women's day 2024: ಮಹಿಳಾ ಪ್ರಧಾನ ಸಿನಿಮಾಗಳ ಮೂಲಕ ಸ್ಟಾರ್ ನಟರಷ್ಟೇ ಗಮನ ಸೆಳೆದ ನಟಿಯರಿವರು!

ಅಂದಿನ ಕಾಲದಲ್ಲಿ ಪುರುಷರಿಗಷ್ಟೇ ಸೀಮಿತವಾಗಿದ್ದ ಫೈಟ್, ಮಾಸ್ ಡೈಲಾಗ್, ರಗಡ್ ಕುಣಿತ ಆಕ್ಷನ್ ಸೀನ್‌ಗಳನ್ನೂ ಮಹಿಳೆಯರೂ ಕೂಡ ಮಾಡಬಲ್ಲರು ಎಂದು ತೋರಿಸಿಕೊಟ್ಟವರು ನಟಿ ಮಾಲಾಶ್ರೀ. ಆಕ್ಷನ್ ಸಿನಿಮಾಗಳ ಮುಖಾಂತರ ಮಹಿಳೆಯರನ್ನಷ್ಟೇ ಅಲ್ಲ, ಪುರುಷ ಅಭಿಮಾನಿಗಳನ್ನೂ ಸಂಪಾದಿಸಿದ್ದಾರೆ. ನಾಯಕಿ ಪ್ರಧಾನ ಸಿನಿಮಾ ಮಾಡಿ ಗೆದ್ದ ಕೀರ್ತಿ ಕನಸಿನ ರಾಣಿಗೆ ಸಲ್ಲುತ್ತದೆ. ನಟಿಯರು ಮಹಿಳಾ ಪ್ರಧಾನ ಚಲನಚಿತ್ರಗಳಲ್ಲಿ ನಟಿಸಿ ಗೆಲ್ಲುವುದು ಸುಲಭದ ಕೆಲಸವಲ್ಲ. ಆದರೆ, ಮಾಲಾಶ್ರೀ ಅಭಿನಯಿಸಿದ ಬಹುತೇಕ ಮಹಿಳಾ ಪ್ರಧಾನ ಚಿತ್ರಗಳು ಹಿಟ್ ಲಿಸ್ಟ್ ಸೇರಿವೆ. 

ಉಮಾಶ್ರೀ ಕನ್ನಡ ಚಿತ್ರರಸಿಕರ ಮನಸ್ಸಿನಲ್ಲಿ ತಮ್ಮ ಅದ್ಬುತ ನಟನೆಯ ಮೂಲಕ ವಿಶೇಷ ಸ್ಥಾನ ಪಡೆದಿದ್ದಾರೆ. ಹಾಸ್ಯ ನಟನೆಯಿಂದ ಹಿಡಿದು ಆಳವಾಗಿ ಪ್ರಭಾವ ಬೀರುವ ಪಾತ್ರಗಳಲ್ಲಿ ಲೀಲಾಜಾಲವಾಗಿ ಅಭಿನಯಿಸಿದ್ದಾರೆ. ಮಾಲಾಶ್ರೀ, ಶ್ರುತಿ ಯವರಂತೆ ನಾಯಕಿಯಾಗಿ ಅಭಿನಯಿಸುವ ಅವಕಾಶಗಳು ಇವರಿಗೆ ಸಿಗಲಿಲ್ಲವಾದರೂ ತಾವು ನಟಿಸಿದ ಹಲವು ಸಿನಿಮಾಗಳಲ್ಲಿ ನಾಯಕನ ಪಾತ್ರವನ್ನು ಮೀರಿ ಗುರುತಿಸಿಕೊಂಡಿದ್ದಾರೆ. ಪುಟ್ನಂಜ, ಗುಲಾಬಿ ಟಾಕೀಸ್, ಕಲಾವು, ಕೊತಿಗಳು ಸಾರ್ ಕೋತಿಗಳು, ಕನಸೆಂಬೊ ಕುದುರೆಯೇರಿ ಕಳೆದ ಎರಡ್ಮೂರು ವರ್ಷಗಳ ಹಿಂದೆ ತೆರೆಕಂಡ ರತ್ನನ್ ಪ್ರಪಂಚ ಸಿನಿಮಾಗಳಲ್ಲಿ ಅವರ ಅಭಿನಯ ಅದ್ಭುತ.
 

ನಟಿ ಶ್ರುತಿ ಬಹುತೇಕ ಸಿನಿಮಾಗಳಲ್ಲಿ ನಾಯಕಿಯಾಗಿ, ಅಬಲೆಯಾಗಿ, ಅಳುಮುಂಜಿಯಾಗಿ, ಸಹಿಷ್ಣುವಾಗಿ  ನಟಿಸಿರುವುದೇ ಹೆಚ್ಚು. ಪಾವರು ಪ್ರತಿರೋಧದ ಮನಸ್ಥಿತಿಯ ನಾಯಕಿಯ ಪಾತ್ರಗಳಲ್ಲಿ ನಟಿಸಿದ್ದು ತೀರಾ ಕಡಿಮೆ. ಆದರೆ, ನಾಯಕ ಪ್ರಧಾನ ಸಿನಿಮಾಗಳ ಮಧ್ಯೆ ಶ್ರುತಿ ತಮ್ಮದೇ ಮಾದರಿಯ ಮಹಿಳಾ ಪಾತ್ರಗಳ ಮೂಲಕ ಗಮನ ಸೆಳೆದಿದ್ದರು. 

ನಟಿ ತಾರಾ ಕೂಡ ತಮ್ಮ ಬಹುತೇಕ ಚಿತ್ರಗಳಲ್ಲಿ ಸಿದ್ಧ ಮಾದರಿಯ ನಾಯಕಿ ಪಾತ್ರಗಳಲ್ಲಿ ಕಾಣಿಸಿಕೊಂಡರಾದರೂ ಕೂಡ ಆಗಾಗ  ಕಾನೂರು ಹೆಗ್ಗಡತಿ, ಮುನ್ನುಡಿ, ಕಾರ್ಮುಗಿಲು, ಮುಂಜಾನೆಯ ಮಂಜು, ಕರಿಮಲೆಯ ಕಗ್ಗತ್ತಲು, ಮತದಾನ, ನಿನಗಾಗಿ, ಹಸೀನಾ, ಸೈನೈಡ್ ರೀತಿಯ ಸಿನಿಮಾಗಳಲ್ಲಿ ನಟಿಸಿ ಗಮನ ಸೆಳೆದರು. ಹಸೀನಾ ಚಿತ್ರದ ಅಭಿನಯಕ್ಕಾಗಿ ಅತ್ಯುತ್ತಮ ನಟಿ ರಾಷ್ಟ್ರಪ್ರಶಸ್ತಿಯನ್ನು ಪಡೆದರು. 

ರಾಗಿಣಿ ದ್ವಿವೇದಿ ಕೂಡ ಕನಸಿನ ರಾಣಿ ಮಾಲಾಶ್ರೀ ರೀತಿಯಲ್ಲೇ ಸೂಪರ್ ಲೇಡಿ ಪಾತ್ರಗಳಲ್ಲಿ ಕೆಲ ಸಿನಿಮಾಗಳನ್ನು ಮಾಡಿದ್ದಾರೆ. ಆದರೆ, ಆ ಸಿನಿಮಾಗಳು ಅಷ್ಟಾಗಿ ಯಶಸ್ಸು ನೀಡಲಿಲ್ಲ. ನಟಿ ಪೂಜಾಗಾಂಧಿ ಕೂಡ ಅಭಿನೇತ್ರಿ ಸೇರಿದಂತೆ ಕೆಲ ಮಹಿಳಾ ಪ್ರಧಾನ ಸಿನಿಮಾಗಳಲ್ಲಿ ನಟಿಸಿದ್ದಾರೆ. 

ನಟಿ ಪ್ರಿಯಾಂಕ ಉಪೇಂದ್ರ ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗಿ ಮಹಿಳಾ ಪ್ರಧಾನ ಸಿನಿಮಾಗಳಲ್ಲೇ ಅಭಿನಯಿಸುತ್ತಿದ್ದಾರೆ. ಮಮ್ಮಿ, ಮಿಸ್ ದೇವಕಿ, ಪ್ರಿಯಾಂಕಾ, ಹೌರಾ ಬ್ರಿಡ್ಜ್, ಮಿಸ್ ನಂದಿನಿ, ಕೈಮರ ಇನ್ನೂ ಕೆಲ ಮಹಿಳಾ ಪ್ರಧಾನ ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ. 

ಆಗಿನ ಕಾಲದ ಟಾಪ್ ನಟಿರಾದ ಕಲ್ಪನಾ, ಜಯಂತಿ, ಆರತಿ ಮಹಿಳೆಯನ್ನು ಸಹಿಷ್ಣುವಾಗಿ, ಗೃಹಿಣಿಯಾಗಿ, ಅಬಲೆಯಾಗಿ ತೋರಿಸಿದ ಸಿನಿಮಾಗಳಲ್ಲಿ ನಟಿಸಿದ್ದರು. ಆದರೂ ಕೂಡ ನಟಿ ಕಲ್ಪನಾ ಶರಪಂಜರ, ಗೆಜ್ಜೆಪೂಜೆ ಅಂತಹ ಚಿತ್ರಗಳ ಮೂಲಕ ಗಮ ಸೆಳೆದಿದ್ದರು. ಇನ್ನು ನಟಿ ಜಯಂತಿ ಸಹ ಸಿನಿಮಾರಂಗದಲ್ಲಿ ಹೀರೋಯಿನ್ ಪಾತ್ರಗಳಿಗಿದ್ದ ಕೆಲ ಗಡಿಗಳನ್ನು ಮೀರಿದವರು. ಸ್ವಿಮ್ಮಿಂಗ್ ಸೂಟ್ ಧರಿಸುವುದಾಗಿರಬಹುದು, ವಿವಾಹೇತರ ಸಂಬಂಧ ಹೊಂದಿದ ಪಾತ್ರಗಳಿಗೆ ಬಣ್ಣ ಹಚ್ಚುವುದಾಗಿರಬಹುದು. ಒಟ್ಟಾರೆ ಆ ಕಾಲಕ್ಕೆ ಬೋಲ್ಡ್ ಪಾತ್ರ ಆರಿಸಿಕೊಳ್ಳುವ ದಿಟ್ಟತನ ತೋರಿದ್ದರು. ನಟಿ ಆರತಿ ಕೂಡ ರಂಗನಾಯಕಿ, ನಾಗರಹಾವು ಸಿನಿಮಾಗಳಲ್ಲಿ ಬೋಲ್ಡ್ ಪಾತ್ರಗಳನ್ನು ಆರಿಸಿಕೊಂಡವರು.