ಕನ್ನಡ ಕಿರುತೆರೆಗೆ ಎಂಟ್ರಿಕೊಡಲು ಸಜ್ಜಾದ ಹೊಸ ಸೀರಿಯಲ್ & ರಿಯಾಲಿಟಿ ಶೋಗಳಿವು!

ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಶೀಘ್ರದಲ್ಲೇ ವಧು ಎಂಬ ಧಾರಾವಾಹಿ ಆರಂಭವಾಗುತ್ತಿದೆ. ಈಗಾಗಲೇ ಈ ಸೀರಿಯಲ್‌ನ ಪ್ರೋಮೋಗಳು ಬಿಡುಗಡೆಯಾಗಿದ್ದು, ಈ ಹಿಂದೆ ಕಲರ್ಸ್ ಕನ್ನಡದ ಬಿಜಿನೆಸ್ ಹೆಡ್ ಆಗಿದ್ದ ಪರಮೇಶ್ವರ್ ಗುಂಡ್ಕಲ್ ನಿರ್ದೇಶನ ಮಾಡುತ್ತಿದ್ದಾರೆ. ಈ ಧಾರಾವಾಹಿಯಲ್ಲಿ ದುರ್ಗಾಶ್ರೀ, ಅಭಿಷೇಕ್ ಶ್ರೀಕಾಂತ್, ಟಿ.ಎನ್ ಸೀತಾರಾಮ್ ಸೇರಿದಂತೆ ಹಲವರು ತಾರಾಗಣದಲ್ಲಿದ್ದಾರೆ. ದಿಲೀಪ್ ರಾಜ್ ದಂಪತಿ ಭಂಡವಾಳ ಹೂಡುತ್ತಿದ್ದಾರೆ.

ವಧು ಮಾತ್ರವಲ್ಲದೇ, ಕಲರ್ಸ್ ಕನ್ನಡದಲ್ಲಿ 'ಯಜಮಾನ' ಎಂಬ ಮತ್ತೊಂದು ಧಾರಾವಾಹಿ ಆರಂಭವಾಗ್ತಿದೆ.  ಜನವರಿ 12ರಂದು ಈ ಸೀರಿಯಲ್‌ನ ಮೊದಲ ಪ್ರೋಮೋ ರಿಲೀಸ್ ಆಗಿದ್ದು, ಇನ್‌ಸ್ಟಾಗ್ರಾಮ್ ಇನ್‌ಪ್ಲುಯೆನ್ಸರ್ ಮಧುಶ್ರೀ ಭೈರಪ್ಪ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ನಾಯಕನಾಗಿ ಹರ್ಷ ಬಿ.ಎಸ್ ಬಣ್ಣಹಚ್ಚಿದ್ದಾರೆ. ಶ್ರೀಮಂತಿಕೆಯ ದರ್ಪ ಹಾಗೂ ಬಡವನ ಶ್ರಮ ಎಂಬ ಕಾನ್ಸೆಪ್ಟನಲ್ಲಿ ಯಜಮಾನ ಧಾರಾವಾಹಿ ಮೂಡಿಬರುತ್ತಿದೆ. ಕೋಪ, ದ್ವೇಷ , ಅಹಂಕಾರ ತುಂಬಿಕೊಂಡಿರುವ ಹುಡುಗಿ ಹಾಗೂ ಪ್ರೀತಿ, ವಿಶ್ವಾಸ, ಸ್ನೇಹ ಹುಡುಗ. ಅಪ್ಪಿತಪ್ಪಿ ಇವರಿಬ್ಬರೂ ಮದುವೆಯಾದರೆ ಏನಾಗಲಿದೆ ಎಂಬುದೇ ಸೀರಿಯಲ್ ಕಥೆ. ಈ ಎರಡು ಧಾರಾವಾಹಿಗಳು ಬಿಗ್‌ಬಾಸ್ ಗ್ರ್ಯಾಂಡ್ ಫಿನಾಲೆ ಮುಗಿನ ಬಳಿಕ ಪ್ರಸಾರವಾಗಲಿವೆ.

ಕನ್ನಡದ ಜನಪ್ರಿಯ ಕಾರ್ಯಕ್ರಮಗಳಲ್ಲಿ ಒಂದಾದ ಸೃಜನ್ ಲೋಕೇಶ್ ನಿರೂಪಣೆಯ 'ಮಜಾ ಟಾಕೀಸ್' ಇದೇ ಫೆಬ್ರವರಿ 1ರಿಂದ ಆರಂಭವಾಗುತ್ತಿದೆ. ಈ ಬಾರಿಯ ಮಜಾ ಟಾಕೀಸ್‌ನಲ್ಲಿ ಸೃಜನ್ ಜೊತೆಗೆ ಯೋಗರಾಜ್ ಭಟ್, ಪ್ರಿಯಾಂಕಾ ಶಿವಣ್ಣ, ಬಿಗ್‌ಬಾಸ್‌ ಸೀಸನ್ 10 ಸ್ಪರ್ಧಿ ತುಕಾಲಿ ಸಂತೋಷ್, ನಟ ವಿಶ್ವಾಸ್, ವಿನೋದ್ ಗೊಬ್ಬರಗಾಲ, ಪ್ರಿಯಾಂಕಾ ಕಾಮತ್, ಶಿವು, ಚಂದ್ರಪ್ರಭಾ ಸೇರಿದಂತೆ ಕಲಾವಿದರ ದಂಡೇ ಸೇರಿಕೊಂಡಿದೆ. ಒನ್‌ ಆಂಡ್ ಒನ್ಲಿ ವರಲಕ್ಷ್ಮೀ ಮಿಂಚಿದ್ದ ಅಪರ್ಣಾ, ಜನ್ ಪತ್ನಿಯಾಗಿ ಕಾಣಿಸಿಕೊಳ್ಳುತ್ತಿದ್ದ ರಾಣಿ ಅಲಿಯಾಸ್ ಶ್ವೇತಾ ಚಂಗಪ್ಪ, ಮುದ್ದು ಸರೋಜ ಎಂದೇ ಪ್ರಸಿದ್ಧರಾಗಿದ್ದ ಪವನ್, ಮಂಡ್ಯ ರಮೇಶ್ ಸೇರಿದಂತೆ ಹಲವರು ಮಿಸ್ ಆಗಿದ್ದಾರೆ.

ಜೀ ಕನ್ನಡ ವಾಹಿನಿಯಲ್ಲಿ ಶೀಘ್ರದಲ್ಲೇ 'ನಾ ನಿನ್ನ ಬಿಡಲಾರೆ' ಎಂಬ ಹಾರರ್ ಶೈಲಿಯ ಧಾರಾವಾಹಿ ಆರಂಭವಾಗಲಿದೆ. ಈ ಸೀರಿಯಲ್‌ನಲ್ಲಿ ಪಾರು ಸೀರಿಯಲ್ ಖ್ಯಾತಿಯ ಶರತ್ ಪದ್ಮನಾಭ್, ವಿಕ್ರಾಂತ ರೋಣ ಬೆಡಗಿ ನೀತಾ ಅಶೋಕ್, ಮಹಿತಾ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ. ಕರುಳಬಳ್ಳಿಯ ಕಾಪಾಡಲು ಹೋರಾಡೋ ಅಮ್ಮನ ‘ಆತ್ಮ’ಕತೆ ಎಂಬ ಅಡಿಬರಹವಿರುವ ಈ ಸೀರಿಯಲ್ ಜನವರಿ 27ರಿಂದ ಪ್ರಸಾರ ಕಾಣ್ತಿದೆ.

ಜೀ ಕನ್ನಡ ವಾಹಿನಿಯಲ್ಲಿ 'ಶ್ರೀ ರಾಘವೇಂದ್ರ ಮಹಾತ್ಮೆ' ಎಂಬ ಭಕ್ತಿಪ್ರಧಾನ ಹಿನ್ನೆಲೆಯುಳ್ಳ ಧಾರಾವಾಹಿ ಪ್ರಸಾರವಾಗುವುದಾಗಿ ಈ ಹಿಂದೆ ಘೋಷಣೆಯಾಗಿತ್ತು. ಸದ್ಯ ಈ ಧಾರಾವಾಹಿಗೆ ಅಡಿಷನ್ಸ್ ಪ್ರಕ್ರಿಯೆ ಸಂಪೂರ್ಣಗೊಂಡಿದ್ದು, ಮುಖ್ಯ ಪಾತ್ರಧಾರಿಗಳನ ಆಯ್ಕೆಯೂ ಪೂರ್ಣಗೊಂಡಿದೆಯಂತೆ. ಮಾರ್ಚ್ ತಿಂಗಳ ವೇಳೆಗೆ ಈ ಸೀರಿಯಲ್ ಆರಂಭವಾಗುವ ಸಾಧ್ಯತೆಯಿದೆ.