'ಗುರುದೇವ್ ಹೊಯ್ಸಳ'ಗೆ ಪ್ರೇಕ್ಷಕರಿಂದ ಮೆಚ್ಚುಗೆ: ಕಥೆ, ನಟನೆ ಸೇರಿದಂತೆ ಇತರ ಮಾಹಿತಿ ಇಲ್ಲಿದೆ.

ಬೆಳಗಾವಿಯಲ್ಲಿ ಪೊಲೀಸ್ ಅಧಿಕಾರಿ ಭಾರ್ಗವ್ ಕಾಣೆಯಾಗಿರುತ್ತಾರೆ. ಅದರ ತನಿಖೆಗೆ ಅಂತ ಹೊರಡುವ ಹೊಯ್ಸಳನಿಗೆ ಹಲವು ಸವಾಲು ಎದುರಾಗುತ್ತೆ. ಭಾರ್ಗವ್ ಎಲ್ಲಿ ಅಂತ ಹುಡುಕೋಕೆ ಹೋದ ಹೊಯ್ಸಳ ಯುವ ಪ್ರೇಮಿಗಳನ್ನು ಒಂದು ಮಾಡುತ್ತಾನೆ. ಅಲ್ಲಿಂದ ಕಥೆ ಆ ಯುವ ಪ್ರೇಮಿಗಳನ್ನು ಸುತ್ತಿಕೊಂಡು, ಮತ್ತೆ ಭಾರ್ಗವನ ಬಳಿ ಬಂದು ನಿಲ್ಲುತ್ತೆ. ಬೆಳಗಾವಿ ಸುತ್ತಮುತ್ತಲಿನ ಕಥೆ ಅಂದಾಕ್ಷಣ, ಕನ್ನಡಿಗರು ಮರಾಠಿಗರ ನಡುವಿನ ಹೋರಾಟ ಇಲ್ಲ. ಹಾಗಂತ ಚಿಕ್ಕದೊಂದು ಝಲಕ್ ಕೊಡುವುದನ್ನು ಮರೆತಿಲ್ಲ. 

ಪೊಲೀಸ್ ಅಧಿಕಾರಿ ಭಾರ್ಗವನನ್ನು ಹುಡುಕೋಕೆ ಹೋದ ಗುರುದೇವ್ ಹೊಯ್ಸಳ ಮರ್ಯಾದಾ ಹತ್ಯೆ ಕೇಸ್‌ನಲ್ಲಿ ಸಿಕ್ಕಿಕೊಳ್ಳುತ್ತಾನೆ. ಕೊನೆಗೆ ಅದನ್ನು ಧೈರ್ಯದಿಂದ ಚಾಣಾಕ್ಷ್ಯ ತನದಿಂದ ಹೇಗೆ ಮೆಟ್ಟಿ ನಿಲ್ಲುತ್ತಾನೆ ಅನ್ನೋದು ಕಥೆ. ಇಡೀ ಸಿನಿಮಾದ ಉದ್ದಕ್ಕೂ ನೋಡುಗರಿಗೆ ಪಾಠ ಹೇಳುತ್ತಿದ್ದಾರೆ ಎಂದು ಅನಿಸದೇ, ಎಂಟರ್‌ಟೈನಿಂಗ್ ಆಗಿ ಮಾಸ್ ಫೀಲ್ ಕೊಡುತ್ತಾ ಕಥೆ ಹೆಣೆದಿರೋದನ್ನು ಮೆಚ್ಚಲೇಬೇಕು.

'ಗುರುದೇವ್ ಹೊಯ್ಸಳ' ಸಿನಿಮಾದಲ್ಲಿ ನಟರಾಕ್ಷಸ ಡಾಲಿಧನಂಜಯ್ ರಫ್ ಅಂಡ್ ಟಫ್ ಆಗಿ ಕಾಣಿಸಿಕೊಂಡಿದ್ಧಾರೆ. 'ಗುರುದೇವ್ ಹೊಯ್ಸಳ' ಖಡಕ್ ಪೊಲೀಸ್ ಆಫೀಸರ್. ಈಗಾಗಲೇ ಕರ್ನಾಟಕದಲ್ಲಿ ಹೆಸರು ಮಾಡಿದ್ದ ಪೊಲೀಸ್ ಅಧಿಕಾರಿ ಯಾರಾದರೂ ಇಬ್ಬರು ನೆನಪಿಗೆ ಬರಬಹುದು. ಪ್ರಾಮಾಣಿಕ, ಸ್ಟ್ರಿಕ್ಟ್, ಆಕ್ರಮಣಕಾರಿ ಅಧಿಕಾರಿ. ಚಿತ್ರದಲ್ಲಿ ಗುರುದೇವ್ ಹೊಯ್ಸಳನಿಗೆ ಖಾಕಿ ಹೊಂದಿಕೊಂಡಿದೆ. ಇಂತಹ ಒಬ್ಬ ಪೊಲೀಸ್‌ ಅಧಿಕಾರಿ ಇರಬೇಕು ಅಂತ ಅನಿಸುವಷ್ಟು ಸಹಜವಾಗಿ ಢಾಲಿ ನಟಿಸಿದ್ದಾರೆ. ಒಟ್ಟಿನಲ್ಲಿ  ಖಾಕಿ ಖದರ್ ಮತ್ತೊಮ್ಮ ಗೆದ್ದಿದೆ. 

ನಟ ನವೀನ್ ಶಂಕರ್ 'ಗುಳ್ಟು' ಸಿನಿಮಾದ ಮೂಲಕವೇ ತಾವೇನು ಎಂಬುದನ್ನು ನಿರೂಪಿಸಿದ್ದರು.  ಇದೀಗ ಗುರುದೇವ್ ಹೊಯ್ಸಳದಲ್ಲಿ ಖಳನಾಯಕನಾಗಿ ನಟಿಸುವ ಮೂಲಕ ಇಡೀ ಸಿನಿಮಾದುದ್ದಕ್ಕೂ ರೊಚ್ಚಿಗೆಬಬ್ಬಿಸಿದ್ದಾರೆ. ಸಿನಿಮಾದಲ್ಲಿ ನವೀನ್ ಬಾಲಿ ಎಂಬ ಪಾತ್ರ ನಿರ್ವಹಿಸಿದ್ದು, ಸಖತ್ ರಗಡ್ ಆಗಿದೆ. ಹೀರೋಗೆ ಇಲ್ಲದ ಎಂಟ್ರಿ, ಆಕ್ಷನ್ ಚಿತ್ರದಲ್ಲಿ ಇವರಿಗಿದೆ. ಹೊಯ್ಸಳನಿಗೆ ಸಮನಾಗಿ ನಿಲ್ಲುವ ಪಾತ್ರ ಬಾಲಿಯದ್ದು. ಹೀಗಾಗಿ ನವೀನ್‌ ತಮ್ಮ ಅದ್ಭುತ ನಟನೆ ಮೂಲಕ ಪ್ರೇಕ್ಷಕರ ಮನಗೆದ್ದಿದ್ದಾರೆ. 

ವಿಜಯ್ ಎನ್ ಡೈರೆಕ್ಷನ್ ಸೂಪರ್ ಆಗಿದ್ದು, ಪ್ರೇಕ್ಷಕರಲ್ಲಿ ಮಾಸ್ ಫೀಲ್ ತುಂಬುವಲ್ಲಿ ಯಶಸ್ವಿಯಾಗಿದ್ದಾರೆ. ಅಜನೀಶ್ ಲೋಕನಾಥ್ ಬ್ಯಾಕ್‌ಗ್ರೌಂಡ್ ಮ್ಯೂಸಿಕ್ ಸಿನಿಮಾದ ಹೈಲೈಟ್. ಕಾರ್ತಿಕ್ ಕ್ಯಾಮರಾ, ದೀಪು ಎಸ್ ಕುಮಾರ್ ಎಡಿಟಿಂಗ್ ಓಕೆ. ಮಾಸ್ತಿ ಡೈಲಾಗ್ ಮಾಸ್ ಆಗಿದೆ. ಅಮೃತಾ ಇಷ್ಟವಾಗುತ್ತಾರೆ. ಅಚ್ಯುತ್ ಕುಮಾರ್, ಅವಿನಾಶ್ ಬಿಎಸ್, ಅನಿರುದ್ಧ್ ಭಟ್, ರಾಜೇಶ್ ನಟರಾಜ್ ಸಹಜ ನಟನೆ ಈ ಸಿನಿಮಾದಲ್ಲಿದೆ.