ನಿಖಿತಾ ತುಕ್ರಾಲ್ ಟು ರಚಿತಾ ರಾಮ್: ವಿವಾದದ ಸುಳಿಯಲ್ಲಿ ಸಿಲುಕಿಕೊಂಡ ಸ್ಯಾಂಡಲ್‌ವುಡ್ ನಟಿಯರಿವರು!

ಐಂದ್ರಿತಾ ರೇ ಅವರು 'ನೂರು ಜನ್ಮಕು' ಸಿನಿಮಾ ಶೂಟಿಂಗ್‌ಗಾಗಿ ಹಾಂಗ್‌ಕಾಂಗ್‌ಗೆ ತೆರಳಿದ್ದರು. ಈ ಚಿತ್ರದ ಚಿತ್ರೀಕರಣ ಒಂದು ಸ್ಟಾರ್ ಕ್ರೂಸ್ ಹಡಗಿನಲ್ಲಿ ನಡೆಯಬೇಕಿರುತ್ತದೆ. ಇಂತಹ ಸಂದರ್ಭದಲ್ಲಿ ಐಂದ್ರಿತಾ ರೇ ಶೂಟಿಂಗ್‌ಗೆ ಲೇಟಾಗಿ ಬಂದಿದ್ದರಿಂದ ನಿರ್ದೇಶಕ ನಾಗತಿಹಳ್ಳಿ ಚಂದ್ರಶೇಖರ್ ಅವರು ಪ್ರಶ್ನಿಸುತ್ತಾರೆ. ಮುಂದೆ ಇಬ್ಬರ ನಡುವೆ ಮಾತಿಗೆ ಮಾತು ಬೆಳೆದು ನಾಗತಿಹಳ್ಳಿ ಚಂದ್ರಶೇಖರ್ ಅವರು ಐಂದ್ರಿತಾಗೆ ಕಪಾಳಮೋಕ್ಷ ಮಾಡಿದ್ದರು. ಈ ವಿಷಯ ವಿವಾದಕ್ಕೆ ತಿರುಗಿ ಫಿಲ್ಮ ಛೇಂಬರ್ ತನಕ ಹೋಗಿತ್ತು. ಬಳಿಕ ಆಗಿನ ಕಲಾವಿದರ ಸಂಘದ ಅಧ್ಯಕ್ಷರಾಗಿದ್ದ ಅಂಬರೀಶ್ ಹಾಗೂ ಜಯಮಾಲಾ ಸಮ್ಮುಖದಲ್ಲಿ ಸಮಸ್ಯೆ ಬಗೆಹರಿಸಲಾಗಿತ್ತು. 

ಮಳೆ ಹುಡುಗಿ ಪೂಜಾ ಗಾಂಧಿ 2019ರಲ್ಲಿ ಬೆಂಗಳೂರಿನ ಅಶೋಕ ಹೋಟೆಲ್‌ನಲ್ಲಿ ಕೆಲವು ದಿನ ಉಳಿದುಕೊಂಡಿದ್ದರು. ಆದರೆ, ಲಕ್ಷ-ಲಕ್ಷ ಬಿಲ್ ಮಾಡಿ ಯಾರಿಗೂ ಗೊತ್ತಾಗದೇ ಹಾಗೇ ಅಲ್ಲಿಂದ ತೆರೆಳಿದ್ದರು. ಈ ಸಂಬಂಧ ಹೈಗ್ರೌಂಡ್ ಪೊಲೀಸ್ ಠಾಣೆಯಲ್ಲಿ ದೂರ ದಾಖಲಾಗಿತ್ತು. ಪೂಜಾಗಾಂಧಿ ಒಟ್ಟು 4.5 ಲಕ್ಷ ಬಿಲ್ ಮಾಡಿದ್ದರು. ದೂರು ದಾಖಲಿಸಿಕೊಂಡಿದ್ದ ಪೊಲೀಸರು, ಪೂಜಾ ಗಾಂಧಿಯನ್ನು ಸ್ಟೇಷನ್‌ಗೆ ಕರಿಸಿದ್ದರು. ಪೊಲೀಸರ ಸಮ್ಮುಖದಲ್ಲಿ ಎರಡು ಲಕ್ಷ ನೀಡಿದ್ದ ಈ ನಟಿ, ಉಳಿದ ಹಣ ಮತ್ತೆ ಪಾವತಿಸಿದ್ದರು. 

ಸ್ಯಾಂಡಲ್‌ವುಡ್ ಡಿಂಪಲ್ ಕ್ವೀನ್ ರಚಿತಾ ರಾಮ್ 'ಐ ಲವ್ ಯೂ' ಸಿನಿಮಾದ ಹಾಡೊಂದರಲ್ಲಿ ಸಿಕ್ಕಾಪಟ್ಟೆ ಬೋಲ್ಡ್ ಆಗಿ ಕಾಣಿಸಿಕೊಂಡಿದ್ದರು. ಮೊದಲ ಬಾರಿಗೆ ರಚಿತಾರನ್ನು ಬೋಲ್ಡ್‌ ಆಗಿ ನೋಡಿದವರಲ್ಲಿ ಕೆಲವು ಇಲ್ಲಸಲ್ಲದ ಪ್ರಶ್ನೆ ಮಾಡಿದ್ದರು. ಇದೇ ವಿಚಾರವಾಗಿ ಡಿಂಪಲ್ ಕ್ವೀನ್ ಕಣ್ಣೀರು ಹಾಕಿದ್ದರು. ಪೋಷಕರ ಬಳಿಯೂ ಕ್ಷಮೆಯಾಚಿಸಿದ್ದರು. ಸಿನಿಮಾದಲ್ಲಿ ಒಬ್ಬ ನಟಿಯಾಗಿ ನಿನ್ನನ್ನು ಒಪ್ಪಿಕೊಳ್ಳುತ್ತೇವೆ, ಮಗಳಾಗಿ ನೋಡಲು ಸಾಧ್ಯವಾಗುತ್ತಿಲ್ಲ ಎಂದು ಅವರ ತಂದೆ ಹೇಳಿದ್ದರಂತೆ. ಈ ವಿಚಾರ ಹೇಳಿಕೊಂಡು ರಚಿತಾ ಕಣ್ಣೀರು ಹಾಕಿದ್ದರು. ಇದಾದ ಬಳಿಕ ಬಂದ ಲವ್ ಯೂ ರಚ್ಚು ಸಿನಿಮಾದಲ್ಲೂ ಬೋಲ್ಡ್ ಆಗಿ ಕಾಣಿಸಿಕೊಂಡಿದ್ದರಿಂದ ಮಾಧ್ಯದವರು ಈ ಬಗ್ಗೆ ಪ್ರಶ್ನಿಸಿದ್ದರು. ಇದಕ್ಕೆ ರಚಿತಾ, ಮದುವೆಯಾದ ದಂಪತಿ ಏನು ಮಾಡುತ್ತಾರೋ ಅದನ್ನೇ ಈ ಸಿನಿಮಾದಲ್ಲಿ ಮಾಡಿರುವುದು ಅಂತ ಹೇಳಿದ್ದರು. ಇದರಿಂದ ಕೋಪಗೊಂಡ ಕನ್ನಡ ಕ್ರಾಂತಿ ದಳವು ನಮ್ಮ ಸಂಸ್ಕೃತಿಗೆ ಧಕ್ಕೆ ತಂದ ರಚಿತಾ ಸಿನಿಮಾ ರಿಲೀಸ್ ಮಾಡಲು ಬಿಡುವುದಿಲ್ಲ ಎಂದು ಪ್ರತಿಭಟಿಸಿದ್ದರು. 

ಕನ್ನಡ ಚಿತ್ರರಂಗಕ್ಕೆ ಆಗಷ್ಟೇ ಕಾಲಿಟ್ಟಿದ್ದ ರಶ್ಮಿಕಾ ಮಂದಣ್ಣ, ರಾಕಿಂಗ್ ಸ್ಟಾರ್ ಯಶ್ ಬಗ್ಗೆ ಮಾತನಾಡಿ ಬಹಳ ದೊಡ್ಡ ವಿವಾದ ಮೈಮೇಲೆ ಎಳೆದುಕೊಂಡಿದ್ದರು. ಕಿರಿಕ್ ಸಿನಿಮಾ ಬಿಡುಗಡೆಗೂ ಮುನ್ನ ಸಂದರ್ಶನವೊಂದರಲ್ಲಿ ಕನ್ನಡದಲ್ಲಿ ಶೋ ಆಫ್ ನಟ ಯಾರು? ಅಂತ ಕೇಳಲಾಗಿತ್ತು. ಅದಕ್ಕೆ ರಶ್ಮಿಕಾ, ರಾಕಿಭಾಯ್ ಹೆಸರು ಹೇಳಿದ್ದರು. ಇದು ಯಶ್ ಅಭಿಮಾನಿಗಳನ್ನು ಕೆರಳಿಸಿತ್ತು. ಯಶ್ ಬಾಸ್‌ಗೆ ಕ್ಷಮೆ ಕೇಳಬೇಕು ಅಂತ ಪಟ್ಟು ಹಿಡಿದಿದ್ದರು. ಆ ವೇಳೆ ಯಶ್ ಮಧ್ಯಪ್ರವೇಶಿಸಿ ಟ್ವಿಟರ್‌ನಲ್ಲಿ ಪ್ರತಿಕ್ರಿಯೆ ನೀಡಿ, ಪ್ರಕರಣವನ್ನು ಶಾಂತಗೊಳಿಸಿದ್ದರು. ಇದಾದ ಬಳಿಕ ರಕ್ಷಿತ್ ಶೆಟ್ಟಿ ಜೊತೆಗಿನ ಎಂಗೇಜ್‌ಮೆಂಟ್ ಮುರಿದುಕೊಂಡು ಸಾಕಷ್ಟು ಟ್ರೋಲ್‌ಗೆ ಗುರಿಯಾದರು. 

ಮೋಹಕತಾರೆ ರಮ್ಯಾ ಕೂಡ ಸಾಕಷ್ಟು ವಿವಾದಗಳಲ್ಲಿ ಸಿಲುಕಿಕೊಂಡಿದ್ದಾರೆ. ರಮ್ಯಾ ಮತ್ತು ಕಿಚ್ಚ ಸುದೀಪ್ 'ಜಸ್ಟ್ ಮಾತ್ ಮಾತಲ್ಲಿ' ಚಿತ್ರೀಕರಣದ ವೇಳೆ ಜಗಳವಾಡಿಕೊಂಡಿದ್ದರಂತೆ.  ಈ ಜಗಳದಿಂದಾಗಿ ರಮ್ಯಾ ಸಿನಿಮಾದಿಂದಲೇ ಹೊರಬಂದಿದ್ದರಂತೆ. ತದನಂತರ ನಡೆದ ಕೆಲ ಮಾತುಕತೆಗಳ ಬಳಿಕ ಮತ್ತೆ ಶೂಟಿಂಗ್‌ಗೆ ಮರಳಿದ್ದರು. ಇದಾದ ಬಳಿಕ ಕಿಚ್ಚಹುಚ್ಚ ಸಿನಿಮಾದಲ್ಲಿ ಒಟ್ಟಿಗೆ ಕಾಣಿಸಿಕೊಂಡಿದ್ದರು. ಆನಂತರದಲ್ಲಿ ರಾಜಕೀಯಕ್ಕೆ ಎಂಟ್ರಿಕೊಟ್ಟ ರಮ್ಯಾ ಅಲ್ಲೂ ಸಾಕಷ್ಟು ಕಾಂಟ್ರವರ್ಸಿಗಳಿಗೆ ಗುರಿಯಾದರು. ತಮ್ಮ ರಾಜಕೀಯಕ್ಕೆ ಸಿಕ್ಕಾಪಟ್ಟೆ ಸಹಾಯ ಮಾಡಿದ್ದ ಅಂಬರೀಶ್ ಅವರ ಅಂತ್ಯಸಂಸ್ಕಾರಕ್ಕೂ ಬಾರದಿದ್ದಕ್ಕೆ ಅಂಬಿ ಅಭಿಮಾನಿಗಳು ಸಾಕಷ್ಟು ಆಕ್ರೋಶ ವ್ಯಕ್ತಪಡಿಸಿದ್ದರು. 

ನಿಖಿತಾ ತುಕ್ರಾಲ್  ಸ್ಯಾಂಡಲ್‌ವುಡ್‌ನಲ್ಲಿ ಬೆರಳೆಣಿಯೆಷ್ಟು ಕನ್ನಡ ಸಿನಿಮಾಗಳಲ್ಲಿ ನಟಿಸಿದರೂ ಕ್ರೇಜ್ ಸೃಷ್ಟಿಸಿಕೊಂಡಿದ್ದರು. ನಟ ದರ್ಶನ್ ಜೊತೆ ಯೋಧ, ಫ್ರಿನ್ಸ್, ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ಸಿನಿಮಾಗಳಲ್ಲಿ ಅಭಿನಯಿಸಿದ್ದರು. 2011ರಲ್ಲಿ ನಟ ದರ್ಶನ್ ಹಾಗೂ ಪತ್ನಿ ವಿಜಲಕ್ಷ್ಮೀ ನಡುವೆ ಕಲಹ ಉಂಟಾಗಿತ್ತು. ಇದಕ್ಕೆ ಸಹನಟಿ ನಿಖಿತಾ ಅವರೇ ಕಾರಣ ಎನ್ನಲಾಗಿತ್ತು. ಇದಾದ ಬಳಿಕ ನಿರ್ಮಾಪಕರ ಸಂಘ ನಿಖಿತಾರನ್ನು ಮೂರು ವರ್ಷ ಕನ್ನಡ ಚಿತ್ರರಂಗದಿಂದ ಬ್ಯಾನ್ ಮಾಡಿತ್ತು. ಈ ಮೂಲಕ ನಿಖಿತಾ ವಿವಾದಕ್ಕೆ ಸಿಲುಕಿಕೊಂಡಿದ್ದರು. 

ನಟಿ ಹರಿಪ್ರಿಯಾ ಅವರು D/O ಪಾರ್ವತಮ್ಮ ಸಿನಿಮಾ ರಿಲೀಸ್ ಆದಾಗ, ತಮ್ಮ ಫೇಸ್‌ಬುಕ್‌ ಹಾಗೂ ಟ್ವಿಟರ್ ಖಾತೆಯಲ್ಲಿ ನನಗೆ ಸಿನಿಮಾ ನಿರ್ದೇಶಕರು ಹೇಳಿರುವ ಕಥೆಯೇ ಬೇರೆ, ತೆರೆಯ ಮೇಲೆ ನೋಡುತ್ತಿರುವುದೇ ಬೇರೆ ಅಂತ ಬರೆದುಕೊಂಡಿದ್ದರು. ಇದರಿಂದ ಸಿನಿಮಾದ ಇಮೇಜ್ ಹಾಳಾಗಿದೆ, ಗಳಿಕೆಯ ಮೇಲೆ ಪರಿಣಾಮ ಬೀರಿದೆ ಅಂತ ಚಿತ್ರತಂಡ ಚಲನಚಿತ್ರ ವಾಣಿಜ್ಯ ಮಂಡಳಿಗೆ ದೂರು ನೀಡಿತ್ತು. ಮತ್ತೊಂದು ಕಾಂಟ್ರವರ್ಸಿಯೆಂದರೆ, ಹರಿಪ್ರಿಯಾ ಅವರು ಮಾಜಿ ಸಿಎಂ ಯಡಿಯೂರಪ್ಪ ಮಗ ವಿಜಯೇಂದ್ರ ಅವರೊಂದಿಗೆ ಡೇಟಿಂಗ್ ಮಾಡ್ತಿದ್ದಾರೆಂಬ ಸುದ್ದಿ ಹರಡಿತ್ತು. ಇದು ದೊಡ್ಡ ಸುದ್ದಿಯಾಗಿದ್ದು, ಹರಿಪ್ರಿಯಾ ನಾನು ವಿಜಯೇಂದ್ರ ಜೊತೆಗೆ ಡೇಟಿಂಗ್ ಮಾಡಿಲ್ಲ ಅಂತ ಹೇಳಿದ್ದರು.