ಹ್ಯಾರ್ಪಿ ಬರ್ತಡೇ: ನಟಿ ಭಾಮಾ ಅಭಿನಯದ ಟಾಪ್ 5 ಕನ್ನಡ ಸಿನಿಮಾಗಳಿವು!

ನಟಿ ಭಾಮ ಅಭಿನಯದ ಮೊದಲ ಕನ್ನಡ ಸಿನಿಮಾ ಮೊದಲ ಸಲ. ಪುರುಷೋತ್ತಮ್ ಸೋಮನಾಥಪುರ ನಿರ್ದೇಶನದ ಈ ಚಿತ್ರದಲ್ಲಿ ರಾಕಿಂಗ್ ಸ್ಟಾರ್ ಯಶ್ ನಾಯಕನಾಗಿ ಅಭಿನಯಿಸಿದ್ದರು. ಇದೊಂದು ಲವ್ ಸ್ಟೋರಿ ಸಿನಿಮಾವಾಗಿತ್ತು.  ಚಿತ್ರದಲ್ಲಿ ಕಾರ್ತಿಕ್ (ಯಶ್) ದೀಪಾಳ ಪ್ರೀತಿಯಲ್ಲಿ ಬೀಳುತ್ತಾನೆ. ನಂತರ ಆಕೆಗೆ ಪ್ರಫೋಸ್ ಕೂಡ ಮಾಡುತ್ತಾನೆ. ಆದರೆ, ದೀಪಾ ತನ್ನ ಪೋಷಕರ ಒಪ್ಪಿಗೆ ಕೇಳುತ್ತಾಳೆ. ದೀಪಾ ತಂದೆ-ತಾಯಿ ಕಾರಣಾಂತರಗಳಿಂದ ಇವರ ಪ್ರೀತಿಗೆ ಒಪ್ಪಿಗೆ ಸೂಚಿಸುವುದಿಲ್ಲ. ಹಲವು ಪ್ರಯತ್ನಗಳ ಬಳಿಕ ಅವರು ಒಪ್ಪಿಕೊಳ್ಳುತ್ತಾರೆ. ಚಿತ್ರದಲ್ಲಿ ರಂಗಾಯಣ ರಘು, ತಾರಾ, ಶರಣ್, ಅವಿನಾಶ್, ವಿನಯ್ ಪ್ರಸಾದ್ ಮುಂತಾದವರು ನಟಿಸಿದ್ದರು.  

ಎಸ್‌ ನಾರಾಯಣ್‌ ನಿರ್ದೇಶನದ ಶೈಲೂ ಸಿನಿಮಾದಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್‌ಗೆ ನಾಯಕಿಯಾಗಿ ಭಾಮ ನಟಿಸಿದ್ದರು. ಭಾಮ ಈ ಚಿತ್ರದಲ್ಲಿ ಹಳ್ಳಿ ಹುಡುಗಿಯ ಪಾತ್ರದಲ್ಲಿ ಬಹಳ ಮನೋಜ್ಜವಾಗಿ ನಟಿಸಿದ್ದರು. ಇದೊಂದು ಪ್ರೇಮಕಥೆ. ಸಿನಿಮಾದಲ್ಲಿ ಶೈಲೂ ಮತ್ತು ಆಕೆಯ ತಾಯಿಯನ್ನು ಮನೆ ಮಾಲೀಕ ಮನೆಯಿಂದ ಹೊರಹಾಕುತ್ತಾನೆ. ಬಳಿಕ ಮಂಜ (ಗಣೇಶ್) ಆಕೆಯನ್ನು ತನ್ನ ಅಜ್ಜಿ ಮನೆಗೆ ಕರೆತಂದು ಓದಿಸುತ್ತಾನೆ. ಬಳಿಕ ಇವರಿಬ್ಬರು ಬಿಟ್ಟಿಲಾರದ ಪ್ರೇಮಿಗಳಾಗುತ್ತಾರೆ. ಆದರೆ, ಇವರಿಬ್ಬರ ಪ್ರೀತಿಗೆ ಶೈಲೂ ತಾಯಿಯೇ ವಿಲನ್ ಆಗುತ್ತಾಳೆ. ಬಳಿಕ ಅನೇಕ ಘಟನೆಗಳು ಜರುಗಿ ಕೊನೆಯಲ್ಲಿ ಶೈಲೂ ಹಾಗೂ ಮಂಜ ದುರಂತ ಅಂತ್ಯ ಕಾಣುತ್ತಾರೆ. 

ಶೇಖರ್ ನಿರ್ದೇಶನದ ಬರ್ಫಿ ಸಿನಿಮಾದಲ್ಲಿ ದಿಗಂತ್ ನಾಯಕನಾಗಿ ಮತ್ತು ಭಾಮ ನಾಯಕಿಯಾಗಿ ಅಭಿನಯಿಸಿದ್ದರು. ಚಿತ್ರ ಹೀರೋ ಸಂತೋಷ್ (ದಿಗಂತ್) ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಾ ಸಿಇಒ ಆಗಬೇಕೆಂದು ಕನಸು ಕಾಣುತ್ತಿರುತ್ತಾನೆ. ಈ ಮಧ್ಯೆ ಬೇಗ ಮದುವೆ ಮಾಡಿಕೊಳ್ಳುವಂತೆ ಆತನ ಫೋಷಕರು ಮತ್ತು ಸ್ನೇಹಿತರು ಒತ್ತಾಯಿಸುತ್ತಿರುತ್ತಾರೆ. ಹೀಗಾಗಿ ಸಂತೋಷ್ ವಧುವಿಗಾಗಿ ಆನ್‌ಲೈನ್ ವೆಬ್‌ಸೈಟ್ ಮೊರೆ ಹೋಗುತ್ತಾನೆ. ಈ ಮೂಲಕ ತನ್ನ ಅಭಿರುಚಿಗೆ ತಕ್ಕಂತಹ ಹುಡುಗಿಯನ್ನು ಹುಡುಕಿಕೊಳ್ಳುತ್ತಾನೆ. ಹುಡುಗಿ ತೀರ್ಥಹಳ್ಳಿಯವಳಾದರೂ ಪಂಜಾಬ್‌ನಲ್ಲಿತ್ತಾಳೆ. ಬಳಿಕ ಸಂತೋಷ್ ಆಕೆಯನ್ನು ಭೇಟಿಯಾಗಲು ಪಂಜಾನ್‌ಗೆ ತೆರಳುತ್ತಾನೆ. ಕೊನೆಯಲ್ಲಿ ಇವರಿಬ್ಬರಿಗೂ ಮದುವೆಯಾಗುತ್ತದೆಯೇ? ಇಲ್ಲವೇ ? ಎಂಬುದೆ ಸಿನಿಮಾ ಕಥೆ. 

ಉದಯ್ ಪ್ರಕಾಶ್ ನಿರ್ದೇಶನದ 'ಆಟೋ ರಾಜ' ಸಿನಿಮಾದಲ್ಲಿ ಎರಡನೇ ಬಾರಿಗೆ ಗಣೇಶ್‌ಗೆ ನಾಯಕಿಯಾಗಿ ಭಾಮ ಅಭಿನಯಿಸಿದ್ದರು. ದೀಪಿಕಾ ಕಾಮಯ್ಯ ಕೂಡ ಈ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು.  ಬೆಂಗಳೂರಿನಲ್ಲಿ ಆಟೋಡ್ರೈವರ್ ಆಗಿ ಕೆಲಸ ಮಾಡುತ್ತಿರುವ ರಾಜ, ಹಳ್ಳಿಯಿಂದ ರಾಜಧಾನಿಗೆ ಬರುವ ರಾಧಾ ಹಾಗೂ ರೇಡಿಯೋ ಜಾಕಿ ನಡುವಿನ ತ್ರಿಕೋನ ಪ್ರೇಮಕಥೆಯಿದು. ಚಿತ್ರದಲ್ಲಿ ಅತ್ಯಂತ ಸಂಪ್ರದಾಯಸ್ತ ಹಳ್ಳಿಯ ಹುಡುಗಿ, ಸಿನಿಮಾ ನಟಿಯಾಗಿ ಮಾಡರ್ನ್ ಗರ್ಲ್ ಆಗುತ್ತಾಳೆ. ಇದಕ್ಕೆಲ್ಲ ಬೆಂಗಳೂರಿನಲ್ಲಿ ಆಟೋಡ್ರೈವರ್ ಆಗಿ ಜನಸೇವೆ ಮಾಡುತ್ತಿರುವ ಆಟೋರಾಜ ಪ್ರತ್ಯಕ್ಷ ಹಾಗೂ ಪರೋಕ್ಷವಾಗಿ ಕಾರಣನಾಗುತ್ತಾನೆ. 

ಅಂಬರ ಸಿನಿಮಾದಲ್ಲಿ ಲೂಸ್ ಮಾದ ಯೋಗೇಶ್ ನಾಯಕನಾಗಿ ಮತ್ತು ಭಾಮ ನಾಯಕಿಯಾಗಿ ಅಬಿನಯಿಸಿದ್ದಾರೆ. ಭೂಮಿಗಿಂತ ದೊಡ್ಡದು ಆಕಾಶ, ಅದಕ್ಕಿಂತಲೂ ದೊಡ್ಡದು ಪ್ರೀತಿ ಎಂಬುದೇ ಚಿತ್ರದ ಸಂದೇಶ. ಇದೊಂದು ಕಾಲೇಜು ಲವ್ ಸ್ಟೋರಿ. ಬಿಎಸ್ಸಿ ವಿದ್ಯಾರ್ಥಿ ಅಜಯ್ (ಯೋಗಿ), ಕಾಮರ್ಸ್ ವಿದ್ಯಾರ್ಥಿನಿ ಅರುಂಧತಿ ಇಬರಿಬ್ಬರು ಪರಸ್ಪರ ಪ್ರೀತಿಸುತ್ತಿರುತ್ತಾರೆ. ಆದರೆ, ಇಬ್ಬರು ಕೂಡ ಬಾಯ್ಬಿಟ್ಟು ಹೇಳಿಕೊಳ್ಳಲ್ಲ. ಬಳಿಕ ಇವರಿಬ್ಬರ ಬಾಳಲ್ಲಿ ವಿಲನ್ ಎಂಟ್ರಿಯಾಗುತ್ತದೆ. ಬಳಿಕ ಒಂದಿಷ್ಟು ಹೊಡೆದಾಟ, ಬಡಿದಾಟವಿರುತ್ತದೆ. ಕೊನೆಯಲ್ಲಿ ಇಬರಿಬ್ಬರು ಏನಾಗುತ್ತಾರೆಂಬುದೇ ಚಿತ್ರದ ಕಥೆ.