ಈ ವರ್ಷ ಅಂತರ್ ಧರ್ಮೀಯ ಮದುವೆಯಾದ ತಾರೆಯರಿವರು!

ಸೌತ್ ಬ್ಯೂಟಿ ಕೀರ್ತಿ ಸುರೇಶ್ ಅವರು 2024ರ ಡಿಸೆಂಬರ್ 12ರಂದು ತಮ್ಮ ಬಹುಕಾಲದ ಗೆಳೆಯ ಆಂಟೋನಿ ಥಟ್ಟಿಲ್ ಅವರೊಂದಿಗೆ ಮದುವೆಯಾದರು. ಇವರದ್ದು ಅಂತರ್ ಧರ್ಮೀಯ ವಿವಾಹ. ಕೀರ್ತಿ ಅಯ್ಯಂಗರ್ ಹುಡುಗಿ, ದುಬೈ ಮೂಲದ ಉದ್ಯಮಿಯಾಗಿರುವ ಆಂಟೋನಿ ಥಟ್ಟಿಲ್ ಕ್ರಿಶ್ಚಿಯನ್. ಇವರಿಬಬ್ರು ಮೊದಲು ಗೋವಾದಲ್ಲಿ ಮೊದಲು ಬ್ರಾಹ್ಮಣ ಸಂಪ್ರದಾಯದಂತೆ ಸಪ್ತಪದಿ ತುಳಿದರು. ಆನಂತರ ಕ್ರಿಶ್ಚಿಯನ್ ಸಂಪ್ರದಾಯದಂತೆಯೂ ಮದುವೆಯಾಗಿದ್ದಾರೆ. ಅಂದ್ಹಾಗೆ ಇವರಿಬ್ಬರು 14 ವರ್ಷಗಳಿಂದ ಸ್ನೇಹಿತರಾಗಿದ್ದರು.

ಬಾಲಿವುಡ್ ಬೆಡಗಿ ಸೋನಾಕ್ಷಿ ಸಿನ್ಹಾ ತಮ್ಮ ಬಹುಕಾಲದ ಗೆಳೆಯ ಜಹೀರ್ ಇಕ್ಬಾಲ್ ಅವರೊಂದಿಗೆ ಮದುವೆಯಾದರು. ಸೋನಾಕ್ಷಿಯವರು ಹಿಂದೂ ಆದರೆ, ಜಹೀರ್ ಇಕ್ಬಾಲ್ ಮುಸ್ಲಿಂ. ಕಳೆದ ಏಳು ವರ್ಷಗಳಿಂದ ಪರಸ್ಪರ ಪ್ರೀತಿಸುತ್ತಿದ್ದ ಈ ಜೋಡಿ 2024ರ ಜೂನ್ ತಿಂಗಳಲ್ಲಿ ವಿವಾಹ ಬಂಧನಕ್ಕೊಳಗಾದರು.

ತಮಿಳಿನ ಖ್ಯಾತ ನಟ  ಶರತ್‌ಕುಮಾರ್ ಪುತ್ರಿ ವರಲಕ್ಷ್ಮೀ ಕೂಡ ಈ ವರ್ಷ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ವರಲಕ್ಷ್ಮೀ ತಮ್ಮ ದೀರ್ಘ ಕಾಲದ ಗೆಳೆಯ ನಿಕೋಲೈ ಸಚ್‌ದೇವ್ ಅವರೊಂದಿಗೆ ಮದುವೆಯಾದರು. ವರಲಕ್ಷ್ಮೀ ಶರತ್‌ಕುಮಾರ್ ಹಿಂದುವಾದರೆ, ನಿಕೋಲೈ ಕ್ರಿಶ್ಚಿಯನ್. ಹೀಗಾಗಿ, ಈ ಜೋಡಿ ಧೈಲ್ಯಾಂಡ್‌ನಲ್ಲಿ ಹಿಂದೂ-ಕ್ರಿಶ್ಚಿಯನ್ ಸಂಪ್ರದಾಯದಂತೆ ಮದುವೆಯಾದರು. ಅಂದ್ಹಾಗೆ, ವರಲಕ್ಷ್ಮೀ ಇತ್ತೀಚೆಗೆಗಷ್ಟೇ ಬಿಡುಗಡೆಯಾದ ಕಿಚ್ಚ ಸುದೀಪ್ ನಟನೆಯ ಮ್ಯಾಕ್ಸ್ ಸಿನಿಮಾದಲ್ಲಿ ನೆಗೆಟಿವ್ ಪಾತ್ರ ನಿರ್ವಹಿಸುವ ಮೂಲಕ ಗಮನ ಸೆಳೆದಿದ್ದಾರೆ.

ಚಂದನವನದಲ್ಲಿ ನಟನಾಗಿ, ನಿರ್ದೇಶಕನಾಗಿ ಕನ್ನಡಿಗರ ಮನಗೆದ್ದಿರುವ ತರುಣ್‌ ಸುಧೀರ್‌ ಹಾಗೂ ನಟಿ ಸೋನಲ್ ಮೊಂಥೆರೋ 2024ರ ಆಗಸ್ಟ್ 11ರಂದು ಪ್ರೀತಿಸಿ ಮದುವೆಯಾಗಿದ್ದರು. ಸೋನಲ್ ಕ್ರಿಶ್ಚಿಯನ್ ಆದರೆ, ತರುಣ್ ಸುಧೀರ್ ಹಿಂದೂ. ಹೀಗಾಗಿ ಬೆಂಗಳೂರಿನಲ್ಲಿ ಹಿಂದೂ ಸಂಪ್ರದಾಯದಂತೆ ಮದುವೆಯಾದ ಇವರು, ಮಂಗಳೂರಿನಲ್ಲಿ ಕ್ರಿಶ್ಚಿಯನ್ ಸಂಪ್ರದಾಯದಂತೆ ಮತ್ತೊಮ್ಮೆ ಮದುವೆಯಾದರು. ಇವರಿಬ್ಬರಿಗೂ ದರ್ಶನ್ ನಟನೆಯ ರಾಬರ್ಟ್ ಸಿನಿಮಾ ಚಿತ್ರೀಕರಣದ ಸಂದರ್ಭ ಪ್ರೀತಿಯಾಗಿತ್ತಂತೆ. ರಾಬರ್ಟ್ ಸಿನಿಮಾವನ್ನು ತರುಣ್ ಅವರೇ ನಿರ್ದೇಶನ ಮಾಡಿದ್ದರು.