ಫೈಟ್ ಸೀನ್‌ಗಳಿಲ್ಲದಿದ್ದರೂ ಸೂಪರ್ ಹಿಟ್ ಆದ ಕನ್ನಡ ಸಿನಿಮಾಗಳಿವು!

ಸಿಂಪಲ್ ಸ್ಟಾರ್ ರಕ್ಷಿತ್ ಶೆಟ್ಟಿ ನಟಿಸಿದ್ದ ಹಾಗೂ ಸಿಂಪಲ್ ಸುನಿ ನಿರ್ದೇಶಿಸಿದ್ದ 'ಸಿಂಪಲ್ಲಾಗ್ ಒಂದ್ ಲವ್ ಸ್ಟೋರಿ' ಸಿನಿಮಾ ಸರಳ ಪ್ರೇಮಕಥೆಗೆ ವಿನೂತನ ನಿರೂಪಣೆ ಹೊಂದಿತ್ತು. ಅದ್ಭುತ ಡೈಲಾಗ್, ಕಥೆಯಲ್ಲಿ ಬರುವ ಟ್ವಿಸ್ಟ್ ಈ ಚಿತ್ರದ ಜೀವಾಳ. ಅಂದ್ಹಾಗೆ ರಕ್ಷಿತ್ ಶೆಟ್ಟಿಗೆ ಕನ್ನಡ ಚಿತ್ರರಂಗದಲ್ಲಿ ಮೊದಲು ಬ್ರೇಕ್ ನೀಡಿದ ಸಿನಿಮಾವಿದು. ಇದರಲ್ಲಿ ಯಾವುದೇ ಫೈಟ್ ಸೀನ್‌ಗಳು ಇರಲಿಲ್ಲ. ಆದರೆ, ಇಂದಿಗೂ ಸಿನಿಮಾ ಪ್ರೇಕ್ಷಕರ ಮನಸ್ಸಿನಲ್ಲಿ ಖಾಯಂ ಸ್ಥಾನ ಪಡೆದುಕೊಂಡಿದೆ.

ಸಿಂಪಲ್ ಸ್ಟಾರ್ ರಕ್ಷಿತ್ ಶೆಟ್ಟಿ ನಟನೆಯ 777 ಚಾರ್ಲಿ ಸಿನಿಮಾದಲ್ಲೂ ಯಾವುದೇ ಫೈಟ್ ಸೀನ್ ಇರಲಿಲ್ಲ. ಕಿರಣ್ ರಾಜ್ ಕೆ ನಿರ್ದೇಶನದ ಮನುಷ್ಯ ಮತ್ತು ನಾಯಿಯ ಬಾಂಧವ್ಯದ ಭಾವುಕ ಕಥನ ಹೊಂದಿದ್ದ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. 777 ಚಾರ್ಲಿ  ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಬಿಡುಗಡೆಯಾಗಿದ್ದು, ಐದು ಭಾಷೆಗಳಲ್ಲೂ ಜನರು ಈ ಸಿನಿಮಾ ಮೆಚ್ಚಿಕೊಂಡಿದ್ದರು.

ಸಾಧು ಕೋಕಿಲ ನಿರ್ದೇಶನದ ಮೊದಲ ಬಾರಿಗೆ ಆಕ್ಷನ್ ಕಟ್ ಹೇಳಿದ್ದ ಸಿನಿಮಾ 'ರಕ್ತಕಣ್ಣೀರು'. ಕನ್ನಡ ಮತ್ತು ತೆಲುಗು ಭಾಷೆಯಲ್ಲಿ ಏಕಕಾಲದಲ್ಲಿ ತಯಾರಾದ ಈ ಚಿತ್ರದಲ್ಲಿ ರಿಯಲ್ ಸ್ಟಾರ್ ಉಪೇಂದ್ರ ನಾಯಕನಾಗಿ ನಟಿಸಿದ್ದರು. ಚಿತ್ರದಲ್ಲಿ ಮೋಹನನಾಗಿ ಉಪ್ಪಿ ನಟನೆಯನ್ನು ಯಾರು ಮರೆಯಲು ಸಾಧ್ಯವಿಲ್ಲ. ಸಿನಿಮಾದ ಡೈಲಾಗ್‌ಗಳಂತೂ ಒಂದಕ್ಕಿಂತ ಒಂದು ಸೂಪರ್.  2003ರಲ್ಲಿ ಬಿಡುಗಡೆಯಾದ ಈ ಸಿನಿಮಾ ಸೆನ್ಸೇಷನ್ ಕ್ರಿಯೇಟ್ ಮಾಡಿತ್ತು. ಇದರಲ್ಲೂ ಯಾವುದೇ ರೀತಿಯ ಫೈಟ್ ಸೀನ್‌ಗಳು ಇರಲಿಲ್ಲ.  

2024ರಲ್ಲಿ ಬಿಡುಗಡೆಯಾದ ದಿಯಾ ಖ್ಯಾತಿಯ ದೀಕ್ಷಿತ್ ಶೆಟ್ಟಿ ಅಭಿನಯದ ಬ್ಲಿಂಕ್ ಸಿನಿಮಾ ಕನ್ನಡಿಗರು ಸೇರಿದಂತೆ ಪರಭಾಷಿಗರನ್ನು ಸೆಳೆದಿತ್ತು. ಇದೊಂದು ಟೈಮ್ ಟ್ರಾವೆಲಿಂಗ್ ಚಿತ್ರವಾಗಿದ್ದು, ಓರ್ವ ಸಾಮಾನ್ಯ ಹುಡುಗನ ಜೀವನದಲ್ಲಿ ಎದುರಾಗುವ ಘಟನೆಗಳು, ವಿವಿಧ ಆಯಾಮಗಳು ಸಿನಿಮಾದ ಜೀವಾಳ. ಪ್ರೇಕ್ಷಕರನ್ನು 1996, 2001, 2021, 2035ರ ನಡುವಿನ ಪ್ರಯಾಣಕ್ಕೆ ಕರೆದೊಯ್ದಿದ್ದ ಬ್ಲಿಂಕ್‌ನಲ್ಲೂ ಕೂಡ ಯಾವುದೇ ಫೈಟ್ ಸಿನಿಮಾಗಳಿರಲಿಲ್ಲ.

ಅಶೋಕ್ ಕೆ.ಎಸ್ ನಿರ್ದೇಶನದಲ್ಲಿ ಮೂಡಿಬಂದ ರೊಮ್ಯಾಂಟಿಕ್ ಟ್ರ್ಯಾಜಿಡಿ ಚಿತ್ರ ದಿಯಾ. ತ್ರಿಕೋನ ಪ್ರೇಮಕಥೆಯೊಂದಿಗೆ ತಾಯಿ-ಮಗನ ಅದ್ಭುತ ಬಾಂಧವ್ಯವನ್ನು ಹೊಂದಿದ್ದ ಈ ಸಿನಿಮಾದಲ್ಲೂ ಯಾವುದೇ ಫೈಟ್ ಸೀನ್‌ಗಳಿರಲಿಲ್ಲ.  ಫೃಥ್ವಿ ಅಂಬರ್, ದೀಕ್ಷಿತ್ ಶೆಟ್ಟಿ ಹಾಗೂ ಖುಷಿ ರವಿ ಪ್ರಮುಖ ಪಾತ್ರದಲ್ಲಿ ಮುಖ್ಯ ಪಾತ್ರದಲ್ಲಿ ಅಭಿನಯಿಸಿದ್ದ ಈ ಚಿತ್ರ ಸೂಪರ್ ಹಿಟ್ ಆಗಿತ್ತು.