Children's Day 2024: ಕನ್ನಡದ ಈ ಎವರ್‌ಗ್ರೀನ್ ಮಕ್ಕಳ ಸಿನಿಮಾಗಳನ್ನು ನಿಮ್ಮ ಪುಟಾಣಿಗಳಿಗೆ ಮಿಸ್ ಮಾಡದೇ ತೋರಿಸಿ!

1979ರಲ್ಲಿ ತೆರೆಕಂಡ 'ಪುಟಾಣಿ ಏಜೆಂಟ್ 123' ಕನ್ನಡದ ಪ್ರಮುಖ ಮಕ್ಕಳ ಸಿನಿಮಾಗಳಲ್ಲೊಂದು. ಗೀತಾಪ್ರಿಯ ನಿರ್ದೇಶಶನ ಈ ಸಿನಿಮಾದಲ್ಲಿ ರಾಮಕೃಷ್ಣ ಹೆಗಡೆ, ಮಂಜುಳಾ,  ಬೇಬಿ ಇಂದಿರಾ, ಶ್ರೀನಾಥ್, ಅಂಬರೀಶ್, ಉದಯ್ ಕುಮಾರ್, ಶಕ್ತಿ ಪ್ರಕಾಶ್ ಮುಂತಾದವರು ನಟಿಸಿದ್ದರು. ಚಿತ್ರದಲ್ಲಿ ಮುರಳಿ ಎಂಬ ಪ್ರಾಮಾಣಿಕ ಪೊಲೀಸ್ ಅಧಿಕಾರಿ ಮೇಲೆ ಕೊಲೆ ಪ್ರಕರಣದಲ್ಲಿ ಸುಳ್ಳು ಆರೋಪ ಹೊರಿಸಿ, ಮರಣದಂಡನೆ ವಿಧಿಸಲಾಗುತ್ತದೆ. ಮೂವರು ವಿದ್ಯಾರ್ಥಿಗಳು ಅದು ತಪ್ಪೆಂದು ಸಾಭೀತುಪಡಿಸಲು ಪಡುವ ಹರಸಾಹಸವನ್ನು ಈ ಸಿನಿಮಾ ಹೊಂದಿತ್ತು. 

ಮಕ್ಕಳ ಸಿನಿಮಾ ಅಂದಾಕ್ಷಣ ಥಟ್ ಅಂತ ನೆನಪಾಗುವ ಸಿನಿಮಾಗಳಲ್ಲಿ 'ಸಿಂಹದ ಮರಿ ಸೈನ್ಯ' ಕೂಡ ಒಂದು. 1981ರಲ್ಲಿ ತೆರೆಕಂಡ ಈ ಸಿನಿಮಾವನ್ನು ರಾಜೇಂದ್ರ ಸಿಂಗ್ ಬಾಬು ನಿರ್ದೇಶನ ಮಾಡಿದ್ದರು. ಚಿತ್ರದಲ್ಲಿ ಅರ್ಜುನ್ ಸರ್ಜಾ, ಮಾಸ್ಟರ್ ಭಾನುಪ್ರಕಾಶ್, ಅಮರೀಶ್ ಪುರಿ, ಜಯಂತಿ, ಬೇಬಿ ಇಂದಿರಾ, ಬೇಬಿ ರೇಖಾ ಮುಂತಾದವರು ನಟಿಸಿದ್ದರು. ಮಕ್ಕಳ ಸಾಹಸಗಾಥೆಯ ಹಿನ್ನೆಲೆಯಲ್ಲಿ ಈ ಸಿನಿಮಾ ಸಾಗಲಿದೆ. 

1985ರಲ್ಲಿ ತೆರೆಕಂಡ ಬೆಟ್ಟದ ಹೂ  ಸಿನಿಮಾದಲ್ಲಿ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಎನ್ ಲಕ್ಷ್ಮಿನಾರಾಯಣ  ನಿರ್ದೇಶನದಲ್ಲಿ ಮೂಡಿಬಂದಿದ್ದ ಈ ಚಿತ್ರವನ್ನು ಪಾರ್ವತಮ್ಮ ನಿರ್ಮಾಣ ಮಾಡಿದ್ದರು. ಸಿನಿಮಾದಲ್ಲಿ ಬಾಲಕ ರಾಮು (ಪುನೀತ್) ತಾನು ಓದುವಾಗಲೇ ಮನೆಯ ಜಾವಾಬ್ದಾರಿ ಹೊತ್ತು, ಶಾಲೆ ಮುಗಿದ ನಂತರ ಭಾರತಕ್ಕೆಂದು ಪ್ರವಾಸಕ್ಕೆ ಬಂದ ಒಬ್ಬ  ವಿದೇಶಿ ದಂಪತಿ ಮನೆಯಲ್ಲಿ ಕೆಲಸ ಮಾಡುತ್ತಿರುತ್ತಾನೆ. ಇದರ ಜೊತೆಗೆ ಅಪರೂಪದ ಬೆಟ್ಟದ ಹೂವನ್ನು ತಂದು ಮಾರುತ್ತಿರುತ್ತಾನೆ. ಓದುವುದೆಂದರೆ ಪಂಚಪ್ರಾಣವಿರುವ ರಾಮು, ಕುವೆಂಪು ಅವರ `ಶ್ರೀ ರಾಮಾಯಣ ದರ್ಶನಂ' ಪುಸ್ತಕ ತೆಗೆದುಕೊಳ್ಳಬೇಕೆಂದು ದುಡ್ಡು ಉಳಿಸುತ್ತಿರುತ್ತಾನೆ.  ಉಳಿದ ಹಣದಿಂದ ಇನ್ನೇನು ಪುಸ್ತಕ ತೆಗೆದುಕೊಳ್ಳಬೇಕೆನ್ನುವಷ್ಟರಲ್ಲಿ ಮನೆಯಲ್ಲಿ ತನ್ನ ತಾಯಿ ಚಳಿಯಲ್ಲಿ ನಡುಗುವುದು ನೆನಪಾಗಿ ಒಂದು ಕಂಬಳಿ ಕೊಳ್ಳುತ್ತಾನೆ. ಈ ಚಿತ್ರದ ನಟನೆಗಾಗಿ ಪುನೀತ್ ಅತ್ತ್ಯುತ್ತಮ ಬಾಲನಟ ರಾಷ್ಟ್ರಪ್ರಶಸ್ತಿ ಪಡೆದಿದ್ದರು. 

1994ರಲ್ಲಿ ಬಿಡುಗಡೆಯಾದ ನಾಗತಿಹಳ್ಳಿ ಚಂದ್ರಶೇಖರ್ ನಿರ್ದೇಶನದ 'ಕೊಟ್ರೇಶಿ ಕನಸು' ಸಿನಿಮಾ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರವಾಗಿತ್ತು. ಈ ಸಿನಿಮಾದಲ್ಲಿ ವಿಜಯ್ ರಾಘವೇಂದ್ರ, ಕರಿಬಸಯ್ಯ ಹಾಗೂ ಉಮಾಶ್ರೀ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಚಿತ್ರದಲ್ಲಿ ಕೆಳಜಾತಿಗೆ ಸೇರಿದ ಕೊಟ್ರೇಶಿ ಓದುವುದರಲ್ಲಿ ಬಹಳ ಮುಂದಿರುತ್ತಾನೆ. ಅವರ ಜಾತಿಯಲ್ಲೇ ೭ನೇ ತರಗತಿಯಲ್ಲಿ ಪಾಸ್ ಆದ ಮೊದಲ ಹುಡುಗನಾಗಿರುತ್ತಾನೆ. ಇದನ್ನು ಊರಿನ ಮೇಲ್ಜಾತಿಯವರು ಸಹಿಸುವುದಿಲ್ಲ. ಜೊತೆಗೆ ಅವನು ಹೈಸ್ಕೂಲಿಗೆ ಹೋಗೋದಕ್ಕೆ ಅಡ್ಡಿಯಾಗುತ್ತಾರೆ. ಕೊನೆಗೆ ಕೊಟ್ರೇಶಿ ಹೈಸ್ಕೂಲಿಗೆ ಹೋಗುತ್ತಾನಾ? ಇಲ್ಲವಾ ಎಂಬುದೇ ಸಿನಿಮಾ ಕಥೆ. ಈ ಸಿನಿಮಾಗಾಗಿ ವಿಜಯ್ ರಾಘವೇಂದ್ರ ರಾಷ್ಟ್ರಪ್ರಶಸ್ತಿ ಪಡೆದುಕೊಂಡಿದ್ದರು. 

2006ರಲ್ಲಿ ತೆರೆಕಂಡ ಮಾಸ್ಟರ್ ಕಿಶನ್ ನಿರ್ದೇಶಿಸಿ, ನಟಿಸಿರುವ 'ಕೇರ್ ಆಫ್ ಫುಟ್ ಪಾತ್' ಸಿನಿಮಾ ಗಿನ್ನಿಸ್ ದಾಖಲೆ ಬರೆದಿತ್ತು. ಈ ಚಿತ್ರದಲ್ಲಿ ಜಾಕಿ ಶ್ರಾಫ್, ಮುಖ್ಯಮಂತ್ರಿ ಚಂದ್ರು, ತಾರಾ ಮೊದಲಾದವರ ತಾರಾಬಳಗವಿತ್ತು. ಕಿಚ್ಚ ಸುದೀಪ್ ಕೂಡ ಶಂಕರ್ ಎಂಬ ಒಂದು ಪುಟ್ಟ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. 

1977ರಲ್ಲಿ ತೆರೆಕಂಡ ನಾಗರಹೊಳೆ ಸಿನಿಮಾವನ್ನು ರಾಜೇಂದ್ರ ಸಿಂಗ್ ಬಾಬು ನಿರ್ದೇಶನ ಮಾಡಿದ್ದರು. ಚಿತ್ರದಲ್ಲಿ ವಿಷ್ಣುವರ್ಧನ್, ಭಾರತಿ, ಅಂಬರೀಶ್, ಮಾಸ್ಟರ್ ಪ್ರಸಾದ್, ಮಾಸ್ಟರ್ ಭಾನುಪ್ರಕಾಶ್ ಮುಂತಾದವರು ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಇದೊಂದು ಸಾಹಸಮಯ ಮಕ್ಕಳ ಸಿನಿಮಾವಾಗಿದೆ.

1960ರಲ್ಲಿ ತೆರೆಕಂಡ ಖ್ಯಾತ ನಿರ್ದೇಶಕ ಪಂತಲು ನಿರ್ದೇಶನದ ಸಿನಿಮಾ 'ಮಕ್ಕಳ ರಾಜ್ಯ'. ಈ ಸಿನಿಮಾದಲ್ಲಿ ಇಂದಿನ ಜನಪ್ರಿಯ ಪೋಷಕ ನಟ ಉಮೇಶ್ ಅವರು ಆಗ ಬಾಲನಟನಾಗಿ ಲೀಡ್‌ರೋಲ್‌ನಲ್ಲಿ ಕಾಣಿಸಿಕೊಂಡಿದ್ದರು. ಉಳಿದಂತೆ ನರಸಿಂಹರಾಜು, ನಾಗೇಶ್ವರ್ ರಾವ್, ರಾಜಮ್ಮ, ಮಾಸ್ಟರ್ ವೆಂಕಟೇಶ್ ಮುಂಆತದವರು ನಟಿಸಿದ್ದಾರೆ.

2018ರಲ್ಲಿ ಬಿಡುಗಡೆಗೊಂಡ  ರಿಷಭ್ ಶೆಟ್ಟಿ ನಿರ್ದೇಶನದ 'ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಕಾಸರಗೋಡು' ಸಿನಿಮಾದಲ್ಲಿ ಕನ್ನಡ ಶಾಲೆಗಳು ಪರಿಸ್ಥಿತಿಯನ್ನು ಚಿತ್ರಿಸಲಾಗಿತ್ತು. ಶಾಲೆಯಲ್ಲಿ ಮಕ್ಕಳ ಆಟ, ಪಾಠ, ತುಂಟಾಟ ಈ ನಡುವೆ ಮೂರು ವರ್ಷಗಳಿಂದ ಪಾಸ್ ಆಗದೇ ಒಂದೇ ಕ್ಲಾಸ್‌ನಲ್ಲಿ ಓದುತ್ತಿರುವ 'ದಡ್ಡ ಪ್ರವೀಣ'ನ ಕ್ರಶ್ ಸ್ಟೋರಿ ಜೊತೆಗೆ ಕನ್ನಡ ಭಾಷೆಯ ಬಗ್ಗೆ ಕೀಳರಿಮೆ ಹೊಂದಿದರೆ, ಕನ್ನಡ ಅಸ್ಮಿತೆ ಉಳಿಸಿಕೊಳ್ಳುವುದು ಕಷ್ಟ ಎಂಬ ಸಂದೇಶವನ್ನು ಸಾರಿತ್ತು. 'ಸರ್ಕಾರಿ ಹಿ.ಪ್ರಾ.ಶಾಲೆ, ಕಾಸರಗೋಡು' ಚಿತ್ರ ಖಂಡಿತ ನಿಮ್ಮ ಬಾಲ್ಯ ನೆನಪಿಸುತ್ತದೆ.