ಯಶ್ ಪ್ಯಾನ್ ಇಂಡಿಯಾ ಸ್ಟಾರ್ ಆಗಿ ಬೆಳೆಯಲು ರಾಧಿಕಾ ಪಂಡಿತ್ ಸಹಕಾರ ಹೇಗಿತ್ತು ಗೊತ್ತಾ? ಇಲ್ಲಿದೆ ಮಾಹಿತಿ.

ಯಶ್ ಮತ್ತು ರಾಧಿಕಾ ಪಂಡಿತ್ ಸೀರಿಯಲ್ ಟು ಸಿನಿಮಾವರೆಗೆ ಜೊತೆಯಾಗಿದ್ದರು. ಇಬ್ಬರು ಒಟ್ಟಿಗೆ ಸಿನಿಜೀವನಕ್ಕೆ ಕಾಲಿಟ್ಟು ಯಶಸ್ಸು ಗಳಿಸಿದರು. ರಾಂಕಿಂಗ್ ಸ್ಟಾರ್ ಯಶ್ ಅವರ ಪ್ರತಿಯೊಂದು ಹೆಜ್ಜೆಯಲ್ಲೂ ರಾಧಿಕಾ ಸಪೋರ್ಟ್ ಮಾಡುತ್ತಿದ್ದರು. ಯಶ್ ಸಿನಿಮಾ ಆಯ್ಕೆಯಲ್ಲೂ ರಾಧಿಕಾ ಜೊತೆಯಾಗಿದ್ದು, ಸಲಹೆ-ಸೂಚನೆಗಳನ್ನು ನೀಡುತ್ತಿದ್ದರು. ಹೆಂಡತಿ ಬಗ್ಗೆ ಈ ಹಿಂದೆ ಪ್ರತಿಕ್ರಿಯಿಸಿದ್ದ ಯಶ್, ನಾನು ಹಲವು ಭಾಷೆಗಳಲ್ಲಿ ಚಿರಪರಿಚಿತ ನಟ ಆಗಿರಬಹುದು.  ನಟನೆಯಲ್ಲಿ ರಾಧಿಕಾ ನನಗಿಂತಲೂ ಒಳ್ಳೆಯ ನಟಿ. ಚಿತ್ರದ ಆಯ್ಕೆ ವಿಚಾರದಲ್ಲಿ ಅವರು ಬಹಳ ಜಾಗರೂಕತೆ ವಹಿಸುತ್ತಾರೆ ಎಂದಿದ್ದರು. ಯಾವುದೇ ಪ್ರಾಜೆಕ್ಟ್ ಗೆ ಸಹಿ ಮಾಡುವ ಮುನ್ನ ಈ ಜೋಡಿ ಪರಸ್ಪರ ಚರ್ಚಿಸಿ, ನಿರ್ಧಾರ ಕೈಗೊಳ್ಳುತ್ತದೆಯಂತೆ.  

2018ರ ಡಿಸೆಂಬರ್ 2ರಂದು ಐರಾ ಜನಿಸಿದಳು. ಅದೇ ತಿಂಗಳ ಡಿಸೆಂಬರ್ 21ರಂದು ಕೆಜಿಎಫ್ ಸಿನಿಮಾ ಬಿಡುಗಡೆಯಾಯಿತು. ಕೆಜಿಎಫ್ ಬಿಡುಗಡೆ ಬಳಿಕ ಯಶ್ ಪ್ಯಾನ್ ಇಂಡಿಯಾ ಸ್ಟಾರ್ ಆಗಿ ಬೆಳೆದರು. ಈ ಸಂದರ್ಭದಲ್ಲಿ ಯಶ್ ಹಲವಾರು ಸಂದರ್ಶನ, ಪ್ರೊಮೋಷನ್ ಅಂತ ಮನೆಯಿಂದ ಆಚೆಯೇ ಇರುತ್ತಿದ್ದರು. ಇಂತಹ  ಸಂದರ್ಭದಲ್ಲಿ ರಾಧಿಕಾ ಕುಟುಂಬದ ಜವಾಬ್ದಾರಿ ಹೊತ್ತುಕೊಂಡರು. ನಂತರ ಕೆಜಿಎಫ್ ಚಾಪ್ಟರ್ ೨ ಸಿನಿಮಾ ಶೂಟಿಂಗ್ ಆರಂಭವಾಯಿತು. 2019ರ ಅಕ್ಟೋಬರ್ 30ರಂದು ಅಥರ್ವ್ ಜನಿಸಿದನು. ಈ ಸಂದರ್ಭದಲ್ಲಿಯೂ ಯಶ್ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದರು. ಇಂತಹ ಸಂದರ್ಭದಲ್ಲಿ ರಾಧಿಕಾ ಪಂಡಿತ್ ತಮ್ಮ ಎರಡು ಮಕ್ಕಳ ಪಾಲನೆ-ಪೋಷಣೆ ಮಾಡಿ ಕುಟುಂಬವನ್ನು ನಿಭಾಯಿಸಿದರು. 

ನಟ ಯಶ್ ಮತ್ತು ರಾಧಿಕಾ ಪಂಡಿತ್ 6 ವರ್ಷಗಳ ಪ್ರೀತಿಸುತ್ತಿದ್ದರು. ಆದರೆ, ಇವರಿಬ್ಬರು ಯಾವುದೇ ಗಾಸಿಪ್ ಪಂಡಿತರ ಬಾಯಿಗೆ ಆಹಾರವಾಗಿರಲಿಲ್ಲ. ಈ ಜೋಡಿ ಗೋವಾದಲ್ಲಿ ಡೇಟಿಂಗ್ ಮಾಡುತ್ತಿದ್ದರು. ರಾಧಿಕಾ ಪಂಡಿತ್ ತಾಯಿಯ ಮೂಲ ಗೋವಾ. ಹೀಗಾಗಿ ಗೋವಾ ಅಂದರೆ ರಾಧಿಕಾಗೆ ಅಚ್ಚುಮೆಚ್ಚು. ಯಶ್ ಮತ್ತು ರಾಧಿಕಾ ಸವಿನೆನಪುಗಳು ಗೋವಾವದಲ್ಲೇ ಹೆಚ್ಚಾಗಿದ್ದವು. ಇವರಿಬರು ವರ್ಷಕ್ಕೆ ನಾಲ್ಕು ಬಾರಿಯಾದರೂ ಗೋವಾಗೆ ತೆರಳುತ್ತಿದ್ದರು. ಈ ಜೋಡಿ 2016ರಲ್ಲಿ ತಮ್ಮ ಎಂಗೇಜ್ಮೆಂಟ್ ಕೂಡ ಗೋವಾದಲ್ಲೇ ಅದ್ಧೂರಿಯಾಗಿ ಮಾಡಿಕೊಂಡಿತ್ತು.  

ರಾಂಕಿಂಗ್ ಸ್ಟಾರ್ ಯಶ್ ಮತ್ತು ರಾಧಿಕಾ ಪಂಡಿತ್ ಮೊದಲ ಬಾರಿಗೆ ' ಮೊಗ್ಗಿನ ಮನಸು' ಸಿನಿಮಾದಲ್ಲಿ ಒಟ್ಟಿಗೆ ನಟಿಸಿದ್ದರು. ಈ ಸಿನಿಮಾ ಹಿಟ್ ಆಯಿತು. ಈ ಚಿತ್ರದ ನಟನೆಗಾಗಿ ರಾಧಿಕಾ ಫಿಲ್ಮ್ ಫೇರ್ ಮತ್ತು ಕರ್ನಾಟಕ ರಾಜ್ಯ ಪ್ರಶಸ್ತಿ ಪಡೆದರು. ಬಳಿಕ ಯಶ್ ಮತ್ತು ರಾಧಿಕಾ ಡ್ರಾಮಾ, ಮಿಸ್ಟರ್ ಅಂಡ್ ಮಿಸಸ್ ರಾಮಾಚಾರಿ, ಸಂತು ಸ್ಟ್ರೈಟ್ ಫಾರ್ವರ್ಡ್ ಸಿನಿಮಾಗಳಲ್ಲಿ ಒಟ್ಟಿಗೆ ನಟಿಸಿದರು. ಈ ಪೈಕಿ ಮಿಸ್ಟರ್ ಅಂಡ್ ಮಿಸಸ್ ರಾಮಾಚಾರಿ ಇವರಿಬ್ಬರಿಗೆ ದೊಡ್ಡಮಟ್ಟದ ಹೆಸರು ತಂದು ಕೊಟ್ಟಿತು. 

ರಾಧಿಕಾ ಪಂಡಿತ್ ನಟಿಯಾಗಬೇಕೆಂಬ ಕನಸು ಕಂಡು ಬೆಳೆದವರಲ್ಲ. ಆದರೂ ಸಹ ಇಂದು ಸ್ಟಾರ್ ನಟಿಯಾಗಿ ಬೆಳೆದಿದ್ದಾರೆ. ಓದು ಮುಗಿಸಿ ಶಿಕ್ಷಕಿಯಾಗಬೇಕು ಎಂದುಕೊಂಡಿದ್ದ ರಾಧಿಕಾ ಪಂಡಿತ್, ಅಂದು ಸ್ನೇಹಿತೆ ಮನವೊಲಿಸಿದ ಕಾರಣ ಇಂದು ನಟಿಯಾಗಿ ಖ್ಯಾತಿ ಗಳಿಸಿದ್ದಾರೆ. ಹಲವು ಹಿಟ್ ಸಿನಿಮಾಗಳಲ್ಲಿ ನಟಿಸಿದ್ದ ರಾಧಿಕಾ, ಮದುವೆ ಬಳಿಕ ಒಂದು ಚಿತ್ರದಲ್ಲಿ ನಟಿಸಿದ್ದರು. ಇದಾದ ಬಳಿಕ ಮಕ್ಕಳ ಪಾಲನೆ-ಪೋಷಣೆಯಲ್ಲಿ ಬ್ಯುಸಿಯಾಗಿದ್ದರು. ಇದೀಗ ರಾಧಿಕಾ ಕಂಬ್ಯಾಕ್ ಮಾಡುವ ಸೂಚನೆ ನೀಡಿದ್ದು, ಒಂದೊಳ್ಳೆ ಕಥೆಗಾಗಿ ಕಾಯುತ್ತಿದ್ದಾರೆ.