ಕ್ಯಾಮರಾದಿಂದ ತುಂಬಾ ದೂರವಿರುವ ಸ್ಯಾಂಡಲ್‌ವುಡ್‌ ಖ್ಯಾತ ನಟರ ಪತ್ನಿಯರಿವರು!

ಸ್ಯಾಂಡಲ್‌ವುಡ್‌ನ ಭರವಸೆಯ ನಟನಾಗಿರುವ ಯುವ ರಾಜ್‌ಕುಮಾರ್ ಅವರು ಶ್ರೀದೇವಿ ಎಂಬುವವರನ್ನು ಪ್ರೀತಿಸಿ ಮದುವೆಯಾಗಿದ್ದಾರೆ. ಶ್ರೀದೇವಿ ಎಂದೂ ಕೂಡ ಮಾಧ್ಯಮದ ಮುಂದೆ ಮಾತನಾಡಿಲ್ಲ. ಆದರೆ, ತೆರೆಹಿಂದೆ ಚಿತ್ರರಂಗದಲ್ಲಿ ಆಕ್ಟಿವ್ ಆಗಿದ್ದಾರೆ. ಈ ಹಿಂದೆ ವಿನಯ್ ರಾಜ್‌ಕುಮಾರ್ ಅವರ 'ರನ್ ಆಂಟನಿ' ಸಿನಿಮಾ ಪ್ರಚಾರ ಕಾರ್ಯಗಳಲ್ಲಿ ಶ್ರೀದೇವಿ ಭಾಗಿಯಾಗಿದ್ದರು.

ಬಹುಭಾಷಾ ನಟ ಪ್ರಕಾಶ್ ರಾಜ್‌ ಪತ್ನಿ ಪೋನಿ ವರ್ಮ ಕೊರಿಯೋಗ್ರಾಫರ್ ಆಗಿದ್ದವರು. ಆದರೆ, ಅವರು ತಮ್ಮ ಪತಿಯೊಂದಿಗೆ ಚಿತ್ರರಂಗದ ಕೆಲಸಗಳಲ್ಲಿ ಭಾಗಿಯಾಗೋದಿಲ್ಲ. ಅವರು ಮಾಧ್ಯಮದ ಮುಂದೆ ಬಂದು ಮಾತನಾಡಿದ್ದು ಕೂಡ ತೀರ ಅಪರೂಪವೇ. 

ವೃತ್ತಿಜೀವನ ಹಾಗೂ ವೈಯಕ್ತಿಕ ಜೀವನವನ್ನು ಒಟ್ಟಾಗಿಟ್ಟವರಲ್ಲಿ ನೀನಾಸಂ ಸತೀಶ್ ಕೂಡ ಒಬ್ಬರು. ಇವರಿಗೆ ಮದುವೆಯಾಗಿ, ಓರ್ವ ಮಗಳಿರುವುದು ಗೊತ್ತಾಗಿದ್ದೇ 2015ರಲ್ಲಿ. ಇವರು ಮದುವೆಯಾಗಿರುವ ವಿಚಾರ ಕೂಡ ಗೊತ್ತಾಗಿರಲಿಲ್ಲ. ಸತೀಶ್ ಅವರು ಸುಪ್ರೀತಾ ಎಂಬುವವರನ್ನು ವಿವಾಹವಾಗಿದ್ದು, ಅವರಿಗೆ ಕ್ಯಾಮರಾ ಮುಂದೆ ಬರುವುದು ಇಷ್ಟವಿಲ್ಲವಂತೆ. ಹೀಗಾಗಿ, ಅವರು ಸಾರ್ವಜನಿಕವಾಗಿ ಕಾಣಿಸಿಕೊಳ್ಳುವುದಿಲ್ಲ. 

ನಟ ಶರಣ್ ಪತ್ನಿ ಪಲ್ಲವಿ ಕೂಡ ಕ್ಯಾಮರಾದಿಂದ ತುಂಬಾ ದೂರ. ಶರಣ್ ಅವರ ಸೋಶಿಯಲ್ ಮೀಡಿಯಾದಲ್ಲಿ ಅವರ ಪತ್ನಿಯ ಫೋಟೋ ಕಾಣಿಸಬಹುದು ಅಷ್ಟೇ. ಅದನ್ನು ಹೊರತಾಗಿ ಪಲ್ಲವಿಯವರು ಎಂದೂ ಕೂಡ ಮೀಡಿಯಾ ಮುಂದೆ ಕಾಣಿಸಿಕೊಂಡಿಲ್ಲ. ಸಾಮಾಜಿಕ ಜಾಲತಾಣಗಳಿಂದಲೂ ಕೂಡ ದೂರ ಉಳಿದಿದ್ದಾರೆ. 

ಡೈಲಾಗ್ ಕಿಂಗ್ ಸಾಯಿಕುಮಾರ್ ಹೆಸರು ಕೇಳಿದರೆ ಸಾಕು, ಕನ್ನಡ ಪ್ರೇಕ್ಷಕರ ಮೈ ರೋಮಾಂಚನವಾಗುತ್ತದೆ. ಕಾರಣ ಪೊಲೀಸ್ ಹಾಗೂ ವಿಲನ್ ಪಾತ್ರಗಳಲ್ಲಿ ಕೇಳಿಬರುತ್ತಿದ್ದ ಅವರ ಗಂಡು ಧ್ವನಿ ಹಾಗೂ ಡೈಲಾಗ್ ಡೆಲಿವರಿ ಶೈಲಿ. ಒಂದು ಕಾಲದಲ್ಲಿ ಸಾಯಿಕುಮಾರ್‌ ಅವರನ್ನು ಹುಡುಕಿಕೊಂಡು ಸಾಲು-ಸಾಲು ಪೊಲೀಸ್ ಪಾತ್ರಗಳೇ ಬರುತ್ತಿದ್ದವು. ಸಾಯಿಕುಮಾರ್ ಅವರು ಸುರೇಖಾ ಎಂಬುವವರನ್ನು ಮದುವೆಯಾಗಿದ್ದು, ಇಬ್ಬರು ಮಕ್ಕಳಿದ್ದಾರೆ. ಪತಿ ಸ್ಟಾರ್ ನಟರಾಗಿದ್ದರೂ ಕೂಡ ಸುರೇಖಾ ಕ್ಯಾಮರಾ ಮುಂದೆ ಕಾಣಿಸಿಕೊಳ್ಳುವುದಿಲ್ಲ. 

ನಟ ಕಿಶೋರ್ ಕಾಲೇಜಿನಲ್ಲಿರುವಾಗಲೇ ಪ್ರೀತಿಯಲ್ಲಿ ಬಿದ್ದವರು. ಇವರು ವಿಶಾಲಾಕ್ಷಿ ಎಂಬುವವರನ್ನು ಪ್ರೀತಿಸಿ ಮದುವೆಯಾಗಿದ್ದಾರೆ. ನಟನೆ ಹೊರತಾಗಿ ಕಿಶೋರ್ ಅವರು ತಮ್ಮ ಪತ್ನಿ ಜೊತೆ ಕೃಷಿ ಚಟುವಟಿಕೆಯಲ್ಲಿ ತೊಡಗಿಕೊಂಡಿದ್ದಾರೆ. ಆದರೆ, ವಿಶಾಲಾಕ್ಷಿ ಕ್ಯಾಮರಾ ಮುಂದೆ ಬರೋದಿಲ್ಲ. ಅವರ ಕ್ಯಾಮರಾ ಕಣ್ಣಿಗೆ ಕಾಣಿಸಿಕೊಂಡಿದ್ದು ಅಪರೂಪ. 

ನಟ ಹಾಗೂ ರಾಜಕಾರಣಿ ನಿಖಿಲ್ ಕುಮಾರಸ್ವಾಮಿ ಪತ್ನಿ ರೇವತಿ ಕ್ಯಾಮರಾ ಮುಂದೆ ಬಂದರೂ ಕೂಡ ಮಾತನಾಡಲು ಹಿಂಜರಿಯುತ್ತಾರೆ. ಅವರಿಗೆ ಕ್ಯಾಮರಾ ಮುಂದೆ ಬಂದು ಮಾತನಾಡುವುದು ಅಷ್ಟು ಇಷ್ಟವಾಗುವುದಿಲ್ಲವಂತೆ. ಈ ಜೋಡಿಗೆ ಅವ್ಯಾನ್ ಎಂಬ ಮಗನಿದ್ದಾನೆ.