ಕಮಲ್ ಹಾಸನ್ ಟು ಕಿಚ್ಚ ಸುದೀಪ್: ಖಳನಾಯಕನ ಪಾತ್ರದಲ್ಲಿ ಅದ್ಭುತವಾಗಿ ನಟಿಸಿ ಗೆದ್ದ ದಕ್ಷಿಣದ ಸೂಪರ್‌ ಸ್ಟಾರ್‌ಗಳು ಇವರು!

ಸೂಪರ್ ಸ್ಟಾರ್ ಆಗಿದ್ದರೂ ಖಳನಾಯಕನ ಪಾತ್ರ ಮಾಡಿ ಗೆದ್ದವರಲ್ಲಿ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಪ್ರಮುಖರು. ಖ್ಯಾತ ನಿರ್ದೇಶಕ ಎಸ್‌.ಎಸ್‌.ರಾಜಮೌಳಿ ನಿರ್ದೇಶನದ ತೆಲುಗಿನ ಬ್ಲಾಕ್‌ಬಸ್ಟರ್ ಸಿನಿಮಾ 'ಈಗ'ದಲ್ಲಿ ಸುದೀಪ್ ತೆಲುಗು ನಟ ನಾಣಿ ಎದುರು ವಿಲನ್ ಆಗಿ ಅಬ್ಬರಿಸಿದ್ದರು. ಈ ಸಿನಿಮಾದ ಇವರ ನಟನೆಗೆ ಪ್ರೇಕ್ಷಕರು ಫಿದಾ ಆಗಿದ್ದರು. ಇದರ ಜೊತೆಗೆ ಸಲ್ಮಾನ್ ಖಾನ್ ಅಭಿನಯದ ದಬ್ಬಾಂಗ್ 3, ತಮಿಳಿನ ದಳಪತಿ ವಿಜಯ್ ನಟನೆಯ ಪುಲಿ,  ತೆಲುಗಿನ ಬಾಹುಬಲಿ ಸಿನಿಮಾಗಳಲ್ಲಿ ನೆಗೆಟಿವ್ ರೋಲ್‌ನಲ್ಲಿ ಮಿಂಚಿದ್ದಾರೆ.

ಲೋಕೇಶ್ ಕನಕರಾಜ್ ನಿರ್ದೇಶನದ 'ವಿಕ್ರಂ' ಸಿನಿಮಾದಲ್ಲಿ ಕಮಲ್ ಹಾಸನ್, ಫಾಹದ್ ಫಾಸಿಲ್, ಸೂರ್ಯ, ವಿಜಯ್ ಸೇತುಪತಿ ಸೇರಿದಂತೆ ಘಟಾನುಘಟಿ ನಾಯಕರಿದ್ದರು. ಈ ಚಿತ್ರದಲ್ಲಿ ನಟ ಸೂರ್ಯ ರೋಲೆಕ್ಸ್ ಎಂಬ ಗ್ಯಾಂಗ್‌ಸ್ಟರ್ ಪಾತ್ರ ನಿರ್ವಹಿಸಿದ್ದರು. ಈ ಸಿನಿಮಾದಲ್ಲಿನ ಸೂರ್ಯ ನಟನೆಗೆ ಅಭಿಮಾನಿಗಳು ಶಿಳ್ಳೆ, ಚಪ್ಪಾಳೆಗಳ ಸುರಿಮಳೆಗೈದಿದ್ದರು. ವಿಕ್ರಂ ಚಿತ್ರದಲ್ಲಿ ಸೂರ್ಯ ಅವರದ್ದು ಅತಿಥಿ ಪಾತ್ರವಾದರೂ ಸಿಕ್ಕಾಪಟ್ಟೆ ಗಮನ ಸೆಳೆದಿದ್ದರು.

2021ರಲ್ಲಿ ತೆರೆಕಂಡ ದಿನೇಶ್ ಪೋತನ್ ನಿರ್ದೇಶನದ 'ಜೋಜಿ' ಸಿನಿಮಾ ಗಮನ ಸೆಳೆದಿದ್ದು, ಫಾಹದ್ ಫಾಸಿಲ್ ಅಭಿನಯದಿಂದಲೇ ಎನ್ನೋದು ಎಲ್ಲರೂ ಒಪ್ಪುವಂಥಾ ವಿಚಾರವೇ. ಶೇಕ್‌ಸ್ಪೀಯರ್‌ನ ಮ್ಯಾಕ್ಬೆತ್ ನಾಟಕವನ್ನು ಆಧರಿಸಿದ ಸೈಕಲಾಜಿಕಲ್ ಡ್ರಾಮಾ ಕಥಾಹಂದರ ಈ ಸಿನಿಮಾದ್ದು. ಇದರಲ್ಲಿ ಫಾಹದ್ ಫಾಸಿಲ್‌ರದ್ದು ನೆಗೆಟಿವ್ ಶೇಡ್‌ನ ಪಾತ್ರ. ತನ್ನ ಕೀಳರಿಮೆ ಹೋಗಲಾಡಿಸಲು ಏನು ಬೇಕಾದರೂ ಮಾಡಲು ತಯಾರಾಗುವ ವ್ಯಕ್ತಿಯ ಪಾತ್ರದಲ್ಲಿ ಫಾಹದ್ ನಿಜಕ್ಕೂ ಅತ್ಯದ್ಭಜುವಾಗಿ ನಟಿಸಿದ್ದರು. ಹಾಗೇ ಪ್ಯಾನ್ ಇಂಡಿಯಾ ಸಿನಿಮಾ 'ಪುಷ್ಪ' ಸಿನಿಮಾದಲ್ಲೂ ನೆಗೆಟಿವ್ ಶೇಡ್‌ನಲ್ಲಿ ಕಾಣಿಸಿಕೊಂಡಿದ್ದರು.

2017ರಲ್ಲಿ ತೆರೆಕಂಡ ತಮಿಳಿನ ಸೂಪರ್ ಹಿಟ್ ಸಿನಿಮಾ 'ವಿಕ್ರಂ ವೇದ'ದಲ್ಲಿ ವಿಜಯ್ ಸೇತುಪತಿ ಖಳನಾಯಕನ ರೋಲ್‌ನಲ್ಲಿ ಕಾಣಿಸಿಕೊಂಡಿದ್ದರು. ಕಳ್ಳ-ಪೊಲೀಸ್ ಆಟದ ಹಿನ್ನೆಲೆಯಲ್ಲೇ ಸರಿ-ತಪ್ಪುಗಳ ವಿಶ್ಲೇಷಣೆ ಸಿನಿಮಾದ ಮೂಲ ಕಥಾವಸ್ತು. ಆರ್. ಮಾಧವನ್, ವಿಜಯ್ ಸೇತುಪತಿ ಜೊತೆ ಕನ್ನಡತಿ ಶ್ರದ್ಧಾ ಶ್ರೀನಾಥ್, ವರಲಕ್ಷ್ಮಿ ಶರತ್‌ ಕುಮಾರ್ ಕೂಡಾ ಈ ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದರು.

ಆನಂದ್ ಶಂಕರ್ ನಿರ್ದೇಶನದ 'ಇರು ಮುಗನ್' ಚಿತ್ರದಲ್ಲಿ ನಯನತಾರಾ, ನಿತ್ಯಾ ಮೆನನ್, ನಾಸಿರ್ ಜೊತೆ ಚಿಯಾನ್ ವಿಕ್ರಂ ನೆಗೆಟಿವ್ ಶೇಡ್‌ನಲ್ಲಿ ಅದ್ಭುತವಾಗಿ ಕಾಣಿಸಿಕೊಂಡಿದ್ದರು. ಈ ಸಿನಿಮಾದಲ್ಲಿ ವಿಕ್ರಂ ದ್ವಿಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಅದರಲ್ಲಿ ಒಂದು ಪಾತ್ರ ಹೀರೋ, ಮತ್ತೊಂದು ವಿಲನ್. ರಾ ಏಜೆಂಟ್ ಆಗಿ ಒಂದು ಪಾತ್ರ, ತೃತೀಯ ಲಿಂಗಿಯಾಗಿ ಮತ್ತೊಂದು ಪಾತ್ರದಲ್ಲಿ ವಿಕ್ರಂ ಅದ್ಭುತ ಪರ್ಫಾರ್ಮೆನ್ಸ್ ನೀಡಿದ್ರು. 2016ರಲ್ಲಿ ಬಿಡುಗಡೆಯಾದ ಈ ಚಿತ್ರ ಒಂದು ಮಾಸ್ ಎಂಟರ್‌ಟೈನರ್ ಆಗಿ ಗೆದ್ದಿತ್ತು.

2009ರಲ್ಲಿ ಬಿಡುಗಡೆಯಾದ ರಂಜಿ ನಿರ್ದೇಶನದ 'ಪಲೇರಿ ಮಾಣಿಕ್ಯಂ' ಚಿತ್ರದಲ್ಲಿ ಮುಮ್ಮುಟಿ ನೆಗೆಟಿವ್ ಶೇಡ್‌ನಲ್ಲಿ ಕಾಣಿಸಿಕೊಂಡಿದ್ರು. ಇದೊಂದು ಮಿಸ್ಟರಿ ಕ್ರೈಮ್ ಕಥೆಯ ಹಿನ್ನೆಲೆ ಹೊಂದಿರುವ ಸಿನಿಮಾವಾಗಿದ್ದು, ಮೈಥಿಲಿ, ಶ್ವೇತಾ ಮೆನನ್, ಶ್ರೀನಿವಾಸನ್ ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿದ್ದರು. ದೆಹಲಿಯ ಒಬ್ಬ ಪ್ರೈವೇಟ್ ಡಿಟೆಕ್ಟಿವ್ ತನ್ನೂರಿಗೆ ಒಂದು ಮರ್ಡರ್ ಇನ್ವೆಸ್ಟಿಗೇಶನ್ ಮಾಡಲು ಬರುವ ಕಥೆ ಹೊಂದಿದ್ದ ಈ ಸಿನಿಮಾದಲ್ಲಿ ಮುಮ್ಮುಟಿ ಜಮೀನ್ದಾರನಾಗಿ ನೆಗೆಟಿವ್ ಶೇಡ್‌ನಲ್ಲಿ ಮಿಂದಿದ್ದರು.

ದಳಪತಿ ವಿಜಯ್ ಡಬಲ್ ರೋಲ್‌ನಲ್ಲಿ ಕಾಣಿಸಿಕೊಂಡ ಸಿನಿಮಾ 'ಅಳಗಿಯ ತಮಿಳ್ ಮಗನ್'. ಈ ಸಿನಿಮಾದಲ್ಲಿ ಹೀರೋ ಹಾಗೂ ವಿಲನ್ ಎರಡು ಪಾತ್ರಗಳನ್ನು ವಿಜಯ್ ಅಚ್ಚುಕಟ್ಟಾಗಿ ನಿಭಾಯಿಸಿದ್ದರು. 2007ರಲ್ಲಿ ತೆರೆಕಂಡ ಈ ಸಿನಿಮಾ ಕಮರ್ಷಿಯಲ್ ಸಕ್ಸಸ್ ಜೊತೆಗೆ ವಿಜಯ್ ನಟನೆಗೆ ಸಾಕಷ್ಟು ಮೆಚ್ಚುಗೆ ವ್ಯಕ್ತವಾಗಿತ್ತು.

2001ರಲ್ಲಿ ತೆರೆಕಂಡ ಸುರೇಶದ ಕೃಷ್ಣ ನಿರ್ದೇಶನದ 'ಆಳಾದವನ್' ಚಿತ್ರದ ಕತೆಯನ್ನು ಖುದ್ದು ಕಮಲ್ ಹಾಸನ್ ಬರೆದಿದ್ದರು. ಬಾಲಿವುಡ್ ಬೆಡಗಿಯರಾದ ಮನೀಶಾ ಕೊಯಿರಾಲ ಮತ್ತು ರವೀನಾ ಟಂಡನ್ ಕಮಲ್‌ಗೆ ಸಾಥ್ ಕೊಟ್ಟ ಸಿನಿಮಾ ಇದು. ಹುಚ್ಚಾಸ್ಪತ್ರೆಯಿಂದ ತಪ್ಪಿಸಿಕೊಂಡ ಒಬ್ಬ ಮಾನಸಿಕ ಸಮಸ್ಯೆಯಿರುವ ವ್ಯಕ್ತಿಯ ಕಥೆ ಹೊಂದಿದ್ದ ಈ ಸಿನಿಮಾದಲ್ಲಿ ಕಮಲ್ ದ್ವಿಪಾತ್ರದಲ್ಲಿ ನಟಿಸಿದ್ದರು. ಈ ಚಿತ್ರದಲ್ಲಿ ಅವರ ಹೀರೋ ರೋಲ್ಗಿಂತ ವಿಲನ್ ರೋಲ್‌ಗೆ ಸಿನಿರಸಿಕರು ಫಿದಾ ಆಗಿದ್ದರು.

ವಾಲಿ ಹೆಸರಿನ ಸಿನಿಮಾ ಕನ್ನಡದಲ್ಲೂ ರೀಮೆಕ್ ಆಗಿದ್ದು ನಿಮಗೆ ನೆನಪಿರಬಹುದು. ತಲಾ ಅಜಿತ್ ಕುಮಾರ್ ದ್ವಿಪಾತ್ರದಲ್ಲಿ ನಟಿಸಿರುವ ಈ ಚಿತ್ರದಲ್ಲಿ ನಾಯಕ ಎಷ್ಟು ಹ್ಯಾಂಡ್ಸಮ್ ಅನಿಸುತ್ತಾನೋ, ಖಳನಟ ಅಜಿತ್ ಅಷ್ಟೇ ಕುತಂತ್ರಿ ಎನಿಸಿಕೊಳ್ಳುತ್ತಾನೆ. 1999ರಲ್ಲಿ ತೆರೆಕಂಡ ಈ ಸಿನಿಮಾ ಅನೇಕ ಪ್ರಶಸ್ತಿ ಪುರಸ್ಕಾರಗಳನ್ನು ಬಾಚಿಕೊಂಡಿತ್ತು.