ಸ್ಯಾಂಡಲ್‌ವುಡ್‌ನ ಅತ್ಯುತ್ತಮ ರೋಡ್ ಜರ್ನಿ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ಗೋಲ್ಡನ್ ಸ್ಟಾರ್ ಗಣೇಶ್ ಮತ್ತು ರೇಖಾ ವೇದವ್ಯಾಸ್ ಅಭಿನಯದ 'ಹುಡುಗಾಟ' ಕನ್ನಡದಲ್ಲಿನ ಉತ್ತಮ ರೋಡ್ ಜರ್ನಿ ಸಿನಿಮಾ.  ಚಿತ್ರದಲ್ಲಿ  ತನ್ನ ಪ್ರಿಯತಮನನ್ನು ಭೇಟಿಯಾಗಲು ಮನೆಯಿಂದ ಓಡಿಹೋದ ಪ್ರಿಯಾ,  ಬಾಲು ಮಹೇಂದರ್ ಎಂಬ ಪತ್ರಕರ್ತನನ್ನು ಭೇಟಿಯಾಗುತ್ತಾಳೆ. ಒಂದು ಒಳ್ಳೆಯ ಸ್ಟೋರಿ ಸಿಗಬಹುದು ಎಂದು ಬಾಲು ಆಕೆಗೆ ಸಾಥ್ ನೀಡುತ್ತಾನೆ. ರಸ್ತೆಯಲ್ಲಿನ ಇವರಿಬ್ಬರ ತುಂಟಾದ ತುಂಬಿದ ಜರ್ನಿ ಪ್ರೇಕ್ಷಕರಿಗೆ ಮುದ ನೀಡುತ್ತದೆ.  

ಹಿಂದಿಯ ಧಮಾಲ್ ಚಿತ್ರದ ರಿಮೇಕ್ ಆದ ಮಸ್ತ್ ಮಜಾ ಮಾಡಿ ಚಿತ್ರದಲ್ಲಿ ನಾಲ್ಕು ನಿರುದ್ಯೋಗಿ ಯುವಕರು ಊಟಿಯ ಗಾರ್ಡನ್ ಒಂದರಲ್ಲಿರುವ ಸಂಪತ್ತಿಗೋಸ್ಕರ ಊಟಿಯೆಡೆಗೆ ಪ್ರಯಾಣ ಬೆಳಸುತ್ತಾರೆ. ಇದೇ ನಿಧಿಗಾಗಿ ಎಸಿಪಿಯೊಬ್ಬ ಕೂಡ ಪ್ರಯತ್ನ ಪಡುತ್ತಿರುತ್ತಾನೆ. ಚಿತ್ರದಲ್ಲಿ ಸುದೀಪ್, ವಿಜಯ್ ರಾಘವೇಂದ್ರ, ದಿಗಂತ್, ಕೋಮಲ್,ಜೆನ್ನಿಫರ್ ಕೋತ್ವಾಲ್ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದರೆ, ಉಪೇಂದ್ರ, ರೇಖಾ, ಶರ್ಮಿಳಾ ಮಾಂಡ್ರೆ, ಸಂಜನಾ, ಶೆರಿನ್, ಗೌರಿ ಮುಂಜಾಲ್, ಸುಮನ್ ರಂಗನಾಥನ್ ಅತಿಥಿ ಪಾತ್ರಗಳಲ್ಲಿ ನಟಿಸಿದ್ದರು.

ವಿಷ್ಣುವರ್ಧನ್, ರಮೇಶ್ ಮತ್ತು ಪ್ರೇಮಾ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದ ಏಕದಂತ ಚಿತ್ರ ಹಿಂದಿಯ ಬಾಂಬೆ ಟು ಗೋವಾ ಚಿತ್ರ ಕಥೆ ಆಧರಿಸಿತ್ತು. ವಿಕ್ಕಿಗೆ ತನ್ನ ಕಡಿಮೆ ಆದಾಯದ ಕಾರಣ ಮಗು ಬೇಡವಾಗಿರುತ್ತದೆ. ಆದರೆ ಅವನ ಪತ್ನಿ ಮಗುವಿಗಾಗಿ ಹಲವು ವಿಚಿತ್ರ ವ್ರತಗಳನ್ನು ಪಾಲಿಸುತ್ತಿರುತ್ತಾಳೆ. ಒಂದು ವ್ರತದ ಪಾಲನೆಗಾಗಿ ಗಂಡನ ಜೊತೆ ಗಣಪತಿಪುರಕ್ಕೆ ಹೊರಡುತ್ತಾಳೆ. ಈ ಜರ್ನಿಯಲ್ಲಿ ನಡೆಯುವ ಅನೇಕ ಹಾಸ್ಯ ಘಟನೆಗಳು ಪ್ರೇಕ್ಷಕರಿಗೆ ಇಷ್ಟವಾಗುತ್ತವೆ. ಈ ಸಿನಿಮಾದಲ್ಲಿ ವಿಷ್ಣುವರ್ಧನ್, ರಮೇಶ್ ಅರವಿಂದ್ಹಾಗೂ ಪ್ರೇಮ ಪ್ರೇಮ ಪ್ರಮುಖ ಪಾತ್ರ ನಿರ್ವಹಿಸಿದ್ದರು. 

ರ್ಯಾಂಬೋ 2 ಸಿನಿಮಾದಲ್ಲಿ ಶರಣ್ ನಾಯಕನಾಗಿ ಮತ್ತು ಆಶಿಕಾ ರಂಗನಾಥ್ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು. ಸಿನಿಮಾದಲ್ಲಿ ಕೃಷ್ಣ (ಶರಣ್) ಸಿನಿಮಾದ ನಾಯಕಿ ಮಯೂರಿ (ಆಶಿಕಾ) ಜೊತೆ ಲಾಂಗ್ ಡ್ರೈವ್ ಹೋಗುತ್ತಾನೆ. ದಾರಿಯಲ್ಲಿ ಇವರಿಗೆ ಡಿಜೆ ಜೊತೆಯಾಗುತ್ತಾನೆ. ಆದರೆ ವಿಚಿತ್ರ ಕಾರೊಂದು ಇವರನ್ನು ಹಿಂಬಾಲಿಸುತ್ತಾ ಇವರ ಮೇಲೆ ಪದೇ ಪದೇ ದಾಳಿ ಮಾಡುತ್ತದೆ. ನಂತರ ಆ ಕಾರಿನ ವ್ಯಕ್ತಿ ಮಯೂರಿಯನ್ನು ಕಿಡ್ಯಾಪ್ ಮಾಡುತ್ತಾನೆ. ಆ ವ್ಯಕ್ತಿಯ ಹಿನ್ನಲೆ ಏನು ಮತ್ತು ಇವರ ಮೇಲೆ ಏಕೆ ದಾಳಿ ಮಾಡುತ್ತಾನೆ ಎಂಬುದು ಚಿತ್ರದ ಸ್ವಾರಸ್ಯ. ಶರಣ್ ಮತ್ತು ಆಶಿಕಾ ಅಭಿನಯದ ಈ ಸಿನಿಮಾ ಒಳ್ಳೆಯ ಮೆಚ್ಚುಗೆ ಪಡೆದಿತ್ತು. 

ವಿಕ್ಕಿ ಮತ್ತು ಮಾನ್ವಿತಾ ಕಾಮತ್ ನಟನೆಯ ಕೆಂಡಸಂಪಿಗೆ ಸಿನಿಮಾದಲ್ಲಿ ಒಬ್ಬ ಬಡ ಆಫೀಸ್ ಬಾಯ್ ರವೀಂದ್ರ ಮತ್ತು ಒನರ್ ಪುತ್ರಿ ಗೌರಿ ಪರಸ್ಪರ ಪ್ರೀತಿಯಲ್ಲಿ ಬೀಳುತ್ತಾರೆ. ಆದರೆ ರವೀಂದ್ರನ ಮೇಲೆ ಡ್ರಗ್ ಕೇಸ್ ಹಾಕಿ ಜೈಲಿಗೆ ತಳ್ಳಲಾಗುತ್ತದೆ. ಜೈಲಿಂದ ಪರಾರಿಯಾಗುವ ರವೀಂದ್ರ, ಗೌರಿ ಜೊತೆ ಓಡಿ ಹೋಗುತ್ತಾನೆ. ಈ ಜೋಡಿಯನ್ನು ಪೊಲೀಸರು ಬೆನ್ನತ್ತುತ್ತಾರೆ. ಪೊಲೀಸರಿಂದ ತಪ್ಪಿಸಿಕೊಂಡು ಮುಂದೆ ಸಾಗುವ ಈ ಜೋಡಿಯ ಕಥೆ ಒಳ್ಳೆ ಮುದ ನೀಡುತ್ತದೆ. ಜೊತೆಗೆ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು.  

ವಿಜಯಲಕ್ಷ್ಮಿ ಸಿಂಗ್ ನಿರ್ದೇಶನದ ಯಾನ ಚಿತ್ರದಲ್ಲಿ ಜೈಜಗದೀಶ್ ಮತ್ತು ವಿಜಯಲಕ್ಷ್ಮಿ ದಂಪತಿ ಪುತ್ರಿಯರಾದ ವೈಭವಿ, ವೈನಿಧಿ ಮತ್ತು ವೈಸಿರಿ ನಾಯಕಿಯರಾಗಿ ನಟಿಸಿದ್ದರು. ಇವರಿಗೆ ಜೊತೆಯಾಗಿ ಸುಮಖ, ಚಕ್ರವರ್ತಿ ಮತ್ತು ಅಭಿಷೇಕ್ ಬಣ್ಣಹಚ್ಚಿದ್ದರು. ಮೂವರು ಹುಡುಗಿಯರು ತಮ್ಮ ಜೀವನದಲ್ಲಿ ಎದುರಾಗುವ ಒಂದು ಭಾವನಾತ್ಮಕ ಸಂಘರ್ಷದಿಂದ ಮನೆ ತೊರೆದು ಕೈಗೊಳ್ಳುವ ಯಾನದ ಕಥೆಯನ್ನು ಚಿತ್ರ ಹೊಂದಿದೆ. ಡಿಜೆ ಆಗಬೇಕೆಂಬ ಕನಸ್ಸು ಹೊಂದಿರುವ ಮಾಯಾ, ಹಲವು ದೊಡ್ಡ ಕನಸ್ಸುಗಳನ್ನು ಹೊತ್ತು ಸಣ್ಣಪಟ್ಟಣದಿಂದ ನಗರಕ್ಕೆ ಬರುವ ಅಂಜಲಿ ಮತ್ತು ಸದಾ ಉತ್ಸಾಹದಿಂದ ಪುಟಿಯುವ ಬಿಂದಾಸ್  ಹುಡುಗಿ ನಂದಿನಿ ಒಂದೇ ಕಾಲೇಜ್ ಕ್ಯಾಂಪಸ್‌ನಲ್ಲಿ ಸೇರುತ್ತಾರೆ. ಈ ಮೂವರು ತಮ್ಮ ಜೀವನದಲ್ಲಿ ಬರುವ ಒಂದು ಸಮಸ್ಯೆಯಿಂದ ಹೊರಬರುಲು ಗೋವಾದೆಡೆಗೆ ಪಯಣವನ್ನು ಕೈಗೊಳ್ಳುತ್ತಾರೆ. ಈ ಯಾನದ ಅನುಭವ ಹೇಗೆ ಅವರ ಬದುಕಿಗೆ ಹೊಸ ಆಯಾಮವನ್ನು ನೀಡುತ್ತದೆ ಎನ್ನುವುದು ಚಿತ್ರದ ಕಥೆ.

'ಲೈಫ್ ಜೊತೆ ಒಂದು ಸೆಲ್ಫಿ' ಸಿನಿಮಾದಲ್ಲಿ ನೆನಪಿರಲಿ ಪ್ರೇಮ್, ಪ್ರಜ್ವಲ್ ದೇವರಾಜ್ ಮತ್ತು ಹರಿಪ್ರಿಯಾ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಚಿತ್ರದಲ್ಲಿ ಮೂವರಿಗೂ ಜೀವನದಲ್ಲಿ ಒಂದೊಂದು ವೈಯಕ್ತಿಯ ಸಮಸ್ಯೆ ಇರುತ್ತದೆ.  ನಿರ್ದೇಶಕನಾಗ ಬೇಕು ಎಂದುಕೊಂಡ ನುಕುಲ್ (ಪ್ರೇಮ್), ನಿಶ್ಚಿತಾರ್ಥದ ನಂತರ ಬ್ರೇಕಪ್ ಆಗುವ ರಶ್ಮಿ (ಹರಿಪ್ರಿಯಾ) ಹಾಗೂ ತಾಯಿಯ ಅಸ್ತಿತ್ವಕ್ಕಾಗಿ ಮನೆಯವರ ಜೊತೆಗೆ ಜಗಳ ಮಾಡಿಕೊಂಡ ವಿವೇಕ್  (ಪ್ರಜ್ವಲ್ ದೇವರಾಜ್) ತಮ್ಮ ನೆಮ್ಮದಿಗಾಗಿ ಗೋವಾಗೆ ಬರುತ್ತಾರೆ. ಇಡೀ ಕಥೆ ಗೋವಾದಲ್ಲಿಯೇ ನಡೆಯುತ್ತದೆ. ಸಿನಿಮಾ ನೋಡುವವರು ಇಲ್ಲಿ ಇರುವುದು ಮೂರು ಪ್ರಮುಖ ಪಾತ್ರಗಳ ಕಥೆ ಎಂದುಕೊಳ್ಳುವ ಹೊತ್ತಿಗೆ ಸರಿಯಾಗಿ ನಾಲ್ಕನೇ ಕಥೆ ಶುರು ಆಗುತ್ತದೆ. ಆ ನಾಲ್ಕನೇ ಕಥೆಯೇ ಸಿನಿಮಾದ ಉಸಿರು. 

ಮುಂದಿನ ನಿಲ್ದಾಣ ಚಿತ್ರದಲ್ಲಿ ಪ್ರವೀಣ್ ತೇಜ್, ಅನನ್ಯ ಕಶ್ಯಪ್ ಮತ್ತು ರಾಧಿಕಾ ನಾರಾಯಣ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಸಿನಿಮಾದಲ್ಲಿ ಪ್ರವೀಣ್ ತೇಜ್ ಸಾಫ್ಟ್‌ವೇರ್ ಇಂಜಿನಿಯರ್ ಮತ್ತು ಛಾಯಾಗ್ರಾಹಕನ ಪಾತ್ರವನ್ನು ನಿರ್ವಸಿದ್ದರು. ಚಿತ್ರದಲ್ಲಿ ತಮ್ಮ ಜೀವನದ ಕೆಲ ಸಮಸ್ಯೆಗಳಿಂದ ಬೇಸತ್ತ ಪಾರ್ಥ, ಮೀರಾ ಮತ್ತು ಅಹಾನರೋಡ್‌ ಟ್ರಿಪ್ ಹೊರಡುತ್ತಾರೆ. 

ತಮಿಳು ಪೈಯಾ ಚಿತ್ರದ ರಿಮೇಕ್ ಆದ ಅಜಿತ್ ಚಿತ್ರದಲ್ಲಿ ಚಿರಂಜೀವಿ ಸರ್ಜಾ ಜೊತೆ ನಿಕ್ಕಿ ಗಲ್ರಾನಿ ನಾಯಕಿಯಾಗಿ ನಟಿಸಿದ್ದರು. ಬೆಂಗಳೂರಿನ ತನ್ನ ಸ್ನೇಹಿತರ ಜೊತೆಗಿದ್ದ ಅಜಿತ್, ಚಾರುಲತಾ ಪ್ರೀತಿಯಲ್ಲಿ ಬೀಳುತ್ತಾನೆ. ಮುಂದೆ ಇವರಿಬ್ಬರು ಒಂದೇ ಪ್ರಯಾಣದಲ್ಲಿ ಒಂದಾಗುತ್ತಾರೆ.