ಈ ವಾರ ರಿಲೀಸ್ ಆಗಲಿರುವ ಎರಡು ಕನ್ನಡ ಸಿನಿಮಾಗಳಿವು: ಕಥೆ, ಪಾತ್ರದ ಜೊತೆ ಇತರೆ ಮಾಹಿತಿ ಇಲ್ಲಿದೆ.

ಸಂತೋಷ್ ಆನಂದ್ ರಾಮ್ ನಿರ್ದೇಶನದ 'ರಾಘವೇಂದ್ರ ಸ್ಟೋರ್ಸ್' ಸಿನಿಮಾದಲ್ಲಿ ನವರಸನಾಯಕ ಜಗ್ಗೇಶ್ ನಾಯಕನಾಗಿ ಅಭಿನಯಿಸಿದ್ದಾರೆ. ಶ್ವೇತಾ ಶ್ರೀವಾಸ್ತವ್ ನಾಯಕಿಯ ಪಾತ್ರಕ್ಕೆ ಬಣ್ಣ ಹಚ್ಚಿದ್ದಾರೆ. ಉಳಿದಂತೆ ರವಿಶಂಕರ್ ಗೌಡ, ದತ್ತಣ್ಣ, ಮಿತ್ರ, ಅಚ್ಯುತ್ ಕುಮಾರ್, ಚಿತ್ಕಲಾ ಬಿರಾದರ್ ಫೋಷಕ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ಚಿತ್ರವನ್ನು ವಿಜಯ್ ಕಿರಗಂದೂರು ಹೊಂಬಾಳೆ ಪ್ರೊಡಕ್ಷನ್ಸ್ ಬ್ಯಾನರ್ ಅಡಿಯಲ್ಲಿ ನಿರ್ಮಿಸುತ್ತಿದ್ದಾರೆ. ಇದು ಹೊಂಬಾಳೆ ಪ್ರೊಡಕ್ಷನ್ಸ್‌ನ 12ನೇ ಸಿನಿಮಾವಾಗಿದ್ದು, ಚಿತ್ರದಲ್ಲಿ ಬ್ಯಾಚುಲರ್ಸ್‌ಗಳ ಗೋಳನ್ನು ಹಾಸ್ಯದ ರೂಪದಲ್ಲಿ ಪ್ರಸ್ತುಪಡಿಸಲಾಗಿದೆ.

'ರಾಘವೇಂದ್ರ ಸ್ಟೋರ್ಸ್‌ನಲ್ಲಿ ಬ್ಯಾಚುಲರ್ಸ್‌ಗಳ ಸಂಕಷ್ಟವನ್ನು ಹಾಸ್ಯದ ರೂಪದಲ್ಲಿ ತೋರಿಸಲಾಗಿದೆ. ನವರಸ ನಾಯಕ ಜಗ್ಗೇಶ್ ಈ ಚಿತ್ರದಲ್ಲಿ ಹಯವದನ ಎಂಬ ಪಾತ್ರವನ್ನು ನಿರ್ವಹಿಸಿದ್ದಾರೆ. ಜಗ್ಗೇಶ್ ಅವರದ್ದು ಅಡುಗೆ ಭಟ್ಟನ ಕೆಲಸ. ಹೀಗೆ ಕ್ಯಾಟರಿಂಗ್ ಕೆಲಸ ಮಾಡುವ ಹಯವದನನಿಗೆ 40 ವರ್ಷ ದಾಟಿಯೂ ಮದುವೆಯಾಗಿಲ್ಲ ಎಂಬ ನೋವು. ಹೀಗಾಗಿ ಮದುವೆಯಾಗಲು ಹುಡುಗಿ ಹುಡುಕಿ ಸುಸ್ತಾದ ಹಯವದನ ಬಳಿಕ ಹುಡುಗಿಯಾದರೂ ಸರಿ, ಆಂಟಿಯಾದರೂ ಸರಿ ಎಂಬ ನಿಲುವಿಗೆ ಬಂದುಬಿಡುತ್ತಾನೆ. ಹೀಗೆ ಸಿನಿಮಾದುದ್ದಕ್ಕೂ ಬ್ಯಾಚುಲರ್ಸ್‌ಗಳ ಗೋಳನ್ನು ಹಾಸ್ಯದ ಮೂಲಕ ಪ್ರಸ್ತುತಪಡಿಸಲಾಗಿದೆ.  

ಈ ಚಿತ್ರದಲ್ಲಿ ನಟಿ ಶ್ವೇತಾ ಶ್ರೀವಾಸ್ತವ್ ಮದುವೆಯಾಗಿ ಮಗು ಇರುವ ಆಂಟಿಯ ಪಾತ್ರಕ್ಕೆ ಬಣ್ಣ ಹಚ್ಚಿದ್ದಾರೆ. ಈ ಪಾತ್ರದಲ್ಲಿ ಅವರು ವಿಶೇಷವಾಗಿ ಜೀವ ತುಂಬಿದ್ದಾರೆ. ಜೊತೆಗೆ ದತ್ತಣ್ಣ ಹಯವದನ (ಜಗ್ಗೇಶ್) ತಂದೆಯ ಪಾತ್ರದಲ್ಲಿ ಕಾಣಿಸಿಕೊಡಿದ್ದಾರೆ. ಸಿನಿಮಾದಲ್ಲಿ ಹಾಸ್ಯದ ಜೊತೆಗೆ ಸಾಕಷ್ಟು ಭಾವನಾತ್ಮಕ ಅಂಶಗಳು ಇವೆ. ಚಿತ್ರದ ಸಿಂಗಲ್ ಸುಂದರ ಹಾಡಿಗೆ ಪ್ರೇಕ್ಷಕರಿಂದ ಸಾಕಷ್ಟು ಮೆಚ್ಚುಗೆ ವ್ಯಕ್ತವಾಗಿದ್ದು, ಏಪ್ರಿಲ್ 28ರಂದು ಸಿನಿಮಾ ಕಣ್ತುಂಬಿಕೊಳ್ಳಬಹುದು. 

ಇನ್ನೂ ಈ ವಾರ ಬಿಡುಗಡೆಯಾಗುತ್ತಿರುವ ಮತ್ತೊಂದು ಸಿನಿಮಾ ರಾಘು. ಎಂ ಆನಂದ್ ರಾಜ್ ನಿರ್ದೇಶನದಲ್ಲಿ ಮೂಡಿರುತ್ತಿರುವ, ವಿಜಯ್ ರಾಘವೇಂದ್ರ ನಾಯಕನಾಗಿ ನಟಿಸಿರುವ ಏಕವ್ಯಕ್ತಿ ಸಿನಿಮಾ 'ರಾಘು'. ಈ ಸಿನಿಮಾದಲ್ಲಿ ಆರಂಭದಿಂದ ಅಂತ್ಯದವರೆಗೂ ಕಾಣಿಸುವುದು ವಿಜಯ್ ರಾಘವೇಂದ್ರ ಮಾತ್ರ.  'ರಾಘು' ಸಿನಿಮಾ ಮೂಲಕ ಚಿನ್ನಾರಿ ಮುತ್ತ ವಿಜಯ್ ರಾಘವೇಂದ್ರ ತಮ್ಮ ಹೊಸದೊಂದು ಪ್ರಯೋಗಕ್ಕೆ ಕೈ ಹಾಕಿದ್ದಾರೆ. ಡಿಕೆಎಸ್ ಸ್ಟುಡಿಯೋ, ಕೋಟಾ ಫಿಲಂ ಪ್ಯಾಕ್ಟರಿ ಪ್ರೊಡಕ್ಷನ್ ಅಡಿ ಈ ಚಿತ್ರವನ್ನು ರನ್ವಿತ್ ಶಿವಕುಮಾರ್ ಹಾಗೂ ಅಭಿಷೇಕ್ ಕೋಟಾ ನಿರ್ಮಾಣ ಮಾಡಿದ್ದಾರೆ. ಸಿನಿಮಾಗೆ ಉದಯ್ ಲೀಲಾ ಛಾಯಾಗ್ರಹಣವಿದ್ದು, ಸೂರಜ್ ಜೋಯಿಸ್ ಸಂಗೀತ ನಿರ್ದೇಶನವಿದೆ. 

ರಾಘು ಸಿನಿಮಾದಲ್ಲಿ ವಿಜಯ್ ರಾಘವೇಂದ್ರ ಒಬ್ಬರೇ ಇದ್ದಾರೆ. ಟ್ರೈಲರ್ ನೋಡಿದಾಗ ಚಿತ್ರದಲ್ಲಿ ವಿಜಯ್ ರಾಘವೇಂದ್ರ ಕಿಲ್ಲರ್ ಪಾತ್ರವನ್ನು ನಿರ್ವಹಿಸಿದ್ದಾರಾ? ಎಂಬ ಅನುಮಾನ ಮಾಡುತ್ತದೆ.  ಈ ಚಿತ್ರದಲ್ಲಿ ಒಂದು ಪಾತ್ರದ ಇತಿಹಾಸ ಮತ್ತು ಚರಿತ್ರೆಯನ್ನು ಹೇಳಲಾಗಿದೆ. ರಾಘು ಸಿನಿಮಾದ ಕೌತುಕತೆ ತಿಳಿದುಕೊಳ್ಳಬೇಕಾದರೆ ನೀವು ಏಪ್ರಿಲ್ 28ರಂದು ಥಿಯೇಟರ್‌ಗೆ ಭೇಟಿ ನೀಡಲೇಬೇಕು.