ಗುಪ್ತಗಾಮಿನಿ ಟು ಪಾಪ ಪಾಂಡು: ಕನ್ನಡ ಕಿರುತೆರೆ ಪ್ರೇಕ್ಷಕರ ಆಲ್‌ಟೈಮ್ ಫೇವರಿಟ್ ಧಾರಾವಾಹಿಗಳಿವು!

ಒಂದು ಕಾಲದಲ್ಲಿ ಎಲ್ಲರನ್ನು ನಕ್ಕು ನಲಿಸುತ್ತಿದ್ದ ಹಾಗೂ ಅಪಾರ ಅಭಿಮಾನಿ ಬಳಗ ಹೊಂದಿದ್ದ ಧಾರಾವಾಹಿ ಅಂದರೆ ಅದು 'ಪಾಪ ಪಾಂಡು'. ಸಿಹಿಕಹಿ ಚಂದ್ರು ನಿರ್ದೇಶನದ ಈ ಸೀರಿಯಲ್‌ನಲ್ಲಿ ಶಾಲಿನಿ ಹಾಗೂ ಚಿದಾನಂದ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಈಟಿವಿಯಲ್ಲಿ ಪ್ರಸಾರವಾಗ್ತಿದ್ದ ಈ ಧಾರಾವಾಹಿ 'ಸೀರಿಯಲ್ ಅಂದರೆ ಇಷ್ಟವಿಲ್ಲದವರನ್ನು ಕೂಡ ದಿನ ಟಿವಿ ಮುಂದೆ ಕೂರುವಂತೆ ಮಾಡಿತ್ತು'. ಪಾಪದ ಗಂಡನನ್ನು (ಚಿದಾನಂದ್) ಅವರ ಪತ್ನಿ (ಶಾಲಿನಿ) ಹೇಗೆ ಕಂಟ್ರೋಲ್ ಮಾಡುತ್ತಾಳೆ ಎಂಬುದರ ಸುತ್ತ ಕಥೆ ಸಾಗುತ್ತಿತ್ತು. ಎಷ್ಟೇ ಹಾಸ್ಯಮಯ ಧಾರಾವಾಹಿಗಳು ಬಂದರೂ ಈ ಪಾತ್ರಗಳು ಮನಸ್ಸಿನ ಮೂಲೆಯಲ್ಲೂ ಕೆದಕದೆ ಇರದು.

2003ರಿಂದ 2007ರ ಸಮಯದಲ್ಲಿ ಪ್ರಸಾರವಾಗುತ್ತಿದ್ದ 'ಸಿಲ್ಲಿ ಲಲ್ಲಿ' ಧಾರಾವಾಹಿ ಯಾರಿಗೆ ಗೊತ್ತಿಲ್ಲ ಹೇಳಿ. ರಾಕಿಂಗ್ ಸ್ಟಾರ್ ಯಶ್ ಕೂಡ ಸೀರಿಯಲ್‌ನಲ್ಲಿ ಅತಿಥಿ ಪಾತ್ರ ಮಾಡುತ್ತಿದ್ದರು. ಪಕ್ಕಾ ಹಾಸ್ಯ ಶೈಲಿಯಲ್ಲಿ ಮೂಡಿಬರುತ್ತಿದ್ದ ಈ ಧಾರಾವಾಹಿಯನ್ನೂ ಕೂಡ ಸಿಹಿಕಹಿ ಚಂದ್ರು ಅವರೇ ನಿರ್ದೇಶನ ಮಾಡಿದ್ದರು. ಈ ಧಾರಾವಾಹಿ ಕೊಟ್ಟ ಮನೋರಂಜನೆಯಿಂದಾಗಿ ಸಮಾಜ ಸೇವಕಿ ಲಲಿತಾಂಬಾ, ಡಾಕ್ಟರ್, ಲೀಲಾ, ಪಲ್ಲಿ, ಶ್ರೀಲತಾ, ಕಾಂಪೌಂಡ್ ಗೋವಿಂದ, ರಂಗ ಸೇರಿದಂತೆ ಎಲ್ಲಾ ಪಾತ್ರಗಳು ಅಚ್ಚಳಿಯದೇ ಜನರ ಮನಸ್ಸಿನಲ್ಲಿ ಉಳಿದಿವೆ. ಈಗಲೂ ಕೂಡ ಈ ಸೀರಿಯಲ್‌ನ ಹಾಸ್ಯದ ಕ್ಲಿಪ್‌ಗಳನ್ನು ಯೂಟ್ಯೂಬ್‌ನಲ್ಲಿ ನೋಡುವವರಿದ್ದಾರೆ. 

ಆರ್ ಕೆ ನಾರಾಯಣ್ ಅವರ ಬರಹಗಳ ಆಧಾರಿತ ಹಾಗೂ ಶಂಕರ್ ನಾಗ್ ನಿರ್ದೇಶನದ 'ಮಾಲ್ಗುಡಿ ಡೇಸ್' ಧಾರಾವಾಹಿ ಮರೆಯಲು ಸಾಧ್ಯವೇ ಇಲ್ಲ. ಶಂಕರ್ ನಾಗ್ ಅವರ ಮಾಸ್ಟರ್ ಪೀಸ್ ಎಂದೇ ಕರೆಯಲಾಗುವ ಈ ಧಾರಾವಾಹಿ, ಪ್ರಾರಂಭದಲ್ಲಿ ಇಂಗ್ಲಿಷ್ ಮತ್ತು ನಂತರ ಹಿಂದಿಯಲ್ಲಿ ಪ್ರಸಾರವಾಗಿತ್ತು. ಕನ್ನಡಿಗರೇ ನಿರ್ದೇಶಿಸಿದ, ಕನ್ನಡದವರೇ ನಿರ್ಮಾಪಕರಾಗಿದ್ದ, ಕನ್ನಡದ ಕಲಾವಿದರೇ ಹೆಚ್ಚಿದ್ದ ಈ ಧಾರಾವಾಹಿ, ಕನ್ನಡಿಗರಿಗೆ ಅವರ ಭಾಷೆಯಲ್ಲಿ ಸಿಕ್ಕಿರಲಿಲ್ಲ. ನಂತರ ಎಂಟು ಹತ್ತು ವರ್ಷಗಳ ನಂತರ ಕನ್ನಡಕ್ಕೆ ಡಬ್ ಆಗಿತ್ತು. ಇದರಲ್ಲಿ ಮಾಸ್ಟರ್ ಮಂಜುನಾಥ್, ಗಿಗೀಶ್ ಕಾರ್ನಾಡ್, ಅನಂತ್ ನಾಗ್, ವೈಶಾಲಿ ಕಾಸರವಳ್ಳಿ, ಆರುಂಧತಿ ನಾಗ್ ಸೇರಿದಂತೆ ಹಲವು ಕಲಾವಿದರಿದ್ದರು.

ಕನ್ನಡ ಕಿರುತೆರೆಯ ಸ್ಟಾರ್ ನಿರ್ದೇಶಕ ಟಿ.ಎನ್ ಸೀತಾರಾಮ್ ನಿರ್ದೇಶನದಲ್ಲಿ ಮೂಡಿಬಂದ ಮಾಯಾಮೃಗ, ಮನ್ವಂತರ ಮಗಳು ಜಾನಕಿ, ಮುಕ್ತ ಮುಕ್ತದಂತಹ ಧಾರಾವಾಹಿಗಳನ್ನು ಮರೆಯಲು ಸಾಧ್ಯವೇ ಇಲ್ಲ. ಮಧ್ಯಮ ವರ್ಗದ ಜೀವನವನ್ನು ಹೆಚ್ಚಾಗಿ ಪ್ರತಿಬಿಂಬಿಸುವ ಈ ಕಥೆಗಳು ಭಾವಪೂರ್ಣ ಶೀರ್ಷಿಕೆ ಗೀತೆಗಳನ್ನೂ ಹೊಂದಿರುತ್ತಿದ್ದವು. ಅಲ್ಲದೆ, ಸಾಂಪ್ರದಾಯಿಕ ನ್ಯಾಯಾಲಯದ ದೃಶ್ಯಗಳು ಸೀತಾರಾಮ್ ಅವರ ಧಾರಾವಾಹಿಗಳಲ್ಲಿ ಸರ್ವೇ ಸಾಮಾನ್ಯವಾಗಿ ಕಂಡುಬರುವ ಮತ್ತೊಂದು ವಿಶೇಷತೆ. 

ಈಟಿವಿಯಲ್ಲಿ ಪ್ರಸಾರವಾಗುತ್ತಿದ್ದ 'ಮೂಡಲ ಮನೆ' ಧಾರಾವಾಹಿ ಮರೆಯುವಂತಿಲ್ಲ. ವೈಶಾಲಿ ಕಾಸರವಳ್ಳಿ ಅವರ ನಿರ್ದೇಶನದ ಈ ಸೀರಿಯಲ್‌ನಲ್ಲಿ ಉತ್ತರ ಕರ್ನಾಟಕದಲ್ಲಿ ವಾಸಿಸುವ ಅವಿಭಕ್ತ ಸಾಂಪ್ರಾದಾಯಿಕ ಬ್ರಾಹ್ಮಣ ಕುಟುಂಬದ ಬಿಕ್ಕಟ್ಟನ್ನು ಬಿತ್ತರಿಸಲಾಗಿತ್ತು. ಬಹುತೇಕ ಉತ್ತರ ಕರ್ನಾಟಕದ ಪ್ರತಿಭೆಗಳಿದ್ದ ಈ ಧಾರಾವಾಹಿ ಸಾಂಸ್ಕೃತಿಕ ಮಾಲ್ಯಗಳೊಂದಿಗೆ ಉತ್ತರ ಕರ್ನಾಟಕ ಭಾಷೆ ಹಾಗೂ ಸೊಗಡನ್ನು ಒಳಗೊಂಡಿತ್ತು.

ಬಿ.ಎ, ಬಿಎಸ್ಸಿ, ಬಿಕಾಂ ಮಾಡಿ, ಕೆಲಸವೆ ಸಿಗದೆ ಬರಿ ಅಲೆದಾಡಿ, ಎಲ್ಲರ ಕೈಲೂ ಉಗಿಸಿಕೊಳ್ಳುವ ವೇಸ್ಟು ಬಾಡಿಗಳು.. ದಂಡಪಿಂಡಗಳು ಇವರು.... ಎಂದು ಪ್ರತಿದಿನ ಉದಯ ಟಿ.ವಿಯಲ್ಲಿ ಪ್ರಸಾರವಾಗುತ್ತಿದ್ದ ಸೀರಿಯಲ್ 'ದಂಡಪಿಂಡಗಳು'. ಈ ಧಾರಾವಾಹಿಯನ್ನು   ಫಣಿ ರಾಮಚಂದ್ರ ನಿರ್ದೇಶನ ಮಾಡಿದ್ದರು. ನಿರುದ್ಯೋಗಿಗಳಾದ ಐದು ಯುವಕರ ಹೋರಾಟವನ್ನು ಈ ಧಾರಾವಾಹಿ ಹೊಂದಿತ್ತು. 

2003ರಲ್ಲಿ ಈಟಿವಿಯಲ್ಲಿ ಪ್ರಸಾರವಾಗುತ್ತಿದ್ದ ಸೂಪರ್ ಹಿಟ್ ಧಾರಾವಾಹಿ ಗುಪ್ತಗಾಮಿನಿ. ಕೌಟುಂಬಿಕ ಕಥೆಯನ್ನು ಹೊಂದಿದ್ದ ಈ ಸೀರಿಯಲ್, ಭಾವನಾ ಎಂಬ ಪಾತ್ರದ ಮೇಲೆ ಕೇಂದ್ರಿಕೃತವಾಗಿತ್ತು. ಸ್ವಾಭಿಮಾನದ ಹೆಣ್ಣುಮಗಳೊಬ್ಬಳು ತನ್ನ ಕುಟುಂಬಕ್ಕಾಗಿ ಎಲ್ಲವನ್ನೂ ತ್ಯಾಗ ಮಾಡುವ ಕಥೆ ಹೊಂದಿತ್ತು. 

ಕನ್ನಡದ ಮೊಟ್ಟ ಮೊದಲ ಮಹಿಳಾ ಕೇಂದ್ರಿಕೃತ ಧಾರಾವಾಹಿ ಅಂದರೆ ಅದು 'ಕಾದಂಬರಿ'. ಈ ಸೀರಿಯಲ್‌ನಲ್ಲಿ ಮಹಿಳೆಯೂ ಪ್ರತಿ ಸಮಸ್ಯೆಯನ್ನು ಎದುರಿಸಲು ಹೇಗೆ ಶಕ್ತಿ ಪಡೆಯುತ್ತಾಳೆ ಎಂಬುದರ ಮೇಲೆ ಕೇಂದ್ರಿಕೃತವಾಗಿತ್ತು. ಇದರಲ್ಲಿ ರಾಧಿಕಾ ಪಂಡಿತ್, ಶ್ವೇತಾ ಚೆಂಗಪ್ಪ ಹಾಗೂ ಸಿಂಧೂ ಕಲ್ಯಾಣ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದರು.