Happy Birthday: ಲವ್ಲಿ ಸ್ಟಾರ್ ಪ್ರೇಮ್ ನಟನೆಯ ಹಿಟ್ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ನಟ ಪ್ರೇಮ್ 2004ರಲ್ಲಿ ತೆರೆಕಂಡ `ಪ್ರಾಣ' ಚಿತ್ರದ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟರು. ಆದರೆ, ಈ ಚಿತ್ರ ಬಾಕ್ಸಾಫೀಸ್‌ನಲ್ಲಿ ಯಶಸ್ವಿಯಾಗಲಿಲ್ಲ. ನಂತರ 2005ರಲ್ಲಿ ನೆನಪಿರಲಿ ಸಿನಿಮಾದಲ್ಲಿ ನಟಿಸಿದರು. ಈ ಚಿತ್ರದಲ್ಲಿ ಪ್ರೇಮ್‌ಗೆ ಜೋಡಿಯಾಗಿ ವರ್ಷ ಅಭಿನಯಿಸಿದ್ದರು. ಪ್ರೇಮಕಥೆಯುಳ್ಳ ಈ ಸಿನಿಮಾ ಪ್ರೇಮ್ ಅವರ ಸಿನಿ ಕರಿಯರ್‌ಗೆ ಬಿಗ್ ಬ್ರೇಕ್ ಕೊಟ್ಟಿತ್ತು. ಈ ಸಿನಿಮಾ ಸೂಪರ್ ಹಿಟ್ ಆಗಿದ್ದು, ಪ್ರೇಮ್ ಈ ಚಿತ್ರಕ್ಕಾಗಿ ಫಿಲ್ಮ್ ಫೇರ್ ಪ್ರಶಸ್ತಿ ಕೂಡ ಪಡೆದಿದ್ದರು. 

ನಂತರ 2006ರಲ್ಲಿ ಜೊತೆ ಜೊತೆಯಲಿ ಸಿನಿಮಾದಲ್ಲಿ ನಟಿಸಿದರು. ಚಿತ್ರದಲ್ಲಿ ಪ್ರೇಮ್‌ಗೆ ಜೋಡಿಯಾಗಿ ಮೋಹಕತಾರೆ ಕಾಣಿಸಿಕೊಂಡಿದ್ದರು. ದಿನಕರ್ ತೂಗದೀಪ್ ನಿರ್ದೇಶನದ ಈ ಸಿನಿಮಾ ಚಿತ್ರಮಂದರಗಳಲ್ಲಿ 25 ವಾರಗಳಿಗೂ ಹೆಚ್ಚು ಪ್ರದರ್ಶನ ಕಂಡು ದಾಖಲೆ ಬರೆಯಿತು. ಈ ಸಿನಿಮಾದಲ್ಲಿ ರಮ್ಯಾ ಮತ್ತು ಪ್ರೇಮ್ ವಿವಾಹಿತರ ಪಾತ್ರ ನಿರ್ವಹಿಸಿದ್ದರು. ದಾಂಪತ್ಯ ಜೀವನದ ಮೇಲೆ ಬೆಳಕು ಚೆಲ್ಲಿದ ಈ ಚಿತ್ರ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದಿತ್ತು.  

ಬಳಿಕ ಕೆ ನರೇಂದ್ರ ಬಾಬು ನಿರ್ದೇಶನದ ಪಲ್ಲಕ್ಕಿ ಸಿನಿಮಾದಲ್ಲಿ ನಟಿಸಿದರು. ಈ ಚಿತ್ರದಲ್ಲಿ ಪ್ರೇಮ್‌ಗೆ ಜೋಡಿಯಾಗಿ ರಮಣಿತು ಚೌಧರಿ ನಟಿಸಿದ್ದರು. ಪ್ರೇಮಕಥೆಯುಳ್ಳ ಈ ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಸದ್ದು ಮಾಡಿತ್ತು. ಚಿತ್ರದಲ್ಲಿ ಯುವಕ (ಪ್ರೇಮ್) ಪ್ರೀತಿಯೇ ಎಲ್ಲಾ ಎಂದುಕೊಂಡಿರುತ್ತಾನೆ.  ಹೀಗಾಗಿ ತನ್ನ ಕುಟುಂಬಕ್ಕಿಂತ ಹೆಚ್ಚಾಗಿ ಒಂದು ಯುವತಿಯನ್ನು ಪ್ರೀತಿಸುತ್ತಾನೆ. ಬಳಿಕ ಆಕೆ ಆತನನ್ನು ನಿರಾಕರಿಸಿ ಹೋದಾಗ ಜೀವನದ ವಾಸ್ತವತೆಯನ್ನು ಅರಿತುಕೊಳ್ಳುತ್ತಾನೆ. 

ಜೊತೆಗಾರ ಸಿನಿಮಾದಲ್ಲೂ ಕೂಡ ನಟಿ ರಮ್ಯಾ ಹಾಗೂ ಪ್ರೇಮ್ ಜೊತೆಯಾಗಿ ನಟಿಸಿದ್ದರು. ಪ್ರೀತಿಯ ಮಹಾಪೂರ, ಕಣ್ಣಲ್ಲಿ ನೀರು ತರಿಸುವ ಸೆಂಟಿಮೆಂಟ್, ಮಧುರವಾದ ಹಾಡುಗಳು ಈ ಸಿನಿಮಾದ ಪ್ರಮುಖ ಅಂಶಗಳಾಗಿದ್ದವು. ಈ ಸಿನಿಮಾವನ್ನು ಸಿಗಮಣಿ ನಿರ್ದೇಶನ ಮಾಡಿದ್ದರು. 2010ರಲ್ಲಿ ಬಿಡುಗಡೆಯಾದ ಈ ಸಿನಿಮಾ ಅಶ್ವಿನಿ ರಾಮ್ ಪ್ರಸಾದ್ ನಿರ್ಮಾಣ ಮಾಡಿದ್ದರು. ಇದೊಂದು ಕೌಟುಂಬಿಕ ಸಿನಿಮಾವಾಗಿದೆ.  

2013ರಲ್ಲಿ ಬಿಡುಗಡೆಯಾದ ಚಾರ್‌ ಮಿನಾರ್ ಸಿನಿಮಾದಲ್ಲಿ ಪ್ರೇಮ್ ನಾಯಕರಾಗಿ ಮತ್ತು ಮೇಘನಾ ಗಾಂವ್ಕರ್ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು.  ನಿರ್ದೇಶಕ ಆರ್ ಚಂದ್ರು ಈ ಸಿನಿಮಾದಲ್ಲಿ ಹಳ್ಳಿಗಾಡಿನ ಚಿತ್ರವನ್ನು ಚೊಕ್ಕಟವಾಗಿ ಕಟ್ಟಿಕೊಟ್ಟಿದ್ದರು. ಇದರ ಜೊತೆಗೆ ಭಾವನಾತ್ಮಕ ಅಂಶಗಳು, ಮನಸ್ಸಿಗೆ ಆಪ್ತವೆನಿಸುವ ಸಂಭಾಷಣೆ, ಕಣ್ಮನ ತಣಿಸುವ ಹಾಡುಗಳು ಚಿತ್ರದ ಸೊಗಸನ್ನು ಮತ್ತಷ್ಟು ಹೆಚ್ಚಿಸಿದ್ದವು. ಈ ಸಿನಿಮಾ ಸೂಪರ್ ಹಿಟ್ ಆಗಿದ್ದು, ಪ್ರೇಮ್ ಅವರಿಗೆ ಫಿಲ್ಮ್ ಫೇರ್ ಬೆಸ್ಟ್ ಆಕ್ಟರ್ ಅವಾರ್ಡ್ ಲಭಿಸಿತ್ತು. 

ತರುಣ್ ಸುದೀರ್ ನಿರ್ದೇಶನದ ಚೌಕ ಸಿನಿಮಾದಲ್ಲಿ ಪ್ರೇಮ್, ವಿಜಯ್ ರಾಘವೇಂದ್ರ, ಪ್ರಜ್ವಲ್ ದೇವರಾಜ್, ದಿಗಂತ್, ಭಾವನಾ ಮೆನನ್, ಐಂದ್ರಿತಾ, ಪ್ರಿಯಾಮಣಿ, ದೀಪಾ ಸನ್ನಿದಿ ಮುಖ್ಯಪಾತ್ರದಲ್ಲಿ ಅಭಿನಯಿಸಿದ್ದರು. ಈ ಸಿನಿಮಾದಲ್ಲಿ ತರುಣ್ ಸುದೀರ್ ಒಬ್ಬ ಮನುಷ್ಯನಲ್ಲಿ ಒಳ್ಳೆಯಗುಣ ಮತ್ತು ಕೆಟ್ಟಗುಣ ಎರಡು ಸಹ ಇರುತ್ತವೆ. ಉತ್ತಮವಾದ ಗುಣಗಳನ್ನು ಮೈಗೂಡಿಕೊಳ್ಳಲು ತಾಳ್ಮೆ ಬೇಕು ಎಂಬ ಅಂಶವನ್ನು ತೆರೆಯಮೇಲೆ ಕಟ್ಟಿಕೊಟ್ಟಿದ್ದರು. ಜೊತೆಗೆ ಒಂದೇ ಚಿತ್ರದಲ್ಲಿ ನಾಲ್ಕು ನಟರಿಗೆ ನಾಲ್ಕು ರೀತಿಯ ಕಥೆಗಳನ್ನು ಬರೆದು ಸೈ ಎನಿಸಿಕೊಂಡಿದ್ದರು. ಈ ಸಿನಿಮಾ ಹಿಟ್ ಆಗುವುದರ ಜೊತೆಗೆ ೬೫ನೇ ಫಿಲ್ಮ ಫೇರ್ ಕಾರ್ಯಕ್ರಮದಲ್ಲಿ ಬೆಸ್ಟ್ ಸಿನಿಮಾ ವಿಭಾಗಕ್ಕೆ ನಾಮಿನೇಟ್ ಆಗಿತ್ತು.