ಅತಿಹೆಚ್ಚು ಭಾಷೆಗಳಿಗೆ ರಿಮೇಕ್ ಆದ ಸ್ಯಾಂಡಲ್‌ವುಡ್‌ ಸಿನಿಮಾಗಳ ಪಟ್ಟಿ ಇಲ್ಲಿದೆ.

1958ರಲ್ಲಿ ತೆರೆಕಂಡ ಬಿ.ಆರ್.ಪಂತುಲು ನಿರ್ಮಿಸಿ, ನಿರ್ದೇಶನ ಮಾಡಿದ್ದ 'ಸ್ಕೂಲ್ ಮಾಸ್ಟರ್' ಸಿನಿಮಾ ಆ ಕಾಲಕ್ಕೆ ದೊಡ್ಡ ಹಿಟ್ ಆಗಿತ್ತು. ಈ ಸಿನಿಮಾದ ಕನ್ನಡದ ಜೊತೆ ತೆಲುಗು,  ತಮಿಳಿಗೂ ಡಬ್ ಆಗಿ ತೆರೆಕಂಡಿತ್ತು.  ಮಲಯಾಳಂನಲ್ಲಿ ಖ್ಯಾತ ನಿರ್ದೇಶಕ ಪುಟ್ಟಣ್ಣ ಕಣಗಾಲ್ ಅದೇ ಶೀರ್ಷಿಕೆಯಲ್ಲಿ ರಿಮೇಕ್ ಮಾಡಿದ್ದರು. ವಿಶೇಷವೆಂದರೆ ಇದು ಅವರ ನಿರ್ದೇಶನದ ಮೊದಲ ಸಿನಿಮಾ. ಈ ಚಿತ್ರ 1972ರಲ್ಲಿ 'ಬಡಿ ಪಂತುಲು' ಹೆಸರಿನಲ್ಲಿ  ತೆಲುಗಿಗೆ ರಿಮೇಕ್ ಆಗಿದ್ದರೆ, 1973ರಲ್ಲಿ ಸ್ಕೂಲ್ ಮಾಸ್ಟರ್ ಹೆಸರಿನಲ್ಲೇ ತಮಿಳಿಗೆ ರಿಮೇಕ್ ಆಯಿತು. ಇದರಲ್ಲಿ ಶಿವಾಜಿ ಗಣೇಶನ್ ನಟಿಸಿದ್ದರು.  ಹಿಂದಿಯಲ್ಲಿ ಬಿಡುಗಡೆಯಾದ 'ಜಿಂದಗಿ, ಭಾಗ್ ಬಾನ್, ಪಾಕಿಸ್ತಾನದ 'ಸಮಜ್' ಚಿತ್ರಕ್ಕೂ ಈ ಸಿನಿಮಾ ಸ್ಪೂರ್ತಿಯಾಗಿತ್ತು ಎನ್ನಲಾಗಿದೆ. 

ಡಾ. ರಾಜ್ ಕುಮಾರ್, ಮಾಧವಿ ಮತ್ತು ಗೀತಾ ನಟನೆಯ ಬ್ಲಾಕ್ ಬಸ್ಟರ್ ಸಿನಿಮಾ 'ಅನುರಾಗ ಅರಳಿತು' ಆರು ಭಾಷೆಗಳಿಗೆ ರಿಮೇಕ್ ಆಗಿತ್ತು.  ಎಂ.ಎಸ್.ರಾಜಶೇಖರ್ ನಿರ್ದೇಶನದ ಈ ಸಿನಿಮಾ ಚಿತ್ರಮಂದಿರಗಳಲ್ಲಿ 50 ವಾರ ಪ್ರದರ್ಶನ ಕಂಡಿತ್ತು. ಅನುರಾಗ ಅರಳಿತು ಚಿತ್ರವನ್ನು 'ಮಣ್ಣನ್' ಹೆಸರಿನಲ್ಲಿ ರಜನಿಕಾಂತ್ ರಿಮೇಕ್ ಮಾಡಿದ್ದರೆ, ಚಿರಂಜೀವಿ 'ಘರನಾ ಮೊಗಡು' ಎಂದು ರಿಮೇಕ್ ಮಾಡಿದ್ದರು. ಕೆ ರಾಘವೇಂದ್ರ ರಾವ್ ನಿರ್ದೇಶನದ 'ಘರನಾ ಮೊಗಡು' ಚಿತ್ರ 1992ರಲ್ಲಿ 10 ಕೋಟಿಗೂ ಅಧಿಕ ಗಳಿಕೆ ಕಂಡಿತ್ತು. ನಂತರ ಈ ಸಿನಿಮಾ ಒಡಿಯಾದಲ್ಲಿ ಸಿಂಧೂರ ನುಹೇನ್ ಖೇಲಾ, ಹಿಂದಿಯಲ್ಲಿ ಲಾಡ್ಲಾ, ಬಾಂಗ್ಲಾ ಭಾಷೆಯಲ್ಲಿ ಶಮಿ ಸ್ತ್ರೀರ್ ಜುಡ್ಡೋ, ಬೆಂಗಾಲಿಯಲ್ಲಿ ಜುಮೈಬಾಬು ಜಿಂದಾಬಾದ್ ಎಂದು ರಿಮೇಕ್ ಆಗಿತ್ತು. ವಿದೇಶಿ ಭಾಷೆಗೆ ರಿಮೇಕ್ ಆದ ಕನ್ನಡ ಸಿನಿಮಾದ ಇದಾಗಿದೆ. 

ಪವರ್‌ಸ್ಟಾರ್ ಪುನೀತ್ ರಾಜ್‌ಕುಮಾರ್ ನಾಯಕನಾಗಿ ಎಂಟ್ರಿ ಕೊಟ್ಟ ಮೊದಲ ಸಿನಿಮಾ 'ಅಪ್ಪು'. ಈ ಸಿನಿಮಾಕ್ಕೆ ಪುರಿ ಜಗನ್ನಾಥ್ ಆಕ್ಷನ್ ಕಟ್ ಹೇಳಿದ್ದರು. ಲವ್‌ಸ್ಟೋರಿ, ಆಕ್ಷನ್, ಕಾಮಿಡಿ ಎಲ್ಲಾ ಎಲಿಮೆಂಟ್ಸ್‌ ಈ ಸಿನಿಮಾದಲ್ಲಿ ಇತ್ತು.  ಹೀಗಾಗಿ ಪ್ರೇಕ್ಷಕರು ಮುಗಿಬಿದ್ದು ಸಿನಿಮಾ ನೋಡಿದ್ದರು. ಈ ಸಿನಿಮಾ 2002, ಏಪ್ರಿಲ್ 26 ರಂದು ಗ್ರ್ಯಾಂಡ್ ಆಗಿ ರಿಲೀಸ್ ಆಗಿತ್ತು. ಅಪ್ಪು ನಾಯಕನಾದ ಮೊದಲ ಸಿನಿಮಾ ಥಿಯೇಟರ್‌ಗಳಲ್ಲಿ 100 ದಿನ ಅಲ್ಲ, 200 ದಿನ ಓಡಿತ್ತು.  ಈ ಸಿನಿಮಾದಿಂದ ರಕ್ಷಿತಾಗೆ ನಾಯಕಿಯಾಗಿ ದೊಡ್ಡ ಬ್ರೇಕ್ ನೀಡಿತ್ತು. ಕನ್ನಡದಲ್ಲಿ ಹಿಟ್ ಆದ ಬಳಿಕ ಪುರಿ ಜಗನ್ನಾಥ್ ಅವರೇ ತೆಲುಗಿನಲ್ಲಿ 'ಈಡಿಯೆಟ್' ಎಂದು ರಿಮೇಕ್ ಮಾಡಿದರು. ಈ ಚಿತ್ರದಲ್ಲಿ ಹೀರೋ ಆಗಿ ರವಿತೇಜ ನಟಿಸಿದ್ದರು. ತಮಿಳಿನಲ್ಲಿ 'ಧಮ್' ಆಗಿ ರಿಮೇಕ್ ಆಗಿದ್ದು, ಸಿಂಬು ನಾಯಕನಾಗಿ ನಟಿಸಿದ್ದರು.  ಬಳಿಕ ಅಪ್ಪು ಸಿನಿಮಾ ಬೆಂಗಾಲಿ ಭಾಷೆಗೆ 'ಹೀರೋ' ಆಗಿ, ಬಾಂಗ್ಲಾ ಭಾಷೆಗೆ ಪ್ರಿಯ ಅಮರ್ ಪ್ರಿಯ' ಆಗಿ ರಿಮೇಕ್ ಆಯಿತು. ಅನುರಾಗ ಅರಳಿತು ನಂತರ ವಿದೇಶಿ ಭಾಷೆಗೆ ರಿಮೇಕ್ ಆದ ಎರಡನೇ ಸಿನಿಮಾ ಅಪ್ಪು. 

2006ರ ಡಿಸೆಂಬರ್ 29ರಂದು ಬಿಡುಗಡೆಯಾದ ಯೋಗರಾಜ್ ಭಟ್ ನಿರ್ದೇಶನದ 'ಮುಂಗಾರು ಮಳೆ' ಸಿನಿಮಾ ಕನ್ನಡ ಚಿತ್ರರಂಗದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿತ್ತು. ಯೋಗರಾಜ್ ಭಟ್ ಅವರಿಗೆ ಈ ಚಿತ್ರ ದೊಡ್ಡ ಯಶಸ್ಸು ನೀಡಿತ್ತು.  ಇದು ಸಿನಿಮಾವು  ಒಂದು ವರ್ಷ ಪ್ರದರ್ಶನಗೊಳ್ಳುವ ಮೂಲಕ ದಾಖಲೆ ಬರೆಯಿತು. ಕೇವಲ 70 ಲಕ್ಷ ರೂ. ವೆಚ್ಚದಲ್ಲಿ ನಿರ್ಮಾಣವಾದ ಈ ಸಿನಿಮಾ ಗಲ್ಲಾಪೆಟ್ಟಿಗೆಯಲ್ಲಿ 75 ಕೋಟಿ ಬಾಚಿಕೊಂಡಿತ್ತು. ಈ ಚಿತ್ರ ಗೋಲ್ಡನ್ ಸ್ಟಾರ್ ಗಣೇಶ್ ಸಿನಿಜೀವನಕ್ಕೆ ದೊಡ್ಡ ಬ್ರೇಕ್ ನೀಡಿತ್ತು.  ಈ ಸಿನಿಮಾ ಮೊದಲಿಗೆ 'ವಾನಾ' ಆಗಿ ತೆಲುಗಿಗೆ ರಿಮೇಕ್ ಆಯಿತು. ಬಳಿಕ ಒಡಿಯಾಗೆ 'ರೋಮಿಯೋ ದ ಲವರ್ ಬಾಯ್' ಆಗಿ, ಮರಾಠಿ ಭಾಷೆಗೆ 'ಪ್ರೇಮಂ ನಮಃ', ಬೆಂಗಾಳಿಗೆ 'ಪ್ರೇಮೇರ್ ಕಹಾನಿ'ಯಾಗಿ ರಿಮೇಕ್ ಆಗಿತ್ತು. 

ಲೂಸಿಯಾ ಪವನ್ ಕುಮಾರ್ ನಿರ್ದೇಶನದಲ್ಲಿ ಮೂಡಿಬಂದ 'ಯು ಟರ್ನ್' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಈ ಸಿನಿಮಾದಲ್ಲಿ ಶ್ರದ್ಧಾ ಶ್ರೀನಾಥ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದರು. ಬೆಂಗಳೂರಿನ ಡಬಲ್ ರೋಡ್ ಫ್ಲೈಓವರ್ ಮೇಲಿನ ನೈಜ ಸಮಸ್ಯೆಯನ್ನು ಇಟ್ಟುಕೊಂಡು ಅದಕ್ಕೆ ರೋಚಕವಾದ ಚಿತ್ರಕಥೆ ಬರೆದು ಪವನ್ ಕುಮಾರ್ ನಿರ್ದೇಶನ ಮಾಡಿದ್ದರು. ಸಿನಿಮಾ ಬಂದಮೇಲೆ ಆ ಫ್ಲೈಓವರ್ ಸಮಸ್ಯೆಯನ್ನು ಸರಿಪಡಿಸಲಾಗಿತ್ತು. 2.5  ಕೋಟಿ ವೆಚ್ಚದಲ್ಲಿ ನಿರ್ಮಾಣವಾದ ಈ ಸಿನಿಮಾ 25 ಕೋಟಿ ಗಳಿಕೆ ಕಂಡಿತ್ತು.  ನಂತರ ಇದೇ ಶೀರ್ಷಿಕೆ ಇಟ್ಟುಕೊಂಡು ಪವನ್ ಕುಮಾರ್ ಅವರೇ ತೆಲುಗು ಮತ್ತು ತಮಿಳಿಗೆ ರಿಮೇಕ್ ಮಾಡಿದ್ದರು.  2017ರಲ್ಲಿ ಮಲಯಾಳಂ ಭಾಷೆಗೆ ಕೇರ್ ಫುಲ್ ಆಗಿ ರಿಮೇಕ್ ಆಯಿತು. ನಂತರ ಶ್ರೀಲಂಕಾದ ಸಿಂಹಳ, ಫಿಲಿಪೈನ್ಸ್ ದೇಶದ ಫಿಲಿಪಿನೋ ಭಾಷೆಗೆ ರಿಮೇಕ್ ಆಯಿತು. ಈ ಎರಡು ಭಾಷೆಗೆ ರಿಮೇಕ್ ಆದ ಮೊದಲ ಸಿನಿಮಾ ಯು ಟರ್ನ್.