ಈ 8 ಸಿನಿಮಾಗಳಲ್ಲಿ ಕನ್ನಡದ ಕಣ್ಮಣಿ ಅಪ್ಪು ನಟಿಸಿದ್ದರೆ ಹೇಗಿರುತ್ತಿತ್ತು ಗೊತ್ತಾ!

ಪುನೀತ್ ರಾಜ್‌ಕುಮಾರ್ ನಟಿಸಬೇಕಿದ್ದ 'ಮಯೂರ' ಸಿನಿಮಾ ಮುಹೂರ್ತವಾಗಿ ಅರ್ಧಕ್ಕೆ ನಿಂತಿತ್ತು. ತೆಲುಗು ನಿರ್ದೇಶಕ ಶೋಭನ್ ಡೈರೆಕ್ಷನ್‌ನಲ್ಲಿ ಮಯೂರ ಎಂಬ ಸಿನಿಮಾ ಶುರುವಾಗಿತ್ತು. ಟಾಲಿವುಡ್‌ನಲ್ಲಿ ಬಾಬಿ, ವರ್ಷಂ, ಚಂಟಿ ಚಿತ್ರಗಳನ್ನು ನಿರ್ದೇಶಿಸಿದ್ದ ಶೋಭನ್, ಅಪ್ಪುಗಾಗಿ ಒಂದೊಳ್ಳೆ ಕಥೆ ಮಾಡಿದ್ದರು. ಈ ಸಿನಿಮಾದಲ್ಲಿ ಅಪ್ಪು ಲಾಯರ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದರು. ಆದರೆ, ಮುಹೂರ್ತ ಮಾಡಿ ಮೂರ್ನಾಲ್ಕು ದಿನ ಚಿತ್ರೀಕರಣವಾದ ಮೇಲೆ ಶೋಭನ್ ಕೊನೆಯುಸಿರೆಳೆದರು. ಈ ಕಾರಣಕ್ಕೆ ಸಿನಿಮಾ ನಿಂತುಹೋಯಿತು.

ಯೋಗರಾಜ್ ಭಟ್ ಹಾಗೂ ಪುನೀತ್ ರಾಜ್‌ಕುಮಾರ್ ಕಾಂಬಿನೇಷನ್‌ನಲ್ಲಿ ಮೂಡಿಬಂದ 'ಪರಮಾತ್ಮ' ಸಿನಿಮಾದ ಬಗ್ಗೆ ಎಲ್ಲರಿಗೂ ಗೊತ್ತೇ ಇದೆ. ಇದಕ್ಕೂ ಮುನ್ನ 2008ರಲ್ಲಿ ಲಗೋರಿ ಎಂಬ ಸಿನಿಮಾದಲ್ಲಿ ಇಬ್ಬರು ಒಟ್ಟಿಗೆ ಕೆಲಸ ಮಾಡಬೇಕಿತ್ತು. ಈ ಚಿತ್ರ ಮಾಡಲು ಅಪ್ಪು ಹಾಗೂ ರಾಘಣ್ಣ ಕೂಡ ಒಪ್ಪಿದ್ದು, ರಾಕ್‌ಲೈನ್ ವೆಂಕಟೇಶ್ ನಿರ್ಮಾಣ ಮಾಡಲು ಮುಂದಾಗಿದ್ದರಂತೆ. ತದನಂತರದಲ್ಲಿ ಈ ಸಿನಿಮಾ ಸೆಟ್ಟೇರಲೇ ಇಲ್ಲ. 

ಸೂರಿ ಹಾಗೂ ಪುನೀತ್ ಕಾಂಬಿನೇಷನ್‌ನ ಜಾಕಿ ಹಾಗೂ ಅಣ್ಣಾಬಾಂಡ್ ಚಿತ್ರಗಳು ಸೂಪರ್ ಹಿಟ್ ಆಗಿದ್ದವು. ೨೦೧೫ರಲ್ಲಿ ಕೆಂಡಸಂಪಿಗೆ ಚಿತ್ರ ಸೂಪರ್ ಹಿಟ್ ಆದಮೇಲೆ ಸೂರಿಯವರು ಅಪ್ಪು ಜೊತೆ 'ಕಂಟ್ರಿ ಪಿಸ್ತೂಲ್' ಎಂಬ ಸಿನಿಮಾ ಮಾಡಲು ಮನಸ್ಸು ಮಾಡಿದ್ದರು. ಆದರೆ, ಕಾರಣಾಂತರಗಳಿಂದ ಆ ಸಿನಿಮಾ ಬಿಟ್ಟಿ ಅದೇ ಕಾಂಬಿನೇಷನ್‌ನಲ್ಲಿ 'ದೊಡ್ಮನೆ ಹುಡುಗ' ಸಿನಿಮಾ ತೆರೆಗೆ ಬಂತು. ನಂತರ ಕಂಟ್ರಿ ಪಿಸ್ತೂಲ್ ಸಿನಿಮಾದಲ್ಲಿ ಯಶ್ ನಟಿಸಲಿದ್ದಾರೆ ಎನ್ನಲಾಗಿತ್ತು. ಆದರೆ, ಅದು ಸಾಧ್ಯವಾಗಿರಲಿಲ್ಲ.

ಉಗ್ರಂ ಸಿನಿಮಾ ಸೂಪರ್ ಹಿಟ್ ಆದಮೇಲೆ ಪ್ರಶಾಂತ್ ನೀಲ್ ಒಂದು ಫ್ಯಾಮಿಲಿ ಸಬ್ಜೆಕ್ಟ್ ಮಾಡಿದ್ದರಂತೆ. ಈ ಸಿನಿಮಾದಲ್ಲಿ ಪುನೀತ್ ರಾಜ್‌ಕುಮಾರ್ ನಟಿಸಬೆಕಿತ್ತು. ಚಿತ್ರಕ್ಕೆ ಆಹ್ವಾನ ಎಂಬ ಟೈಟಲ್ ಫಿಕ್ಸ್ ಮಾಡಲಾಗಿತ್ತು. ಈ ಸಿನಿಮಾಗೆ ಅಪ್ಪು ಕೂಡ ಒಕೆ ಎಂದಿದ್ದರಂತೆ. ಆದರೆ, ಪುನೀತ್ ಸಿಕ್ಕಾಪಟ್ಟೆ ಬ್ಯುಸಿಯಿದ್ದ ಕಾರಣ ಡೇಟ್ ಸಿಗದೇ, ಆ ಸಿನಿಮಾ ಕೈಬಿಟ್ಟು ನೀಲ್ ಕೆಜಿಎಫ್ ಪ್ರಾಜೆಕ್ಟ್ ಕೈಗೆತ್ತಿಕೊಂಡಿದ್ದರು. 

ರಿಷಬ್ ಶೆಟ್ಟಿ ನಿರ್ದೇಶಿಸಿ, ನಟಿಸಿರುವ 'ಕಾಂತಾರ' ಸಿನಿಮಾ ಬಹಳ ದೊಡ್ಡಮಟ್ಟದಲ್ಲಿ ಸದ್ದು ಮಾಡಿತ್ತು. ಕನ್ನಡ ವರ್ಷನ್‌ನಿಂದಲೇ ವಿಶ್ವಾದ್ಯಂತ ಸಿನಿಪ್ರಿಯರ ಪ್ರೀತಿಯನ್ನು ಸಂಪಾದಿಸಿತ್ತು. ಆದರೆ, ಈ ಚಿತ್ರದಲ್ಲಿ ರಿಷಭ್ ಬದಲು ಪುನೀತ್ ರಾಜ್‌ಕುಮಾರ್ ನಟಿಸಬೇಕಿತ್ತಂತೆ. ಈ ವಿಷಯವನ್ನು ಹೊಂಬಾಳೆ ಸಂಸ್ಥೆಯ ಕಾರ್ಯನಿರ್ವಾಹಕ ನಿರ್ಮಾಪಕ ಕಾರ್ತಿಕ್ ತಿಳಿಸಿದ್ದರು. ಆದರೆ, ಡೇಟ್ಸ್ ಹೊಂದಾಣಿಕೆ ಆಗದ ಕಾರಣ ಅಪ್ಪು ಸಿನಿಮಾದಿಂದ ಹಿಂದೆ ಸರಿದಿದ್ದರಂತೆ. 

ದಿನಕರ್ ತೂಗುದೀಪ್, ಹೆಬ್ಬುಲಿ ಖ್ಯಾತಿಯ ಎಸ್‌. ಕೃಷ್ಣ ಹಾಗೂ ಪವನ್ ಕುಮಾರ್ ನಿರ್ದೇಶನದ 'ದ್ವಿತ್ವ' ಸಿನಿಮಾಗಳಲ್ಲಿ ಅಪ್ಪು ನಟಿಸ್ಬೇಕಿತ್ತು. ಈ ಬಗ್ಗೆ ಮಾತುಕತೆ ಮುಗಿದಿತ್ತು. 'ದ್ವಿತ್ವ' ಚಿತ್ರದ ಥೀಮ್ ಪೋಸ್ಟರ್ ಸಹ ರಿಲೀಸ್ ಆಗಿತ್ತು. ಹೊಂಬಾಳೆ ಸಂಸ್ಥೆಯ ಈ ಚಿತ್ರದ ಮುಹೂರ್ತ ಮಾಡಲು ತಯಾರಿ ನಡೆದಿತ್ತು. ಆದರೆ ಅಷ್ಟರಲ್ಲೇ ಅಪ್ಪು ಬಾರದ ಲೋಕಕ್ಕೆ ಹೊರಟುಬಿಟ್ಟರು.