ಸ್ಯಾಂಡಲ್‌ವುಡ್‌ನ ಆ ಕಾಲದ ಚಾಕೊಲೇಟ್ ಹೀರೋಸ್ ಇವರು: ನಿಮ್ಮಿಷ್ಟದ ನಟ ಯಾರು?

ತಮ್ಮ ಹ್ಯಾಂಡ್ಸಮ್ ಲುಕ್‌ನಿಂದಲೇ ಸಿನಿಪ್ರಿಯರ ಮನಗೆದ್ದಿದ್ದ ರಾಮ್‌ಕುಮಾರ್, ಕನ್ನಡದ ಖ್ಯಾತ ನಿರ್ಮಾಪಕ ಶೃಂಗಾರ ನಾಗರಾಜ್ ಅವರ ಮುದ್ದಿನ ಮಗ. 1990ರಲ್ಲಿ ತೆರೆಕಂಡ 'ಆವೇಶ'ಸ ಸಿನಿಮಾ ಮೂಲಕ ಸ್ಯಾಂಡಲ್‌ವುಡ್‌ಗೆ ಎಂಟ್ರಿಕೊಟ್ಟಿದ್ದ ರಾಮ್‌ಕುಮಾರ್, 1993ರಲ್ಲಿ ಬಿಡುಗಡೆಯಾದ ಗೆಜ್ಜೆನಾದ ಚಿತ್ರದದಿಂದ ಕನ್ನಡಿಗರ ಹೃದಯ ಗೆಲ್ಲುವಲ್ಲಿ ಯಶಸ್ವಿಯಾದರು. ಅಲ್ಲಿಂದ ಮುಂದೆ ತವರಿನ ತೊಟ್ಟಿಲು, ಸ್ನೇಹಲೋಕ, ಹಬ್ಬ, ಆಂಟಿ ಪ್ರೀತ್ಸೆ, ನವಶಕ್ತಿ ವೈಭವ, ಪಾಂಡವರು ಹೀಗೆ ಹಲವು ಸಿನಿಮಾ ಮೂಲಕ ಸ್ಟಾರ್ ನಟನಾಗಿ ಮಿಂಚಿದವರು. ಸದ್ಯ ಅವರು ಸಿನಿಮಾರಂಗದಿಂದ ದೂರ ಉಳಿದಿದ್ದಾರೆ.

ಸುನೀಲ್ ಕನ್ನಡ ಚಿತ್ರರಂಗ ಕಂಡ ಸ್ಪುರದ್ರೂಪಿ ನಟ. ಸುನೀಲ್ 90ರ ದಶಕದ ಚಾಕೊಲೇಟ್ ಹೀರೋ ಎಂದೇ ಖ್ಯಾತಿ ಪಡೆದಿದ್ದರು. 1990 ರಿಂದ 1994 ರವರೆಗೆ ಸಿನಿರಂಗದಲ್ಲಿ ಸಕ್ರಿಯವಾಗಿದ್ದ ಸುನೀಲ್ ಸುಮಾರು ಮೂವತ್ತು ಚಿತ್ರಗಳಲ್ಲಿ ನಟಿಸಿದ್ದಾರೆ. ಬೆಳ್ಳಿ ಕಾಲುಂಗುರ, ದ್ರಾಕ್ಷಾಯಿಣಿ, ಮಾಲಾಶ್ರೀ ಮಾಮಾಶ್ರೀ, ಶೃತಿ ಮುಂತಾದ ಹಿಟ್ ಚಿತ್ರಗಳ ಮೂಲಕ ಪ್ರಸಿದ್ಧರಾಗಿದ್ದರು. ಸಿನಿಪರದೆಯ ಮೇಲೆ ಸುನೀಲ್ ಮತ್ತು ಮಾಲಾಶ್ರೀ  ಆ ಕಾಲದ ಫೇವರೇಟ್ ಜೋಡಿಯಾಗಿತ್ತು. ತಮ್ಮ ಚುರುಕು ಅಭಿನಯದಿಂದ ಕನ್ನಡದಲ್ಲಿ ಸಂಚಲನ ಮೂಡಿಸಿದ್ದ ಸುನೀಲ್, 1994 ಜುಲೈ 24ರಂದು ನಿರ್ಮಾಪಕ ಸಚಿನ್ ಮಲ್ಯ ಮತ್ತು ನಟಿ ಮಾಲಾಶ್ರೀಯವರೊಂದಿಗೆ ಬಾಗಲಕೋಟೆಯಿಂದ ಬೆಂಗಳೂರಿಗೆ ಕಾರಿನಲ್ಲಿ ಬರುವಾಗ ಅಪಘಾತದಲ್ಲಿ ನಿಧನರಾದರು.

ತನ್ನ ಹ್ಯಾಂಡ್ಸಮ್ ಲುಕ್, ನಟನೆ, ಅದ್ಭುತ ಡ್ಯಾನ್ಸ್ ಮೂಲಕ ದೊಡ್ಡ ಅಭಿಮಾನಿ ಬಳಗ ಹೊಂದಿದ್ದ ಚಂದನವನದ ಚೆಂದದ ನಟ ಸುಪ್ರೀಂ ಹೀರೋ ಶಶಿಕುಮಾರ್. ಅಂದಿನ ಕಾಲದಲ್ಲಿ ಶಿಶಿಕುಮಾರ್ ನೃತ್ಯದ ಸ್ಟೈಲ್ ಸಿನಿರಸಿಕರ ಮೆಚ್ಚುಗೆಗೆ ಕಾರಣವಾಗಿತ್ತು. 1988ರಲ್ಲಿ ತೆರೆಕಂಡ `ಚಿರಂಜೀವಿ ಸುಧಾಕರ' ಚಿತ್ರದ ಮೂಲಕ ಸ್ಯಾಂಡಲ್‌ವುಡ್ ಪ್ರವೇಶಿಸಿದ್ದ ಶಶಿಕುಮಾರ್, ತಮಿಳು, ತೆಲುಗು, ಹಿಂದಿ ಸಿನಿಮಾಗಳಲ್ಲೂ ಅಭಿನಯಿಸಿ ಸೈ ಎನಿಸಿಕೊಂಡಿದ್ದರು. ಬರೀ ಏಳೆಂಟು ವರ್ಷದಲ್ಲಿ 75 ಸಿನಿಮಾಗಳನ್ನು ಮಾಡಿದ್ದ ಶಶಿಕುಮಾರ್ ದೊಡ್ಡ ಸ್ಟಾರ್ ಆಗಿದ್ದರು. ಅವರ ಸಾಕಷ್ಟು ಸಿನಿಮಾಗಳು ಸೂಪರ್ ಹಿಟ್ ಆಗಿದ್ದವು. ಹೀಗೆ ಎಲ್ಲಾ ಚೆನ್ನಾಗಿದೆ ಎನ್ನುವಾಗಲೇ 1998ರ ಜುಲೈ 31 ರಂದು ಒಂದು ಅಪಘಾತಕ್ಕೊಳಗಾದರು. ಅಪಘಾತದ ಬಳಿಕ ನಡೆದ ಸರ್ಜರಿಯಿಂದ ಅವರ ಮುಖ ಚಹರೆ ಭಾಗಶಃ ಬದಲಾಯಿತು. ಅಲ್ಲಿಂದ ಚಿತ್ರಗಳ ಅವಕಾಶವೂ ಕಡಿಮೆಯಾಯಿತು. ಕಳೆದ ವರ್ಷ ಗೋಲ್ಡನ್ ಸ್ಟಾರ್ ಗಣೇಶ್ ಅಭಿನಯದ 'ಕೃಷ್ಣಂ ಪ್ರಣಯ ಸಖಿ' ಸಿನಿಮಾದಲ್ಲಿ ಫೋಷಕ ಪಾತ್ರದಲ್ಲಿ ಶಶಿಕುಮಾರ್ ಬೆಳ್ಳಿತೆರೆ ಮೇಲೆ ಕಾಣಸಿಕೊಂಡಿದ್ದರು.

ಚಂದನವನದಲ್ಲಿ ಇಂದಿಗೂ ತಮ್ಮ ಚಾರ್ಮ್ ಉಳಿಸಿಕೊಂಡ ನಟರಲ್ಲಿ ರಮೇಶ್ ಅರವಿಂದ್ ಮೊದಲಿಗರು. ರಮೇಶ್, ಶಿವರಾಜ್ ಕುಮಾರ್ ಮತ್ತು ಜಗ್ಗೇಶ್ ಬೆಳ್ಳಿತೆರೆಗೆ ಪಾದಾರ್ಪಾಣೆ ಮಾಡಿದ್ದು ಹೆಚ್ಚುಕಮ್ಮಿ ಒಂದೇ ಸಮಯದಲ್ಲಿ. ರಮೇಶ್ ಅರವಿಂದ್ ಸಿನಿಮಾರಂಗಕ್ಕೆ ಬಂದು ದಶಕಗಳೇ ಕಳೆದರೂ ಯುವ ನಟರನ್ನೂ ನಾಚಿಸುವಂತೆ ಫಿಟ್ ಆಗಿದ್ದಾರೆ. ಸದಾ ತಮ್ಮ ಸ್ಪೂರ್ತಿದಾಯಕ ಮಾತುಗಳಿಂದ ಎಲ್ಲರನ್ನು ಹುರಿದುಂಬಿಸುತ್ತಿರುತ್ತಾರೆ. ಸುಂದರ ಸ್ವಪ್ನಗಳು ಸಿನಿಮಾ ಮೂಲಕ ಚೆಂದನವನಕ್ಕೆ ಕಾಲಿಟ್ಟ ರಮೇಶ್, ಕನ್ನಡ ಸೇರಿದಂತೆ  ತಮಿಳು, ತೆಲುಗು, ತುಳು, ಮಲಯಾಳಂ ಹಾಗೂ ಹಿಂದಿ ಸಿನಿಮಾಗಳಲ್ಲಿ ನಟಿಸಿದ್ದಾರೆ.  ಜೊತೆಗೆ ಅತ್ಯುತ್ತಮ ನಟ ಪ್ರಶಸ್ತಿ, ಫಿಲ್ಮ್ ಫೇರ್ ಪ್ರಶಸ್ತಿ, ಕರ್ನಾಟಕ ರಾಜ್ಯ ಪ್ರಶಸ್ತಿ ಸೇರಿದಂತೆ ಅನೇಕ ಪ್ರಶಸ್ತಿಗಳನ್ನು ಮುಡಿಗೇರಿಸಿಕೊಂಡಿದ್ದಾರೆ.

ನಾಗರಹಾವು ಮೂಲಕ ಕನ್ನಡ ಚಿತ್ರರಂಗ ಪ್ರವೇಶಿಸಿದ ಡಾ.ವಿಷ್ಣುವರ್ಧನ್, ಕನ್ನಡ ಸಿನಿಪ್ರಿಯರ ಹೃದಯ ಸಾಮ್ರಾಜ್ಯದಲ್ಲಿ ಸಾಹಸಸಿಂಹನಾಗಿ ಶಾಶ್ವತವಾಗಿ ನೆಲೆಸಿದ್ದಾರೆ. ಕನ್ನಡ ಚಿತ್ರರಂಗದ ಮೊದಲ ಆ್ಯಂಗ್ರಿ ಯಂಗ್ ಮ್ಯಾನ್ ವಿಷ್ಣುವರ್ಧನ್ ಅವರು ಭಗ್ನ ಪ್ರೇಮಿಯಾಗಿ, ರೋಷಭರಿತ ಖೈದಿಯಾಗಿ, ಖಡಕ್ ಪೊಲೀಸ್ ಅಧಿಕಾರಿಯಾಗಿ ಹೀಗೆ ಹತ್ತು ಹಲವು ಪಾತ್ರಗಳ ಮೂಲಕ ಅಜರಾಮರವಾಗಿದ್ದಾರೆ. ವಿಷ್ಣುವರ್ಧನ್ ಕೂಡ ತುಂಬಾ ಸುಂದರವಾಗಿದ್ದರು. ಅದ್ಭುತ ಕಲರ್ ಹೊಂದಿದ್ದ ಅವರ ಕಣ್ಣುಗಳಲ್ಲಿ ಅದೇನೋ ಮಿಂಚಿತ್ತು. ವಿಷ್ಣು ಅವರನ್ನು ಯಾವುದೇ ಆಂಗಲ್‌ನಲ್ಲಿ ಕ್ಯಾಮರಾ ಇಟ್ಟು ನೋಡಿದ್ದರೂ ಸೂಪರ್ ಆಗಿ ಕಾಣಿಸುತ್ತಿದ್ದರು. ಇದನ್ನು ಕೊನಿಕಾ ಬುಕ್ ಆಫ್ ರೆಕಾರ್ಡ್ ಸಂಸ್ಥೆ ಹೇಳಿತ್ತು. ಆ ಮೂಲಕ ಭಾರತದ ಅತ್ಯಂತ ಹ್ಯಾಂಡ್‌ಸಮ್ ಹೀರೋ ಎನಿಸಿಕೊಂಡಿದ್ದರು.