ಸೂರ್ಯವಂಶ ಟು ಮಾಣಿಕ್ಯ: ಅಪ್ಪ-ಮಗನ ಬಾಂಧವ್ಯದ ಕುರಿತ ಈ ಸಿನಿಮಾಗಳನ್ನು ಮಿಸ್ ಮಾಡದೇ ನೋಡಿ!

ಹೇಮಂತ್ ರಾವ್ ನಿರ್ದೇಶನದಲ್ಲಿ ಮೂಡಿಬಂದಿದ್ದ 'ಗೋಧಿ ಬಣ್ಣ ಸಾಧಾರಣ ಮೈಕಟ್ಟು' ಚಿತ್ರದಲ್ಲಿ ರಕ್ಷಿತ್ ಶೆಟ್ಟಿಯವರು ಅನಂತ್ ನಾಗ್ ಅವರ ಮಗನ ಪಾತ್ರದಲ್ಲಿ ನಟಿಸಿದ್ದರು. ಇದೊಂದು ತಂದೆ ಮತ್ತು ಮಗನ ಕಥೆ  ಹೇಳುವ ಸಿನಿಮಾ.  ವಯಸ್ಸಾದ ತಂದೆ-ತಾಯಿಯರನ್ನ ವೃದ್ಧಾಶ್ರಮಕ್ಕೆ ದೂಡುವ ಇಂದಿನ ಯುವ ಪೀಳಿಗೆ ಕಟ್ಟುನಿಟ್ಟಾಗಿ ನೋಡಲೇಬೇಕಾದ ಚಿತ್ರವಿದು. ತಂದೆ-ತಾಯಿಯ ಮೇಲೆ ಪ್ರೀತಿಯಿರುವ ಅಥವಾ ಕೋವಿರುವ ಪ್ರತಿಯೊಬ್ಬ ಮಕ್ಕಳೂ ಈ ಚಿತ್ರವನ್ನು ಮಿಸ್ ಮಾಡದೇ ನೋಡಬೇಕು. ಸಿನಿಮಾದಲ್ಲಿ ಅನಂತ್  ಮರುವಿನ ಖಾಯಿಲೆಯಿರುವ ಅಪ್ಪನಾಗಿ ಎಲ್ಲಾ ಮಕ್ಕಳಿಗೂ ಪಾಠ ಹೇಳಿದ್ದರು.

2006ರಲ್ಲಿ ತೆರೆಕಂಡ ರೆಬಲ್ ಸ್ಟಾರ್ ಅಂಬರೀಶ್ ಹಾಗೂ ರಿಯಲ್ ಸ್ಟಾರ್ ಉಪೇಂದ್ರ ಅವರ ಕಾಂಬಿನೇಷನ್‌ನ ಸಿನಿಮಾ 'ತಂದೆಗೆ ತಕ್ಕ ಮಗ'. ಈ ಚಿತ್ರದಲ್ಲಿ ತನ್ನ ತಂದೆಯ ಹಠಾತ್ ಮರಣದಿಂದ ಸತ್ಯ (ಉಪೇಂದ್ರ) ತನ್ನ ಪ್ರೀತಿಸಿದ ಹುಡುಗಿಯನ್ನು ಬಿಟ್ಟು ತಂದೆಯನ್ನು ಘನತೆಯನ್ನು ಕಾಪಾಡಲು ಬೇರೆ ಯುವತಿಯನ್ನು ಮದುವೆಯಾಗುತ್ತಾನೆ. ಬಳಿಕ ಅವರಿಬ್ಬರು ಸಂತೋಷದ ವೈವಾಹಿಕ ಜೀವನ ನಡೆಸಲು ಹೇಗೆ ಹೆಣಗಾಡುತ್ತಾರೆ ಎಂಬುದು ಚಿತ್ರದ ಕಥೆ. ಈ ಸಿನಿಮಾದಲ್ಲಿ ತಂದೆ-ಮಗನ ಒಂದು ಸುಂದರ ಬಾಂಧವ್ಯ ನೋಡಬಹುದು.  

ಎಸ್.ನಾರಾಯಣ್ ನಿರ್ದೇಶನದಲ್ಲಿ ಮೂಡಿಬಂದ ಸೂರ್ಯವಂಶ ಚಿತ್ರದಲ್ಲಿ ಸಾಹಸಸಿಂಹ ಡಾ.ವಿಷ್ಣುವರ್ಧನ್ ಅಪ್ಪ ಮತ್ತು ಮಗನಾಗಿ ದ್ವಿಪಾತ್ರದಲ್ಲಿ ನಟಿಸಿದ್ದರು. ಇದು 1997ರಲ್ಲಿ ತಮಿಳಿನಲ್ಲಿ ತೆರೆಕಂಡಿದ್ದ ಸೂರ್ಯವಂಶಂ ಚಿತ್ರದ ರಿಮೇಕ್. ಪಕ್ಕಾ ಕೌಟುಂಬಿಕ ಮನೋರಂಜನೆ ಹೊಂದಿದ್ದ ಈ ಸಿನಿಮಾದಲ್ಲಿ 'ಸತ್ಯಮೂರ್ತಿ' ಪಾತ್ರಕ್ಕೆ ಪ್ರೇಕ್ಷಕರು ಫಿದಾ ಆಗಿದ್ದರು. ಜೊತೆಗೆ ಅಪ್ಪ ಕನಕಮೂರ್ತಿಯಾಗಿ ವಿಷ್ಣುವರ್ಧನ್ ಮೀಸೆ ಬಿಟ್ಟು ವಿಭಿನ್ನ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದರು. ಅಪ್ಪ-ಮಗನ ಬಾಂಧವ್ಯದ ಕಥೆ ಹೊಂದಿದ್ದ ಈ ಸಿನಿಮಾವನ್ನು ಡಾ.ರಾಜ್‌ಕುಮಾರ್, ಅಮಿತಾಬ್ ಬಚ್ಚನ್, ರಜನಿಕಾಂತ್ ಸೇರಿದಂತೆ ದೊಡ್ಡ-ದೊಡ್ಡ ನಟರು ಮೆಚ್ಚಿಕೊಂಡಿದ್ದರು.

ತೆಲುಗಿನ ಮಿರ್ಚಿ ಚಿತ್ರದ ರಿಮೇಕ್ ಆದ 'ಮಾಣಿಕ್ಯ' ಸಿನಿಮಾದಲ್ಲಿ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಮಗನಾಗಿ ಹಾಗೂ ಕ್ರೇಜಿಸ್ಟಾರ್ ರವಿಚಂದ್ರನ್ ಅಪ್ಪನಾಗಿ ಕಾಣಿಸಿಕೊಂಡಿದ್ದರು. ತಂದೆ-ಮಗನ ಬಾಂದ್ಯದ ಕಥೆ ಹೊಂದಿದ್ದ ಈ ಸಿನಿಮಾ ಸೂಪರ್ ಹಿಟ್ ಆಗುವುದರ ಜೊತೆಗೆ 2014ರಲ್ಲಿ ಬಾಕ್ಸಾಫೀಸ್‌ನಲ್ಲಿ ಅತಿಹೆಚ್ಚು ಗಳಿಕೆ ಕಂಡ ಚಿತ್ರವಾಯಿತು. ಜೊತೆಗೆ ಶತದಿನೋತ್ಸವ ಪೂರೈಸಿತ್ತು.

2017ರಲ್ಲಿ ತೆರೆಕಂಡ ಕಾಲೇಜ್ ಕುಮಾರ ವಿಕ್ಕಿ ವರುಣ್ ಹಾಗೂ ರವಿಶಂಕರ್ ಪಿ ತಂದೆ-ಮಗನಾಗಿ ಕಾಣಿಸಿಕೊಂಡಿದ್ದರು. ಈ ಸಿನಿಮಾ ಈಗಿನ ಜನರೇಷನ್‌ನ್ ಮಕ್ಕಳ ಕಥೆ ಹೊಂದಿತ್ತು. ಚಿತ್ರದಲ್ಲಿ ಅಪ್ಪ-ಅಮ್ಮನ ಆಸೆಯನ್ನ ಪೂರೈಸದ ಮಗ, ತನಗಾಗಿ ಸಕಲವನ್ನೂ ನೀಡಿದ ತಂದೆಗೆ ಸವಾಲು ಹಾಕಿ ದುಡಿಮೆಯತ್ತ ಮುಖ ಮಾಡುತ್ತಾನೆ. ಬಳಿಕ ನಮ್ಮ ಕನಸನ್ನು ನಾವೇ ಗೆಲ್ಲಬೇಕು ಎನ್ನುವ ಸತ್ಯ ತಿಳಿದ ಮಗ,  ಆನಂತರ  ಅಪ್ಪ-ಅಮ್ಮನ ಆಸೆಯನ್ನ ಯಾವ ರೀತಿಯಲ್ಲಿ ಪೂರೈಸುತ್ತಾನೆ ಎಂಬ ಕಥೆ ಸಿನಿಮಾದಲ್ಲಿದೆ.