Happy Birthday: ಯೋಗರಾಜ್ ಭಟ್ಟರ ನೀವು ನೋಡಲೇಬೇಕಾದ ಸೂಪರ್ ಹಿಟ್ ಸಿನಿಮಾಗಳಿವು!

2006ರ ಡಿಸೆಂಬರ್ 29ರಂದು ಬಿಡುಗಡೆಯಾದ ಯೋಗರಾಜ್ ಭಟ್ ನಿರ್ದೇಶನದ 'ಮುಂಗಾರು ಮಳೆ' ಸಿನಿಮಾ ಕನ್ನಡ ಚಿತ್ರರಂಗದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿತ್ತು. 'ಮುಂಗಾರು ಮಳೆ' ಸಿನಿಮಾವು  ಒಂದು ವರ್ಷ ಪ್ರದರ್ಶನಗೊಳ್ಳುವ ಮೂಲಕ ದಾಖಲೆ ಬರೆಯಿತು.  ಗಲ್ಲಾಪೆಟ್ಟಿಗೆಯಲ್ಲಿ 75 ಕೋಟಿ ಬಾಚಿಕೊಂಡಿತ್ತು.  ಈ ಸಿನಿಮಾ ಮೂಲಕ ನಟಿ ಪೂಜಾ ಗಾಂಧಿ ಅವರು ಸ್ಯಾಂಡಲ್‌ವುಡ್‌ಗೆ ಪರಿಚಿತರಾದರು. ಅವರ ಮತ್ತು ಗಣೇಶ್‌ ಜೋಡಿಯು ಜನರಿಗೆ ಸಖತ್‌ ಇಷ್ಟವಾಯಿತು. ಇಬ್ಬರ ಕೆಮಿಸ್ಟ್ರಿ ತುಂಬ ಚೆನ್ನಾಗಿ ಮೂಡಿಬಂದಿತ್ತು. 

ಮುಂಗಾರು ಮಳೆ ಸಿನಿಮಾದ ನಂತರ ಯೋಗರಾಜ್ ಭಟ್ 'ಗಾಳಿಪಟ' ಚಿತ್ರ ಮಾಡಿದರು. 'ಗಾಳಿಪಟ' ಕೂಡ ನಿರೀಕ್ಷೆಗೂ ಮೀರಿ ಸೂಪರ್ ಹಿಟ್ ದಾಖಲಿಸಿತ್ತು. ಗಣೇಶ್, ದಿಗಂತ್ ಹಾಗೂ ರಾಜೇಶ್ ಕೃಷ್ಣನ್ ಮೂವರ ಸಂಗಮದಲ್ಲಿ ಬಂದಿದ್ದ 'ಗಾಳಿಪಟ' ಚಿತ್ರವು ಆ ಕಾಲದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿತ್ತು. ಹಾಡುಗಳು ಕೂಡ ಸೂಪರ್ ಹಿಟ್ ಎನಿಸಿದ್ದವು.

ಮನಸಾರೆ ಸಿನಿಮಾ ಕೂಡ ಯೋಗರಾಜ್ ಭಟ್ ಅವರ ಸೂಪರ್ ಹಿಟ್ ಸಿನಿಮಾಗಳಲ್ಲಿ ಒಂದು. ಈ ಚಿತ್ರದಲ್ಲಿ ದಿಗಂತ್, ಐದ್ರಿತಾ ರೇ, ರಾಜು ತಾಳಿಕೋಟೆ, ಪವನ್ ಕುಮಾರ್ ಸೇರಿದಂತೆ ಹಲವಾರು ನಟಿಸಿದ್ದರು. ಮನೋ ಮೂರ್ತಿ ಅವರ ಸಂಗೀತ ಸಂಯೋಜನೆ ಚಿತ್ರದಲ್ಲಿತ್ತು.

ಪಂಚರಂಗಿ ಚಿತ್ರದಲ್ಲಿ ದಿಗಂತ್ ನಾಯಕನಾಗಿ ಮತ್ತು ನಿಧಿ ಸುಬ್ಬಯ್ಯ ನಾಯಕಿಯಾಗಿ ಮುಖ್ಯ ಪಾತ್ರದಲ್ಲಿ ಅಭಿನಯಿಸಿದ್ದರು. ಪ್ರಿಯಾಂಕ ತ್ರಿವೇದಿ, ಅನಂತ್ ನಾಗ್, ರಾಜು ತಾಳಿಕೋಟೆ, ಸುಂದರ್ ರಾಜ್, ಪದ್ಮಜಾ ರಾವ್, ಸುಧಾ ಬೆಳವಾಡಿ, ರಮ್ಯ ಬರ್ನ, ನಾಗಶೇಖರ್, ಸತೀಶ್ ನೀನಾಸಂ ಮೊದಲಾದವರ ತಾರ ಬಳಗವೇ ಚಿತ್ರದಲ್ಲಿತ್ತು. ಯೋಗರಾಜ್ ಭಟ್ ಅವರ ನಿರ್ದೇಶನದ ಈ ಸಿನಿಮಾಗೆ ಮನೋ ಮೂರ್ತಿ ಅವರ ಸಂಗೀತ ಸಂಯೋಜನೆ ಮಾಡಿದ್ದರು.  

ಬ್ಯಾಕ್ ಟು ಬ್ಯಾಕ್ ಹಿಟ್ ನೀಡಿದ್ದ ಪುನೀತ್ ಹಾಗೂ ಯೋಗರಾಜ್ ಭಟ್ ಮೊದಲ ಬಾರಿಗೆ ಕೈಜೋಡಿಸಿದ್ದ ಸಿನಿಮಾ ಪರಮಾತ್ಮ.  ಪರಮಾತ್ಮ ಚಿತ್ರದ ದೊಡ್ಡ ಪ್ಲಸ್ ಪಾಯಿಂಟ್ ಎಂದರೆ ಹಾಡುಗಳು. ಚಿತ್ರದ ಸಂಪೂರ್ಣ ಆಲ್ಬಮ್ ಚಾರ್ಟ್‌ಬಸ್ಟರ್ ಹಿಟ್ ಆಗಿತ್ತು. ಇಂದಿಗೂ ಸಹ ಈ ಹಾಡುಗಳ ಕೇಳುಗರ ಸಂಖ್ಯೆ ಕಡಿಮೆಯೇನಿಲ್ಲ. ಹೀಗೆ ದೊಡ್ಡ ಮಟ್ಟದ ಹಿಟ್ ಆಗಿದ್ದ ಪರಮಾತ್ಮ ಚಿತ್ರದ ಆಡಿಯೊ ಹಕ್ಕು 77 ಲಕ್ಷಕ್ಕೆ ಮಾರಾಟವಾಗಿತ್ತು. ಆಡಿಯೊ ಬಿಡುಗಡೆಯಾದ ಮೊದಲ 3 ದಿನಗಳಲ್ಲಿ ಸುಮಾರು ಒಂದೂವರೆ ಲಕ್ಷಕ್ಕೂ ಹೆಚ್ಚು ಆಡಿಯೊ ಸಿಡಿಗಳು ಮಾರಾಟವಾಗಿದ್ದವು. ಇನ್ನು ಚಿತ್ರದ ಸ್ಯಾಟಲೈಟ್ ಹಕ್ಕು 3ರಿಂದ 4 ಕೋಟಿಗೆ ಮಾರಾಟವಾಗಿತ್ತು ಹಾಗೂ ಅಂದಿಗೆ ಇದು ದಾಖಲೆ ಕೂಡ ಹೌದು.

ಯೋಗರಾಜ್ ಭಟ್ ಅವರ 'ದನ ಕಾಯೋನು' ಸಿನಿಮಾ ಹೊಸ ರೀತಿಯ ಕತೆ. ಪ್ರಾಣಿಗಳೇ ಗುಣದಲ್ಲಿ ಮೇಲು, ಮಾನವರು ಅಂದಕ್ಕಿಂತ ಕೀಳು' ಎಂಬ ಮಾತಿಗೆ ದೃಶ್ಯ ರೂಪಕ ಕೊಟ್ಟು, ಎಲ್ಲರ ಮನ ಮುಟ್ಟುವ ರೀತಿಯಲ್ಲಿ 'ದನ ಕಾಯೋನು' ಚಿತ್ರವನ್ನ ತೆರೆಗೆ ತರಲಾಗಿತ್ತು. ಈ ಸಿನಿಮಾದಲ್ಲಿ ದುನಿಯಾ ವಿಜಯ್ ನಾಯಕನಾಗಿ ಹಾಗೂ ಪ್ರಿಯಾಮಣಿ ನಾಯಕಿಯಾಗಿ ಅಭಿನಯಿಸಿದ್ದರು. 

ವಾಸ್ತು ಪ್ರಕಾರ ಚಿತ್ರದಲ್ಲಿ ನವರಸ ನಾಯಕ ಜಗ್ಗೇಶ್, ರಕ್ಷಿತ್ ಶೆಟ್ಟಿ ಅವರು ನಾಯಕರಾಗಿ ಮತ್ತು ಐಶಿನಿ ಶೆಟ್ಟಿ, ಪಾರುಲ್ ಯಾದವ್ ಅವರು ನಾಯಕಿಯರಾಗಿ ಮುಖ್ಯಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಜೊತೆಗೆ  ಅನಂತ್ ನಾಗ್-ಸುಧಾರಾಣಿ ಕಿತ್ತಾಟವೂ ಈ ಸಿನಿಮಾದಲ್ಲಿತ್ತು. ಈ ಸಿನಿಮಾ ಕೂಡ ಯೋಗರಾಜ್ ಭಟ್ ಅವರ ಹಿಟ್ ಸಿನಿಮಾಗಳಲ್ಲಿ ಒಂದು. 

ಡ್ರಾಮಾ ಚಿತ್ರದಲ್ಲಿ ಯಶ್ ಅವರು ನಾಯಕನಾಗಿ ಮತ್ತು ರಾಧಿಕಾ ಪಂಡಿತ್ ನಾಯಕಿಯಾಗಿ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಸತೀಶ್ ನೀನಾಸಂ, ಅಂಬರೀಶ್, ಅತುಲ್ ಕುಲಕರ್ಣಿ, ಸಿಂಧು ಲೋಕನಾಥ್, ಉಮೇಶ್, ರಾಕ್ ಲೈನ್ ವೆಂಕಟೇಶ್, ಸಂಪತ್ ರಾಜ್, ಹೊಣ ವಳ್ಳಿ ಕೃಷ್ಣ, ಅಚ್ಯುತ್ ಕುಮಾರ್ ಸುಚೇಂದ್ರ ಪ್ರಸಾದ್, ಮಾಳವಿಕಾ ಅವಿನಾಶ್, ಮೊದಲಾದವರ ತಾರ ಬಳಗವೇ ಚಿತ್ರದಲ್ಲಿರುವುದು ಒಂದು ಅಚ್ಚರಿ. ಯೋಗರಾಜ್ ಭಟ್ ಅವರ ನಿರ್ದೇಶನದ ಹಾಡುಗಳು ಸಖತ್ ಫೇಮಸ್ ಆಗಿದ್ದವು. ಭಟ್ಟರ ಹಿಟ್ ಸಿನಿಮಾಗಳಲ್ಲಿ ಡ್ರಾಮಾ ಕೂಡ ಒಂದು.  

ಗೋಲ್ಡನ್ ಸ್ಟಾರ್ ಗಣೇಶ್ ಹಾಗೂ ನಿರ್ದೇಶಕ ಯೋಗರಾಜ್ ಭಟ್ ಕಾಂಬಿನೇಷನ್ ನ ಹ್ಯಾಟ್ರಿಕ್ ಸಿನಿಮಾ ಮುಗುಳುನಗೆ. ಈ ಸಿನಿಮಾ ಕೂಡ ಸೂಪರ್ ಹಿಟ್ ಆಗಿತ್ತು. ಸೋನು ನಿಗಮ್ ಹಾಡಿರುವ 'ಮುಗುಳುನಗೆ' ಟ್ರೈಟಲ್ ಟ್ರ್ಯಾಕ್ ಎಲ್ಲರಿಗೂ ಇಷ್ಟವಾಗಿತ್ತು. 
 

ಗಾಳಿಪಟ 2 ಚಿತ್ರದಲ್ಲಿ ಗೋಲ್ಡನ್‌ ಸ್ಟಾರ್ ಗಣೇಶ್, ದೂದ್ ಪೇಡ ದಿಗಂತ್ ಹಾಗೂ ನಿರ್ದೇಶಕ ಪವನ್ ಕುಮಾರ್ ನಾಯಕರಾಗಿ ಕಾಣಿಸಿಕೊಂಡಿದ್ದರು.  ಗಾಳಿಪಟ 2 ಸಿನಿಮಾದಲ್ಲಿ ಗಾಳಿಪಟ ಚಿತ್ರದಲ್ಲಿ ನಟಿಸಿದ್ದ ರಾಜೇಶ್ ಕೃಷ್ಣನ್ ಬದಲು 'ಲೂಸಿಯ' ನಿರ್ದೇಶಕ ಪವನ್ ಕುಮಾರ್ ಅಭಿನಯಿಸಿದ್ದರು.  ಚಿತ್ರದ ನಾಯಕಿಯರಾಗಿ ವೈಭವಿ ಶಾಂಡಿಲ್ಯ, ಸಂಯುಕ್ತ ಮೆನನ್, ಶರ್ಮಿಳಾ ಮಾಂಡ್ರೆ ಕಾಣಿಸಿಕೊಂಡಿದ್ದರು. ಈ ಸಿನಿಮಾ ಕೂಡ ಸೂಪರ್ ಹಿಟ್ ಆಗಿ ಭರ್ಜರಿ ಪ್ರದರ್ಶನ ಕಂಡಿತ್ತು.