ಚಾಲೆಂಜಿಂಗ್ ಸ್ಟಾರ್ ದರ್ಶನ್ 'ಕ್ರಾಂತಿ' ಸಿನಿಮಾದ ನಾಲ್ಕು ದಿನಗಳ ಕಲೆಕ್ಷನ್ ರಿಪೋರ್ಟ್

ಕ್ರಾಂತಿ ಸಿನಿಮಾದ ಮೊದಲ ದಿನಕ್ಕೆ ಅಡ್ವಾನ್ಸ್ ಬುಕ್ಕಿಂಗ್ ಅದ್ಭುತವಾಗಿತ್ತು. ಮೊದಲ ದಿನ 600ಕ್ಕೂ ಹೆಚ್ಚು ಶೋಗಳು ಭರ್ತಿಯಾಗಿದ್ದವು. ಹಾಗಾಗಿ ದರ್ಶನ್ ನಟನೆಯ ಕ್ರಾಂತಿ ಸಿನಿಮಾ ಮೊದಲ ದಿನ ಅಂದಾಜು 11.30 ಕೋಟಿ ಕಲೆಕ್ಷನ್ ಮಾಡುವ ಮೂಲಕ ಬಾಕ್ಸಾಫೀಸ್ ನಲ್ಲಿ ಅಬ್ಬರಿಸಿತ್ತು. ಬೆಂಗಳೂರಿನಲ್ಲಿ ಬಿಟ್ಟರೆ ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ 'ಕ್ರಾಂತಿ' ಸಿನಿಮಾ ಫೀವರ್ ಜಾಸ್ತಿಯಿತ್ತು. ಅದಕ್ಕೆ ತಕ್ಕ ಹಾಗೆ ಶೋಗಳು, ಬುಕ್ಕಿಂಗ್ ಕೂಡ ಆಗಿತ್ತು. ಮೈಸೂರಿನಲ್ಲಿ ಮೊದಲ ದಿನ ಕ್ರಾಂತಿ ಸಿನಿಮಾ ಅಂದಾಜು 83 ಲಕ್ಷಕ್ಕೂ ಅಧಿಕ ಕಲೆಕ್ಷನ್ ಮಾಡಿತ್ತು.  

ಎರಡನೇ ದಿನ 'ಕ್ರಾಂತಿ' ಸಿನಿಮಾದ ಆನ್‌ಲೈನ್‌ ಬುಕ್ಕಿಂಗ್ ಅಷ್ಟಾಗಿ ಆಗಿರಲಿಲ್ಲ. ಜನವರಿ 26ರಂದು ಗಣರಾಜ್ಯೋತ್ಸವ ರಜೆ ಹಿನ್ನೆಲೆಯಲ್ಲಿ 'ಕ್ರಾಂತಿ' ಸಿನಿಮಾ ನೋಡಲು ದೊಡ್ಡ ಸಂಖ್ಯೆಯಲ್ಲಿ ಸಿನಿರಸಿಕರು ಮುಗಿಬಿದ್ದಿದ್ದರು. ಬುಕ್ಕಿಂಗ್ ಜೊತೆಗೆ ಕಲೆಕ್ಷನ್ ಕೂಡ ಜೋರಾಗಿತ್ತು. ಆದರೆ, 2ನೇ ದಿನ ಕೆಲಸದ ದಿನವಾಗಿದ್ದರಿಂದ ಬುಕ್ಕಿಂಗ್ ಗೆ ಒಳ್ಳೆಯ ಪ್ರತಿಕ್ರಿಯೆ ಸಿಕ್ಕಿರಲಿಲ್ಲ. ಮೊದಲ ದಿನ ಅಬ್ಬರದ ಓಪನಿಂಗ್ ಪಡೆದುಕೊಂಡಿದ್ದ ಕ್ರಾಂತಿ, ಎರಡನೇ ದಿನ 4.7 ಕೋಟಿ ಗಳಿಸಿದೆ. 

ಮೂರನೇ ದಿನವೂ  'ಕ್ರಾಂತಿ' ಸಿನಿಮಾದ ಆನ್‌ಲೈನ್‌ ಬುಕ್ಕಿಂಗ್ ಅಷ್ಟಾಗಿ ಇರಲಿಲ್ಲ. ಮೂರನೇ ದಿನ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ 'ಕ್ರಾಂತಿ' ಸಿನಿಮಾ  5.4 ಕೋಟಿ ರೂಪಾಯಿ ಗಳಿಸಿದೆ. 

ಇನ್ನು ನಾಲ್ಕನೇ ದಿನ ಅಂದರೆ ಭಾನುವಾರ ಈ ಸಿನಿಮಾದ ಬುಕ್ಕಿಂಗ್ ನಲ್ಲಿ ತುಸು ಸುಧಾರಣೆ ಕಂಡಿದೆ. ಭಾನುವಾರ ಬೆಂಗಳೂರಿನಲ್ಲಿ ಕ್ರಾಂತಿ ಚಿತ್ರದ ಸುಮಾರು 30 ಪ್ರದರ್ಶನಗಳು ಫಾಸ್ಟ್ ಫಿಲ್ಲಿಂಗ್/ಸೋಲ್ಡ್ ಔಟ್ ಆಗಿದ್ದವು. ರಾಜ್ಯದ ವಿವಿಧ ಕಡೆ ಕೂಡ ಭಾನುವಾರ ತುಸು ಒಳ್ಳೆಯ ಬುಕ್ಕಿಂಗ್ ಕಂಡಿತ್ತು. ಕ್ರಾಂತಿ ಸಿನಿಮಾ ೪ನೇ ದಿನ 6.1 ಕೋಟಿ ಗಳಿಕೆ ಮಾಡಿದೆ ಎಂದು ಬಾಕ್ಸಾಫೀಸ್ ಪಂಡಿತರು ತಿಳಿಸಿದ್ದು, ಈ ಮೂಲಕ ಮೊದಲ ವಾರಾಂತ್ಯಕ್ಕೆ 27.5 ಕೋಟಿ ಗಳಿಸಿದೆ ಎಂಬ ಮಾಹಿತಿಯಿದೆ.   

ಕ್ರಾಂತಿ ಚಿತ್ರ ಬಿಡುಗಡೆಯಾಗುವುದಕ್ಕೂ ಮುನ್ನ ಸಾಲು-ಸಾಲು ಪೋಸ್ಟ್ ಹಂಚಿಕೊಂಡಿದ್ದ ಚಿತ್ರತಂಡ ಎಷ್ಟು ಬುಕ್ಕಿಂಗ್ ಆಗಿದೆ, ಅಡ್ವಾನ್ಸ್ ಬುಕ್ಕಿಂಗ್ ನಿಂದ ಎಷ್ಟು ಕಲೆಕ್ಷನ್ ಆಗಿದೆ ಎಂಬುದನ್ನು ಹಂಚಿಕೊಂಡಿತ್ತು. ಆದರೆ, ಕ್ರಾಂತಿ ಸಿನಿಮಾ ಬಿಡುಗಡೆಯಾದ ನಂತರ ಚಿತ್ರ ಯಶಸ್ವಿ ಎಂದು ಪೋಸ್ಟ್ ಮಾಡಿದ್ದು, ಬಾಕ್ಸಾಫೀಸ್ ಕಲೆಕ್ಷನ್ ವಿಚಾರವಾಗಿ ಯಾವುದೇ ಮಾಹಿತಿ ಹಂಚಿಕೊಂಡಿಲ್ಲ. ಚಿತ್ರತಂಡ ಅಧಿಕೃತ ಮಾಹಿತಿ ನೀಡದ ಕಾರಣ ಸಿನಿರಸಿಕರಲ್ಲಿ ಮತ್ತು ಅಭಿಮಾನಿಗಳಲ್ಲಿ ಚಿತ್ರ ಎಷ್ಟು ಗಳಿಸಿದೆ ಎಂಬುದರ ಕುರಿತು ಗೊಂದಲ ಉಂಟಾಗಿದೆ.