ಸದ್ದು ಮಾಡಿ ಸೈಲೆಂಟ್ ಆದ ಸ್ಯಾಂಡಲ್‌ವುಡ್ ಸೀಕ್ವೆಲ್‌ಗಳು!

'ಕಿರಾತಕ' ಸಿನಿಮಾ ಹಿಟ್ ಆದಾಗಲೇ ನಿರ್ದೇಶಕ ಪ್ರದೀಪ್ ರಾಜ್ ಸೀಕ್ವೆಲ್ ಮಾಡಲು ಚಿಂತನೆ ನಡೆಸಿದ್ದರು. ಯಶ್ ಕಾಂಬಿನೇಷನ್‌ನಲ್ಲಿ ಸಿನಿಮಾ ಮಾಡಬೇಕು ಎಂದುಕೊಂಡಿದ್ದರು. 'ಇಂದ್ರಜಾಲ್ ಅಡ್ವಟೈರ್ಸ್ ಸೊಲ್ಯೂಷನ್ಸ್' ಬ್ಯಾನರ್‌ ಅಡಿ ಟೈಟಲ್ ರಿಜಿಸ್ಟರ್ ಮಾಡಿಸಿದ್ದರು. ಆದರೆ, ಕೆಜಿಎಫ್ ಸಿನಿಮಾ ಅಭೂರ್ತಪೂರ್ವ ಯಶಸ್ಸು ಅವರನ್ನು ಕಿರಾತಕದಿಂದ ಹೊರಬರುವಂತೆ ಮಾಡಿತ್ತು. ಈ ಸಿನಿಮಾಗಾಗಿ ನಿರ್ಮಾಪಕ ಜಯಣ್ಣ ಅವರಿಂದ ಪಡೆದುಕೊಂಡ ಅಡ್ವಾನ್ಸ್ ಹಣವನ್ನು ರಾಕಿಂಗ್ ಸ್ಟಾರ್ ವಾಪಾಸ್ ಮಾಡಿದ್ದರು. ಆನಂತರ ಪ್ರದೀಪ್ ರಾಜ್ ಹೊಸಬರನ್ನು ಬಳಸಿಕೊಂಡು ಸಿನಿಮಾ ಮಾಡಿದ್ದರು. ಆದರೆ, ಚಿತ್ರ ಯಶಸ್ಸು ಗಳಿಸಲಿಲ್ಲ.

ರಿಷಬ್ ಶೆಟ್ಟಿ ಹೀರೊ ಆಗಿ ನಟಿಸಿದ ಮೊದಲ ಸಿನಿಮಾ ಜಯತೀರ್ಥ ನಿರ್ದೇಶನದ 'ಬೆಲ್ ಬಾಟಂ'. ಈ ಸಿನಿಮಾ ಹಿಟ್ ಆಗುತ್ತಿದ್ದಂತೆ ಅದೇ ತಂಡ ಸೀಕ್ವೆಲ್ ಘೋಷಣೆ ಮಾಡಿ, ಮುಹೂರ್ತ ಮಾಡಿತ್ತು. ಆ ಸಿನಿಮಾಗೂ ಮುನ್ನ ರಿಷಬ್ ಶೆಟ್ಟಿ 'ಕಾಂತಾರ' ಸಿನಿಮಾ ಮಾಡಿ ಸೂಪರ್ ಸಕ್ಸಸ್ ಕಂಡರು. ಹಾಗಾಗಿ, 'ಬೆಲ್‌ಬಾಟಂ'-2 ಚಿತ್ರೀಕರಣ ಮುಂದುವರೆದಿಲ್ಲ. ಸದ್ಯ ರಿಷಭ್ ಕಾಂತಾರ ಪ್ರಿಕ್ವೇಲ್‌ನಲ್ಲಿ ಬ್ಯುಸಿಯಾಗಿದ್ದು, ಮುಂದೆ ಬೆಲ್‌ಬಾಟಮ್ ೨ ಬರತ್ತೋ, ಇಲ್ಲವೋ ಗೊತ್ತಿಲ್ಲ.

ದಿನಕರ್ ನಿರ್ದೇಶನದಲ್ಲಿ ಕನ್ನಡದ ಖ್ಯಾತ ಖಳನಟರ ಮಕ್ಕಳು ನಟಿಸಿದ್ದ 'ನವಗ್ರಹ' ಸಿನಿಮಾ ಸಿಕ್ಕಾಪಟ್ಟೆ ಗಮನ ಸೆಳೆದಿತ್ತು. ಈ ಸಿನಿಮಾದ ಕ್ಲೈಮ್ಯಾಕ್ಸ್ ನೋಡಿದ್ರೆ ಜಗ್ಗು ವಾಪಾಸ್ ಬರುವ ತರಹ ಇತ್ತು. ಅಂದರೆ ಈ ಚಿತ್ರದ ಸೀಕ್ವೆಲ್ ಬರುತ್ತದೆ ಎಂಬ ಸೂಚನೆ ಕೊಡಲಾಗಿತ್ತು. ಚಿತ್ರದ ಸೀಕ್ವೆಲ್ ಮಾಡಲು ಚಿತ್ರತಂಡ ಅಂದುಕೊಂಡಿದ್ದು ಸುಳ್ಳಲ್ಲ. ದರ್ಶನ್ ಅಭಿಮಾನಿಗಳು ಇಂತಹದೊಂದು ಚಿತ್ರಕ್ಕಾಗಿ ಕಾಯುತ್ತಿದ್ದು, ದಿನಕರ್ ಕೂಡ ಈ ಬಗ್ಗೆ ಉತ್ಸುಕರಾಗಿದ್ದಾರೆ. ಆದರೆ, ಸಿನಿಮಾ ನಿರ್ಮಾಣ ಪ್ರಯತ್ನ ಮಾತ್ರ ಇನ್ನು ಶುರುವಾಗಿಲ್ಲ.

ಚಂದನವನದಲ್ಲಿ ಡಾಲಿ ಧನಂಜಯ್‌ಗೆ ಪುನರ್‌ಜನ್ಮ ನೀಡಿದ್ದ ಹಾಗೂ ಶಿವಣ್ಣ ನಾಯಕನಾಗಿ ನಟಿಸಿದ್ದ ಟಗರು ಸಿನಿಮಾ ಸೂಪರ್ ಹಿಟ್ ಆಗಿತ್ತು. ದುನಿಯಾ ಸೂರಿ 'ಟಗರು' ಕ್ಲೈಮ್ಯಾಕ್ಸ್‌ನಲ್ಲೇ ಸೀಕ್ವೆಲ್ ಸುಳಿವು ಕೊಟ್ಟಿದ್ದರು. ಸಣ್ಣ ಟೀಸರ್ ಸಹ ಬಿಡುಗಡೆ ಮಾಡಿದ್ದರು. ಆದರೆ ಬಳಿಕ ಆ ಸಿನಿಮಾ ಬಗ್ಗೆ ಯಾವುದೇ ಮಾಹಿತಿ ಸಿಗಲಿಲ್ಲ. ಆದರೆ, ಶಿವಣ್ಣ ಮಾತ್ರ ಮತ್ತೆ 'ಟಗರು' ಶಿವನಾಗಿ ಅಬ್ಬರಿಸಲು ಸಿದ್ಧರಿದ್ದಾರೆ. ಯಾವಾಗ ಬೇಕಿದ್ದರೂ ಸಿನಿಮಾ ಮಾಡಲು ಸಿದ್ಧ ಎನ್ನುತ್ತಿದ್ದಾರೆ. ಈ ಚಿತ್ರಕ್ಕಾಗಿ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದು, ಯಾವಾಗ ಬರತ್ತೇ ಅನ್ನೋ ಸುಳಿವಿಲ್ಲ.

2014ರಲ್ಲಿ ಬಂದ ಪ್ರಶಾಂತ್ ನೀಲ್ ನಿರ್ದೇಶನದ 'ಉಗ್ರಂ' ಸಿನಿಮಾ ರೋರಿಂಗ್ ಸ್ಟಾರ್ ಶ್ರೀಮುರಳಿಗೆ ಬಿಗ್ ಬ್ರೇಕ್ ನೀಡಿತ್ತು. ಇದು ಪ್ರಶಾಂತ್ ನೀಲ್ ನಿರ್ದೇಶನದ ಮೊದಲ ಸಿನಿಮಾ. ಲವ್, ಸೆಂಟಿಮೆಂಟ್, ಸಾಹಸ ಎಲ್ಲಾ ದೃಶ್ಯಗಳನ್ನು ಬೆರೆಸಿ ಸುಂದರವಾಗಿ ತೆರೆಮೇಲೆ ಬಂದಿದ್ದ ಈ ಸಿನಿಮಾ ಅದ್ಭುತ ಯಶಸ್ಸು ಕಂಡಿತ್ತು. ಉಗ್ರಂ ಚಿತ್ರ ಬಾಲ್ಯದ ಗೆಳೆಯರಾದ ಬಾಲ ಹಾಗೂ ಅಗಸ್ತ್ಯ ಅವರ ಸಂಘರ್ಷದೊಂದಿಗೆ ಕೊನೆಗೊಂಡಿದ್ದರಿಂದ ಇದರ ಸೀಕ್ವೆಲ್ 'ಉಗ್ರಂ ವೀರಂ' ಬರಲಿದೆ ಅಂತ ಕನ್ನಡ ಸಿನಿರಸಿಕರು ಊಹಿಸಿದ್ದರು. ಚಿತ್ರತಂಡ ಸೀಕ್ವೆಲ್ ಮಾಡೋದಾಗಿ ಹೇಳಿಕೊಂಡಿತ್ತು. ಆದರೆ, ಸದ್ಯ ಪ್ರಶಾಂತ್ ಬ್ಯುಸಿಯಾಗಿದ್ದು, ಈ ಸಿನಿಮಾ ಬರುವುದು ಅನುಮಾನವಾಗಿದೆ.