ಮೈ ಆಟೋಗ್ರಾಫ್ ಟು ಸರ್ಕಾರಿ ಹಿ.ಪ್ರಾ ಶಾಲೆ ಕಾಸರಗೋಡು: ಶಾಲಾ-ಕಾಲೇಜಿನ ಗೋಲ್ಡನ್‌ ಲೈಫ್ ನೆನಪಿಸುವ ಅದ್ಭುತ ಕನ್ನಡ ಸಿನಿಮಾಗಳಿವು!

2006ರಲ್ಲಿ ಬಿಡುಗಡೆಯಾಗಿದ್ದ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ನಿರ್ದೇಶನದ ಚೊಚ್ಚಲ ಚಿತ್ರ 'ಮೈ ಆಟೋಗ್ರಾಫ್'. ಈ ಸಿನಿಮಾದಲ್ಲಿ ಸುದೀಪ್ 'ಶಂಕರ್' ಎಂಬ ಪಾತ್ರ ಮಾಡಿದ್ದರು. ಶಂಕರ್ ತನ್ನ ಮದುವೆಗೆ ಕಾಲೇಜು ಸ್ನೇಹಿತರು ಹಾಗೂ ಹಳೇ ಪ್ರೇಮಿಗಳನ್ನು ಆಹ್ವಾನಿಸಲು ಹೋದಾಗ, ಅವರೊಂದಿಗಿನ ಕಾಲೇಜು ದಿನಗಳನ್ನು ಮೆಲುಕು ಹಾಕುವ ಕಥೆ ಚಿತ್ರದಲ್ಲಿತ್ತು. ಚಿತ್ರದ ಅರಳುವ ಹೂವುಗಳೇ, ಸವಿಸವಿ ನೆನಪು ಸಾವಿರ ನೆನಪು ಹಾಗೂ ನನ್ನವಳು ನನ್ನವಳು ಹಾಡುಗಳು ಸೂಪರ್ ಹಿಟ್ ಆಗಿದ್ದವು. ತಮಿಳಿನಲ್ಲಿ ತೆರೆಕಂಡಿದ್ದ ಆಟೋಗ್ರಾಫ್ ಸಿನಿಮಾದ ಕನ್ನಡ ರಿಮೇಕ್ ಇದಾಗಿದ್ದು, ಸುದೀಪ್, ಮೀನಾ, ಶ್ರೀದೇವಿಕಾ (ಲತಿಕಾ), ದೀಪು, ರಶ್ಮಿ ಕುಲಕರ್ಣಿ, ಶ್ರೀನಿವಾಸ ಮೂರ್ತಿ ಸೇರಿದಂತೆ ಹಲವರು ನಟಿಸಿದ್ದರು. 'ಮೈ ಆಟೋಗ್ರಾಫ್' ಕಾಲೇಜು ದಿನಗಳಲ್ಲಿ ಕಳೆದ ಸಮಯ ಅಮೂಲ್ಯ ಎಂಬುದನ್ನು ತೋರಿಸಿಕೊಟ್ಟಿತ್ತು.

2009ರಲ್ಲಿ ತೆರೆಕಂಡ 'ಜಾಲಿಡೇಸ್' ಸಿನಿಮಾದಲ್ಲಿ ನಾಲ್ಕು ಜನ ಸ್ನೇಹಿತರು, ಅವರ ಕಾಲೇಜು ಜೀವನ, ಮಧ್ಯ-ಮಧ್ಯ ಸಣ್ಣ ಮನಸ್ತಾಪ ಹಾಗೂ ಪ್ರೀತಿಯನ್ನು ತೋರಿಸಲಾಗಿತ್ತು. ಜೊತೆಗೆ ಕಾಲೇಜಿನಲ್ಲಿ ನಡೆಯುವ ರ್ಯಾಗಿಂಗ್, ರಾಜಕೀಯ, ಬಂಕಿಂಗ್ ಹಾಗೂ ಶಿಕ್ಷಣದ ಬಳಿಕ ಉದ್ಯೋಗದ ಹುಡುಕಾಟದ ಅದ್ಭುತವಾಗಿ ತೋರಿಸಲಾಗಿತ್ತು. ಇದೊಂದು ಸ್ನೇಹಿತರಿಗಾಗಿಯೇ ಮಾಡಿದ ಅದ್ಭುತ ಸಿನಿಮಾ ಅಂದರೆ ತಪ್ಪಲಾಗರದು.  ಜಾಲಿಡೇಸ್ ಚಿತ್ರದಲ್ಲಿ ಪ್ರದೀಪ್, ಪ್ರವೀಣ್, ವಿಶ್ವಾಸ್, ಸ್ಫೂರ್ತಿ ಸುರೇಶ್, ಋತುವ, ರಾಘವೇಂದ್ರ, ಐಶ್ವರ್ಯ ನಾಗ್, ಕೀರ್ತಿ, ಬಲ್ಲಾಳ್ ಮೊದಲಾದವರ ತಾರ ಬಳಗವಿತ್ತು.

ಜೋಶ್ ಚಿತ್ರದಲ್ಲಿ ರಾಕೇಶ್ ಅಡಿಗ ನಾಯಕನಾಗಿ ಮತ್ತು ಪೂರ್ಣ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು. ಶಿವಮಣಿ ಅವರ ನಿರ್ದೇಶನದಲ್ಲಿ ಮೂಡಬಂದ ಈ ಸಿನಿಮಾ ಸ್ನೇಹಿತರ ಪ್ರಾಮುಖ್ಯತೆ ಜೊತೆಗೆ ಬದುಕಿಗೆ ಬೇಕಾದ ಪಾಠವನ್ನು ಸಹ ಹೇಳಿತ್ತು. ಕೆಲ ಸ್ನೇಹಿತರ ಸ್ಟೋರಿಯನ್ನೇ ಈ ಚಿತ್ರದಲ್ಲಿ ತರಲಾಗಿತ್ತು.

2016ರಲ್ಲಿ ತೆರೆಕಂಡ ಬ್ಲಾಕ್‌ಬಸ್ಟರ್ ಸಿನಿಮಾ ಕಿರಿಕ್ ಪಾರ್ಟಿ. ಈ ಸಿನಿಮಾಗೆ ರಿಷಬ್ ಶೆಟ್ಟಿ ಆಕ್ಷನ್ ಕಟ್ ಹೇಳಿದ್ದು, ರಕ್ಷಿತ್ ಶೆಟ್ಟಿ ನಾಯಕನಾಗಿ ನಟಿಸಿದ್ದರು. ಕೊನೆ ಬೆಂಚಿನಲ್ಲಿ ಕೂತ್ಕೊಂಡು, ಕ್ಲಾಸ್‌ಗಳಿಗೆ ಬಂಕ್ ಹಾಕ್ಕೊಂಡು, ಲೆಕ್ಚರರ್ಸ್ ಹತ್ರ ಬೈಸ್ಕೊಂಡು, ಹುಡುಗೀರ್ ಹಿಂದೆ ಓಡಾಡಕ್ಕೊಂಡು, ಫ್ರೆಂಡ್ಸ್ ಜತೆ ಕಿತ್ತಾಡ್ಕೊಂಡು, ಲವ್, ಫೈಟ್, ಕಾಲೇಜ್ ಎಲೆಕ್ಷನ್ ವಿದ್ಯಾರ್ಥಿ ಜೀವನವನ್ನ ಎಂಜಾಯ್ ಮಾಡಿದ ಪ್ರತಿಯೊಬ್ಬರನ್ನ ಕಾಡುವ ಸಿನಿಮಾ 'ಕಿರಿಕ್ ಪಾರ್ಟಿ'. ಈ ಸಿನಿಮಾದಲ್ಲಿ ರಶ್ಮಿಕಾ ಸಾನ್ವಿ ಎಂಬ ಪಾತ್ರ ಮಾಡಿದ್ದು, ಈ ಪಾತ್ರ ಅವರಿಗೆ ಸಾಕಷ್ಟು ಪ್ರಸಿದ್ಧಿ ತಂದುಕೊಟ್ಟಿತ್ತು. ಚಿತ್ರದ ಮೊದಲಾರ್ಧದಲ್ಲಿ ರಶ್ಮಿಕಾ ಮಂದಣ್ಣ ಕಾಣಿಸಿಕೊಂಡಿದ್ರೆ, ಸೆಕೆಂಡ್ ಹಾಫ್ ನಲ್ಲಿ ಸಂಯುಕ್ತ ಹೆಗ್ಡೆ ಮೋಡಿ ಮಾಡಿದ್ದರು.

2018ರಲ್ಲಿ ಬಿಡುಗಡೆಗೊಂಡ  ರಿಷಭ್ ಶೆಟ್ಟಿ ನಿರ್ದೇಶನದ 'ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಕಾಸರಗೋಡು' ಸಿನಿಮಾದಲ್ಲಿ ಕನ್ನಡ ಶಾಲೆಗಳು ಪರಿಸ್ಥಿತಿಯನ್ನು ಚಿತ್ರಿಸಲಾಗಿತ್ತು. ಶಾಲೆಯಲ್ಲಿ ಮಕ್ಕಳ ಆಟ, ಪಾಠ, ತುಂಟಾಟ ಈ ನಡುವೆ ಮೂರು ವರ್ಷಗಳಿಂದ ಪಾಸ್ ಆಗದೇ ಒಂದೇ ಕ್ಲಾಸ್‌ನಲ್ಲಿ ಓದುತ್ತಿರುವ 'ದಡ್ಡ ಪ್ರವೀಣ'ನ ಕ್ರಶ್ ಸ್ಟೋರಿ ಜೊತೆಗೆ ಕನ್ನಡ ಭಾಷೆಯ ಬಗ್ಗೆ ಕೀಳರಿಮೆ ಹೊಂದಿದರೆ, ಕನ್ನಡ ಅಸ್ಮಿತೆ ಉಳಿಸಿಕೊಳ್ಳುವುದು ಕಷ್ಟ ಎಂಬ ಸಂದೇಶವನ್ನು ಸಾರಿತ್ತು. 'ಸರ್ಕಾರಿ ಹಿ.ಪ್ರಾ.ಶಾಲೆ, ಕಾಸರಗೋಡು' ಚಿತ್ರ ಖಂಡಿತ ನಿಮ್ಮ ಬಾಲ್ಯ ನೆನಪಿಸುತ್ತದೆ.

2008ರಲ್ಲಿ ತೆರೆಕಂಡ ಮೊಗ್ಗಿನ ಮನಸ್ಸು ಸಿನಿಮಾದಲ್ಲೂ ಕಾಲೇಜು ಜೀವನ, ಪ್ರೀತಿ, ಹದಿಹರೆಯದ ಯುವಕ-ಯುವತಿಯರ ದುಡುಕು ನಿರ್ಧಾರಗಳನ್ನು ತೋರಿಸಲಾಗಿತ್ತು. ಈ ಸಿನಿಮಾದಲ್ಲಿ ರಾಕಿಂಗ್ ಸ್ಟಾರ್ ಯಶ್, ರಾಧಿಕಾ ಪಂಡಿತ್, ಶುಭಾ ಪೂಂಜಾ ಮುಂತಾದವರು ಅಭಿನಯಿಸಿದ್ದರು. ರಾಧಿಕಾ 'ಚಂಚಲಾ' ಎಂಬ ಕಾಲೇಜು ಯುವತಿಯ ಪಾತ್ರದಲ್ಲಿ ನಟಿಸಿದ್ದರು. ಮೊಗ್ಗಿನ ಮನಸ್ಸು ಸಿನಿಮಾ ಸೂಪರ್ ಹಿಟ್ ಆಗುವುದಲ್ಲದೇ, ಐದು ಫಿಲಂ ಫೇರ್ ಪ್ರಶಸ್ತಿ ಬಾಚಿಕೊಂಡಿತ್ತು. ಅತ್ಯುತ್ತಮ ಸಿನಿಮಾ, ಅತ್ಯುತ್ತಮ ನಿರ್ದೇಶಕ, ಅತ್ಯುತ್ತಮ ನಟಿ (ರಾಧಿಕಾ ಪಂಡಿತ್), ಅತ್ಯುತ್ತಮ ಪೋಷಕ ನಟ (ಯಶ್), ಅತ್ಯುತ್ತಮ ಪೋಷಕ ನಟಿ (ಶುಭಾ ಪೂಂಜಾ) ಫಿಲಂ ಫೇರ್ ಅವಾರ್ಡ್ ಲಭಿಸಿತ್ತು.