ಸ್ಯಾಂಡಲ್‌ವುಡ್‌ ಸ್ಟಾರ್ ನಟರ ಹೆಸರು ಮೊದಲ ಬಾರಿಗೆ ಪರದೆ ಮೇಲೆ ಹೇಗೆ ಮೂಡಿತ್ತುಗೊತ್ತಾ?ಇಲ್ಲಿದೆ ನೋಡಿ ಲಿಸ್ಟ್

ರಂಗಭೂಮಿಯಲ್ಲಿದ್ದ ಮುತ್ತುರಾಜ್ ಚಿತ್ರರಂಗಕ್ಕೆ ಬಂದು ರಾಜ್‌ಕುಮಾರ್ ಆದರು. ಮುತ್ತುರಾಜ್ ಅವರ ಹೆಸರು ಬದಲಾಗಿದ್ದು 1954ರಲ್ಲಿ ಬಂದ 'ಬೇಡರ ಕಣ್ಣಪ್ಪ' ಚಿತ್ರದಲ್ಲಿ. ಈ ಚಿತ್ರದ ಟೈಟಲ್ ಕಾರ್ಡ್‌ನಲ್ಲಿ 'ನಟರು ರಾಜ್‌ಕುಮಾರ್' ಎಂದು ವರನಟರ ಹೆಸರನ್ನು ಮೊದಲ ಬಾರಿಗೆ ಹಾಕಲಾಗಿತ್ತು. ಅವರ ಹೆಸರಿನ ಜೊತೆಗೆ ಅವರ ಪಾತ್ರವನ್ನು ಸಹ ಬರೆಯಲಾಗಿತ್ತು.  

ಕನ್ನಡ ಚಿತ್ರರಂಗದ ದಂತಕಥೆಯಂದೇ ಖ್ಯಾತಿ ಪಡೆದಿರುವ ಶಂಕರ್ ನಾಗ್ 'ಒಂದಾನೊಂದು ಕಾಲದಲ್ಲಿ' ಸಿನಿಮಾದ ಮೂಲಕ ತಮ್ಮ ಸಿನಿಜೀವನ ಆರಂಭಿಸಿದರು. ಈ ಸಿನಿಮಾದ ಟೈಟಲ್ ಕಾರ್ಡ್‌ನಲ್ಲಿ ಸರಳವಾಗಿ 'ಶಂಕರ್ ನಾಗ್' ಎಂದು ಬರೆಸಿದ್ದರು. ಅವರ ಹೆಸರಿನೊಂದಿಗೆ ಸುಂದರ್ ಕೃಷ್ಣ ಅರಸ್ ಅವರ ಹೆಸರು ಕೂಡ ಇತ್ತು. 1978ರಲ್ಲಿ ಬಂದ ಈ ಚಿತ್ರವನ್ನು ಗಿರೀಶ್ ಕಾರ್ನಾಡ್ ನಿರ್ದೇಶನ ಮಾಡಿದ್ದು, ಶಂಕ್ರಣ್ಣ ಗಂಡುಗಲಿ ಎಂಬ ಪಾತ್ರವನ್ನು ನಿರ್ವಹಿಸಿದ್ದರು.

ಕರುನಾಡ ಚಕ್ರವರ್ತಿ ಡಾ.ಶಿವರಾಜ್‌ಕುಮಾರ್ ಪರದೇ ಮೇಲೆ ಬಂದರೆ ಸಾಕು ಚಿತ್ರಮಂದಿರದಲ್ಲಿ ಶಿಳ್ಳೆ-ಚಪ್ಪಾಳೆಗಳ ಸುರಿಮಳೆ ಬೀಳುತ್ತದೆ. ಅಂದಹಾಗೆ, ಶಿವಣ್ಣ 'ಆನಂದ್' ಚಿತ್ರದ ಮೂಲಕ ನಾಯಕನಾಗಿ ಸ್ಯಾಂಡಲ್‌ವುಡ್ ಪ್ರವೇಶಿಸಿದರು. ಈ ಸಿನಿಮಾದಲ್ಲಿ 'ಕನ್ನಡ ಚಿತ್ರರಂಗಕ್ಕೊಂದು ಹೊಸ ಕೊಡುಗೆ ಶಿವರಾಜ್‌ಕುಮಾರ್' ಎಂದು ಟೈಟಲ್ ಕಾರ್ಡ್‌ನಲ್ಲಿ ಪರಿಚಯಿಸಲಾಗಿತ್ತು. 1986ರಲ್ಲಿ ತೆರೆಕಂಡ ಈ ಚಿತ್ರವನ್ನು ಸಂಗೀತಂ ಶ್ರೀನಿವಾಸ್ ರಾವ್ ನಿರ್ದೇಶಿಸಿದ್ದರು. 

ರಿಯಲ್ ಸ್ಟಾರ್ ಉಪೇಂದ್ರ ಅವರು ನಟನಾಗುವ ಮೊದಲು ಕಾಶಿನಾಥ್ ಅವರ ಬಳಿ ಕೆಲಸ ಮಾಡ್ತಿದ್ರು.  'ಅನಂತನ ಅವಾಂತರ' ಚಿತ್ರದಲ್ಲಿ 'ಕಮನ್ ಕಮನ್ ಕಾಮಣ್ಣ..' ಎಂದು ಮೊದಲ ಬಾರಿಗೆ ಹಾಡು ಬರೆದ ಉಪ್ಪಿ ಆ ಹಾಡಿನ ಮೂಲಕ ಫಸ್ಟ್ ಟೈಂ ಸ್ಕ್ರೀನ್ ಮೇಲೆ ಕಾಣಿಸಿಕೊಂಡರು. ಆದರೆ, ಈ ಚಿತ್ರದ ಟೈಟಲ್ ಕಾರ್ಡ್ ರೆಡಿ ಮಾಡುವ ಹುಡುಗರು ಉಪ್ಪಿ ಹೆಸರನ್ನು ಮರೆತು ಬಿಟ್ಟಿದ್ದರಂತೆ. ಆ ಬಳಿಕ ಕಾಶೀನಾಥ್ ಅವರು 'ಕಾಮಣ್ಣನಾಗಿ ಉಪೇಂದ್ರ' ಎಂದು ಉಪ್ಪಿ ಹೆಸರನ್ನು ಸಿಂಗಲ್ ಆಗಿ ಹಾಕಿಸಿದರಂತೆ. 

'ಪ್ರೇಮಲೋಕ' ಸಿನಿಮಾಗೂ ಮೊದಲು ಕ್ರೇಜಿ ಸ್ಟಾರ್ ರವಿಚಂದ್ರನ್ 'ಕದೀಮ ಕಳ್ಳರು' ಎಂಬ ಸಿನಿಮಾದಲ್ಲಿ ಬಣ್ಣಹಚ್ಚಿದ್ದರು. ಈ ಚಿತ್ರವನ್ನು ಅವರೇ ನಿರ್ಮಾಣ ಸಹ ಮಾಡಿದ್ದು, ಟೈಟಲ್ ಕಾರ್ಡ್‌ನಲ್ಲಿ 'ನಿರ್ಮಾಪಕ ರವಿಚಂದ್ರನ್' ಎಂದು ಹೆಸರು ಬಂದಿತ್ತು. ಈ ಹೆಸರಿನೊಂದಿಗೆ ಚಿತ್ರದಲ್ಲಿ ಅವರ ಮುಖ ಜನರಿಗೆ ಕಂಡಿತ್ತು. 

ಇಂದು ಸುದೀಪ್ ಅವರ ಸಿನಿಮಾ ರಿಲೀಸ್ ಆದ್ರೆ ಸಾಕು 'ಕಿಚ್ಚ ಕಿಚ್ಚ' ಅಂತ ಅಭಿಮಾನಿಗಳು ಸಂಭ್ರಮಿಸುತ್ತಾರೆ. ಆದರೆ, ಸುದೀಪ್ ಅವರ ಹೆಸರು ಮೊದಲು ಪರದೆ ಮೇಲೆ 'ಹೊಸ ಪರಿಚಯ ಸುದೀಪ್ ಸಂಜೀವ್' ಎಂದು ಬಂದಿತ್ತು. ಅಭಿನಯ ಚಕ್ರವರ್ತಿ 'ಸ್ಪರ್ಶ' ಚಿತ್ರಕ್ಕೆ ಮುಂಚೆ 'ತಾಯವ್ವ' ಎಂಬ ಚಿತ್ರದಲ್ಲಿ ಅಭಿನಯಿಸಿದ್ದರು. ಈ ಚಿತ್ರದ ಟೈಟಲ್ ಕಾರ್ಡ್‌ನಲ್ಲಿ ಅವರ ಹೆಸರು ಸುದೀಪ್ ಸಂಜೀವ್ ಎಂದಿತ್ತು. 

ಚಾಲೆಂಜಿಂಗ್ ಸ್ಟಾರ್ ದರ್ಸನ್ ನಾಯಕನಾಗಿದ್ದು 'ಮೆಜೆಸ್ಟಿಕ್' ಸಿನಿಮಾದಿಂದ. ಈ ಸಿನಿಮಾದ ಟೈಟಲ್ ಕಾರ್ಡ್‌ನಲ್ಲಿ 'ಹೊಸ ಪರಿಚಯ ದರ್ಶನ್ ತೂಗುದೀಪ' ಎಂದು ಹೆಸರು ಮೂಡಿತ್ತು. ಪಿ.ಎನ್.ಸತ್ಯ ನಿರ್ದೇಶನ ಮಾಡಿದ ಈ ಚಿತ್ರದಲ್ಲಿ ದರ್ಶನ್ ಮಾಸ್ ಹೀರೋ ಎಂಟ್ರಿಕೊಟ್ಟಿದ್ದರು. 

ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ 'ಅಪ್ಪು' ಚಿತ್ರದ ಮೂಲಕ ನಾಯಕನಾಗಿ ಚಂದನವನ ಪ್ರವೇಶಿಸಿದರು. ಅಪ್ಪು ಸಿನಿಮಾದ ಟೈಟಲ್ ಕಾರ್ಡ್‌ನಲ್ಲಿ 'ಪ್ರಥಮ ಬಾರಿಗೆ ನಾಯಕನಾಗಿ ಪುನೀತ್ ರಾಜ್‌ಕುಮಾರ್' ಎಂದು ಬರೆಯಲಾಗಿತ್ತು. ಈ ಚಿತ್ರಕ್ಕೆ ಪೂರಿ ಜಗನ್ನಾಥ್ ಆಕ್ಷನ್ ಕಟ್ ಹೇಳಿದ್ದರು. 

ನಿರೂಪಕನಾಗಿದ್ದ ಗಣೇಶ್ ಅವರ ಗೋಲ್ಡನ್ ಡೇಸ್ ಶುರುವಾಗಿದ್ದು 'ಚೆಲ್ಲಾಟ' ಸಿನಿಮಾದಿಂದ. ಈ ಚಿತ್ರದಲ್ಲಿ ಮೊದಲ ಬಾರಿಗೆ ಗಣೇಶ್ ನಾಯಕನಾಗಿ ಕಾಣಿಸಿಕೊಂಡಿದ್ದರು. 'ಚಿತ್ರದ ಟೈಟಲ್ ಕಾರ್ಡ್ನಲ್ಲಿ 'ಪ್ರಪ್ರಥಮ ಬಾರಿಗೆ ನಾಯಕ ನಟನಾಗಿ ಗಣೇಶ್' ಎಂದು ಬರೆಯಲಾಗಿತ್ತು.  

ಆರಂಭದಲ್ಲಿ ಸಣ್ಣಪುಟ್ಟ ಪಾತ್ರಗಳನ್ನು ಮಾಡುತ್ತಿದ್ದ ವಿಜಯ್ 'ದುನಿಯಾ' ಚಿತ್ರದ ಮೂಲಕ ಹೀರೋ ಆದರು. ಈ ಸಿನಿಮಾದ  ಟೈಟಲ್ ಕಾರ್ಡ್ನಲ್ಲಿ 'ಬೆಳ್ಳಿ ಪರದೆಗೆ ನಾಯಕನಾಗಿ ವಿಜಯ್' ಎಂದು ಅವರನ್ನು ಪರಿಚಯ ಮಾಡಿಸಿದ್ದರು. ಜೊತೆಗೆ ವಿಜಯ್ ಮೊದಲ ಸಿನಿಮಾದಲ್ಲೇ ಸೂಪರ್ ಸಕ್ಸಸ್ ಕಂಡಿದ್ದರು.