Happy Birthday: ಕನ್ನಡ ಚಿತ್ರರಂಗದ ದಿಕ್ಕು ಬದಲಾಯಿಸಿದ ಕಾಶಿನಾಥ್ ಅವರ 11 ಸಿನಿಮಾಗಳಿವು!

1984ರಲ್ಲಿ ತೆರೆಕಂಡ ಕಾಶಿನಾಥ್ ನಿರ್ದೇಶನದ ಮೆಗಾ ಹಿಟ್ ಸಿನಿಮಾ 'ಅನುಭವ'. ಕಾಶಿನಾಥ್ ನಿರ್ದೇಶನ ಮಾಡಿದ್ದ ಚೊಚ್ಚಲ ಸಿನಿಮಾ. ನಟಿ ಉಮಾಶ್ರೀ ಮತ್ತು ಅಭಿನಯ ಈ ಸಿನಿಮಾ ಮೂಲಕ ಕನ್ಡ ಚಿತ್ರರಂಗಕ್ಕೆ ಪರಿಚಯವಾದರು. ವಿ.ಮನೋಹರ್ ಅದ್ಭುತ ಸಂಗೀತ ನೀಡಿದ್ದ ಈ ಚಿತ್ರ ಯಶಸ್ವಿ ೩೭ ವಾರಗಳ ಕಾಲ ಪ್ರದರ್ಶನ ಕಂಡಿತ್ತು. ಹದಿಹರೆಯದ ಯುವಕ ಮತ್ತು ಯುವತಿಯ ಭಾವನೆಗಳು ಹೇಗಿರುತ್ತೆ ಎಂಬುದನ್ನು ಕಾಶಿನಾಥ್ ಈ ಸಿನಿಮಾದಲ್ಲಿ ರೋಮ್ಯಾಂಟಿಕ್ ಆಗಿ ತೋರಿದ್ದರು.

'ಅನಂತನ ಅವತಾರ' 1989ರಲ್ಲಿ ತೆರೆಕಂಡ ಮತ್ತೊಂದು ಸೂಪರ್ ಹಿಟ್ ಸಿನಿಮಾ. ಕಾಶಿನಾಥ್ ಈ ಸಿನಿಮಾವನ್ನು ನಿರ್ದೇಶಿಸಿ, ನಟಿಸಿದ್ದರು. ಹೊಸದಾಗಿ ಮದುವೆಯಾದ ಜೋಡಿಯ ಕಥೆ ಇದಾಗಿತ್ತು. ಈ ಸಿನಿಮಾದ 'ಕಮಾನ್ ಕಮಾನ್ ಕಾಮಣ್ಣ' ಹಾಡಂತೂ ಸೂಪರ್ ಹಿಟ್ ಆಗಿತ್ತು. 

'ಲವ್ ಮಾಡಿ ನೋಡು' 1989ರಲ್ಲಿ ತೆರೆಕಂಡಿದ್ದ ಮತ್ತೊಂದು ಕಾಮಿಡಿ ಸಿನಿಮಾ. ಈ ಚಿತ್ರದಲ್ಲಿ ಕಾಶಿನಾಥ್, ಮಾಸ್ಟರ್ ಮಂಜುನಾಥ್ ಮತ್ತು ಶ್ರೀಲತಾ ಅಭಿನಯಿಸಿದ್ದರು. ಬಾಡಿಗೆ ಮನೆಯಲ್ಲಿರುವ ಯುವಕ ಮತ್ತು ಮನೆ ಮಾಲೀಕನ ಮಗಳ ನಡುವಿನ ಪ್ರೇಮಕಥೆ ಸಿನಿಮಾದ ಕಥೆಯಾಗಿತ್ತು. ಈ ಚಿತ್ರ ಕೂಡ ಹಲವು ವಿಚಾರಗಳಿಂದ ಪ್ರೇಕ್ಷಕರ ಮನಗೆದ್ದಿತ್ತು.  

1989ರಲ್ಲಿ ಬಿಡುಗಡೆಯಾದ 'ಮನ್ಮಥ ರಾಜ' ಸಿನಿಮಾದಲ್ಲಿ ಕಾಶಿನಾಥ್, ಸುಧಾರಾಣಿ ಮತ್ತು ಜಗ್ಗೇಶ್ ಅಭಿನಯಿಸಿದ್ದರು. ಈ ಚಿತ್ರದ ಮೂಲಕ ಒಬ್ಬ ಹೀರೋ, ಹೀಗೆ ದೇಹ ಹೊಂದಿರಬೇಕು, ಇಷ್ಟೇ ಹೈಟ್, ಇಷ್ಟೇ ತೂಕ, ಬಣ್ಣ, ಧ್ವನಿ ಹೊಂದಿರಬೇಕು ಎಂಬ ಕಟ್ಟಳೆಯನ್ನ ಮುರಿದು ಕಾಶಿನಾಥ್ 'ಮನ್ಮಥರಾಜ' ಚಿತ್ರ ಮಾಡಿದ್ದರು. ಇದೊಂದು ಲವ್ ಸ್ಟೋರಿ ಸಿನಿಮಾವಾಗಿದ್ದು, ನಾಯಕಿಯನ್ನು ಮೆಚ್ಚಿಸುವ ಯುವಕನಾಗಿ ಕಾಶಿನಾಥ್ ಕಾಣಿಸಿಕೊಂಡಿದ್ದರು.  

ಕಾಶಿನಾಥ್ ನಾಲ್ಕು ನಾಯಕಿಯರ ನೆಚ್ಚಿನ ನಾಯಕನಾಗಿ ಕಾಣಿಸಿಕೊಂಡಿದ್ದ ಚಿತ್ರ 'ಸುರ ಸುಂದರಾಂಗ'. 1989ರಲ್ಲಿ ಈ ಚಿತ್ರ ಬಿಡುಗಡೆಯಾಗಿತ್ತು. ಸಿನಿಮಾದಲ್ಲಿ ನಾಲ್ಕು ಬೇರೆ ಬೇರೆ ಯುವತಿಯರೊಂದಿಗೆ ಚೆಲ್ಲಾಟವಾಡುವ ಯುವಕನಾಗಿ ಕಾಶಿನಾಥ್ ವಿಭಿನ್ನ ಪಾತ್ರ ಮಾಡಿದ್ದರು. 

ಕಾಶಿನಾಥ್, ದೇವರಾಜ್, ಮಂಜುಳ ಶರ್ಮಾ ಮುಖ್ಯ ಭೂಮಿಕೆಯಲ್ಲಿ ಅಭಿನಯಿಸಿದ್ದ ರೋಮ್ಯಾಂಟಿಕ್ ಚಿತ್ರ 'ಪೋಲಿಕಿಟ್ಟಿ'. ಈ ಚಿತ್ರ 1990ರಲ್ಲಿ ತೆರೆಕಂಡಿತ್ತು. ಸಿನಿಮಾದಲ್ಲಿ ಕಾಶಿನಾಥ್ ರಸಿಕನಾಗಿದ್ದರೂ ಯಾವ ಹುಡುಗಿಯ ಸಹವಾಸ ಇರುವುದಿಲ್ಲ. ಬಳಿಕ ದೇವರಾಜ್ ಪ್ರೋತ್ಸಾಹದಿಂದಾಗಿ ಹುಡುಗಿಯನ್ನು ಹುಡುಕಿ ಲವ್ ಮಾಡುವ ಮೂಲಕ ಪ್ರೇಕ್ಷಕರನ್ನು ರಂಜಿಸಿದ್ದರು.  

1990ರಲ್ಲಿ ತೆರೆಕಂಡ 'ಚಪಲ ಚೆನ್ನಿಗರಾಯ' ಸಿನಿಮಾದಲ್ಲಿ ಕಾಶಿನಾಥ್, ವನಿತಾ ವಾಸು, ಕಲ್ಪನಾ ಮುಖ್ಯ ಪಾತ್ರದಲ್ಲಿ ನಟಿಸಿದ್ದರು. ಚಿತ್ರದಲ್ಲಿ ಅಪ್ಸರೆಯಂತಹ ಹೆಂಡತಿ ಬೇಕು ಎಂದು ಕಾಯುತ್ತಿದ್ದ ನಾಯಕಿನಿಗೆ ನಿರೀಕ್ಷೆಯನ್ನೇ ಮಾಡದಂತಹ ದಡೂತಿ ಹೆಂಡತಿ ಸಿಕ್ಕಾಗ ಹೇಗಾಗುತ್ತದೆ ಎಂಬ ಕಥೆಯನ್ನು ಹಾಸ್ಯದ ಮೂಲಕ ತೆರೆಗೆ ತರಲಾಗಿತ್ತು. 

1991ರಲ್ಲಿ ರಿಲೀಸ್ ಆದ ಸೂಪರ್ ಹಿಟ್ ಸಿನಿಮಾ ಅಜಗಜಾಂತರ. ಈ ಚಿತ್ರದಲ್ಲಿ ಕಾಶಿನಾಥ್, ಬ್ಯಾಂಕ್ ಜನಾರ್ಧನ್, ಅಂಜನಾ, ಸತ್ಯಭಾಮ ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದರು. ಈ ಸಿನಿಮಾದಲ್ಲಿ ಕಾಶಿನಾಥ್ ಶ್ರೀಮಂತ ಅತ್ತೆಗೆ ಮೋಸ ಮಾಡಿ, ಆಕೆಯ ಮಗಳನ್ನು ಮದುವೆಯಾಗುವ ಯುವಕನ ಪಾತ್ರದಲ್ಲಿ ಮಿಂಚಿದ್ದರು. ಈ ಸಿನಿಮಾವನ್ನು ಕಾಸಿನಾಥ್ ಅವರೇ ನಿರ್ದೇಶನ ಮಾಡಿದ್ದರು. 

1993ರಲ್ಲಿ ತೆರೆಕಂಡ 'ಲವ್ ಟ್ರೈನಿಂಗ್' ಸಿನಿಮಾದಲ್ಲಿ ಕಾಶಿನಾಥ್, ತಾರಾ, ಅಭಿನಯ, ಅಂಜಲಿ ನಟಿಸಿದ್ದರು. ಚಿತ್ರದಲ್ಲಿ ಲವ್ ಮಾಡೋದು ಹೇಗೆ? ಲವ್ ಮಾಡೋಕೆ ಏನು ಅರ್ಹತೆ ಇರಬೇಕೆಂಬ ವಿಷಯವನ್ನು ಇಟ್ಟುಕೊಂಟು ಈ ಚಿತ್ರ ಮುಡಿಬಂದಿತ್ತು. 

ಕಾಶಿನಾಥ್ ಅವರ ಹಾಸ್ಯ ಕಲ್ಪನೆಗೆ ಹೊಸತನ ನೀಡಿದ್ದ ಸಿನಿಮಾ ಹಲೋ ಯಮ. 1998ರಲ್ಲಿ ತೆರೆಕಂಡ ಈ ಸಿನಿಮಾದಲ್ಲಿ ಮನುಷ್ಯ ಸತ್ತ ಮೇಲೆ ಯಮನಿಂದ ವರ ಪಡೆದು ಮತ್ತೆ ಭೂಲೋಕಕ್ಕೆ ಬಂದು, ಯಮನಿಗೆ ಹೇಗೆಲ್ಲಾ ಆಟವಾಡಿಸುತ್ತಾನೆ ಎಂಬುದನ್ನು ಹಾಸ್ಯಮಯವಾಗಿ ತೋರಿಸಲಾಗಿತ್ತು. ಯಮನ ಪಾತ್ರದಲ್ಲಿ ದೊಡ್ಡಣ್ಣ ಹಾಗೂ ಚಿತ್ರಗುಪ್ತನ ಪಾತ್ರದಲ್ಲಿ ಸಾಧುಕೋಕಿಲ ಅಭಿನಯಿಸಿದ್ದರು. 

'ಮೀಸೆ ಹೊತ್ತ ಗಂಡಸಿಗೆ ಡಿಮ್ಯಾಂಡಪ್ಪೋ ಡಿಮ್ಯಾಂಡು ಸಿನಿಮಾ ಟೈಟಲ್‌ನಿಂದಲೇ ಸಂವಲನ ಸೃಷ್ಟಿಸಿತ್ತು. 1999ರಲ್ಲಿ ಬಿಡುಗಡೆಯಾದ ಈ ಸಿನಿಮಾದಲ್ಲಿ ವರದಕ್ಷಿಣೆ ಸುತ್ತ ಕಥೆ ಹೆಣೆಯಲಾಗಿತ್ತು.  ಮದುವೆ ಎಂಬುದು ಒಂದು ವ್ಯವಹಾರ ಎಂಬುದನ್ನು ಈ ಸಿನಿಮಾದಲ್ಲಿ ತೋರಿಸಲಾಗಿತ್ತು. ಸತ್ಯಭಾಆ, ಟೆನ್ನಿಸ್ ಕೃಷ್ಣ, ಕಾಶಿನಾಥ್ ಪ್ರಮುಖ ಪಾತ್ರ ನಿರ್ವಹಿಸಿದ್ದರು.