ಕನ್ನಡದಲ್ಲಿ ಬ್ಲಾಕ್‌ಬಸ್ಟರ್ ಆದ ಈ ಸಿನಿಮಾಗಳು ಬೇರೆ ಭಾಷೆಯಲ್ಲಿ ಫ್ಲಾಪ್!

2006ರಲ್ಲಿ  ಬಿಡುಗಡೆಯಾದ ಯೋಗರಾಜ್ ಭಟ್ ನಿರ್ದೇಶನದ 'ಮುಂಗಾರು ಮಳೆ' ಸಿನಿಮಾ ಕನ್ನಡ ಚಿತ್ರರಂಗದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿತ್ತು. ಯೋಗರಾಜ್ ಭಟ್ ಅವರಿಗೆ ಈ ಚಿತ್ರ ದೊಡ್ಡ ಯಶಸ್ಸು ನೀಡಿತ್ತು. ಇದು ಸಿನಿಮಾವು  ಒಂದು ವರ್ಷ ಪ್ರದರ್ಶನಗೊಳ್ಳುವ ಮೂಲಕ ದಾಖಲೆ ಬರೆಯಿತು. ಕೇವಲ 70 ಲಕ್ಷ ರೂ. ವೆಚ್ಚದಲ್ಲಿ ನಿರ್ಮಾಣವಾದ ಈ ಸಿನಿಮಾ ಗಲ್ಲಾಪೆಟ್ಟಿಗೆಯಲ್ಲಿ 75 ಕೋಟಿ ಬಾಚಿಕೊಂಡಿತ್ತು. ಈ ಸಿನಿಮಾ ಮೊದಲಿಗೆ 'ವಾನಾ' ಆಗಿ ತೆಲುಗಿಗೆ ರಿಮೇಕ್ ಆಗಿದ್ದು, ಪ್ಲಾಫ್ ಆಗಿತ್ತು. ಬಳಿಕ ಒಡಿಯಾಗೆ 'ರೋಮಿಯೋ ದ ಲವರ್ ಬಾಯ್' ಆಗಿ, ಮರಾಠಿ ಭಾಷೆಗೆ 'ಪ್ರೇಮಂ ನಮಃ', ಬೆಂಗಾಳಿಗೆ 'ಪ್ರೇಮೇರ್ ಕಹಾನಿ'ಯಾಗಿ ರಿಮೇಕ್ ಆಗಿತ್ತು. ಆದರೆ, ಯಶಸ್ಸು ಗಳಿಸಲಿಲ್ಲ. 

ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಹಾಗೂ ಪ್ರೇಮ್ ಕಾಂಬಿನೇಷನ್‌ನಲ್ಲಿ ಮೂಡಿಬಂದ 'ಜೋಗಿ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಭೂಗತ ಲೋಕದ ಛಾಯೆಯೊಂದಿಗೆ ಮಾತೃವಾತ್ಸಲ್ಯವನ್ನು ಹೊಂದಿದ್ದ ಈ ಚಿತ್ರದ ನಟನೆಗಾಗಿ ಶಿವಣ್ಣ ರಾಜ್ಯ ಪ್ರಶಸ್ತಿ ಪಡೆದಿದ್ದರು. ಕರ್ನಾಟಕದ 60ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ 100ಕ್ಕೂ ಹೆಚ್ಚು ದಿನ ಪ್ರದರ್ಶನ ಕಂಡಿದ್ದ ಜೋಗಿ, ಸ್ಯಾಂಡಲ್‌ವುಡ್‌ನಲ್ಲಿ ದಾಖಲೆ ನಿರ್ಮಿಸಿತ್ತು. ಕನ್ನಡದಲ್ಲಿ ಹಿಟ್ ಆದ ಬಳಿಕ ತೆಲುಗಿನಲ್ಲಿ 'ಯೋಗಿ' ಮತ್ತು ತಮಿಳಿನಲ್ಲಿ 'ಪೆರತ್ತೈ ಎಂಗಿರ ಅಳಗು ಸುಂದರಂ' ಹೆಸರಿನಲ್ಲಿ  ರಿಮೇಕ್ ಆಗಿದ್ದು, ಎರಡು ಭಾಷೆಯಲ್ಲೂ ಸೋಲು ಕಂಡಿತ್ತು. 

ರಿಯಲ್ ಸ್ಟಾರ್ ಉಪೇಂದ್ರ ನಿರ್ದೇಶನದ ಮತ್ತು ಶಿವಣ್ಣ ನಾಯಕನಾಗಿ ನಟಿಸಿದ್ದ 'ಓಂ' ಸಿನಿಮಾ ಕನ್ನಡ ಚಿತ್ರರಂಗದ ಪಾಲಿಗೆ ಎಂಟನೇ ಅದ್ಭುತ ಎಂದು ಬಣ್ಣಿಸಬಹುದು. ಚಿತ್ರದಲ್ಲಿ ಉಪೇಂದ್ರ ಬೆಂಗಳೂರು ಭೂಗತ ಲೋಕದ ವಾಸ್ತವ ವ್ಯಕ್ತಿಗಳ ದರ್ಶನ ಮಾಡಿಸಿದ್ದು, ಕನ್ನಡ ಚಿತ್ರರಂಗದ ಚಹರೆಯನ್ನೇ ಬದಲಾಯಿಸಿತ್ತು. ಈ ಸಿನಿಮಾ 550ಕ್ಕೂ ಹೆಚ್ಚು ಬಾರಿ ರೀ ರಿಲೀಸ್ ಆಗಿ, ಅತಿಹೆಚ್ಚು ಬಾರಿ ಮರು ಬಿಡುಗಡೆಯಾದ ಭಾರತೀಯ ಚಿತ್ರ ಎಂಬ ದಾಖಲೆ ಬರೆದಿದೆ. ಓಂ ಚಿತ್ರ ತೆಲುಗಿನಲ್ಲಿ 'ಓಂಕಾರಂ' ಹಾಗೂ ಹಿಂದಿಯಲ್ಲಿ 'ಅರ್ಜುನ್ ಪಂಡಿತ್' ಆಗಿ ರಿಮೇಕ್ ಆಯಿತು. ಆದರೆ, ಓಂ ಸಿನಿಮಾದ ಹಾಗೇ ಯಶಸ್ಸು ಸಿಗಲಿಲ್ಲ. 

ಪುಟ್ಟಣ್ಣ ಕಣಗಾಲ್ ನಿರ್ದೇಶನದ 'ನಾಗರಹಾವು' ಕನ್ನಡದ ಅವಿಸ್ಮರಣೀಯ ಕ್ಲಾಸಿಕ್ ಚಿತ್ರಗಳಲ್ಲಿ ಒಂದಾಗಿದೆ. ಈ ಸಿನಿಮಾ ಮೂಲಕ ಸಾಹಸಸಿಂಹ ಡಾ.ವಿಷ್ಣವರ್ಧನ್ ಚಂದನವನ ಪ್ರವೇಶಿಸಿದ್ದರು. ಒಬ್ಬ ಮುಂಗೋಪಿ ಯುವಕ ಮತ್ತು ಅವನನ್ನು ಮಾರ್ಗದರ್ಶನದ ಮೂಲಕ ತಿದ್ದಲೆತ್ನಿಸುವ ಮೇಷ್ಟ್ರ ಕಥೆಯನ್ನು ಈ ಸಿನಿಮಾ ಹೊಂದಿತ್ತು. ನಾಗರಹಾವು ಚಿತ್ರ ಹಿಂದಿಯಲ್ಲಿ 'ಜೆಹ್ರೀಲಾ ಇನ್ಸಾನ್' ಮತ್ತು ತೆಲುಗಿನಲ್ಲಿ 'ಕೊಡೆ ನಾಗು' ಎಂದು ರಿಮೇಕ್ ಆಯಿತು. ಆದರೆ, ಸಿನಿಮಾ ಯಶಸ್ಸು ಗಳಿಸಿಲ್ಲ. ಈ ಚಿತ್ರ ತಮಿಳಿನಲ್ಲಿ 'ರಾಜ ನಾಗಂ' ಎಂದು ರಿಮೇಕ್ ಆಗಿದ್ದು, ಸ್ವಲ್ಪ ಮಟ್ಟಿಗೆ ಗೆಲುವು ಸಾಧಿಸಿತ್ತು. 

ನಟ ಅಂಬರೀಶ್ ಅವರಿಗೆ ರೆಬೆಲ್ ಸ್ಟಾರ್ ಇಮೇಜ್ ತಂದುಕೊಟ್ಟ ಸಿನಿಮಾ 'ಅಂತ'. ಈ ಚಿತ್ರದಲ್ಲಿ ರಾಜಕಾರಣಿಗಳು ಮತ್ತು ಸರ್ಕಾರದ ಬಗ್ಗೆ ತೋರಿಸಲಾಗಿತ್ತು. ವಿಶೇಷ ಕಥಾಹಂದರ ಹೊಂದಿದ್ದ ಅಂತ ಸಿನಿಮಾ ಸೂಪರ್ ಹಿಟ್ ಆಯಿತು. ರಾಜೇಂದ್ರ ಬಾಬು ನಿರ್ದೇಶನದ ಈ ಚಿತ್ರ ಕನ್ನಡದಲ್ಲಿ ಹೊಸ ಏಲ್ ಎಬ್ಬಿಸಿತ್ತು. ಹಿಂದಿಯಲ್ಲಿ ಈ ಸಿನಿಮಾ 'ಮೇರಿ ಅವಾಜ್ ಸುನೋ', ತೆಲುಗಿನಲ್ಲಿ 'ಅಂತಂ ಕಡಿದಿ ಆರಂಭಂ' ಮತ್ತು ತಮಿಳಿನಲ್ಲಿ 'ತ್ಯಾಗಿ' ಹೆಸರಿನಲ್ಲಿ ರಿಮೇಕ್ ಆಯಿತು. ಆದರೆ, ಈ ಮೂರು ಭಾಷೆಯಲ್ಲಿ ಅಂತ ಸಿನಿಮಾ ಕರ್ನಾಟಕದಲ್ಲಿ ಸೃಷ್ಟಿಸಿದ ಸಂಚಲನ ಮರುಸೃಷ್ಟಿಸುವಲ್ಲಿ ವಿಫಲಾವಾಯಿತು.