ನೀವು ಮಿಸ್ ಮಾಡದೇ ನೋಡಲೇಬೇಕಾದ ಶರಣ್ ನಟನೆಯ 5 ಕಾಮಿಡಿ ಸಿನಿಮಾಗಳಿವು!

ಶರಣ್ ಹೀರೋ ಆಗಿ ಬಣ್ಣಹಚ್ಚಿದ ಮೊದಲ ಸಿನಿಮಾ ರ್ಯಾಂಬೋ. ಇದು ಶರಣ್ ನಟನೆಯ 100ನೇ ಚಿತ್ರವಾಗಿತ್ತು. 2012ರಲ್ಲಿ ಬಿಡುಗಡೆಯಾದ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಎಂ.ಎಸ್. ನಿರ್ದೇಶನದಲ್ಲಿ ಮೂಡಿಬಂದ ಈ ಚಿತ್ರದಲ್ಲಿ ಶರಣ್, ತಬಲಾ ನಾಣಿ ಮತ್ತು ಉಮಾಶ್ರೀ ಜುಗಲ್‌ ಬಂದಿಯಿಂದ ಕೂಡಿತ್ತು. ನಾಯಕನಟನಾಗಿ ನಟಿಸಿದ ಮೊದಲ ಸಿನಿಮಾದಲ್ಲೇ ಶರಣ್ ಸಕ್ಸಸ್ ಕಂಡಿದ್ದರು. 

ನಾಯಕನಾಗಿ ಶರಣ್‌ಗೆ ಇನ್ನಷ್ಟು ಭದ್ರ ಬುನಾದಿ ಹಾಕಿಕೊಟ್ಟ ಸಿನಿಮಾವೆಂದರೆ 2013ರಲ್ಲಿ ರಿಲೀಸ್ ಆದ ವಿಕ್ಟರಿ. ನಂದಕಿಶೋರ್ ನಿರ್ದೇಶನದಲ್ಲಿ ಮೂಡಿಬಂದಿದ್ದ ಈ ಚಿತ್ರದಲ್ಲಿ ಶರಣ್ ದ್ವಿಪಾತ್ರದಲ್ಲಿ ನಟಿಸಿದ್ದರು. ಬಿಡುಗಡೆಗೂ ಮುನ್ನವೇ ಈ ಚಿತ್ರದ ಸ್ಯಾಟಲೈಟ್ ಹಕ್ಕು 2.5 ಕೋಟಿಗೆ ಮಾರಾಟವಾಗಿ, ಚಿತ್ರದ ಸಂಪೂರ್ಣ ನಿರ್ಮಾಣ ವೆಚ್ಚವನ್ನು ಗಳಿಸಿಕೊಂಡಿತ್ತು. ಜೊತೆಗೆ ವಿಕ್ಟರಿ ತೆರೆಕಂಡ ಮೊದಲ ವಾರದಲ್ಲೇ ಸುಮಾರು 6 ಕೋಟಿಗೂ ಅಧಿಕ ಗಳಿಸಿ ಬ್ಲಾಕ್‌ಬಸ್ಟರ್ ಹಿಟ್ ಆಯಿತು. ಈ ಸಿನಿಮಾದ 'ಖಾಲಿ ಕ್ವಾಟರ್ ಬಾಟ್ಲಿ ಹಂಗೆ ಲೈಫು' ಹಾಡು ಸಖತ್ ಹಿಟ್ ಆಗಿತ್ತು.   

2014ರಲ್ಲಿ ರಿಲೀಸ್ ಆಗಿದ್ದ ಶರಣ್ ಹಾಗೂ ಚಿಕ್ಕಣ್ಣ ಮುಖ್ಯ ಪಾತ್ರದಲ್ಲಿ ಅಭಿನಯಿಸಿದ್ದ 'ಅಧ್ಯಕ್ಷ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ನಂದಕಿಶೋರ್ ನಿರ್ದೇಶನದಲ್ಲಿ ಮೂಡಿಬಂದ ಈ ಚಿತ್ರ ತಮಿಳಿನ ವರೂತಪದತ ವಲಿಬರ್ ಸಂಗಮ್ ರಿಮೇಕ್. ಉಪಾದ್ಯಕ್ಷ ಚಿತ್ರ ಅಧ್ಯಕ್ಷ ಮತ್ತು ಉಪಾಧ್ಯಕ್ಷರ ಮೂಲಕ ಹಾಸ್ಯದ ಕಚಗುಳಿ ಇಟ್ಟಿತ್ತು. ರವಿಶಂಕರ್ ಮತ್ತು ಶರಣ್ ನಡುವೆ ನಡಯುವ ಮುಸುಕು ಯುದ್ಧ ಚಿತ್ರದ ಜೀವಾಳ. ಅಧ್ಯಕ್ಷ ಸಿನಿಮಾದಲ್ಲಿ ಶರಣ್ ಕಾಮಿಡಿ ಜೊತೆಗೆ ರವಿಶಂಕರ್, ಚಿಕ್ಕಣ್ಣ ಅವರ ಕಾಮಿಡಿಗೆ ಪ್ರೇಕ್ಷಕರು ಬಿದ್ದು ಬಿದ್ದು ನಕ್ಕಿದ್ದರು. ಒಟ್ಟಾರೆಯಾಗಿ ಇಂದೊಂದು ಅಪ್ಪಟ ಮನೋರಂಜನಾತ್ಮಕ ಸಿನಿಮಾವಾಗಿದ್ದು,  ಎಷ್ಟು ಬಾರಿ ನೋಡಿದ್ರು ನಿಮಗೆ ಬೇಸರವಾಗುವುದಿಲ್ಲ.

2018ರಲ್ಲಿ ಬಿಡುಗಡೆಯಾಗಿದ್ದ ರ್ಯಾಂಬೋ 2 ಸಿನಿಮಾದಲ್ಲಿ ಶರಣ್‌ಗೆ ಜೋಡಿಯಾಗಿ ಮಿಲ್ಕಿಬ್ಯೂಟಿ ಆಶಿಕಾ ರಂಗನಾಥ್ ಕಾಣಿಸಿಕೊಂಡಿದ್ದರು. ಈ ಚಿತ್ರದ 'ಚುಟು ಚುಟು' ಹಾಡು ಯೂಟ್ಯೂಬ್‌ನಲ್ಲಿ ಹಲವು ದಾಖಲೆ ಮಾಡಿತ್ತು. ಅನಿಲ್ ಕುಮಾರ್ ಕಥೆ ಆಕ್ಷನ್ ಕಟ್ ಹೇಳಿದ್ದ ಈ ಚಿತ್ರದಲ್ಲಿ ಚಿಕ್ಕ ವಯಸ್ಸಿನಿಂದ ಕೃಷ್ಣ (ಶರಣ್) ಗಣೇಶನ ಭಕ್ತ. ಗಣೇಶನ ಭಕ್ತನಾದರೂ ಈತ ಈ ಯುಗದ ಕೃಷ್ಣ. ಜೀವನದಲ್ಲಿ 'ವೆರೈಟಿ' ಬೇಕು ಅಂತ ಎಲ್ಲ ವಿಷಯದಲ್ಲಿಯೂ ಹುಡುಕುತಿರುತ್ತಾನೆ. ಅದೇ ರೀತಿ 'ವೆರೈಟಿ'ಗಾಗಿ ಲವ್ ಮಾಡುವ ಹುಡುಗಿಯರನ್ನು ಬದಲಿಸುತ್ತಿರುತ್ತಾನೆ. ಇತ್ತ ಮಯೂರಿ (ಆಶಿಕಾ) ಕೂಡ ಫ್ರೆಂಡ್‌ಶಿಪ್ ಹೆಸರಿನಲ್ಲಿ ಹುಡುಗರ ಎಟಿಎಂ ಅನ್ನು ಅವರಿಗಿಂತ ಹೆಚ್ಚು ಬಳಸುವ ಚಾಲಾಕಿಯಾಗಿರುತ್ತಾಳೆ. ಇಂತಹ ಜೋಡಿ ಒಟ್ಟಿಗೆ ಸೇರಿದರೆ ಎನ್ನೆಲ್ಲಾ ಆಗುತ್ತದೆ ಎನ್ನುವುದು ಚಿತ್ರದ ಕಥೆ.

2014ರಲ್ಲಿ ಬಿಡುಗೆಡೆಯಾದ 'ಜೈಲಲಿತ' ಸಿನಿಮಾದಲ್ಲಿ ನಟ ಶರಣ್ ಮಹಿಳೆಯ ಗೆಟಪ್‌ನಲ್ಲಿ ಕಾಣಿಸಿಕೊಂಡಿದ್ದರು. ಮಲಯಾಳಂನ 'ಮಾಯಾ ಮೋಹಿನಿ' ಎಂಬ ಹಿಟ್ ಸಿನಿಮಾ ಸ್ಪೂರ್ತಿಯಿಂದ ಈ ಸಿನಿಮಾ ಮಾಡಲಾಗಿತ್ತು. ಕಾಮಿಡಿ ಜೊತೆಗೆ ಮಾನವ ಸಂಬಂಧಗಳ ಮಹತ್ವ ಸಾರುವ ಈ ಸಿನಿಮಾವನ್ನು ಪಿ ಕುಮಾರ್ ನಿರ್ದೇಶನ ಮಾಡಿದ್ದರು.