝೂನ್ಸಿ' ಸಿನಿಮಾದಲ್ಲಿ ಪೊಲೀಸ್ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದರು.

ಕನ್ನಡದ ಕರಾಟೆ ಕ್ವೀನ್ ಆಯೇಷಾ ಆನಂದ್ ಪಿ ರಾಜ್ ನಿರ್ದೇಶನದ 'ಚೆನ್ನಮ್ಮ ಐಪಿಎಸ್' ಚಿತ್ರದಲ್ಲಿ ಸಾಹಸ ದೃಶ್ಯದಲ್ಲಿ ಬೋಲ್ಡ್ ಆಗಿ ನಟಿಸಿದ್ದರು. ಈ ಚಿತ್ರದಲ್ಲಿನ ಅದ್ಭುತ ನಟನೆಗಾಗಿ ಅವರು ಅಭಿಮಾನಿಗಳಿಂದ ಲೇಡಿ ಬ್ರೂಸ್‌ಲೀ ಎಂಬ ಟೈಟಲ್ ಪಡೆದರು.

ನಟಿ ಹರಿಪ್ರಿಯಾ 'ಡಾಟರ್ ಆಫ್ ಪಾರ್ವತಮ್ಮ' ಎಂಬ ಸಿನಿಮಾದಲ್ಲಿ ಪೊಲೀಸ್ ಪಾತ್ರದಲ್ಲಿ ನಟಿಸಿದ್ದರು. ಚಿತ್ರದಲ್ಲಿ ಹರಿಪ್ರಿಯಾ ತನಿಖಾಧಿಕಾರಿ ವೈದೇಹಿ ಪಾತ್ರದಲ್ಲಿ ಕಾಣಿಸಿಕೊಂಡರೆ, ಅಮ್ಮನ ಪಾತ್ರದಲ್ಲಿ ಪಾರ್ವತಮ್ಮ ಆಗಿ ಸುಮಲತಾ ಮಿಂಚಿದ್ದರು. ತಾಯಿ ಮತ್ತು ಮಗಳ ಬಾಂಧವ್ಯದ ನಡುವೆ ಹೆಣೆದಿರುವ ಈ ಕಥೆಯಲ್ಲಿ ಮಹಿಳಾ ಜೀವನದ ಸಾಹಗಾಥೆಯೂ ಇದೆ.

ಸ್ಯಾಂಡಲ್‌ವುಡ್ ಸಲಗ ದುನಿಯಾ ವಿಜಯ್ ನಿರ್ದೇಶಿಸಿ, ನಟಿಸಿರುವ ಭೀಮಾ ಸಿನಿಮಾದಲ್ಲಿ ನಟಿ ಪ್ರಿಯಾ ಶಠಮರ್ಷಣ ಖಡಕ್ ಪೊಲೀಸ್ ಆಫೀಸರ್ ಗಿರಿಜಾ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಭೀಮಾದಲ್ಲಿ ದುರುಳರಿಗೆ  ಸಿಂಹಸ್ವಪ್ನವಾಗಿರುವ ಗಿರಿಜಾ ಸಿಕ್ಕಾಪಟ್ಟೆ ಗಮನ ಸೆಳೆದಿತ್ತು. ಚಿಕ್ಕವಯಸ್ಸಿನಲ್ಲಿ ಐಪಿಎಸ್ ಮಾಡಬೇಕೆಂಬ ಆಸೆಯೂ ಪ್ರಿಯಾ ಅವರಿಗಿತ್ತು. ಆದರೆ, ಅದು ಸಾಧ್ಯವಾಗಿರಲಿಲ್ಲ. ಭೀಮಾ ಮೂಲಕ ಅವರ ಕನಸು ಈಡೇರಿತ್ತು.