Happy Birthday: ಶ್ರೀನಗರ ಕಿಟ್ಟಿ ನಟನೆಯ ಹಿಟ್ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ನಟ ಶ್ರೀನಗರ ಕಿಟ್ಟಿ 2003ರಲ್ಲಿ ಗಿರಿ ಸಿನಿಮಾ ಮೂಲಕ ನಾಯಕನಾಗಿ ಸ್ಯಾಂಡಲ್‌ವುಡ್‌ಗೆ ಎಂಟ್ರಿಕೊಟ್ಟರು. ಆನಂತರ ಕೆಲ ಸಿನಿಮಾಗಳಲ್ಲಿ ನಟಿಸಿದರಾದರೂ ಯಾವ ಚಿತ್ರವೂ ಯಶಸ್ವಿಯಾಗಲಿಲ್ಲ. ನಾಯಕನಾಗಿ ಇವರಿಗೆ ಕೀರ್ತಿ ತಂದು ಕೊಟ್ಟ ಚಿತ್ರ ದುನಿಯಾ ಸೂರಿ ನಿರ್ದೇಶನದ `ಇಂತಿ ನಿನ್ನ ಪ್ರೀತಿಯ'. ಈ ಸಿನಿಮಾದಲ್ಲಿ ಶ್ರೀನಗರ ಕಿಟ್ಟಿ ನಾಯಕನಾಗಿ, ಸೋನು ಗೌಡ ಮತ್ತು ಭಾವನಾ ನಾಯಕಿರಾಗಿ ಅಭಿನಯಿಸಿದ್ದರು. ಇದೊಂದು ದುರಂತ ಕಥೆಯುಳ್ಳ ಸಿನಿಮಾವಾಗಿತ್ತು. ನಾಯಕ (ಶ್ರೀನಗರ ಕಿಟ್ಟಿ) ಮತ್ತು ನಾಯಕಿ (ಸೋನು) ಪರಸ್ಪರ ಪ್ರೀತಿಸುತ್ತಿರುತ್ತಾರೆ. ಆದರೆ ನಾಯಕ ಹಾಗೂ ನಾಯಕಿಯ ಅಣ್ಣನ ಜಗಳದಿಂದಾಗಿ ಇವರಿಬ್ಬರ ಪ್ರೀತಿ ಮುರಿದು ಬೀಳುತ್ತದೆ. ನಂತರದಲ್ಲಿ ಕಿಟ್ಟಿ ಮದ್ಯಪಾನಿಯಾಗುತ್ತಾರೆ. ಇದರಿಂದ ಆತನನ್ನು ಹೊರತರಲು ಮನೆಯವರು ಆತನಿಗೆ ಬೇರೆ ಹುಡುಗಿಯೊಂದಿಗೆ (ಭಾವನಾ) ಮದುವೆ ಮಾಡುತ್ತಾರೆ. ಆಕೆಗೆ ದಾಂಪತ್ಯದ ಬಗ್ಗೆ ಸಾಕಷ್ಟು ಕನಸಿರುತ್ತದೆ. ಆದರೆ, ಅದೆಲ್ಲವೂ ಮೊದಲ ರಾತ್ರಿಯೇ ಮುರಿದು ಬೀಳುತ್ತದೆ. ಇನ್ನೇನು ಎಲ್ಲಾ ಸರಿ ಹೋಯಿತು ಅನ್ನುವಷ್ಟರಲ್ಲಿ ಕಿಟ್ಟಿಯ ಹೆಂಡತಿ ಸಾವನ್ನಪ್ಪುತ್ತಾಳೆ. ಬಳಿಕ ಆತ ಮತ್ತೆ ಮದ್ಯಪಾನಕ್ಕೆ ದಾಸನಾಗುತ್ತಾನೆ. ಇದು ಸಿನಿಮಾ ಕಥೆ. ಈ ಸಿನಿಮಾದ ಒಂದೊಂದೇ ಬಚ್ಚಿಟ್ಟ ಮಾತು ಹಾಡು ಇಂದಿಗೂ ಫೇಮಸ್.

ಇಂತಿ ನಿನ್ನ ಪ್ರೀತಿಯ ಚಿತ್ರ ಯಶಸ್ವಿಯಾದ ಬಳಿಕ ಶ್ರೀನಗರ ಕಿಟ್ಟಿ 'ಜನುಮದ ಗೆಳತಿ' ಚಿತ್ರದಲ್ಲಿ ನಟಿಸಿದರು. ದಿನೇಶ್ ಬಾಬು ನಿರ್ದೇಶನದ ಈ ಚಿತ್ರದಲ್ಲಿ ಪೂಜಾ ಗಾಂಧಿ ನಾಯಕಿಯಾಗಿ ಅಭಿನಯಿಸಿದ್ದರು. ಇದೊಂದು ಲವ್ ಸ್ಟೋರಿ ಹೊಂದಿದ್ದ ಸಿನಿಮಾವಾಗಿದ್ದು, ಬಾಕ್ಸಾಫೀಸ್‌ನಲ್ಲಿ ಸದ್ದು ಮಾಡುವಲ್ಲಿ ವಿಫಲವಾಯಿತು. 

ಒಲವೇ ಜೀವನ ಲೆಕ್ಕಾಚಾರ ಚಿತ್ರದಲ್ಲಿ ಶ್ರೀನಗರ ಕಿಟ್ಟಿ ನಾಯಕನಾಗಿ ಮತ್ತು ರಾಧಿಕಾ ಪಂಡಿತ್, ಅನ್ವಿತ ಹಾಗೂ ಡೈಸಿ ಬೋಪಣ್ಣ, ನಾಯಕಿಯರಾಗಿ ಅಭಿನಯಿಸಿದ್ದರು.  ಈ ಚಿತ್ರವನ್ನು ನಾಗತಿಹಳ್ಳಿ ಚಂದ್ರಶೇಖರ್ ನಿರ್ದೇಶನ ಮಾಡಿದ್ದು, ಪ್ರೇಕ್ಷಕರಿಂದ ಮೆಚ್ಚುಗೆ ಪಡೆಯಿತು. ಈ ಚಿತ್ರದ ನಟನೆಗಾಗಿ ರಾಧಿಕಾ ಪಂಡಿತ್ ಇನ್ನೋವೇಟಿವ್  ಫಿಲ್ಮ್ ಪ್ರಶಸ್ತಿ ಪಡೆದರು. ಚಿತ್ರದಲ್ಲಿ ಕಿಟ್ಟಿ 'ಬಾಲು' ಎಂಬ ಪಾತ್ರವನ್ನು ನಿರ್ವಹಿಸಿದ್ದರು. 

ಮಳೆ ಬರಲಿ ಮಂಜು ಇರಲಿ ಸಿನಿಮಾದಲ್ಲಿ ಶ್ರೀನಗರ ಕಿಟ್ಟಿ ನಾಯಕನಾಗಿ ಹಾಗೂ ಪಾರ್ವತಿ ಮೆನನ್ ನಾಯಕಿಯಾಗಿ ಅಭಿನಯಿಸಿದ್ದರು. ಇದೊಂದು ತ್ರಿಕೋನ ಪ್ರೇಮಕಥೆಯುಳ್ಳ ಸಿನಿಮಾವಾಗಿದ್ದು, ಸಿನಿರಸಿಕರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿತ್ತು. ಈ ಚಿತ್ರವನ್ನು ಸಂಪೂರ್ಣವಾಗಿ ಕೊಡಗಿನಲ್ಲಿ ಚಿತ್ರೀಕರಿಸಲಾಗಿತ್ತು. 

ನಾಗಶೇಖರ್ ನಿರ್ದೇಶನದಲ್ಲಿ ಮೂಡಿಬಂದ ಸಂಜು ವೆಡ್ಸ್ ಗೀತಾ ಚಿತ್ರದಲ್ಲಿ ಶ್ರೀನಗರ ಕಿಟ್ಟಿ ಮತ್ತು ರಮ್ಯಾ ಮುಖ್ಯ ಪಾತ್ರದಲ್ಲಿ ಅಭಿನಯಿಸಿದ್ದರು. ಇದು ಕಿಟ್ಟಿ ಸಿನಿಜೀವನದ ಅತ್ಯುತ್ತಮ ಸಿನಿಮಾ. ಚಿತ್ರದಲ್ಲಿ  ಜೆಸ್ಸಿ ಗಿಫ್ಟ್ ಸಂಗೀತದಲ್ಲಿ ಮೂಡಿಬಂದ ಹಾಡುಗಳು ಕೇಳುಗರ ಮನಸೋರೆಗೊಂಡವು. ಪ್ರೇಮಿಗಳ ದುರಂತ ಅಂತ್ಯ ಕಥೆ ಹೊಂದಿದ್ದ ಈ ಸಿನಿಮಾ ಬಾಕ್ಸಾಫೀಸ್‌ನಲ್ಲೂ ಸಖತ್ ಸದ್ದು ಮಾಡಿತ್ತು. ಸೋನು ನಿಗಮ್ ಮತ್ತು ಶ್ರೇಯಾ ಘೋಷಾಲ್ ಕಂಠದಲ್ಲಿ ಕನ್ನಡದ ಎವರ್ ಗ್ರೀನ್ ಹಿಟ್ ಹಾಡುಗಳು ಈ ಚಿತ್ರದ ಮೂಲಕ ಹೊರಬಂದವು. ಈ ಚಿತ್ರಕ್ಕೆ ಸೈಮಾ, ಫೀಲ್ಮ್ ಫೇರ್ ,ಕರ್ನಾಟಕ ರಾಜ್ಯ ಪ್ರಶಸ್ತಿ ಸೇರಿದಂತೆ ಹಲವು ಪ್ರಶಸ್ತಿಗಳು ಲಭಿಸಿವೆ.

ಹುಡುಗರು ಚಿತ್ರದಲ್ಲಿ ಪುನೀತ್ ರಾಜ್‌ಕುಮಾರ್, ಯೋಗೇಶ್ , ಶ್ರೀನಗರ ಕಿಟ್ಟಿ ನಾಯಕರಾಗಿ ಮತ್ತು ರಾಧಿಕಾ ಪಂಡಿತ್, ಅಭಿನಯ, ವನಿತಾ ವಸು ನಾಯಕಿಯರಾಗಿ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಒಂದೇ ಮನಸ್ಥಿತಿಯುಳ್ಳ ಮೂವರು ಹುಡುಗರ ಕಥೆ ಹೊಂದಿದ್ದ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಅಷ್ಟೇ ಅಲ್ಲದೇ ಚಿತ್ರಮಂದಿರಗಳಲ್ಲಿ 15 ವಾರಗಳ ಕಾಲ ಓಡಿತ್ತು.

ಕಿಟ್ಟಿ ಅಭಿನಯದ ಇಪ್ಪತ್ತೈದನೇ ಚಿತ್ರ ಬಹುಪರಾಕ್.  2014ರಲ್ಲಿ ತೆರೆಕಂಡ ಈ ಚಿತ್ರದಲ್ಲಿ ಕಿಟ್ಟಿ ಮೂರು ವಿಭಿನ್ನ ಪಾತ್ರಗಳಲ್ಲಿ ಹಾಗೂ ಮೇಘನಾ ರಾಜ್ ಎರಡು ಪಾತ್ರಗಳಲ್ಲಿ ಮಿಂಚಿದ್ದರು. ಮಾನಸ್, ಮೌನಿ ಹಾಗೂ ಮಣಿ ಎಂಬ ಮೂರು ಶೇಡ್ಗಳಲ್ಲಿ ಕಿಟ್ಟಿ ಕಾಣಿಸಿಕೊಂಡಿದ್ದು, ಸ್ನೇಹ ಮತ್ತು ಪ್ರೀತಿ ಎಂಬ ದ್ವಿಪಾತ್ರದಲ್ಲಿ ಮೇಘನಾ ಕಾಣಿಸಿಕೊಂಡಿದ್ದರು. ಸಿಂಪಲ್ ಸುನಿ ನಿರ್ದೇಶನದ ಈ ಸಿನಿಮಾ ಹೊಸತನ ಹಾಗೂ ಭಿನ್ನ ಪ್ರಯೋಗವಾಗಿತ್ತು. 

ಸತತ ಸೋಲಿನ ಬಳಿಕ ಶ್ರೀನಗರ ಕಿಟ್ಟಿ 2023ರಲ್ಲಿ  ಗೌಳಿ ಸಿನಿಮಾ ಮೂಲಕ ಚಂದನವನಕ್ಕೆ ಮರಳಿದ್ದರು.  ಸೂರ ನಿರ್ದೇಶನದ 'ಗೌಳಿ' ಸಿನಿಮಾದಲ್ಲಿ ಕಿಟ್ಟಿ  ಸಖತ್ ರಗಡ್ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದರು. ಸಿನಿಮಾಗಾಗಿ ಉದ್ದನೆಯ ಗಡ್ಡ ಹಾಗೂ ಕೂದಲು ಬಿಟ್ಟಿದ್ದರು. ಗೌಳಿಯಲ್ಲಿ ಹಿಂದೆಂದೂ ಕಾಣಿಸಿಕೊಳ್ಳದ ಪಾತ್ರದಲ್ಲಿ  ಕಾಣಿಸಿಕೊಂಡಿದ್ದರು. ಸಿನಿಮಾ ಸ್ವಲ್ಪಮಟ್ಟಿಗೆ ಪ್ರೇಕ್ಷಕರ ಮೆಚ್ಚುಗೆ ಪಡೆದಿತ್ತು.