2022ರಲ್ಲಿ ವಿವಿಧ ಕಾರಣಗಳಿಂದ ವಿವಾದಕ್ಕೆ ಒಳಗಾದ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ರಿಷಬ್ ಶೆಟ್ಟಿ ನಿರ್ದೇಶಿಸಿ, ನಟಿಸಿರುವ ಕಾಂತಾರ ಸಿನಿಮಾ 2022ರ ಸೆಪ್ಟೆಂಬರ್ 30ರಂದು ಬಿಡುಗಡೆಯಾಗಿ ರಾಷ್ಟ್ರಮಟ್ಟದಲ್ಲಿ ದೊಡ್ಡ ಹೆಸರು ಮಾಡಿತ್ತು. ಆದರೆ, ಈ ಸಿನಿಮಾದ ವರಾಹ ರೂಪಂ ಎನ್ನುವ ಫೇಮಸ್​ ಟ್ಯೂನ್​ ಅನ್ನು ಸಂಗೀತ ನಿರ್ದೇಶಕ ಅಜನೀಶ್​ ಬಿ. ಲೋಕನಾಥ್ 5 ವರ್ಷ ಹಳೆಯ ಮಲಯಾಳಂ ಭಾಷೆಯ ‘ನವರಸಂ..’ ಹಾಡಿನಿಂದ ಕಾಪಿ ಮಾಡಿದ್ದಾರೆ ಎಂಬ ಆರೋಪ ಕೇಳಿಬಂದಿತ್ತು.  ವರಾಹ ರೂಪಂ ಮತ್ತು ನವರಸಂ ಹಾಡುಗಳ ನಡುವೆ ಇರುವ ಸಾಮ್ಯತೆಯು ಕಾಪಿರೈಟ್‌ ಕಾನೂನಿನ ಸ್ಪಷ್ಟ ಉಲ್ಲಂಘನೆಯಾಗಿದೆ. ಇದರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುತ್ತೇವೆ ಎಂದು ತೈಕ್ಕುಡಂ ಬ್ರಿಡ್ಜ್ ಮ್ಯೂಸಿಕ್ ಬ್ಯಾಂಡ್ ತಿಳಿಸಿತ್ತು. ಹೀಗಾಗಿ ತೈಕ್ಕುಡಂ ಬ್ರಿಡ್ಜ್ ಮ್ಯೂಸಿಕ್ ಬ್ಯಾಂಡ್‌ನ ಅನುಮತಿ ಇಲ್ಲದೆ ವರಾಹ ರೂಪಂ ಹಾಡನ್ನ ಬಳಕೆ ಮಾಡುವಂತಿಲ್ಲ ಎಂದು ಕೇರಳ ಕೋರ್ಟ್ ಆದೇಶ ನೀಡಿತ್ತು. ಬಳಿಕ ನ್ಯಾಯಾಲಯವೇ ವರಾಹ ರೂಪಂ ಹಾಡನ್ನು ಬಳಸುವಂತೆ ತೀರ್ಪು ನೀಡಿತ್ತು. 

ಡಾಲಿ ಧನಂಜಯ್ ನಿರ್ಮಿಸಿ, ನಟಿಸಿರುವ ಹೆಡ್ ಬುಷ್ ಸಿನಿಮಾ ಅಕ್ಟೋಬರ್ ೨೧ರಂದು ತೆರೆಕಂಡಿತ್ತು.  ಈ ಸಿನಿಮಾದಲ್ಲಿ ವೀರಗಾಸೆ ಕುಣಿತದವರಿಗೆ ಹೊಡೆಯಲಾಗಿದೆ. ವೀರಗಾಸೆ ಕುಣಿತದ ವೇಷ ಧರಿಸುವವರು ಶೂ ಧರಿಸಿದ್ದಾರೆ.  ಈ ಮೂಲಕ ಕರಗಕ್ಕೆ ಅವಮಾನ ಮಾಡಲಾಗಿದೆ ಎಂದು ಬಜರಂಗದಳ ಕಾರ್ಯಕರ್ತರು ಆರೋಪಿಸಿದ್ದರು. ಜೊತೆಗೆ ಚಿತ್ರತಂಡದ ವಿರುದ್ಧ ದೂರು ನೀಡಿ, ಧನಂಜಯ್ ಕಟೌಟ್ ಗೆ ಚಪ್ಪಲಿ ಹಾರ ಹಾಕಿ, ಪ್ರತಿಭಟಿಸಿದ್ದರು. ಬಳಿಕ ಈ ಪ್ರಕರಣ ಸುಖಾಂತ್ಯ ಕಂಡಿತ್ತು. 

ಮಠ ಸಿನಿಮಾ ನವೆಂಬರ್ 18ರಂದು ತೆರೆಕಂಡಿತ್ತು.  ಈ ಚಿತ್ರದ ಟೈಟಲ್ ಬಗ್ಗೆ ಋಷಿಕುಮಾರ ಸ್ವಾಮೀಜಿ ಅಸಮಾಧಾನ ವ್ಯಕ್ತಪಡಿಸಿದ್ದರು. ಸಿನಿಮಾದಲ್ಲಿ ಮಠ, ಮಠಾಧೀಶರ ಬಗ್ಗೆ ವ್ಯಂಗ್ಯ ಮಾಡಲಾಗುತ್ತಿದೆ. ಇದರಿಂದ ನಾಳಿನ ಯುವಜನತೆಗೆ ಏನು ಸಂದೇಶ ನೀಡಿದಂತಾಗುತ್ತದೆ. ಚಿತ್ರಕ್ಕೆ ಮಠ ಎಂಬ ಹೆಅಸರು ನೀಡುವ ಅವಶ್ಯಕತೆ ಏನಿದೆ. ಮಠದಲ್ಲೇ ನಡೆಯುವ ವಿಚಾರಗಳನ್ನೇ ಏಕೆ ಸಿನಿಮಾ ಮಾಡ್ತೀರಾ? ಎಂದು ಕಾಳಿ ಸ್ವಾಮೀಜಿ ಪ್ರಶ್ನಿಸಿದ್ದರು. ಬಳಿಕ ವಿವಾದ ತಣ್ಣಗಾಗಿತ್ತು. 

ವಿವೇಕ್ ಅಗ್ನಿಹೋತ್ರಿ ನಿರ್ದೇಶನದ 'ದಿ ಕಾಶ್ಮೀರ್ ಫೈಲ್ಸ್' ಸಿನಿಮಾ ನಾನಾ ಕಾರಣಗಳಿಂದ ಚರ್ಚೆಯಲ್ಲಿತ್ತು. ಕಾಶ್ಮೀರದಲ್ಲಿನ ನಡೆದಿದ್ದ ಪಂಡಿತರ ಹತ್ಯೆ, ಅವರ ಮೇಲಿನ ದೌರ್ಜನ್ಯ, ವಲಸೆ ಬಗ್ಗೆ ಸಿನಿಮಾದಲ್ಲಿ ತೋರಿಸಲಾಗಿದೆ. ಆದರೆ, ಚಿತ್ರ ತೆರೆಕಂಡ ನಂತರ ಕೆಲವರು ನಿರ್ದೇಶಕರ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದರೂ ಮತ್ತೊಂದು ವರ್ಗ ವಿರೋಧಿಸಿತ್ತು. ಈ ಚಿತ್ರದಲ್ಲಿ ಸತ್ಯವನ್ನು ತೋರಿಸಲಾಗಿದೆ ಅಂತ ಕೆಲವರು ಹೇಳಿದರೆ, ಇನ್ನು ಕೆಲವರು ಇದೊಂದು ಕಾಲ್ಪನಿಕ ಎಂದಿದ್ದರು. ಇದಕ್ಕೆ ರಾಜಕೀಯ ಬಣ್ಣ ಕೂಡ ಬಳಿಯಲಾಗಿತ್ತು.  

ತಮಿಳುನಾಡಿನ ಮಧುರೈ ಮೂಲದ ಲೀನಾ ಮಣಿಮೇಕಲೈ ಅವರು 'ಕಾಳಿ' ಎಂಬ ಸಾಕ್ಷ್ಯ ಚಿತ್ರವನ್ನು ನಿರ್ದೇಶನ ಮಾಡಿದ್ದು, ಈ ಸಾಕ್ಷ್ಯಚಿತ್ರದ್ ಪೋಸ್ಟರ್ ನಲ್ಲಿ ಹಿಂದೂ ದೇವತೆ ಕಾಳಿ ಮಾತೆ ಸಿಗರೇಟ್ ಸೇದುತ್ತಿರುವುದು ಹಾಗೂ ಕೈಯಲ್ಲಿ ಎಲ್ ಜಿಬಿಟಿಕ್ಯೂ ಸಮುದಾಯದ ಧ್ವಜವನ್ನು ಹಿಡಿದಿರುವ ಅವತಾರದಲ್ಲಿ ತೋರಿಸಲಾಗಿತ್ತು. ಈ ಪೋಸ್ಟರ್ ವಿರುದ್ದ ವಿವಾದ ಭುಗಿಲೆದ್ದಿತ್ತು. ಅನೇಕರು ಹಿಂದೂಗಾಲ ಭಾವನೆಗೆ ಧಕ್ಕೆ ಮಾಡಿರುವ  ಲೀನಾ ಮಣಿಮೇಕಲೈ ಅವರನ್ನು ಬಂಧಿಸುವಂತೆ ಸೋಶಿಯಲ್ ಮೀಡಿಯಾದಲ್ಲಿ ಒತ್ತಾಯಿಸಿದ್ದರು. 

ಭಾರತದಲ್ಲಿ ಅಸಹಿಷ್ಣುತೇ ಇದೆ ಎಂದು ಹೇಳಿ ಹಿಂದೂಗಳ ಕೆಂಗಣ್ಣಿಗೆ ಗುರಿಯಾಗಿದ್ದ ಅಮಿರ್ ಖಾನ್ ಅಭಿನಯದ 'ಲಾಲ್ ಸಿಂಗ್ ಚಡ್ಡಾ' ಸಿನಿಮಾ ಕೂಡ ವಿವಾದಕ್ಕೆ ಒಳಾಗಾಗಿತ್ತು.  ಈ ಸಿನಿಮಾ ತೆರೆಕಾಣುವ ಮುನ್ನವೇ ಬಹಿಷ್ಕಾರದ ಬಿಸಿ ಎದುರಿಸಿತ್ತು. ಜೊತೆಗೆ ಚಿತ್ರದಲ್ಲಿ ಸೈನಿಕರನ್ನು ಅವಹೇಳನ ಮಾಡಲಾಗಿದೆ ಎಂಬ ಮಾತು ಕೇಳಿಬಂದಿತ್ತು. 

ರಣಬೀರ್ ಕಪೂರ್ ಹಾಗೂ ಅಲಿಯಾ ಭಟ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದ ಬ್ರಹ್ಮಾಸ್ತ್ರ ಸಿನಿಮಾ ಸೆಪ್ಟೆಂಬರ್ 9ರಂದು ತೆರೆಕಂಡಿತ್ತು. ಆದರೆ, ಬಿಡುಗಡೆಗೂ ಮುನ್ನ ಈ ಸಿನಿಮಾ ಬಾಯ್ಕಾಟ್ ಸಮಸ್ಯೆ ಎದುರಿಸಿತ್ತು. ರಂಬೀರ್ ಕಪೂರ್ ಪಾದರಕ್ಷೆಗಳನ್ನು ಧರಿಸಿ, ದೇವಸ್ಥಾನದ ಗಂಟೆ ಭಾರಿಸುವ ದೃಶ್ಯ ಟ್ರೈಲರ್ ನಲ್ಲಿ ಕಂಡುಬಂದಿತ್ತು. ಜೊತೆಗೆ ರಣಬೀರ್ ಕಪೂರ್ ಹಾಗೂ ಆಲಿಯಾ ಭಟ್ ಸ್ಟಾರ್ ಕಿಡ್ ಗಳಾಗಿರುವ ಕಾರಣಕ್ಕೆ ನೆಪೋಟಿಸಮ್ ಕಾರಣ ನೀಡಿ, ಹಲವರು ಚಿತ್ರವನ್ನು ಬಾಯ್ಕಾಟ್ ಮಾಡುವಂತೆ ಸೂಚಿಸಿದ್ದರು. 

ಪ್ರಭಾಸ್ ಅಭಿನಯದ ಪ್ಯಾನ್ ಇಂಡಿಯಾ ಸಿನಿಮಾ 'ಆದಿಪುರುಷ್' ಚಿತ್ರ ೨೦೨೩ರಲ್ಲಿ ತೆರೆಕಾಣಲಿದೆ. ಆರಂಭದಿಂದಲೂ ಭಾರಿ ಸುದ್ದಿಯಾಗಿರುವ ಈ ಸಿನಿಮಾ ಟೀಸರ್ ನಿಂದ ವಿವಾದ ಮೈಮೇಲೆ ಎಳೆದುಕೊಂಡಿತ್ತು. ಚಿತ್ರದ ಟೀಸರ್ ನಲ್ಲಿ ರಾವಣನ ಪಾತ್ರಧಾರಿ ಸೈಫ್ ಅಲಿ ಖಾನ್ ಲುಕ್ ಚರ್ಚೆಗೆ ಕಾರಣವಾಗಿತ್ತು. ರಾವಣನನ್ನು ಮುಸ್ಲಿಂ ದೊರೆಯಂತೆ ತೋರಿಸಲಾಗಿದೆ ಎಂದು ಎಲ್ಲೆಡೆ ಆಕ್ರೋಶ ವ್ಯಕ್ತವಾಗಿತ್ತು. 

ಶಾರುಖ್ ಖಾನ್ ಮತ್ತು ದೀಪಿಕಾ ಪಡುಕೋಣೆ ಅಭಿನಯದ 'ಪಠಾಣ್' ಸಿನಿಮಾ ಕೂಡ ೨೦೨೩ರಲ್ಲಿ ಬಿಡುಗಡೆಯಾಗಲಿದೆ. ಆದರೆ, ಚಿತ್ರ ಬಿಡುಗಡೆಗೂ ಮುನ್ನವೇ  #BoycottShahRukhKhan ಅಭಿಯಾನ ಶುರುವಾಗಿದೆ. ಅಕ್ಷಯ್ ಕುಮಾರ್, ಅಜಯ್ ದೇವ್ಗನ್ ಅಂತಹ ನಟರು ತಾನಾಜಿ, ಪೃಥ್ವಿರಾಜ್ ಚೌಹಾಣ್ ಬಗ್ಗೆ ಸಿನಿಮಾ ಮಾಡಿದರೆ ಶಾರುಖ್ ಖಾನ್ ಪಠಾಣ್ ಸಿನಿಮಾ ಮಾಡುತ್ತಿದ್ದಾರೆ ಎಂದು ನೆಟ್ಟಿಗರು ಕಿಡಿಕಾರಿದ್ದರು. ಜೊತೆಗೆ ಈ ಸಿನಿಮಾದ ಬೇಷ್  ರಂಗ್ ಹಾಡಿನಲ್ಲಿ ದೀಪಿಕಾ ಪಡುಕೋಣೆ ಕೇಸರಿ ಬಿಕಿನಿ ಧರಿಸಿರುವುದು ಭಾರಿ ವಿವಾದಕ್ಕೆ ಕಾರಣವಾಗಿತ್ತು.