ಡ್ರೋನ್ ಪ್ರತಾಪ್ ಟು ನಮ್ರತಾ: ಬಿಗ್‌ಬಾಸ್‌ ಸೀಸನ್ 10ರ ಬಳಿಕ ಹೆಚ್ಚುತ್ತಲೇ ಇದೆ ಈ ಸ್ಪರ್ಧಿಗಳ ಫಾಲೋವರ್ಸ್ ಸಂಖ್ಯೆ!

ಚಾರ್ಲಿ ಬೆಡಗಿ ಸಂಗೀತಾ ಶೃಂಗೇರಿ ದೊಡ್ಮನೆಗೆ ಕಾಲಿಟ್ಟ ದಿನದಿಂದಲೂ ಅವರ ಅಭಿಮಾನಿಗಳ ಸಂಖ್ಯೆ ಹೆಚ್ಚಾಗಿತ್ತು. ಬಳೆ ವಿವಾದದ ಬಳಿಕವಂತೂ ಅವರಿಗೆ ಬೆಂಬಲ ಹೆಚ್ಚಾಗಿತ್ತು. ಕಾರ್ತಿಕ್‌ ಮಹೇಶ್‌ ಅವರಿಗೆ ತಲೆ ಬೋಳಿಸುವ ಟಾಸ್ಕ್ ಕೊಟ್ಟ ಮೇಲೆ ಅವರ ಹಿಂಬಾಲಕರ ಸಂಖ್ಯೆ ಕುಸಿತಗೊಂಡಿತ್ತು.  ಆದರೆ, ಮತ್ತೆ ಅವರ ಫಾಲೋವರ್ಸ್ ಸಂಖ್ಯೆ ಏರುತ್ತಲೇ ಹೋಗಿದ್ದು, ಬಿಗ್‌ಬಾಸ್‌ ಮನೆಯಲ್ಲಿ ಅವರ ನೇರ ನಡೆ ವೀಕ್ಷಕರಿಗೆ ಇಷ್ಟವಾಗಿತ್ತು. ಫ್ಯಾನ್ಸ್ ಅವರಿಗೆ ಸಿಂಹಣಿ ಅಂತಲೇ ಕರೆಯುತ್ತಿದ್ದರು. ಬಿಗ್‌ಬಾಸ್ ಮನೆಯಿಂದ ಹೊರಬಂದ ಮೇಲೂ ಅವರಿಗೆ ಫ್ಯಾನ್ಸ್ ಸಂಖ್ಯೆ ಹೆಚ್ಚುತ್ತಲೇ ಹೋಗುತ್ತಿದೆ. ಸದ್ಯ ಸಂಗೀತಾಗೆ ಇನ್‌ಸ್ಟಾಗ್ರಾಮ್‌ನಲ್ಲಿ 6 ಲಕ್ಷದ 10 ಸಾವಿರ ಹಿಂಬಾಲಕರಿದ್ದಾರೆ.

ಬಿಗ್‌ಬಾಸ್‌ ಮನೆಗೆ ತೆರಳವುದಕ್ಕೂ ಮುನ್ನ 'ಡ್ರೋನ್' ವಿಚಾರವಾಗಿ ಪ್ರತಾಪ್ ಸಾಕಷ್ಟು ಟ್ರೋಲ್, ಟೀಕೆ ಹಾಗೂ ಅವಮಾನಗಳಿಗೆ ಒಳಗಾಗಿದ್ದರು.  ದೊಡ್ಮನೆಗೆ ಎಂಟ್ರಿಕೊಟ್ಟ ಮೊದಲನೇ ವಾರ ಸ್ಪರ್ಧಿಗಳಿಂದಲೂ ಡ್ರೋನ್ ಪ್ರತಾಪ್ ಸಾಕಷ್ಟು ಲೇವಡಿಗೆ ಒಳಗಾಗಿದ್ದರು. ಆದರೆ, ದಿನ ಕಳೆದಂತೆ ವೀಕ್ಷಕರಿಗೆ ಪ್ರತಾಪ್ ಮೇಲಿದ್ದ ಅಭಿಪ್ರಾಯ ಬದಲಾಯಿತು. ಬಿಗ್‌ಬಾಸ್‌ ಮನೆಯಲ್ಲಿ ಅವರ ನಡವಳಿಕೆ ಕಂಡು ವೀಕ್ಷಕರು ಅವರನ್ನು ಇಷ್ಟಪಡಲು ಆರಂಭಿಸಿದರು. ಜೊತೆಗೆ ಇನ್‌ಸ್ಟಾಗ್ರಾಮ್‌ನಲ್ಲಿ ಅವರಿಗೆ ಸಾಕಷ್ಟು ಫ್ಯಾನ್ ಪೇಜ್‌ಗಳು ಹುಟ್ಟಿಕೊಂಡವು. ಬಿಗ್‌ಬಾಸ್‌ ಸೀಸನ್ 10ರ ರನ್ನರ್ ಅಪ್ ಆದ ಪ್ರತಾಪ್‌, ಇನ್‌ಸ್ಟಾಗ್ರಾಮ್‌ನಲ್ಲಿ ಸದ್ಯ 5 ಲಕ್ಷದ 33 ಸಾವಿರ ಹಿಂಬಾಲಕರಿದ್ದಾರೆ. ಸದ್ಯ ಅವರು ಗಿಚ್ಚಿ ಗಿಲಿ ಗಿಲಿ 3ನಲ್ಲಿ ಭಾಗವಹಿಸಿದ್ದಾರೆ. ಒಟ್ಟಾರೆ ಬಿಗ್‌ಬಾಸ್‌ನಿಂದಾಗಿ ಜನರಿಗೆ ಡ್ರೋನ್ ಪ್ರತಾಪ್ ಮೇಲಿನ ಅಭಿಪ್ರಾಯ ಬದಲಾಗಿದೆ. 

ಬಿಗ್‌ಬಾಸ್‌ ಕನ್ನಡ ಸೀಸನ್ 10ರ ವಿನ್ನರ್ ಕಾರ್ತಿಕ್ ಮಹೇಶ್ ಆವರಿಗೆ ಸದ್ಯ ಇನ್‌ಸ್ಟಾಗ್ರಾಮ್‌ನಲ್ಲಿ 4 ಲಕ್ಷದ 70 ಸಾವಿರ ಹಿಂಬಾಲಕರಿದ್ದಾರೆ. ಬಿಗ್‌ಬಾಸ್‌ ಮನೆಗೆ ಬರುವ ಮುನ್ನ ಕಾರ್ತಿಕ್, ಹಲವು ಧಾರಾವಾಹಿ ಹಾಗೂ ಒಂದು ಸಿನಿಮಾದಲ್ಲಿ ನಟಿಸಿದ್ದರೂ ಜನರಿಗೆ ಅಷ್ಟಾಗಿ ಪರಿಚಯವಿರಲಿಲ್ಲ. ಆದರೆ, ದೊಡ್ಮನೆಗೆ ಎಂಟ್ರಿಕೊಟ್ಟ ಮೇಲೆ ಕಾರ್ತಿಕ್ ಅನೇಕರಿಗೆ  ಇಷ್ಟವಾದರು. ಬಿಗ್‌ಬಾಸ್‌ ಆರಂಭದಿಂದಲೂ ಕಾರ್ತಿಕ್ ಎಲ್ಲಾ ವಿಷಯದಲ್ಲೂ ಆಕ್ಟಿವ್ ಆಗಿದ್ದರು. ಬಿಗ್‌ಬಾಸ್‌ ಮುಗಿದ ಮೇಲಂತೂ ಕಾರ್ತಿಕ್‌ ಅಭಿಮಾನಿಗಳ ಸಂಖ್ಯೆ ಹೆಚ್ಚುತ್ತಲೇ ಇದೆ. 

ಬಿಗ್‌ಬಾಸ್‌ ಕನ್ನಡ ಸೀಸನ್ 10ರಲ್ಲಿ ಭಾಗವಹಿಸುವುದಕ್ಕೂ ಮುನ್ನ ತನಿಷಾ, ಪೆಂಟಗನ್ ಸಿನಿಮಾದಲ್ಲಿ ತನಿ‍ಷಾ ಕುಪ್ಪಂಡ ಬೋಲ್ಡ್ ಅಗಿ ಕಾಣಿಸಿಕೊಂಡಿದ್ರು. ಈ ಸಿನಿಮಾ ಪ್ರಚಾರ ವೇಳೆ ಯ್ಯೂಟೂಬರ್ ಒಬ್ಬರು ಅಶ್ಲೀಲ ಸಿನಿಮಾದಲ್ಲಿ ನಟಿಸುತ್ತೀರಾ ಅಂತ ಪ್ರಶ್ನೆ ಮಾಡಿದ್ದರು. ಈ ಸಂಬಂಧ ಅವರು ಧ್ವನಿ ಎತ್ತಿದ್ದರು. ಇದರ ಜೊತೆಗೆ ರಾಜಾಹುಲಿ ಸಿನಿಮಾದ ಹರ್ಷ ಕೂಡ ತಮಗೆ ಅಶ್ಲೀಲ ಮೆಸೇಜ್ ಮಾಡಿದ್ದರ ಬಗ್ಗೆ ತನಿಷಾ ಮಾತನಾಡಿದ್ದರು. ದಂಡುಪಾಳ್ಯ ಚಿತ್ರದಲ್ಲಿ ಪೂಜಾ ಗಾಂಧಿಗೆ ತನಿಷಾ ಕಿಸ್ ಕೊಟ್ಟಿದ್ದರು. ಇದು ಕೂಡ ಸಿಕ್ಕಾಪಟ್ಟೆ ಚರ್ಚೆಯಾಗಿತ್ತು. ಆದರೆ, ಬಿಗ್‌ಬಾಸ್‌ ಬಳಿಕ ವೀಕ್ಷಕರಿಗೆ ಅವರ ಮೇಲಿನ ಅಭಿಪ್ರಾಯ ಬದಲಾಯಿತು. ದೊಡ್ಮನೆಯಲ್ಲಿ ತಮ್ಮ ಆಟ, ನೇರನುಡಿಯಿಂದ ಬೆಂಕಿ ಅಂತಲೇ ಖ್ಯಾತಿ ಪಡೆದರು. ಸದ್ಯ ಅವರಿಗೆ 3 ಲಕ್ಷದ 53 ಸಾವಿರ ಹಿಂಬಾಲಕರಿದ್ದಾರೆ. 

ಬಿಗ್‌ಬಾಸ್‌ಗೆ ಬರುವ ಮುನ್ನ ವಿನಯ್ ಗೌಡ ಕನ್ನಡ ಕಿರುತೆರೆಯಲ್ಲಿ 'ಶಿವ' ಅಂತಲೇ ಖ್ಯಾತಿ ಪಡೆದಿದ್ದರು. ದೊಡ್ಮನೆಗೆ ಎಂಟ್ರಿಕೊಟ್ಟ ಆರಂಭದ ದಿನಗಳಲ್ಲಿ ಬಳೆ ವಿವಾದ ಹಾಗೂ ಕೆಲ ವಿಷಯಗಳಿಂದ ವಿನಯ್ ಗೌಡ ನೆಗೆಟಿವ್ ಆಗಿ ಕಾಣಿಸಿಕೊಂಡಿದ್ದರು.  ಆದರೆ, ಕ್ರಮೇಣ ವೀಕ್ಷಕರಿಗೆ ಅವರ ಮೇಲಿನ ಅಭಿಪ್ರಾಯ ಬದಲಾಯಿತು. ವಿನಯ್ ಹೊರಗಿನಿಂದ ಅಗ್ರೆಸ್ಸಿವ್ ಆಗಿ ಕಂಡರೂ ಅವರು ಮನಸ್ಸಿನಲ್ಲಿ ಯಾವುದನ್ನೂ ಇಟ್ಟುಕೊಳ್ಳುವುದಿಲ್ಲ ಎಂಬುದು ಅರ್ಥವಾಯಿತು. ಈ ಬಾರಿ ಟ್ರೋಫಿ ಗೆಲ್ಲಲಿದ್ದಾರೆ ಅಂತಲೂ ಹಲವರು ಭಾವಿಸಿದ್ದರು. ಬಿಗ್‌ಬಾಸ್‌ ಮನೆಯಿಂದ ಹೊರಬಂದ ಮೇಲೆ ವಿನಯ್‌ಗೆ ಅಭಿಮಾನಿಗಳ ಸಂಖ್ಯೆ ದಿನೇ ದಿನೇ ಹೆಚ್ಚುತ್ತಿದ್ದು, ಸದ್ಯ ಅವರಿಗೆ ಇನ್‌ಸ್ಟಾಗ್ರಾಮ್‌ನಲ್ಲಿ 2 ಲಕ್ಷದ 52 ಸಾವಿರ ಹಿಂಬಾಲಕರಿದ್ದಾರೆ. 

ಬಿಗ್‌ಬಾಸ್‌ ಕನ್ನಡ ಸೀಸನ್ 10ರ ಆರಂಭದಲ್ಲಿ ನಮ್ರತಾ ಗೌಡ ಅವರು ವಿನಯ್ ಅವರ ಗುಂಪಿನಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿದ್ದರು. ಹೀಗಾಗಿ, ವೀಕ್ಷಕರು ಅವರಿಗೆ 'ಚಮಚ' ಅಂತ ಹೆಸರಿಟ್ಟಿದ್ದರು. ಈ ಬಗ್ಗೆ ವಾರಾಂತ್ಯದ ಸಂಚಿಕೆಯಲ್ಲಿ ಸುದೀಪ್ ಕೂಡ ಪ್ರಸ್ತಾಪಿಸಿದ್ದರು. ನಂತರದಲ್ಲಿ ನಮ್ರತಾ ತಮ್ಮ ಗೇಮ್ ಆರಂಭಿಸಿದ್ರು. ಎಲ್ಲಾ ಟಾಸ್ಕ್‌ಗಳಲ್ಲೂ 100% ನೀಡುತ್ತಿದ್ದರು. ನಮ್ರತಾ ಬಿಗ್‌ಬಾಸ್‌ಗೂ ಮೊದಲೇ ಇನ್‌ಸ್ಟಾಗ್ರಾಮ್‌ನಲ್ಲಿ ಹೆಚ್ಚು ಹಿಂಬಾಲಕರನ್ನು ಹೊಂದಿದ್ದರು. ಆದರೆ, ಬಿಗ್‌ಬಾಸ್ ಬಳಿಕ ಅವರ ಫಾಲೋವರ್ಸ್ ಸಂಖ್ಯೆ 1 ಮಿಲಿಯನ್ ಆಗಿದೆ.