ಹ್ಯಾಪಿ ಬರ್ತಡೇ: ಶುಭಾ ಪೂಂಜಾ ನಟನೆಯ ಟಾಪ್ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ಶುಭಾ ಪೂಂಜಾ ನಟನೆಯ ಎರಡನೇ ಕನ್ನಡ ಸಿನಿಮಾ ಚಂಡ. ಎಸ್ ನಾರಾಯಣ ನಿರ್ದೇಶನದಲ್ಲಿ ಮೂಡಿಬಂದಿದ್ದ 'ಚಂಡ' ಚಿತ್ರದಲ್ಲಿ ದುನಿಯಾ ವಿಜಯ್ ಜೊತೆ ಶುಭಾ ಪೂಂಜಾ ನಾಯಕಿಯಾಗಿ ನಟಿಸಿದ್ದರು. ಶ್ರೀಮಂತ ಕಾಲೇಜು ಹುಡಗಿಯೊಬ್ಬಳು ಕೆಳವರ್ಗದ ಹುಡಗನನ್ನು ಪ್ರೀತಿಸುವ ಕಥೆ ಹೊಂದಿದ್ದ ಈ ಚಿತ್ರ ಜನಮನ ಸೆಳೆಯಿತು. 2007ರಲ್ಲಿ ತೆರೆಕಂಡ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. 

ಶಶಾಂಕ್ ನಿರ್ದೇಶನದಲ್ಲಿ ಮೂಡಿಬಂದ ಮೊಗ್ಗಿನ ಮನಸ್ಸು ಚಿತ್ರದಲ್ಲಿ ರಾಧಿಕಾ ಪಂಡಿತ್ ಹಾಗೂ ಶುಭಾ ಪೂಂಜಾ ನಾಯಕಿಯಾಗಿ ನಟಿಸಿದ್ದರು.ಈ ಸಿನಿಮಾದಲ್ಲಿ ಶುಭಾ 'ರೇಣುಕಾ' ಎಂಬ ಪಾತ್ರವನ್ನು ನಿರ್ವಹಿಸಿದ್ದರು. ಮೊಗ್ಗಿನ ಮನಸು ಯಶ್, ರಾಧಿಕಾ ಹಾಗೂ ಶುಭಾಗೆ ಬಿಗ್ ಬ್ರೇಕ್‌ ನೀಡಿತ್ತು.ಮೊಗ್ಗಿನ ಮನಸು ಸಿನಿಮಾ ಸೂಪರ್ ಹಿಟ್ ಆಗುವುದಲ್ಲದೇ, ಐದು ಫಿಲಂ ಫೇರ್ ಪ್ರಶಸ್ತಿ ಬಾಚಿಕೊಂಡಿತ್ತು. ಅತ್ಯುತ್ತಮ ಸಿನಿಮಾ, ಅತ್ಯುತ್ತಮ ನಿರ್ದೇಶಕ, ಅತ್ಯುತ್ತಮ ನಟಿ (ರಾಧಿಕಾ ಪಂಡಿತ್), ಅತ್ಯುತ್ತಮ ಪೋಷಕ ನಟ (ಯಶ್), ಅತ್ಯುತ್ತಮ ಪೋಷಕ ನಟಿ (ಶುಭಾ ಪೂಂಜಾ) ಫಿಲಂ ಫೇರ್ ಅವಾರ್ಡ್ ಲಭಿಸಿತ್ತು.

ಸ್ಲಂಬಾಲ ಸಿನಿಮಾದಲ್ಲಿ ಶುಭಾ ಪೂಂಜಾ ನಾಯಕಿಯಾಗಿ ಹಾಗೂ ದುನಿಯಾ ವಿಜಯ್ ನಾಯಕನಾಗಿ ಅಭಿನಯಿಸಿದ್ದರು.ಈ ಚಿತ್ರವನ್ನು ಮಹಿಳಾ ನಿರ್ದೇಶಕಿ ಸುಮನಾ ಕಿತ್ತೂರು ನಿರ್ದೇಶಿಸಿದ್ದು, ಭೂಗತಲೋಕದ ಕಥೆಯನ್ನು ಪರಿಣಾಮಕಾರಿಯಾಗಿ ನಿರ್ವಹಿಸಿದ್ದರು. ರೌಡಿಸಂ ಕಥೆಯನ್ನು ಅತಿರೇಕವಿಲ್ಲದೆ ತೆರೆಮೇಲೆ ತೋರಿಸಿದ್ದರು. 

2009ರಲ್ಲಿ ತೆರೆಕಂಡ ತಾಕತ್ ಸಿನಿಮಾದಲ್ಲಿ ದುನಿಯಾ ವಿಜಯ್ ಹಾಗೂ ಶುಭಾ ಪೂಂಜಾ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಎಂ ಎಸ್ ರಮೇಶ್ ನಿರ್ದೇಶನದ ಈ ಚಿತ್ರದಲ್ಲಿ ಬಸ್ಯಾ (ವಿಜಯ್) ಕಂಡಕ್ಟರ್ ಆಗಿ ಕೆಲಸ ಮಾಡುತ್ತಿರುತ್ತಾನೆ. ಒಂದು ಈತನಿಗೆ ಒಂದು ಅನಾಥ ಮಗು ಸಿಗುತ್ತದೆ. ಬಳಿಕ ಬಸ್ಯಾ ಹಾಗೂ ಡ್ರೈವರ್ ಆ ಮಗುವನ್ನು ಸಾಕುತ್ತಿರುತ್ತಾರೆ. ಈ ಸಂದರ್ಭ ಊರಿನ ಮುಖಂಡನ ಮಗಳು ಭಾಗ್ಯಾ (ಶುಭಾ) ಆತನಿಗೆ ಮನಸೋಲುತ್ತಾಳೆ. ಬಳಿಕ ಇವರಿಬ್ಬರು ಪರಸ್ಪರ ಪ್ರೀತಿಸುತ್ತಿರುತ್ತಾರೆ. ಇದು ಆಕೆಯ ತಂದೆಗೆ ಗೊತ್ತಾಗುತ್ತಿದ್ದಂತೆ ಬಸ್ಯಾ ತೊಂದರೆಗೆ ಸಿಲುಕುತ್ತಾನೆ. 

ಜೈ ಮಾರುತಿ 800 ಸಿನಿಮಾದಲ್ಲಿ ಶರಣ್ ನಾಯಕನಾಗಿ, ಶುಭಾ ಪೂಂಜಾ ಮತ್ತು ಸೃತಿ ಹರಿಹರನ್ ನಾಯಕಿಯರಾಗಿ ಅಭಿನಯಿಸಿದ್ದರು. ಎ ಹರ್ಷ ನಿರ್ದೇಶನದಲ್ಲಿ ಮೂಡಿಬಂದ ಚಿತ್ರದಲ್ಲಿ ಶರಣ್ ಸ್ನೇಹಿತ ಅಪಘಾತದಲ್ಲಿ ಸಾವನ್ನಪ್ಪುತ್ತಾನೆ. ಈ ವೇಳೆ ಶರಣ್ ಸ್ನೇಹಿತನ ಕುಟುಂಬವನ್ನು ಒಂದು ಮಾಡುವುದಾಗಿ ಭಾಷೆ ಕೊಟ್ಟಿರುತ್ತಾನೆ. ಅದರಂತೆ ನರಸಿಂಹ ಎಂಬಾತನ ಬಳಿ ಅಡಿಯಾಳಾಗಿರುವ ಸ್ನೇಹಿತನ ತಾಯಿ ಮತ್ತು ಸಹೋದರರಿಯರನ್ನು ರಕ್ಷಿಸಲು ಆ ಊರಿಗೆ ಎಂಟ್ರಿ ಕೊಡುತ್ತಾನೆ. ಅಲ್ಲಿ ನರಸಿಂಹನ ಸಹೋದರಿ ಸ್ಮಿತಾ (ಶುಭಾ ಪೂಂಜಾ) ಮತ್ತು ವೀರಪ್ಪನ ಮಗಳು ಗೀತಾ (ಶೃತಿ ಹರಿಹರನ್) ಇಬ್ಬರಿಗೂ ನಾಯಕನ ಮೇಲೆ ಪ್ರೇಮಾಂಕುರವಾಗುತ್ತದೆ. ಒಬ್ಬರನ್ನು ಶರಣ್ ಪಟಾಯಿಸಿದರೆ, ಇನ್ನೊಬ್ಬಳು ನಾಯಕನ ಹಿಂದೆ ಗಿರಿಗಿಟ್ಲೆ ಹೊಡೆಯುತ್ತಿರುತ್ತಾಳೆ.ಎರಡು ಕುಟುಂಬವನ್ನು ಒಂದು ಮಾಡಲು ಹರಸಾಹಸ ಪಡುವ ನಾಯಕ, ಕೊನೆಗೆ ಕುಟುಂಬವನ್ನು ಒಂದು ಮಾಡುತ್ತಾನಾ? ಇಬ್ಬರು ನಾಯಕಿಯರಲ್ಲಿ ಯಾರು ನಾಯಕನಿಗೆ ಒಲಿಯುತ್ತಾರೆ ಎಂಬುದೇ ಚಿತ್ರದ ಕಥೆ.