ಅಶ್ವಿನಿ ನಕ್ಷತ್ರ ಟು ನಮ್ಮನೆ ಯುವರಾಣಿ: ಕನ್ನಡ ಕಿರುತೆರೆ ಪ್ರೇಕ್ಷಕರ ಅಲ್‌ಟೈಮ್ ಫೇವರಿಟ್ ಧಾರವಾಹಿಗಳಿವು!

2014ರಲ್ಲಿ ಆರಂಭವಾಗಿದ್ದ 'ಅಶ್ವಿನಿ ನಕ್ಷತ್ರ' ಧಾರಾವಾಹಿಯಲ್ಲಿ ನಟ ಕಾರ್ತಿಕ್ ಜಯರಾಮ್ ಹಾಗೂ ಮಯೂರಿ ಕ್ಯಾತರಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇದು ಈ ಇಬ್ಬರಿಗೂ ಬಿಗ್ ಬ್ರೇಕ್ ನೀಡಿದ್ದ ಸೀರಿಯಲ್ ಆಗಿತ್ತು. ಅಂದ್ಹಾಗೆ ಈ ಧಾರಾವಾಹಿಗೆ ಹಣ ಹೂಡಿದ್ದು ಕಿಚ್ಚ ಸುದೀಪ್ ಪತ್ನಿ ಪ್ರಿಯಾ. ಸೀರಿಯಲ್ ಪ್ರಿಯರು ಇಂದಿಗೂ ಕೂಡ 'ಅಶ್ವಿನಿ ನಕ್ಷತ್ರ' ಮರೆತ್ತಿಲ್ಲ. ಇದರಲ್ಲಿ ಜೆಕೆ 'ಹೆಂಡ್ತಿ' ಅಂತ ಕರೆಯುವ ಡೈಲಾಗ್ ಸಿಕ್ಕಾಪಟ್ಟೆ ಫೇಮಸ್ ಆಗಿತ್ತು. ಹಲವರು ಈ ಸೀರಿಯಲ್‌ನ ಸೀಕ್ವೆಲ್ ನೋಡಲು ಬಯಸಿದ್ದರು. ಆದ್ರೆ, ಇದಾದ ಬಳಿಕ ಕಾರ್ತಿಕ್ ಜಯರಾಮ್ ಮತ್ತು ಮಯೂರಿ ಸಿನಿಮಾದತ್ತ ಮುಖ ಮಾಡಿದರು. 

ನಟಿ ಅನುಪಮಾ ಗೌಡ ದ್ವಿಪಾತ್ರದಲ್ಲಿ ಕಾಣಿಸಿಕೊಂಡ 'ಅಕ್ಕ' ಸೀರಿಯಲ್ ಕೂಡ ಸೂಪರ್ ಹಿಟ್ ಆಗಿತ್ತು. ಅನುಪಮಾ ಅವಳಿ-ಜವಳಿ ಸಹೋದರಿಯರ ಪಾತ್ರವನ್ನು ಅದ್ಭುತವಾಗಿ ನಿಭಾಯಿಸಿದ್ದರು. ತಂಗಿ ಮಾಡಿದ ತ್ಯಾಗ ಅರಿಯದೇ ಅಕ್ಕ ಹೇಗೆ ಅವಳಿಗೆ ತೊಂದರೆ ಕೊಡುತ್ತಾರೆ, ತಂಗಿಯಾದವಳು ಅಕ್ಕ ನೀಡಿದ ಸಮಸ್ಯೆಯನ್ನು ಹೇಗೆ ನಿಭಾಯಿಸುತ್ತಾಳೆ? ಎಂಬುದೇ ಕಥೆಯಾಗಿತ್ತು. ಸದ್ಯ ಅನುಪಮಾ ರಿಯಾಲಿಟಿ ಶೋಗಳಲ್ಲಿ ಬ್ಯುಸಿಯಾಗಿದ್ದಾರೆ.

ಶ್ವೇತಾ ಆರ್ ಪ್ರಸಾದ್ ಹಾಗೂ ಸ್ಕಂದ ಅಶೋಕ್ ಮುಖ್ಯಭೂಮಿಕೆಯಲ್ಲಿದ್ದ 'ರಾಧಾ ರಮಣ' ಸೀರಿಯಲ್‌ ಸಿಕ್ಕಾಪಟ್ಟೆ ಅಭಿಮಾನಿಗಳನ್ನು ಸಂಪಾದಿಸಿತ್ತು. ಬಿಗ್‌ಬಾಸ್‌ ಕನ್ನಡ ಸೀಸನ್ 7ರ ಆರಂಭವಾಗುವಾಗ ಮುನ್ನ ಈ ಸೀರಿಯಲ್ ಮುಕ್ತಾಯವಾಗಿತ್ತು. ಈ ವೇಳೆ ಅಸ್ಪಷ್ಟವಾಗಿ ಧಾರಾವಾಹಿ ಮುಗಿಸಲಾಗಿತ್ತು. ಹೀಗಾಗಿ, ಮತ್ತೆ ರಾಧಾ ರಮಣ ಶುರುವಾಗಬಹುದು ಅಂತ ಹಲವರು ಊಹಿಸಿದ್ದರು. ಆದರೆ, ಆ ಬಳಿಕ ಇದರ ಸೀಕ್ವೆಲ್ ಬರಲೇ ಇಲ್ಲ.

ಕನ್ನಡದ ಮೆಗಾ ಧಾರಾವಾಹಿ 'ಅಗ್ನಿಸಾಕ್ಷಿ'ಗೆ ಸಿಕ್ಕಾಪಟ್ಟೆ ಅಭಿಮಾನಿಗಳಿದ್ದರು. ಸುಮಾರು ಆರು ವರ್ಷಗಳ ಕಾಲ ಪ್ರಸಾರವಾಗಿದ್ದ ಈ ಸೀರಿಯಲ್‌ನಲ್ಲಿ ನಟ ವಿಜಯ್ ಸೂರ್ಯ ಹಾಗೂ ವೈಷ್ಣವಿ ಗೌಡ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇದರಲ್ಲಿ ಸಿದ್ಧಾರ್ಥ್, ಸನ್ನಿಧಿ ಹಾಗೂ ಚಂದ್ರಿಕಾ ಪಾತ್ರಗಳು ಹೆಚ್ಚು ಜನಪ್ರಿಯವಾಗಿದ್ದವು. ಈ ಧಾರಾವಾಹಿ ಮುಕ್ತಾಯಗೊಂಡಾಗ ಹಲವರು ಬೇಸರಗೊಂಡಿದ್ದರು. ಸದ್ಯ ಈ ಧಾರಾವಾಹಿ ಕಲಾವಿದರು ಬೇರೆ-ಬೇರೆ ಪ್ರಾಜೆಕ್ಟ್‌ಗಳಲ್ಲಿ ಬ್ಯುಸಿಯಾಗಿದ್ದಾರೆ.

ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಪ್ರಖ್ಯಾತಿ ಧಾರಾವಾಹಿಗಳಲ್ಲಿ 'ನಮ್ಮ ಯುವರಾಣಿ' ಕೂಡ ಒಂದು. ಈ ಧಾರಾವಾಹಿಯಲ್ಲಿ ಅನಿಕೇತ್, ಮೀರಾ, ಸಾಕೇತ್ ಪಾತ್ರಗಳು ವೀಕ್ಷಕರಿಗೆ ಮೋಡಿ ಮಾಡಿದ್ದವು. ಇನ್ನು ಅನಿ-ಮೀರಾ ಜೋಡಿಯ ಕೋಳಿ ಜಗಳ ವೀಕ್ಷಕರಿಗೆ ಬಹಳ ಇಷ್ಟವಾಗಿತ್ತು. ಇವರಿಬ್ಬರ ಹೆಸರಿನಲ್ಲಿ ಸೋಶಿಯಲ್ ಮೀಡಿಯಾದಲ್ಲಿ ಫ್ಯಾನ್ಸ್ ಕ್ಲಬ್ ಹುಟ್ಟಿಕೊಂಡಿದ್ದವು. ನಮ್ಮನೆ ಯುವರಾಣಿ ಧಾರಾವಾಹಿ ಮುಕ್ತಾಯವಾಗಿದ್ದರೂ ಕೂಡ ಪ್ರೇಕ್ಷಕರಲ್ಲಿ  ಅನಿಕೇತ್-ಮೀರಾ ಕ್ರೇಜ್ ಕಡಿಮೆಯಾಗಿಲ್ಲ. ಈ ಜೋಡಿಯನ್ನು ಮತ್ತೆ ಒಟ್ಟಿಗೆ ತೆರೆಮೇಲೆ ನೋಡಲು ಕಾತರದಿಂದ ಕಾಯುತ್ತಿದ್ದಾರೆ. ಆದರೆ, ಅಂಕಿತಾ ಸದ್ಯ ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದಾರೆ.