ವೀಕ್ಷಕರ ಮನಗೆದ್ದ 'ಭಾಗ್ಯ ಲಕ್ಷ್ಮಿ' ಧಾರಾವಾಹಿ: ಸೀರಿಯಲ್ ಹಿಟ್ ಆಗಲು ಇಲ್ಲಿವೆ ಪ್ರಮುಖ ಕಾರಣಗಳು

'ಭಾಗ್ಯ ಲಕ್ಷ್ಮ ' ಅಕ್ಕ-ತಂಗಿಯ ಬಾಂಧವ್ಯದ ಆಧಾರಿತ ಕಥೆಯಾಗಿದೆ. ತಂಗಿಯ ಸಂತೋಷಕ್ಕಾಗಿ ಏನನ್ನಾದರೂ ಮಾಡಲು ಸಿದ್ಧಳಿರುವ ಅಕ್ಕ ಹಾಗೂ ಅಕ್ಕಮ್ಮ ಹಾಕಿದ ಗೆರೆ ದಾಟುವುದಿಲ್ಲ ಎನ್ನುವ ತಂಗಿ. ಇವರಿಬ್ಬರ ಸುಂದರ ಬಾಂಧವ್ಯ ಪ್ರೇಕ್ಷಕರಿಗೆ ತುಂಬಾ ಇಷ್ಟವಾಗಿದೆ. ಕಲರ್ಸ್ ಕನ್ನಡದಲ್ಲಿ ಈ ಹಿಂದೆ 'ಅಕ್ಕ' ಎಂಬ ಸೀರಿಯಲ್ ಪ್ರಸಾರವಾಗಿತ್ತು. ಆದರೆ, ಆ ಧಾರಾವಾಹಿಯಲ್ಲಿ ಸೀರಿಯಲ್ ಪ್ರಿಯರು ಅಕ್ಕ-ತಂಗಿಯರ ಪರಸ್ಪರ ಕಿತ್ತಾಟ ನೋಡಿದ್ದರು. ಆದರೆ, ಈ ಸೀರಿಯಲ್ ನಲ್ಲಿ ಅಕ್ಕ ತಂಗಿಯ ಬಾಂಧವ್ಯ ನೋಡಿ ಮೆಚ್ಚಿಕೊಂಡಿದ್ದಾರೆ.  

'ಭಾಗ್ಯ ಲಕ್ಷ್ಮಿ' ಧಾರಾವಾಹಿಯಲ್ಲಿ ನಿರೂಪಕಿ ಸುಷ್ಮಾ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಹತ್ತು ವರ್ಷಗಳ ಬಳಿಕ ಕಿರುತೆರೆಗೆ ಬಂದಿರುವ ಅವರು ಈ ಧಾರಾವಾಹಿಯಲ್ಲಿ ಭಾಗ್ಯ ಎಂಬ ಪಾತ್ರ ನಿರ್ವಹಿಸುತ್ತಿದ್ದಾರೆ. ಇನ್ನು ಕನ್ನಡ ಚಿತ್ರರಂಗದ ಹಿರಿಯ ನಟಿ ಪದ್ಮಜಾ ರಾವ್ ಭಾಗ್ಯಾಳ ಅತ್ತೆಯ ಪಾತ್ರ ನಿರ್ವಹಿಸಿದ್ದಾರೆ.  ಲಕ್ಷ್ಮಿಯಾಗಿ ಭೂಮಿಕಾ ರಮೇಶ್, ತಾಂಡವ್ ಆಗಿ ಸುದರ್ಶನ್ ರಂಗಪ್ರಸಾದ್, ವೈಷ್ಣವ್ ಆಗಿ ಶಮಂತ್ ಬ್ರೋ ಗೌಡ, ಕಾವೇರಿಯಾಗಿ ಸುಷ್ಮಾ ನಾಣಯ್ಯ  ಅಭಿನಯಿಸಿದ್ದಾರೆ. ಬಿಗ್ ಬಾಸ್ ಖ್ಯಾತಿಯ ಶಮಂತ್ ಬ್ರೋ ಗೌಡ ಇದೆ ಮೊದಲ ಬಾರಿಗೆ ಕಿರುತೆರೆ ಎಂಟ್ರಿಕೊಟ್ಟಿದ್ದಾರೆ.  

'ಭಾಗ್ಯ ಲಕ್ಷ್ಮಿ' ಧಾರಾವಾಹಿ ಈಗಾಗಲೇ 100 ಸಂಚಿಕೆಗಳನ್ನು ಪೂರೈಸಿದೆ. ಹಲವು ಸೂಪರ್ ಹಿಟ್ ಸೀರಿಯಲ್ ಗಳನ್ನೂ ನೀಡಿರುವ ಜೈಮಾತಾ ಕಂಬೈನ್ಸ್ ಈ ಧಾರಾವಾಹಿಯನ್ನು ನಿರ್ಮಾಣ ಮಾಡುತ್ತಿದೆ.  ಕನ್ನಡತಿ ಸೀರಿಯಲ್ ಖ್ಯಾತಿಯ ಯಶವಂತ್ ಪಾಂಡು ಇದನ್ನು ನಿರ್ದೇಶನ ಮಾಡುತ್ತಿದ್ದಾರೆ.  

'ಭಾಗ್ಯ ಲಕ್ಷ್ಮಿ' ಸದ್ಯ ರೋಚಕ ಹಂತ ತಲುಪಿದೆ. ವೈಷ್ಣವ್ ಮತ್ತು ಲಕ್ಷ್ಮಿ ಮದುವೆ ಎಲ್ಲಾ ಸಿದ್ಧತೆಗಳು ನಡೆದಿವೆ. ಆದರೆ, ವೈಷ್ಣವ್ ಗೆ ಈ ಮದುವೆ ಇಷ್ಟವಿಲ್ಲ. ಹೇಗಾದರೂ ಈ ಮದುವೆಯನ್ನು ನಿಲ್ಲಿಸಿ, ಕೀರ್ತಿಯನ್ನು ಮದುವೆಯಾಗಬೇಕು ಎಂಬುದು ಆತನ ಆಸೆ. ಆದರೆ, ಸತ್ಯ ಹೇಳಲು ಸಂದರ್ಭಗಳು ಅವನನ್ನು ಕಟ್ಟಿಹಾಕುತ್ತಿವೆ. ಇತ್ತ ಕಾವೇರಿಗೆ ಲಕ್ಷ್ಮಿಯೇ ತನ್ನ ಸೊಸೆಯಾಗಕೆಂಬ ಹಠ. ಆದರೆ, ಭಾಗ್ಯ ಹಾಗೂ ಲಕ್ಷ್ಮಿ ಇಬ್ಬರಿಗೂ ಈ ಬಗ್ಗೆ ಅರಿವೇ ಇಲ್ಲ. ಸದ್ಯ ಎಲ್ಲರೂ ಮದುವೆ ಮಂಟಪಕ್ಕೆ ಬಂದಿದ್ದು, ಮುಂದೆ ಏನಾಗಲಿದೆ ಎಂಬುದನ್ನು ಕಾದು ನೋಡಬೇಕಿದೆ. 

ಭಾಗ್ಯ ಲಕ್ಷ್ಮಿ  ಶುರುವಾಗಿ ಕೆಲವೇ ತಿಂಗಳುಗಳು ಕಳೆದಿದ್ದರೂ ಕೂಡ ಸಾಕಷ್ಟು ಜನಪ್ರಿಯತೆ ಗಳಿಸಿದೆ. ಈ ಧಾರಾವಾಹಿ ಕನ್ನಡಿಗರ ಮನಗೆಲ್ಲುವಲ್ಲಿ ಯಶಸ್ವಿಯಾದ ಕಾರಣ ಹಿಂದಿಗೆ ಡಬ್ ಮಾಡಲಾಗುತ್ತಿದೆ. ಸದ್ಯದಲ್ಲೇ ಹಿಂದಿಯ ವಾಹಿನಿವೊಂದರಲ್ಲಿ ಭಾಗ್ಯದ ಲಕ್ಷ್ಮಿ ಬಾರಮ್ಮ ಧಾರಾವಾಹಿಯ ಡಬ್ ವರ್ಷನ್ ಪ್ರಸಾರವಾಗಲಿದೆ.