ಸ್ಯಾಂಡಲ್‌ವುಡ್‌ನ ಟಾಪ್ 5 ರೋಡ್ ಜರ್ನಿ ಸಿನಿಮಾಗಳಿವು: ನಿಮ್ಮಿಷ್ಟದ ಸಿನಿಮಾ ಯಾವುದು?

2007ರಲ್ಲಿ ತೆರೆಕಂಡ ಗೋಲ್ಡನ್ ಸ್ಟಾರ್ ಗಣೇಶ್ ಮತ್ತು ರೇಖಾ ವೇದವ್ಯಾಸ್ ಅಭಿನಯದ 'ಹುಡುಗಾಟ' ಸ್ಯಾಂಡಲ್‌ವುಡ್‌ಮ ಉತ್ತಮ ರೋಡ್ ಜರ್ನಿ ಸಿನಿಮಾಗಳಲ್ಲೊಂದು. ಚಿತ್ರದಲ್ಲಿ ತನ್ನ ಪ್ರಿಯಕರನನ್ನು ಭೇಟಿಯಾಗಲು ಮನೆಯಿಂದ ಓಡಿಹೋದ ಪ್ರಿಯಾ,  ಬಾಲು ಮಹೇಂದರ್ ಎಂಬ ಪತ್ರಕರ್ತನನ್ನು ಭೇಟಿಯಾಗುತ್ತಾಳೆ. ಒಂದು ಒಳ್ಳೆಯ ಸ್ಟೋರಿ ಸಿಗಬಹುದು ಎಂದು ಬಾಲು ಆಕೆಗೆ ಸಾಥ್ ನೀಡುತ್ತಾನೆ. ರಸ್ತೆಯಲ್ಲಿನ ಇವರಿಬ್ಬರ ತುಂಟಾದ ತುಂಬಿದ ಜರ್ನಿ ಪ್ರೇಕ್ಷಕರಿಗೆ ಸಿಕ್ಕಾಪಟ್ಟೆ ಇಷ್ಟವಾಗುತ್ತದೆ.

ಹಿಂದಿಯ ಧಮಾಲ್ ಚಿತ್ರದ ರಿಮೇಕ್ ಆದ 'ಮಸ್ತ್ ಮಜಾ ಮಾಡಿ' ಚಿತ್ರದಲ್ಲಿ ನಾಲ್ಕು ನಿರುದ್ಯೋಗಿ ಯುವಕರು ಊಟಿಯ ಗಾರ್ಡನ್ ಒಂದರಲ್ಲಿರುವ ಸಂಪತ್ತಿಗೋಸ್ಕರ ಊಟಿಯೆಡೆಗೆ ಪ್ರಯಾಣ ಬೆಳಸುತ್ತಾರೆ. ಇದೇ ನಿಧಿಗಾಗಿ ಎಸಿಪಿಯೊಬ್ಬ ಕೂಡ ಪ್ರಯತ್ನ ಪಡುತ್ತಿರುತ್ತಾನೆ. ಚಿತ್ರದಲ್ಲಿ ಸುದೀಪ್, ವಿಜಯ್ ರಾಘವೇಂದ್ರ, ದಿಗಂತ್, ಕೋಮಲ್,ಜೆನ್ನಿಫರ್ ಕೋತ್ವಾಲ್ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದರೆ, ಉಪೇಂದ್ರ, ರೇಖಾ, ಶರ್ಮಿಳಾ ಮಾಂಡ್ರೆ, ಸಂಜನಾ, ಶೆರಿನ್, ಗೌರಿ ಮುಂಜಾಲ್, ಸುಮನ್ ರಂಗನಾಥನ್ ಅತಿಥಿ ಪಾತ್ರಗಳಲ್ಲಿ ನಟಿಸಿದ್ದರು.

ರ್ಯಾಂಬೋ 2 ಸಿನಿಮಾದಲ್ಲಿ ಶರಣ್ ನಾಯಕನಾಗಿ ಮತ್ತು ಆಶಿಕಾ ರಂಗನಾಥ್ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು. ಸಿನಿಮಾದಲ್ಲಿ ಕೃಷ್ಣ (ಶರಣ್) ಸಿನಿಮಾದ ನಾಯಕಿ ಮಯೂರಿ (ಆಶಿಕಾ) ಜೊತೆ ಲಾಂಗ್ ಡ್ರೈವ್ ಹೋಗುತ್ತಾನೆ. ದಾರಿಯಲ್ಲಿ ಇವರಿಗೆ ಡಿಜೆ ಜೊತೆಯಾಗುತ್ತಾನೆ. ಆದರೆ ವಿಚಿತ್ರ ಕಾರೊಂದು ಇವರನ್ನು ಹಿಂಬಾಲಿಸುತ್ತಾ ಇವರ ಮೇಲೆ ಪದೇ ಪದೇ ದಾಳಿ ಮಾಡುತ್ತದೆ. ನಂತರ ಆ ಕಾರಿನ ವ್ಯಕ್ತಿ ಮಯೂರಿಯನ್ನು ಕಿಡ್ಯಾಪ್ ಮಾಡುತ್ತಾನೆ. ಆ ವ್ಯಕ್ತಿಯ ಹಿನ್ನಲೆ ಏನು ಮತ್ತು ಇವರ ಮೇಲೆ ಏಕೆ ದಾಳಿ ಮಾಡುತ್ತಾನೆ ಎಂಬುದು ಚಿತ್ರದ ಸ್ವಾರಸ್ಯ. ಶರಣ್ ಮತ್ತು ಆಶಿಕಾ ಅಭಿನಯದ ಈ ಸಿನಿಮಾ ಒಳ್ಳೆಯ ಮೆಚ್ಚುಗೆ ಪಡೆದಿತ್ತು.

ವಿಷ್ಣುವರ್ಧನ್, ರಮೇಶ್ ಮತ್ತು ಪ್ರೇಮಾ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದ 'ಏಕದಂತ' ಚಿತ್ರ ಹಿಂದಿಯ ಬಾಂಬೆ ಟು ಗೋವಾ ಚಿತ್ರ ಕಥೆ ಆಧರಿಸಿತ್ತು. ವಿಕ್ಕಿಗೆ ತನ್ನ ಕಡಿಮೆ ಆದಾಯದ ಕಾರಣ ಮಗು ಬೇಡವಾಗಿರುತ್ತದೆ. ಆದರೆ ಅವನ ಪತ್ನಿ ಮಗುವಿಗಾಗಿ ಹಲವು ವಿಚಿತ್ರ ವ್ರತಗಳನ್ನು ಪಾಲಿಸುತ್ತಿರುತ್ತಾಳೆ. ಒಂದು ವ್ರತದ ಪಾಲನೆಗಾಗಿ ಗಂಡನ ಜೊತೆ ಗಣಪತಿಪುರಕ್ಕೆ ಹೊರಡುತ್ತಾಳೆ. ಈ ಜರ್ನಿಯಲ್ಲಿ ನಡೆಯುವ ಅನೇಕ ಹಾಸ್ಯ ಘಟನೆಗಳು ಪ್ರೇಕ್ಷಕರಿಗೆ ಇಷ್ಟವಾಗುತ್ತವೆ. ಈ ಸಿನಿಮಾದಲ್ಲಿ ವಿಷ್ಣುವರ್ಧನ್, ರಮೇಶ್ ಅರವಿಂದ್ಹಾಗೂ ಪ್ರೇಮ ಪ್ರೇಮ ಪ್ರಮುಖ ಪಾತ್ರ ನಿರ್ವಹಿಸಿದ್ದರು.

ಇತ್ತೀಚೆಗಷ್ಟೇ ಬಿಡುಗಡೆಯಾದ ಬಿಗ್‌ಬಾಸ್‌ ಖ್ಯಾತಿಯ ದೀಪಿಕಾ ದಾಸ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದ '#ಪಾರುಪಾರ್ವತಿ' ಕೂಡ ಪ್ರಯಾಣ ಹಾಗೂ ಅಡ್ವೆಂಚರ್ ಕಥನ ಹೊಂದಿರುವ ಸಿನಿಮಾ. ಚಿತ್ರದಲ್ಲಿ ದೀಪಿಕಾ, ಪೂನಂ ಸಿರ್ ಹಾಗೂ ಫವಾಜ್ ಅಶ್ರಫ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಚಿತ್ರಸದಲ್ಲಿ ದೀಪಿಕಾ ಕಾರಿನಲ್ಲಿ ಕರ್ನಾಟಕದಿಂದ ಉತ್ತರಖಂಡದವರೆಗೂ ಎಂಟು ರಾಜ್ಯಗಳನ್ನು ಸಂಚರಿಸುವ ಕಥನವಿದೆ.