ಸುನಾಮಿ ಕಿಟ್ಟಿ ಟು ನಿವೇದಿತಾ ಗೌಡ: ರಿಯಾಲಿಟಿ ಶೋಗಳಿಂದ ಸಿಕ್ಕಾಪಟ್ಟೆ ಜನಪ್ರಿಯತೆ ಪಡೆದುಕೊಂಡವರಿವರು!

ಬಿಗ್‌ಬಾಸ್ ಕನ್ನಡ ಸೀಸನ್ 4ರ ಮುಂಚೆ ಒಳ್ಳೆ ಹುಡುಗ ಪ್ರಥಮ್ ಯಾರು ಎಂಬುದು ಯಾರಿಗೂ ತಿಳಿದಿರಲಿಲ್ಲ. ಇದಕ್ಕೂ ಮುನ್ನ ದೇವ್ರವ್ನೇ ಬಿಡು ಗುರು ಎಂಬ ಸಿನಿಮಾವನ್ನು ನಿರ್ದೇಶನ ಮಾಡಿದ್ದರು. ಆದರೆ, ಆ ಸಿನಿಮಾ ರಿಲೀಸ್ ಆಗಿರಲಿಲ್ಲ. ಬಳಿಕ ಬಿಗ್‌ಬಾಸ್‌ಗೆ ಎಂಟ್ರಿಕೊಟ್ಟ ಇವರು, ರಾತ್ರೋರಾತ್ರಿ ಫೇಮಸ್ ಆದರು. ಜೊತೆಗೆ ಬಿಗ್‌ಬಾಸ್ ಸೀಸನ್ 4ರ ವಿನ್ನರ್ ಆಗಿದ್ದರು. ಶೋನಿಂದ ಹೊರಬರುತ್ತಿದ್ದಂತೆತೇ ಹೀರೋ ಆಗಿ ಸ್ಯಾಂಡಲ್‌ವುಡ್‌ಗೆ ಎಂಟ್ರಿಕೊಟ್ಟರು. ಸಾಕಷ್ಟು ಅವಕಾಶಗಳು ಅವರನ್ನು ಅರಸಿ ಬಂದವು. ಸದ್ಯ ಪ್ರಥಮ್ ಹಲವು ಸಿನಿಮಾಗಳಲ್ಲಿ ನಾಯಕನಾಗಿ ಅಭಿನಯಿಸಿದ್ದಾರೆ.

ನಟಿ ಕಾವ್ಯಾ ಗೌಡ ಕೂಡ ರಿಯಾಲಿಟಿ ಶೋನಿಂದ ಬೆಳಕಿಗೆ ಬಂದ ಪ್ರತಿಭೆ. ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಮೂಡಿಬಂದ 'ಪ್ಯಾಟೇ ಹುಡ್ಗೀರ್ ಕಾಡಿಗ್ ಬಂದ್ರು' ರಿಯಾಲಿಟಿ ಶೋ ಮೂಲಕ ಗುರುತಿಸಿಕೊಂಡರು. ಈ ರಿಯಾಲಿಟಿ ಶೋ ಮುಗಿಯುತ್ತಿದ್ದಂತೆ  'ಮೀರಾ ಮಾಧವ' ಧಾರಾವಾಹಿಯ ಮೀರಾಳಾಗಿ ಕಿರುತೆರೆಯಲ್ಲಿ ಮಿಂಚಿದ ಈ ನಟಿ, ಮುಂದೆ ಗಾಂಧಾರಿ ಸೀರಿಯಲ್‌ನಲ್ಲಿ ದೃಷ್ಟಿ, ದೀಪ್ತಿ ಎಂಬ ದ್ವಿಪಾತ್ರದಲ್ಲಿ ಕಾಣಿಸಿಕೊಂಡರು. ಕೊನೆಯದಾಗಿ ರಾಧಾ ರಮಣ ಧಾರಾವಾಹಿಯಲ್ಲಿ ನಟಿಸಿದ್ದ ಕಾವ್ಯಾ, ಸದ್ಯ ನಟನೆಯಿಂದ ಅಂತರ ಕಾಯ್ದುಕೊಂಡಿದ್ದಾರೆ.

ಟಿಕ್‌ಟಾಕ್ ವಿಟಿಯೋಗಳ ಮೂಲಕ ಗುರುತಿಸಿಕೊಂಡಿದ್ದ ನಿವೇದಿತಾ ಗೌಡ, ಬಿಗ್‌ಬಾಸ್ ಕನ್ನಡ ಸೀಸನ್ 5ರಲ್ಲಿ ಸ್ಪರ್ಧಿಯಾಗಿ ಭಾಗವಹಿಸಿದ್ದರು. ಜನಸಾಮಾನ್ಯರ ವಿಭಾಗದಲ್ಲಿ ದೊಡ್ಮನೆ ಸೇರಿದ್ದ ಇವರು, ಫೈನಲಿಸ್ಟ್ ಆಗಿದ್ದರು. ಈ ಶೋ ಅವರಿಗೆ ಸಿಕ್ಕಾಪಟ್ಟೆ ಜನಪ್ರಿಯತೆ ತಂದುಕೊಟ್ಟಿತ್ತು. ಆನಂತರ ಚಂದನ್ ಶೆಟ್ಟಿ ಮದುವೆಯಾದ ನಿವೇದಿತಾ, ಕೆಲ ಆಲ್ಬಂ ಸಾಂಗ್, ರಿಯಾಲಿಟಿ ಶೋಗಳಲ್ಲಿ ಕಾಣಿಸಿಕೊಂಡರು. ಜೊತೆಗೆ ಸಿನಿಮಾಗಳಲ್ಲಿಯೂ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಸದ್ಯ ಚಂದನ್ ಅವರಿಂದ ಡಿವೋರ್ಸ್ ಪಡೆದಿರುವ ನಿವೇದಿತಾ, ಸಿನಿಮಾ ಹಾಗೂ ಕಿರುತೆರೆಯಲ್ಲಿ ಬ್ಯುಸಿಯಾಗಿದ್ದಾರೆ.

ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾದ 'ಪ್ಯಾಟೇ ಹುಡ್ಗೀರ್ ಕಾಡಿಗ್ ಬಂದ್ರು' ರಿಯಾಲಿಟಿ ಶೋನಲ್ಲಿ ರಮ್ಯಾ ಭಾಗವಹಿಸಿದ್ದರು. ಈ ಶೋನ ನಿರೂಪಕರಾಗಿದ್ದ ಅಕುಲ್ ಬಾಲಾಜಿ ಅವರಿಗೆ 'ಕೋಳಿ ರಮ್ಯಾ' ಅಂತ ಹೆಸರಿಟ್ಟರು. ಮುಂದೆ ರಮ್ಯಾ ಇದೇ ಹೆಸರಿನಿಂದ ಜನಪ್ರಿಯರಾದರು. ಆನಂತರ 'ಸೊಸೆ ತಂದ ಸೌಭಾಗ್ಯ' ಧಾರಾವಾಹಿಯಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದ ಈಕೆ, 'ಮಿಥುನ ರಾಶಿ' ಧಾರಾವಾಹಿಯಲ್ಲಿ ಖಳನಾಯಕಿ ಕವಿತಾಳಾಗಿ ಮೋಡಿ ಮಾಡಿದ್ದರು. ಕೇಸ್ ನಂ 18/9 ಎಂಬ ಸಿನಿಮಾದಲ್ಲಿ ನಟಿಸಿದ್ದಾರೆ.

ವೃತ್ತಿಯಲ್ಲಿ ತರಕಾರಿ ಮಾರಾಟಗಾರರಾದ ಮೈಸೂರು ಮೂಲದ ಸುನಾಮಿ ಕಿಟ್ಟಿ 'ಇಂಡಿಯನ್' ರಿಯಾಲಿಟಿಗೆ ಶೋಗೆ ಆಯ್ಕೆಯಾದರು. ಈ ಶೋನಿಂದ ಅವರಿಗೆ ಸಿಕ್ಕಾಪಟ್ಟೆ ಜನಪ್ರಿಯತೆ ಸಿಕ್ಕಿತು. ಇಲ್ಲಿಂದ ಅವರ ಬದುಕಿನ ಅದೃಷ್ಟವೇ ಬದಲಾಯಿತು. ಜೊತೆಗೆ ಬಿಗ್‌ಬಾಸ್ ಕನ್ನಡ ಸೀಸನ್ 3ರಲ್ಲೂ ಭಾಗವಹಿಸಿದ್ದರು. ನಂತರ ಕಲರ್ಸ್ ಕನ್ನಡದ ಡ್ಯಾನ್ಸಿಂಗ್ ಸ್ಟಾರ್‌ನಲ್ಲೂ ಮಿಂಚಿದರು. ಆನಂತರದಲ್ಲಿ ಇವರಿಗೆ ಸಾಕಷ್ಟು ಸಿನಿಮಾ ಅವಕಾಶಗಳು ಸಿಕ್ಕವು. ಬಳಿಕ ಅನೇಕ ವಿವಾದಗಳಿಗೆ ಗುರಿಯಾದ ಸುನಾಮಿ ಕಿಟ್ಟಿ, ಸದ್ಯ ಸಿನಿಮಾರಂಗದಿಂದ ದೂರ ಉಳಿದಿದ್ದಾರೆ.

ಸ್ಟಾರ್ ಸುವರ್ಣದಲ್ಲಿ ಪ್ರಸಾರವಾಗುತ್ತಿದ್ದ 'ಪ್ಯಾಟೆ ಹುಡ್ಗೀರ್ ಹಳ್ಳಿ ಲೈಫು' ರಿಯಾಲಿಟಿ ಶೋ ಮೂಲಕ ಕಿರುಪರದೆಗೆ ಕಾಲಿಟ್ಟ ನಯನಾ ಪುಟ್ಟಸ್ವಾಮಿ, ಆ ಶೋನ ವಿನ್ನರ್ ಆಗಿ ಹೊರಹೊಮ್ಮಿದ್ದರು. ಆನಂತರ ಈಟಿವಿ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಅನಂತ್ ನಾಗ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದ 'ಚಿಟ್ಟೆ ಹೆಜ್ಜೆ' ಧಾರಾವಾಹಿಯಲ್ಲಿ ನಟಿಸಿದ್ದರು. ಆನಂತರ ಬಿಗ್‌ಬಾಸ್ ಕನ್ನಡ ಸೀಸನ್ 6ರಲ್ಲಿ ಸ್ಪರ್ಧಿಯಾಗಿ ಭಾಗವಹಿಸಿದ್ದರು. ಜೊತೆಗೆ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ನಟನೆಯ ಪವರ್ ಚಿತ್ರದಲ್ಲೂ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಸದ್ಯ ಪತಿಯೊಂದಿಗೆ ವಿದೇಶದಲ್ಲಿ ನೆಲೆಸಿದ್ದಾರೆ.

ಆಧುನಿಕ ಮಾದರಿ ರೈತ ಅಂತಲೇ ಖ್ಯಾತಿ ಗಳಿಸಿರುವ ಶಶಿಕುಮಾರ್, ಬಿಗ್‌ಬಾಸ್ ಕನ್ನಡ ಸೀಸನ್ 6ರಲ್ಲಿ ಭಾಗವಹಿಸುವ ಮೂಲಕ ಕರ್ನಾಟಕದ ಜನತೆಗೆ ಪರಿಚಯವಾದರು. ಆನಂತರ ಕೌಸಲ್ಯ ಕಲ್ಯಾಣ ಸಿನಿಮಾ ಮೂಲಕ ನಾಯಕನಾಗಿ ಕನ್ನಡ ಚಿತ್ರರಂಗ ಪ್ರವೇಶಿಸಿದ ಇವರು, ಮುಂದೆ ಮೆಹಬೂಬ ಚಿತ್ರದಲ್ಲಿ ಅಭಿನಯಿಸಿದರು.